Ekirikutureetera Kwijuka Ekiihuro kya Mukama Waitu

1, 2. Yesu akakora ki ahari Nisani 14, omu gwa 33? (Reeba ekishushani aha kutandika.)

OMURI Yerusaalemu, aha kiro kya Nisani 14 omu gwa 33, okwezi kwona kukaba nikureebwa. Yesu hamwe n’entumwa ze bakaba baaheza kukuza Okuhingurwaho, barikwijuka okucungurwa kw’Abaisraeli kuruga omu buhuuku omuri Misri ebyasha 15 enyima. Yesu ari n’entumwa ze 11 abeesigwa, akatandikaho omukoro gw’omutaano ogu baabaire nibaija kuguma nibakora buri mwaka kwijuka okufa kwe.a​—Mat. 26:1, 2.

² Yesu ku yaaherize kushaba akarabya omugaati omu ntumwa ze, arikugira ati: “Mwakiire, murye.” Akakwata n’ekikopo kya viinyo yaashaba, reero yaabagira ati: “Munyweho mwena.” (Mat. 26:26, 27) Yesu akaba atarikwija kubaha kindi ky’okurya, kwonka akaba aine bingi by’okubagambira omu kiro ekyo.

3. Omu kicweka eki nituza kugarukamu bibuuzo ki?

³ Yesu niwe yaatandikireho omukoro gw’okwijuka okufa kwe, ogurikwetwa ‘eby’okurya bya Mukama waitu’ nari Ekiihuro kya Mukama Waitu. (1 Kor. 11:20) Aha nshonga egi, abamwe nibabaasa kwebuuza: Ahabw’enki twine kwijuka okufa kwa Yesu? Omugaati na viinyo biine makuru ki? Nitubaasa kwetebeekanisiza tuta Ekiijutsyo? Ni baahi abaine kurya aha mugaati kandi bakanywa n’ahari viinyo? Kandi Abakristaayo nibatwara bata eki Ebyahandiikirwe birikugamba aha matsiko gaabo?

EKIRIKUTUREETERA KWIJUKA OKUFA KWA YESU

4. Okufa kwa Yesu kukatubaasisa kutunga ki?

⁴ Ahabw’okugira ngu turi baijukuru ba Adamu, tukahungura ekibi n’okufa. (Rom. 5:12) Tihariho muntu otahikiriire orikubaasa kwehayo ahari Ruhanga nk’ekitambo ky’okwecungura nari kucungura abandi. (Zab. 49:6-9) Kwonka Yesu akahayo amagara ge agahikiriire ahabwaitu, yaahayo n’omuhendo gw’ekitambo kye ahari Ruhanga. N’ahabw’ekyo, Yesu akatubaasisa kucungurwa kuruga omu kibi n’okufa, reero twatunga amatsiko g’amagara agatahwaho.​—Rom. 6:23; 1 Kor. 15:21, 22.

5. (a) Nitumanya tuta ngu Ruhanga na Kristo nibakunda abantu? (b) Ahabw’enki twine kubaho aha kwijuka okufa kwa Yesu?

⁵ Ruhanga okuhayo ekitambo kya Yesu n’obuhame ngu naakunda abantu. (Yoh. 3:16) Yesu okwehayo kutufeera nikihamya ngu nawe naatukunda. N’obu yaabaire atakaizire omu nsi nk’omuntu, akaba ari omu iguru ‘nk’omukozi mukuru’ wa Ruhanga, kandi akaba ‘naashemererwa kuguma n’abantu.’ (Enf. 8:30, 31) Okusiima eki Ruhanga n’Omwana we baatukoreire kishemereire kutuhiga kubaho aha kwijuka okufa kwa Yesu, ekiraayorekye ngu nitworobera ekiragiro eki: “Mugume mukore muti okuunyijukiraho.”​—1 Kor. 11:23-25.

