Eki Waaba Nookimanya?

Ahabw’enki abashuubuzi abaabaire nibaguriza ebintu omu hekalu ya Yerusaalemu Yesu yaabeetsire ‘abambuzi’?

OMU Ngiri ya Matayo nitushoma tuti: ‘Yesu yaataaha omuri hekalu ya Ruhanga, yaagibingamu boona abaabaire nibatunda, n’abaabaire nibagura, yaajumika emeeza z’abarikuhiinganisa empiiha, n’ebitebe by’abaabaire nibatunda enkombe; yaabagira ati: Kikahandiikwa ngu, Enju yangye eryayetwa enju y’okushabiramu; mbwenu imwe mugihindwire nk’enyanga y’abambuzi.’​—Matayo 21:12, 13.

Ebyafaayo nibyoreka ngu abaabaire nibatunda ebintu omu hekalu bakaba baatwariza kubi abaabaire baija kugura barikubashaba esente nyingi munonga. Nk’eky’okureeberaho, enkombe butoosha zikaba nizigurwa esente nkye kugira ngu abooro babaase kuzigura kuzihayo nk’ebitambo. Kwonka, ebihandiiko by’Abayudaaya ebya ira nibyoreka ngu omu kyasha ky’okubanza hariho obu omuntu yaabaire aine kushashura edenaari y’ezaabu kugura enkombe ibiri. Kikaba kitwara ebiro nka 25 omukozi kutunga esente ezo. Enkombe zikaba nizigura esente nyingi omu bwire obwo kugira ngu n’abooro bakaba batakizibaasa. (Abaleevi 1:14; 5:7; 12:6-8) Rabi Simeon ben Gamaliel akagira ekiniga kingi ahabw’enshonga egi yaatuubya aha mubaro gw’ebitambo ebi Abayudaaya baabaire baine kuhayo. Ahonaaho, omuhendo gw’okugura enkombe ibiri gukatuuba gwahika ahari kimwe kya igana ky’edenaari y’ezaabu.

Nk’oku turikureeba, abashuubuzi omu hekalu bakaba baine omururu, kandi bakaba nibanyomooza abaija kugura. Niyo nshonga ahabw’enki Yesu yaabaire naabaasa kubeeta ‘abambuzi.’