Yesu Okugaruka omu Iguru

Yesu akabugana abakuratsi be omuri Galilaaya. Akabaragiira ati: ‘Mugyende omu mahanga goona, muhindure abantu abeegi. Mubeegyese ebi naabeegyeise, kandi mubabatize.’ Bwanyima akabaraganisa ati: ‘Mwijukye, niinyija kuba ndi naimwe.’

Omu biro 40 Yesu aherize kuzooka, akeeyoreka abeegi be baingi omuri Galilaaya na Yerusaalemu. Akabeegyesa amashomo makuru kandi akakora n’eby’okutangaaza bingi. Bwanyima Yesu akabugana entumwa ze omurundi gw’aha muheru aha Rushozi Zeituuni. Akabagira ati: ‘Mutaruga Yerusaalemu. Mugume mutegyereize eki Taata yaaraganiise.’

Entumwa tibaraamanyire eki yaabaire naamanyisa. Bakamubuuza bati: ‘Hati nooza kuba Omugabe wa Israeli?’ Yesu akabagarukamu ati: ‘Obwire bwa Yehova obw’okumpindura Omugabe tibukahikire. Juba nimwija kutunga omwoyo gurikwera, kandi muryaba baakareebi bangye. Mugyende mubuurire omuri Yerusaalemu, Buyudaaya, Samaria, n’okuhika aha muheru gw’ensi.’

Bwanyima Yesu akatwarwa ahaiguru ekicu kyamushweka. Abeegi be bakaguma nibareeba ahaiguru, kwonka akaba yaagyenzire.

Abeegi be bakaruga aha Rushozi Zeituuni baaza Yerusaalemu. Butoosha bakaba bateeranira omu kishengye eky’ahaiguru kandi bashaba. Bakaba bategyereize Yesu kubaha obuhabuzi obundi.