“Mugume Mukore Muti Okuunyijukiraho”

1, 2. Entumwa baine kuba baabaire nibateekateeka ki obu Yesu yaabaire naaza Yerusaalemu?

‘EIGURU tiririmu bicu, nitubaasa kureeba oruhembe rw’okwezi. Omwabazyo oguhingwire abarinzi omuri Yerusaalemu baine kuba bareebire okwezi kurikutandika kuboneka. Ab’omu ishengyero ku bakimanyire, baaranga okutandika kwa Nisani. Obutumwa bubugire hoona bwahika n’aha. Yesu naayenda kuza Yerusaalemu kugira ngu ahikyeyo ekiro ky’Okuhingurwaho kitakahikire.’

² Abaabaire bari na Yesu omuri Perea (haihi na Yorudaani) obu yaabaire naaza Yerusaalemu, nibabaasa kuba nibyo baabaire nibateekateeka. (Mat. 19:1; 20:17, 29; Mak. 10:1, 32, 46) Bwanyima y’Abayudaaya kumanya obu Nisani 1 byahika, bakaba baine kutegyereza hakahinguraho ebiro 13 reero bakakuza Okuhingurwaho Nisan 14 eizooba ryaheza kurenga.

3. Ahabw’enki Abakristaayo nibafayo kumanya ebiro ebihikire Eby’Okuhingurwaho?

³ Ebiro by’Ekiijutsyo, ebirikuhikaana n’ebiro by’Okuhingurwaho, nibiija kuhika izooba ryaheza kurenga Okwakana 14, 2014. Izooba eryo niriija kuba ery’omutaano aha Bakristaayo ab’amazima n’ahari abo abarikwenda kumanya amazima. Ahabw’enki? N’ahabw’ebigambo ebiri omu 1 Abakorinso 11:23-25 ebirikugira ngu: “Yesu, aha kiro eki baamureebeizeho, akakwata omugaati; ku yaaherize kusiima, yaagubega, yaagira ati: Ogu nigwo mubiri gwangye oguheebwayo ahabwanyu; mugume mukore muti okuunyijukiraho. Ku baaherize kurya, yaakwata atyo n’ekikopo.”

4. (a) Ni bibuuzo ki ebi orikubaasa kwebuuza aha bikwatiraine n’Ekiijutsyo? (b) Ebiro by’Ekiijutsyo nibimanywa bita buri mwaka? (Reeba akabokisi “Ekiijutsyo Ekya 2014.”)

⁴ Hatariho kubanganisa, noija kuba oriho aha kiro eki Yesu yaagambiire abakuratsi be kuguma nibaijuka buri mwaka. Ekiro ekyo kitakahikire noobaasa kwebuuza oti: ‘Nshemereire kutebeekanisiza nta omwabazyo ogwo? Ni bintu ki ebiraakoresibwe? Omukoro ogwo nigwija kukorwa guta? Kandi omukoro ogwo n’ebiraakoresibwe binyiniire makuru ki?’

OMUGAATI NA VIINYO

5. Okuhingurwaho oku Yesu yaagizire n’entumwa ze kukatebeekanisibwa kuta?

⁵ Yesu ku yaagambiire entumwa kuza kutebeekanisa ekishengye ngu babaase kugiriramu Okuhingurwaho, tarabagambiire ngu bakihuunde; kureka akaba naayenda ngu batungye omwanya ogwabaire nigumara abo boona abaabaire beetsirwe. (Shoma Mako 14:12-16.) Bakaba baine kutebeekanisa ebyabaire nibiija kukoresibwa, otwariiremu omugaati ogutatumbisiibwe na viinyo erikutukura. Bwanyima y’Okuhingurwaho, Yesu akatandikaho ogundi mukoro arikukoresa omugaati na viinyo.

6. (a) Bwanyima y’Okuhingurwaho, Yesu akagamba ki aha mugaati? (b) Ni mugaati ki ogurikukoresibwa aha Kiijutsyo?

⁶ Entumwa Matayo akaba ariho aha Kuhingurwaho okwo kandi bwanyima akahandiika ati: “Yesu yaakwata omugaati, yaagusiimira, yaagubega, yaaguheereza abeegi be naagira ati: Mwakiire, murye.” (Mat. 26:26) “Omugaati” gukaba gutatumbisiibwe, nk’ogu baabaire nibakoresa aha Kuhingurwaho. (Kur. 12:8; Bir. 16:3) Omugaati gukaba nigukorwa omu ngano n’amaizi, gutarimu kitumbisa nari omwonyo. Ahabw’okugira ngu gukaba gutarimu kitumbisa, gukaba gutarikubaasa kutumba. Gukaabaire gutarimu kintu kyona, gwomire, kandi gworobi kucwanyagura. Obunaku obu, Ekiijutsyo kitakahikire, abareeberezi nibabaasa kushaba omuntu kukora omugaati nk’ogwo omu ngano n’amaizi, kwonka ahu araaguteekyere asiigyeho kaabuto kakye. (Engano yaaba etarikubaasa kuboneka, nigubaasa kukorwa omu saano y’omuceeri, ey’ebicoori, ey’omugusha nari ey’oburo.) Nari matzoth ey’Ekiyudaaya neebaasa kukoresibwa, ogu n’omugaati ogurikuba kutarimu malt, amahuri, nari obutunguru.