EKI OMUGAATI NA VIINYO BIRIKUMANYISA

6. Twine kwetegyereza tuta omugaati na viinyo ebirikukoresibwa aha Kiijutsyo?

⁶ Obu Yesu yaabaire naatandikaho Ekiijutsyo, tarahindwire omugaati na viinyo omubiri gwe n’eshagama ye omu muringo gw’eky’okutangaaza. Omu mwanya gw’ekyo, akagamba aha mugaati ati: “Ogu nigwo mubiri gwangye.” Aha bikwatiraine na viinyo, akagira ati: “Egi n’eshagama yangye ey’endagaano, esheesheka ahabwa baingi.” (Mak. 14:22-24) N’ahabw’ekyo, omugaati na viinyo bikaba biine kureebwa nk’obumanyiso oburikujwekyera omubiri gwa Yesu n’eshagama ye.

7. Omugaati ogurikukoresibwa aha Kiijutsyo nigujwekyera ki?

⁷ Aha mukoro mukuru ogwabaireho omuri 33, Yesu akakoresa omugaati ogutatumbisiibwe agwabaire gutsigaireho aha Kuhingurwaho. (Kur. 12:8) Omu Byahandiikirwe, ekitumbisa obumwe nikijwekyera akamogo nari ekibi. (Mat. 16:6, 11, 12; Luk. 12:1) N’ahabw’ekyo, Yesu okukoresa omugaati ogutatumbisiibwe kikaba kiri kikuru ahakuba gukaba nigujwekyera gye omubiri gwe oguhikiriire. (Heb. 7:26) Omugaati ogw’omuringo nk’ogwo nigwo gurikukoresibwa aha Kiijutsyo.

8. Viinyo erikukoresibwa aha Kiijutsyo neejwekyera ki?

⁸ Viinyo ei Yesu yaakoreise ahari Nisani 14, 33, neejwekyera eshagama ye, kandi nikyo kimwe na viinyo ei turikukoresa aha Kiijutsyo obunaku obu. Ahari Gologosa, aheeru ya Yerusaalemu, eshagama ye ekasheesheka kugira ngu abantu “basaasirwe ebibi.” (Mat. 26:28; 27:33) Ahabw’okugira ngu omugaati na viinyo ebirikukoresibwa aha Kiijutsyo nibijwekyera ekitambo kya Yesu eky’omuhendo ekyahairweyo ahabw’abantu abeesigwa, nikiba kihikire buri omwe kworeka okusiima kwe arikutebeekanisa kubaho aha Kiihuro kya Mukama Waitu.

OKU TURIKUBAASA KUTEBEEKANISA

9. (a) Ahabw’enki ni kikuru kushoma Ebyahandiikirwe ebirikukwata aha Kiijutsyo? (b) Nootwara ota ekitambo?

⁹ Twaguma nitushoma Ebyahandiikirwe ebirikukwata aha Kiijutsyo ebiri aha kalenda n’omu katabo Examining the Scriptures Daily, nitubaasa kuteekateeka munonga aha ki Yesu yaakozire atakafiire. Ekirikurugamu, nitubaasa kutebeekanisa omutima gwaitu ahabw’Ekiihuro kya Mukama Waitu.b Munyaanyazi-itwe omwe akahandiika ati: “Ekiijutsyo nituba tukiniire ekihika. Buri mwaka nikiba kiri eky’omutaano. Niinyijuka nyemereire omu nju aha rufu rwa tata . . . ndikureeba tata ou naabaire ninkunda munonga kandi omu mutima ndikusiima ekitambo. . . . Nkaba nimmanya ebyahandiikirwe kandi ndikumanya kubishoboorora! Kwonka ku naabaire ngira obusaasi oburikureetwa okufeerwa, nibwo naabaire ntandika kugira okushemererwa ahabw’eki ekitambo ekyo eky’omuhendo kirikwija kubaasisa kubaho ahabwaitu.” Buzima, twaba nitutebeekanisiza Ekiijutsyo, ni kikuru kuteekateeka aha ku ekitambo kya Yesu kirikutucungura omu busaasi bw’ekibi n’okufa.

