Ekiihuro kya Mukama Waitu

Abayudaaya bakaba bakuza Okuhingurwaho buri mwaka ahari Nisani 14. Eki kikaba kibaijutsya oku Yehova yaabaihire omu buhuuku Misri kandi akabatwara omu Nsi Eyaraganisiibwe. Omu 33 Y.A.K., Yesu n’entumwa ze bakakuza Okuhingurwaho omu kishengye eky’ahaiguru omuri Yerusaalemu. Ku baaherize kurya, Yesu akagira ati: ‘Omwe ahariimwe naaza kundeebya.’ Entumwa bakatangaara, kandi baabuuza Yesu bati: ‘N’oha?’ Yesu akabagarukamu ati: ‘N’ou ndahe omugaati ogu.’ Bwanyima akaha Yuda Iskaryota ekicweka ky’omugaati. Ahonaaho, Yuda akaimuka yaaruga omu kishengye.

Bwanyima Yesu akashaba, yabega omugaati, kandi yaaguha entumwa ze 11 ezaatsigaireho. Akabagira ati: ‘Murye omugaati ogu. Nigujwekyera omubiri gwangye, ogu ndaheyo ahabwanyu.’ Bwanyima akashabira viinyo kandi yaagiha entumwa ze. Akagira ati: ‘Munywe viinyo egi. Neejwekyera eshagama yangye, ei ndaheyo kugira ngu ebibi byanyu bibaase kusaasirwa. Nindaganisa ngu nimwija kuba abategyeki naanye omu iguru. Mugume nimukora eki buri mwaka okunyijuka.’ Abakuratsi ba Yesu buri mwaka nibeeteeranira hamwe kwijuka ekiro ekyo. Ekiro ekyo hati nikyetwa Ekiihuro kya Mukama Waitu.

Entumwa ku zaaherize kurya, zikagira empaka aha waabaire ari mukuru omuribo. Kwonka Yesu akabagira ati: ‘Omukuru omuriimwe n’ogwo orikwetwara nk’omuto; kandi akaheereza abandi.’

‘Imwe muri banywani bangye. Nimbagambira byona ebi Tata arikwenda ngu mbagambire. Juba ninza owa Tata. Nimwija kuguma aha, kandi abantu nibaija kumanya ngu muri abeegi bangye mwaguma nimukundana. Mukundane nk’oku naabakunzire.’

Aha muheru, Yesu akashaba Yehova kurinda abeegi be boona. Akashaba Yehova kubahwera kukora kumwe omu busingye. Akashaba ngu eiziina Yehova ryezibwe. Bwanyima Yesu n’entumwa ze bakeeshongora eby’okuhimbisa Yehova kandi baashohora. Obwire bukaba buri haihi kuhika Yesu akakwatwa.