7. Yesu akagamba aha viinyo ya muringo ki, kandi n’eha ei turikubaasa kukoresa aha Kiijutsyo obunaku obu?

⁷ Matayo akagumizamu ati: “[Yesu] yaakwata ekikopo; ku yaaherize kusiima, yaakibaha naagira ati: Munyweho mwena.” (Mat. 26:27, 28) Eki Yesu yaakwatsire kikaba kiri ekikopo ekirimu viinyo. (Ekaba etari shande y’Emizaabibu, ahabw’okuba ishaaruura ry’Emizaabibu rikaba ryahingwire.) Viinyo terakoresiibwe aha kihuuro ky’okubanza omuri Misri, kwonka Yesu taragizire ngu etakoresibwa aha Kuhingurwaho oku yaagizire n’entumwa ze. Akagikoresa n’aha Kiihuro kya Mukama waitu. N’ahabw’ekyo, Abakristaayo nabo nibakoresa viinyo aha Kiijutsyo. Viinyo erikukoresibwa aha Kiijutsyo tihaine kintu kyona ekishemereire kwongyerwamu nka shukaari. Eshagama ya Yesu ekaba etarikwetengyesa kugira ekyayongyerwamu kugihindura ey’omuhendo. N’ahabw’ekyo, viinyo erikutukura niyo erikukoresibwa. Neebaasa kuba ekoreirwe omuka, nari ezo ezirikugurwa omu maduuka nka Beaujolais, Burgundy, nari Chianti.

EKI OMUGAATI NA VIINYO BIRIKUMANYISA

8. Ahabw’enki Abakristaayo nibafayo aha makuru g’omugaati na viinyo?

⁸ Entumwa Paulo akakyoreka butunu ngu oyihireho entumwa, Abakristaayo boona bakaba baine kuguma nibabaho aha Kiijutsyo. Akahandiikira Abakristaayo b’omuri Korinso ati: “Eki naahairwe Mukama, nikyo naabahaire naimwe, ngu Mukama waitu Yesu, aha kiro eki baamureebeizeho, akakwata omugaati; ku yaaherize kusiima, yaagubega, yaagira ati: Ogu nigwo mubiri gwangye oguheebwayo ahabwanyu; mugume mukore muti okuunyijukiraho.” (1 Kor. 11:24) Nikyo kimwe n’Abakristaayo obunaku obu, nibaijuka omukoro ogwo ogw’omutaano buri mwaka kandi nibafayo aha makuru g’omugaati na viinyo.

9. Abamwe baine miteekateekyere ki etahikire aha mugaati ogu Yesu yaakoreise?

⁹ Ab’amakanisa agamwe nibagira ngu Yesu akagira ati: ‘Ogu n’omubiri gwangye,’ n’ahabw’ekyo nibaikiriza ngu omugaati gukahinduka gwaba omubiri gwa Yesu. Kwonka, eki nikitaana n’amazima.a Yesu akaba ari aho omu maisho g’entumwa kandi n’omugaati ogutatumbisiibwe gukaba guriho ogu baabaire nibaza kurya. N’ahabw’ekyo, Yesu akaba naagamba omu muringo gw’akamanyiso nk’oku yaabaire akora emirundi mingi.​—Yoh. 2:19-21; 4:13, 14; 10:7; 15:1.

10. Omugaati ogurikukoresibwa aha Kiijutsyo nigujwekyera ki?

¹⁰ Omugaati ogu entumwa baabaire nibareeba kandi barikuza kurya, gukaba nigujwekyera omubiri gwa Yesu. Ni mubiri ki? Abaheereza ba Ruhanga bakaba nibateekateeka ngu omugaati gukaba nigujwekyera ekibiina ky’abashukirweho amajuta, abu Baibuli erikweta “omubiri gwa Kristo.” Bakaba nibaikiriza batyo ahabw’okuba Yesu omugaati akaguhendamu ebicweka baingi kwonka amagufa ge gakaba gatahenzirwe. (Efe. 4:12; Rom. 12:4, 5; 1 Kor. 10:16, 17; 12:27) Kwonka, bwanyima y’okucondooza kikamanywa ngu omugaati gukaba nigujwekyera omubiri gwa Yesu gwenyine. Yesu ‘akabonabonesibwa omu mubiri,’ kandi yaahanikwa aha muti. Yesu akekorera “ebibi byaitu omu mubiri gwe”, n’ahabw’ekyo aha Kiijutsyo, omugaati nigujwekyera omubiri gwe.​—1 Pet. 2:21-24; 4:1; Yoh. 19:33-36; Heb. 10:5-7.