10. Okutebeekanisiza Ekiijutsyo nikubaasa kukwata kuta aha kubuurira kwaitu?

¹⁰ Okutebeekanisiza Ekiijutsyo nikibaasa kutwariramu okwongyera aha kubuurira kwaitu, obundi turikuba baapayoniya abahwezi omu bwire bw’Ekiijutsyo. Twaba nitweta abeegi baitu ba Baibuli n’abandi kwija aha Kiihuro kya Mukama Waitu, nitutunga okushemererwa ahabw’okugamba ahari Yehova, Omwana we, n’emigisha ebiikiirwe abo abarikushemeza Yehova kandi bakamuhimbisa.​—Zab. 148:12, 13.

11. Abakorinso abamwe bakarya kandi banywa bata aha bumanyiso omu muringo ogutahikire?

¹¹ Waaba nooyetebeekanisiza Ekiihuro kya Mukama Waitu, teekateeka aha ki entumwa Paulo yaahandiikiire Abakristaayo b’omu kibiina kya Korinso. (Shoma 1 Abakorinso 11:27-34.) Paulo akagira ngu omuntu weena orikurya aha mugaati kandi akanywa n’aha kikopo atashemereire kukikora, “aryagira orubanja rw’okucumura aha mubiri n’eshagama ebya Mukama,” waitu Yesu Kristo. N’ahabw’ekyo oshukirweho amajuta aine ‘kweshwijuma’ kureeba yaaba ashemeire, reero bwanyima akabona kurya aha mugaati n’okunywa aha viinyo. Kitari ekyo, naaba “naayeriira kandi naayenywera orubanja.” Abakorinso baingi ahabw’okutwaza kubi bakagira “amagara mabi n’okurwara” nangwa n’abamwe baagwejegyera omu kufa okw’eby’omwoyo. Abamwe nibabaasa kuba baariire kandi bakanywa munonga, Ekiijutsyo kitakahikire nari aha Kiijutsyo, reero ekyo kikabareetera kutateekateeka gye nari kugwejegyera omu by’omwoyo. Okurya n’okunywa aha bumanyiso obwo omu muringo ogutashemeire kikabareetera kutasiimwa Ruhanga.

12. (a) Paulo akagyeragyeranisa Ekiijutsyo ahari ki, kandi akarabura ata abarikurya kandi bakanywa aha bumanyiso? (b) Oshukirweho amajuta yaakora ekibi ky’amaani aine kukora ki?

¹² Paulo akagyeragyeranisa Ekiijutsyo n’eby’okurya kandi yaarabura abarikurya ati: “Timurikubaasa kunywa ha kikopo kya Mukama, kandi n’aha kya baadaimoni. Timurikubaasa kuriira ha meeza ya Mukama waitu n’aha ya baadaimoni.” (1 Kor. 10:16-21) Omuntu orikukira kurya n’okunywa aha bumanyiso bw’Ekiihuro kya Mukama Waitu yaakora ekibi ky’amaani, ashemereire kusherura obuhwezi bw’eby’omwoyo. (Shoma Yakobo 5:14-16.) Oshukirweho amajuta ku arikwana “ebyana ebishemereire abeeteisize,” yaarya kandi akanywa aha bumanyiso naaba atarikutwara ekitambo kya Yesu nk’ekitaine mugasho.​—Luk. 3:8.

13. Ahabw’enki n’eky’omugasho kushaba aha bikwatiraine n’amatsiko agu Ruhanga atuhaire?

¹³ Buri omwe ahariitwe yaaba naayetebeekanisiza Ekiijutsyo, nikiba kiri eky’omugasho kushaba kandi akateekateeka aha amatsiko agu Ruhanga atuhaire. Titurikwenda kutwara ekitambo kya Yesu nk’ekitari ky’omuhendo. N’ahabw’ekyo, tihaine oshemereire kurya aha mugaati nari akanywa aha viinyo yaaba atarikuhamiza kimwe ngu ashukirweho amajuta. Mbwenu shi, n’oha oshemereire kurya kandi akanywa aha bumanyiso?

