Yesu Okuriisa Abantu Baingi

Entumwa zikagaruka zirikuruga kubuurira harikuburayo obwire bukye bakakuza Okuhingurwaho omuri 32 Y.A.K. Bakaba baruhire, n’ahabw’ekyo Yesu akabatwara omu bwato kuza Besesaida, ahu baabaire nibaza kuhuumurira. Kwonka obwato ku bwabaire buri haihi kuhika aha nkungu, Yesu akareeba abantu baingi abaabakuratiireyo. N’obu Yesu araabe yaabaire naayenda kuba n’entumwa ze bonka, akaakiira abantu n’embabazi. Akatambira abarwaire baabo boona kandi yaatandika kubeegyesa. Eizooba ryona, Yesu akabeegyesa aha Bukama bwa Ruhanga. Omu mwabazyo, entumwa ze zikamugira ziti: ‘Abantu bashemereire kuba baine enjara. Boohereze bagyende kusherura eby’okurya.’

Yesu akabagira ati: ‘Batagyenda. Mubahe eby’okurya.’ Entumwa bakabuuza bati: ‘Nooyenda ngu tugyende kubagurira emigaati?’ Filipo, omwe aha ntumwa, akagira ati: ‘N’obu twakuba twine esente nyingi, titurikubaasa kugura emigaati y’okuriisa abantu baingi aba.’

Yesu akababuuza ati: ‘Twine eby’okurya birikwingana ki?’ Anderea akamugarukamu ati: ‘Twine emigaati etaano n’eby’enyanja bibiri. Buzima tibirikumara.’ Yesu akabagira ati: ‘Mu bindeetere.’ Akagambira abantu kushutama omu guruupu z’abantu 50 na 100. Yesu akakwata emigaati n’eby’enyanja, yaareeba aha iguru, yaashaba. Bwanyima eby’okurya akabiha entumwa ze, kandi bakatandika kugaburira abantu. Abashaija 5,000 n’abakazi n’abaana boona bakarya baaba gye. Bwanyima, entumwa bakatorotoora oburagarikira obwatsigaireho bwona, kugira ngu hatagira ebyasiisikara. Haakatsigaraho ebitenga ikumi na bibiri biijwire. Ekyo buzima kikaba kiri eky’okutangaaza.

Abantu bakashemererwa munonga baayenda kuhindura Yesu omugabe waabo. Kwonka Yesu akaba naamanya ngu obwire bwa Yehova obw’okumuhindura omugabe bukaba butakahikire. Bwanyima Yesu akaikiriza abantu kugyenda kandi yaagambira entumwa ze kuza kubuurira seeri y’Enyanja ya Galilaaya. Bakaza omu bwato, kandi Yesu akaza omu rushozi wenka. Ahabw’enki? Ahabw’okuba akaba naayenda kushaba Ishe. N’obu Yesu yaabaire aba aine bingi by’okukora, butoosha akaba agira obwire bw’okushaba.