11, 12. (a) Yesu akagamba ki aha viinyo? (b) Viinyo erikukoresibwa aha Kiijutsyo neejwekyera ki?

¹¹ Ekyo nikituhwera kwetegyereza ebyagambirwe aha viinyo. Nitushoma tuti: “Ku baaherize kurya, yaakwata atyo n’ekikopo, yaagira ati: Ekikopo eki niyo ndagaano nsya omu shagama yangye.” (1 Kor. 11:25) Mbwenu shi ekikopo eki Yesu yaabaire akwitse niyo yaabaire eri endagaano nsya? Ngaaha. Ekigambo “ekikopo” kikaba nikimanyisa viinyo eyaabaire eri omu kikopo. Yesu akagira ngu viinyo ekaba neejwekyera ki? Eshagama ye eyaasheeshekire.

¹² Omu ngiri ya Mako, nitushangamu ebigambo bya Yesu ebi: “Egi n’eshagama yangye ey’endagaano, esheesheka ahabwa baingi.” (Mak. 14:24) Buzima, eshagama ya Yesu ekaba neija kusheesheka “ahabwa baingi, ngu basaasirwe ebibi.” (Mat. 26:28) N’ahabw’ekyo, viinyo erikutukura neejwekyera gye eshagama ya Yesu. Ahabw’eshagama egyo, nitubaasa kugasirwa omu kitambo, kandi tusaasirwe “eby’okushiisha byaitu.”​—Shoma Abaefeso 1:7.

OKWIJUKA OKUFA KWA YESU

13. Ekiijutsyo nikitebeekanisibwa kita buri mwaka?

¹³ Gwaba nigwija kuba guri omurundi gwawe gw’okubanza kuza aha Kiijutsyo, niki eki orikuteekateeka ngu noija kureeba? Ekiijutsyo nikiija kuba omu mwanya ogucumirwe gye, kandi buri muntu naija kubaasa kushutama gye agasirwe. Nitubaasa kukoresa ebimuri kuhunda omwanya, kwonka titushemereire kurengyesereza. Omureeberezi otoorainwe naija kuha orubazo arikushoboorora gye Ebyahandiikirwe kworeka eki Baibuli erikugamba aha Kiijutsyo. Naija kuhwera buri omwe kusiima eki Yesu yaatukoreire. Akatufeera arikuhayo amagara ge nk’ekitambo ngu tugume tuhuriire. (Shoma Abarooma 5:8-10.) Omugambi naija kushoboorora aha matsiko g’emirundi ebiri agu Abakristaayo baine nk’oku kirikworeka omu Baibuli.

14. Aha Kiijutsyo, ni matsiko ki agaraagambweho?

¹⁴ Amatsiko ag’okubanza n’aga bakye aha bakuratsi ba Yesu abaraategyeke nawe omu iguru, nk’entumwa za Yesu abaagumire bari abeesigwa. (Luk. 12:32; 22:19, 20; Kush. 14:1) Amatsiko agandi n’ag’Abakristaayo abarikuheereza Ruhanga n’obwesigwa obunaku obu. Nibaija kutuura omu nsi omu paradiso ebiro byona. Obwo nibwo ebi akunda birikorwa omu nsi nk’oku bikorwa omu iguru, eki Abakristaayo batwire nibashaba. (Mat. 6:10) Ebyahandiikirwe nibyoreka embeera nungi ezi barituuramu bashemereirwe ebiro byona.​—Isa. 11:6-9; 35:5, 6; 65:21-23.

15, 16. Omugaati ogutarimu kitumbisa, nigwija kukoresibwa guta aha Kiijutsyo?