NI BAAHI ABAINE KURYA KANDI BAKANYWA AHA BUMANYISO?

14. Endagaano ensya eine kakwate ki n’okurya hamwe n’okunywa aha bumanyiso bw’Ekiijutsyo?

¹⁴ Abo abarikurya kandi bakanywa aha bumanyiso bw’Ekiijutsyo nibaba nibahamiza kimwe ngu bari omu ndagaano ensya. Aha bikwatiraine na viinyo, Yesu akagira ati: “Ekikopo eki niyo ndagaano nsya omu shagama yangye.” (1 Kor. 11:25) Kurabira omuri nabi Yeremia, Ruhanga akagira ngu akaba naija kukora endagaano nsya eyaabaire neetaana aha ndagaano y’Ebiragiro ei yaabaire akozire n’Abaisraeli. (Shoma Yeremia 31:31-34.) Ruhanga akakora endagaano nsya n’Abaisraeli ab’omwoyo. (Gal. 6:15, 16) Endagaano egi ekahamibwa ekitambo kya Kristo, reero yaatandika kukora ahabw’eshagama ye eyaasheeshekire. (Luk. 22:20) Yesu niwe Muteerani w’endagaano ensya, kandi abashukirweho amajuta abeesigwa abagirimu nibaija kutunga obuhunguzi bwabo omu iguru.​—Heb. 8:6; 9:15.

15. Ni baahi abari omu ndagaano ensya ey’Obukama, kandi nibaija kutunga mugisha ki baaguma bari abeesigwa?

¹⁵ Abo abarikwikirizibwa kurya n’okunywa aha bumanyiso nibamanya ngu bari omu ndagaano y’Obukama. (Shoma Luka 12:32.) Abo abaahindukire abakuratsi ba Yesu abashukirweho amajuta kandi abaamuhamiireho, bakabonabona nk’oku yaabonaboine, bakaba nibaija kutegyeka nawe omu iguru. (Fil. 3:10) Ahabw’okugira ngu bari omu ndagaano ensya kandi n’abeesigwa, nibaija kutegyeka na Kristo omu iguru ebiro byona nk’abagabe. (Kush. 22:5) Abantu nk’abo nibarya kandi banywa aha bumanyiso bw’Ekiijutsyo bataine kirikubashinja.

16. Omu bugufu shoboorora amakuru g’ebiri omu Abarooma 8:15-17.

¹⁶ Abo bonka abu omwoyo gurikuhwera kuhamya ngu n’abaana ba Ruhanga, baine kurya aha mugaati kandi bakanywa n’ahari viinyo. (Shoma Abarooma 8:15-17.) Yetegyereze ngu Paulo akakoresa ekigambo ky’Orusiria “Abba,” ekirikumanyisa “Ai Taata!” Omwana naabaasa kukoresa ekigambo ekyo yaaba naayeta ishe, ahakuba nikyoreka ngu naamukunda, ngu aine omukago murungi nawe, kandi ngu naamuha ekitiinisa. Ahabw’okutunga ‘omwoyo ogwabahindwire abaana ba Ruhanga’ nibaba bari abaana be ab’omwoyo. Omwoyo gwa Yehova niguhamya n’emyoyo yaabo, kubahwera kuhamiza kimwe ngu n’abaana be abashukirweho omwoyo gurikwera. Tikirikumanyisa ngu nibaba batarikwenda kutuura omu nsi. Nibaba nibahamiza kimwe ngu baaguma bari abeesigwa kuhika aha muheru, nibaija kuba abagabe hamwe na Yesu omu iguru. Obunaku obu, hatsigaireho bakye aha 144,000 abarikukuratira Kristo, ‘abashukirweho amajuta Ogwo Orikwera,’ Yehova. (1 Yoh. 2:20; Kush. 14:1) Omwoyo gwe nigwo gurikubahwera kugira ngu, “Abba, Taata!” Ka baine omukago gw’omutaano na Ruhanga!

AMATSIKO GA BAIBULI GATWARE NKA KIKURU

17. Abashukirweho amajuta baine matsiko ki, kandi nibagatwara bata?

¹⁷ Ku oraabe ori Omukristaayo oshukirweho amajuta, nikiba kiri kikuru kushaba aha bikwatiraine n’amatsiko gaawe g’okuza omu iguru. Nk’eky’okureeberaho, Baibuli ku erikugamba aha bugyenyi bw’okushwera omu iguru ahagati ya Yesu ‘n’omugore’ we, oshemereire kukimanya ngu nikikwata ahariiwe kandi okigirire ekihika. (2 Kor. 11:2; Yoh. 3:27-29; Kush. 21:2, 9-14) Nari Ekigambo kya Ruhanga ku kirikugamba ahari rukundo ei Ruhanga ainiire abaana be ab’omwoyo, oine kugira oti: “Ogwo niinye.” Kandi Ekigambo kya Yehova ku kirikuha obuhabuzi abaana be abashukirweho amajuta, omwoyo gurikwera gwine kukuhiga kworoba kandi omu mutima gwawe okagira oti: “Eki nikikwata ahariinye.” Obwo nibuba buri obuhame bw’omwoyo gwa Ruhanga hamwe n’omwoyo gwawe ngu oine amatsiko g’okuza omu iguru.

18. Ab’entaama ezindi baine matsiko ki, kandi noogatwara ota?

¹⁸ Kwonka, ku oraabe ori omwe aha “omutwe muhango gw’abantu” nari “entaama ezindi,” Ruhanga akuhaire amatsiko g’okutuura omu nsi. (Kush. 7:9; Yoh. 10:16) Noija kutuura omu Paradiso, kandi nooshemererwa kuteekateeka aha ki Baibuli erikugamba aha ku ensi eraabe neeshusha omu biro by’omumaisho. Oine ekihika ky’okutunga obusingye bwingi obwo ori n’abanyabuzaare n’abandi abahikiriire. Nooyenda kureeba eibura ry’eby’okurya, obworo, okubonabona, endwara, n’okufa bitakiteganisa bantu. (Zab. 37:10, 11, 29; 67:6; 72:7, 16; Isa. 33:24) Oine ekihika ky’okwakiira abaraazookye baine amatsiko g’okutuuraho omu nsi ebiro byona. (Yoh. 5:28, 29) Ka kishemereire kukureetera kusiima Yehova ahabw’okukuha amatsiko g’okutuura omu nsi! N’obu oraabe atarikurya aha bumanyiso bw’Ekiijutsyo, noobaho kworeka ngu noosiima ekitambo kya Yesu Kristo.

NOIJA KUBAHO?

19, 20. (a) Amatsiko agu Ruhanga akuhaire nigabaasa kuba gata agaabuzima? (b) Ahabw’enki oine kubaho aha Kiihuro kya Mukama Waitu?

¹⁹ Yaaba oine amatsiko g’okuza omu iguru nari ag’okutuura omu nsi, amatsiko ago nigabaasa kuba agaabuzima waikiririza omuri Yehova Ruhanga, Yesu Kristo, n’ekitambo. Waabaho aha Kiijutsyo, noija kutunga omugisha kuteekateeka aha matsiko gaawe n’obukuru bw’okufa kwa Yesu. N’ahabw’ekyo gira ekigyendererwa ky’okuba omwe aha bukaikuru bw’abantu abaraije aha Kiihuro kya Mukama Waitu bwanyima y’eizooba kurenga Orwakataano, Apuri 3, 2015, aha Kyombeko ky’Obukama n’omu myanya endiijo omu nsi yoona.

²⁰ Okubaho aha Kiijutsyo nikibaasa kukuhwera kwongyera kusiima ekitambo kya Yesu. Waahurikiza gye orubazo oruraaheebwe, nikibaasa kukuhiga kukunda abataahi orikubagana nabo ebi oyegire ahari rukundo ya Yehova, n’ekigyendererwa kye ekikuru ahabw’abantu. (Mat. 22:34-40) Omu muringo gwona, teeraho kubaho aha Kiihuro kya Mukama Waitu.