¹⁵ Omugambi yaaba ari haihi kuhendera orubazo, naija kworeka ngu eshaaha zaahika okukora eki Yesu yaagambiire entumwa ze kuguma nibakora. Nk’oku kyaba kyagambirwe, viinyo erikutukura n’omugaati ogutatumbisiibwe nibyo biraakoresibwe. Ebi nibiija kuba biri aha meeza haihi n’omugambi. Naija kushoma Ekyahandiikirwe ekirikworeka ebi Yesu yaagambire n’ebi yaakozire arikutandikaho omukoro ogwo. Nk’eky’okureeberaho, omu Matayo nitushangamu ebigambo ebi: “Yesu yaakwata omugaati, yaagusiimira, yaagubega, yaaguheereza abeegi be naagira ati: Mwakiire, murye; ogu nigwo mubiri gwangye.” (Mat. 26:26) Yesu akabega omugaati agutarimu kitumbisa arikwenda kuguha entumwa zoona abu yaabaire aine. Okwakana 14 aha Kiijutsyo noija kureeba omugaati ogutarimu kitumbisa guhenzirwemu kandi guteirwe aha esohaani.

¹⁶ Nihaija kuba hariho esohaani ezirikumara kugira ngu babaase kurabyamu omugaati omu bwire bukye kandi omu muringo ogutebeekanisiibwe gye. Eki tikiraakorwe nk’omugyenzo kureka nk’oku kishemereire kukorwa mu buri kicweka. Ow’eishe-emwe naija kushaba omu bugufu, kandi bwanyima barabyemu omugaati omu buteeka omu muringo ogurikuhikaana n’ekicweka. Bakye nibo baraarye aha mugaati nari tihaine n’omwe oraaryeho, nk’oku kyabaire omu 2013.

17. Aha Kiijutsyo, nitwija kukuratira tuta obuhabuzi bwa Yesu oburikukwata aha viinyo?

¹⁷ Bwanyima, omugambi naija kugamba n’aha biri omu Matayo ebirikugira ngu: “[Yesu] yaakwata ekikopo; ku yaaherize kusiima, yaakibaha naagira ati: Munyweho mwena; ahakuba egi n’eshagama yangye ey’endagaano ensya, esheesheka ahabwa baingi, ngu basaasirwe ebibi.” (Mat. 26:27, 28) Ow’eishe-emwe ondiijo naija kushaba reero barabyemu ‘ekikopo’ kya viinyo erikutukura.

18. N’obu abandi baraabe batarikunywa viinyo n’okurya aha mugaati, ahabw’enki ni kikuru kubaho aha Kiijutsyo?

¹⁸ Baingi abarikuba baizire aha Kiijutsyo tibarikurya aha mugaati n’okunywa ahari viinyo ahabw’okuba Yesu akooreka ngu abo bonka abaraategyeke nawe omu iguru nibo baine kurya aha mugaati bakanywa n’ahari viinyo. (Shoma Luka 22:28-30; 2 Tim. 4:18) N’obu abandi batarikunywa viinyo n’okurya aha mugaati nibaija kubaho aha Kiijutsyo. Okubaho aha Kiijutsyo ni kikuru, ahabw’okuba nikyoreka ngu nibatwara ekitambo kya Yesu nk’eky’omuhendo. Baaba bari aha Kiijutsyo, nibabaasa kuteekateeka aha migisha ei barikubaasa kutunga ahabw’ekitambo kya Yesu. Baine amatsiko g’okuba bamwe aha ‘mutwe muhango gw’abantu’ abaraahonokeho omu “kubonabona kwingi.” Ahabw’okwikiririza omu kitambo kya Yesu “bakoozya ebijwaro byabo omu shagama y’Omwana gw’entaama,” byayera.​—Kush. 7:9, 14-17.

19. Noobaasa kutebeekanisa ota kubaasa kugasirwa omu Kiijutsyo?

¹⁹ Abajurizi ba Yehova omu nsi yoona nibatebeekanisiza oruteerane orwo orw’omutaano. Ekiijutsyo kitakahikire, nitwija kuba nitweta abantu kubaho. Kandi, nitwija kuba nitushoma aha bi Yesu yaakozire n’ebyabaireho harikuburayo ebiro bikye kuhika aha mukoro gw’Ekiijutsyo omu gwa 33. Nitwija kuba twetebeekaniise kubaasa kubaho aha Kiijutsyo. Ni kirungi kuhikayo kare batakatandikire kweshongora n’okushaba, kugira ngu tubaase kwakiira abagyenyi kandi tugasirwe omu ntebeekanisa yoona. Ab’omu kibiina n’abagyenyi, nibaija kugasirwa munonga baaba nibakuratira omu Baibuli zaabo, orubazo rwaba niruheebwa. Ekikuru munonga, okubaho aha Kiijutsyo nikyoreka ngu nitusiima ekitambo kya Yesu kandi nikiija kworeka ngu nitukuratira ekiragiro kye eki: “Mugume mukore muti okuunyijukiraho.”​—1 Kor. 11:24.