Ahabw’enki Oine Kworobera Abaine Obushoboorozi?

1, 2. (a) N’obuhabuzi bw’oha obu twine kukuratira? (b) Nituza kugarukamu bibuuzo ki omu shuura egi?

OBU waabaire okiri muto, obundi haine obu abazaire baawe baakugambira kukora ekintu eki otarikwenda kukora. Okaba nookunda abazaire baawe, kandi okaba noomanya ngu oine kuboorobera. Kwonka nabwo, nooshanga obumwe okaba noohurira otarikwenda kuboorobera.

² Nitumanya ngu Yehova Tataitwe, naatukunda. Naatureeberera kandi naahamya ngu twine buri kimwe ekirikwetengyesa kubaasa kugira amagara marungi. Naatuha obuhabuzi kutuhwera kuba abasinguzi. Obumwe, naakoresa abantu abandi kutuhabura. Twine kuha Yehova ekitiinisa ahabw’obushoboorozi bwe. (Enfumu 24:21) Kwonka shi ahabw’enki obumwe nikitugumira kwikiriza obuhabuzi? Ahabw’enki Yehova naayenda ngu tukuratire obuhabuzi? Kandi nitworeka tuta ngu nitumuha ekitiinisa ahabw’obushoboorozi bwe?​—Reeba Ebirikukiraho 9.

AHABW’ENKI KIGUMIRE?

3, 4. Abantu bakahinduka bata abatahikiriire, kandi ahabw’enki nikibaasa kutugumira kwikiriza kuhaburwa abandi?

³ Abantu twine omuze gw’okwenda kugoma. Eki kikabaho kuruga obu abantu b’okubanza Adamu na Haawa baashiisha. N’obu baraabe baahangirwe bahikiriire, bakagomera obushoboorozi bwa Ruhanga. Kuruga obwo, abantu boona nibazaarwa batahikiriire. Obutahikiirira bwaitu n’emwe aha nshonga erikutureetera kugumirwa kwikiriza obuhabuzi bwa Yehova n’obw’abantu. Enshonga endiijo n’okugira ngu n’abantu abu Yehova arikukoresa kutuha obuhabuzi nabo tibahikiriire.​—Okutandika 2:15-17; 3:1-7; Zaaburi 51:5; Abarooma 5:12.

⁴ Ahabw’okugira ngu tituhikiriire, nitukira kwetunguura. Okwetunguura nikutureetera kugumirwa kwikiriza obuhabuzi. Nk’eky’okureeberaho, omuri Israeli eya ira, Yehova akatoorana Musa kwebembera abaheereza be. Omushaija orikwetwa Koora owaabaire aheereize Yehova kumara emyaka mingi, akagira amwetunguuro kandi yaagaya munonga Musa. N’obu Musa araabe yaabaire naayebembera abaheereza ba Ruhanga, akaba ataine mwetunguuro. Nangwa akagambwaho nk’omushaija owaabaire naakirayo kuba omucureezi obwire obwo. Kwonka Koora akanga kwikiriza obuhabuzi bwa Musa. Kandi akashendashenda n’abantu baingi kumwegaitaho kugomera Musa. Niki ekyahikire ahari Koora n’abagomi abandi? Bakaitwa. (Okubara 12:3; 16:1-3, 31-35) Omu Baibuli harimu abantu baingi abu turikwegyeraho ngu omwetunguuro n’ogw’akabi.​—2 Obusingye 26:16-21; reeba Ebirikukiraho 10.

5. Abantu abamwe bakoreise bata kubi obushoboorozi bwabo?

⁵ Obundi orahuriireho ebigambo ebirikugira ngu, “Obushoboorozi nibushiisha.” Omu byafaayo byona, abantu baingi bakoreise kubi obushoboorozi bwabo. (Shoma Omubuurizi 8:9.) Nk’eky’okureeberaho, Saulo akaba ari omushaija murungi, kandi omucureezi obu Yehova yaamutoorana kuba omugabe wa Israeli. Kwonka akaikiriza amaryo n’eihari kukura omu mutima gwe, ekyo kyamureetera kuhiiganisa Daudi owaabaire ataine rubanja. (1 Samueli 9:20, 21; 10:20-22; 18:7-11) Bwanyima, Daudi akaba omugabe, kandi yaaba omwe aha bagabe barungi ba Israeli. Kwonka, ku haahingwireho obwire akakoresa kubi obushoboorozi bwe. Akateerana na Batisheba muka Uriya, kandi yaateeraho kushereka ekibi kye arikwohereza Uriya omu rutaro ngu aitirweyo.​—2 Samueli 11:1-17.

EKIRIKUTUREETERA KWOROBERA YEHOVA

6, 7. (a) Rukundo ei twiniire Yehova neetuhiga kukora ki? (b) Niki ekirikwija kutuhwera kworoba n’obu kirikuba kitoorobi kukikora?

⁶ Ahabw’okugira ngu nitukunda Yehova, yaatuhabura nitumworobera. Kandi ahabw’okumukunda okukira ekindi kyona nari omuntu ondiijo weena, nituba nitwenda kumushemeza. (Shoma Enfumu 27:11; Mako 12:29, 30.) Kuruga obu omushaija n’omukazi ab’okubanza baabaire bari omu musiri Edeni, Sitaane atwire naayenda ngu abantu babangaanise aha bushoboorozi bwa Yehova. Omuregi naayenda tuteekateekye ngu Yehova taine bushoboorozi bw’okutugambira eki twine kukora. Kwonka nitumanya ngu eki n’ekishuba. Nitwikirizana n’ebigambo ebirikugira ngu, Yehova “Ruhanga waitu, oshemereire kuhimbisibwa n’okuheebwa ekitiinisa n’obushoboorozi, ahabw’okuba niiwe waahangire byona.”​—Okushuuruurwa 4:11.

⁷ Obu waabaire okiri omwana, obundi okeegyesibwa kworobera abazaire baawe n’obu oraabe waabaire otarikwenda kukikora. Omu muringo nigwo gumwe, naitwe abaheereza ba Yehova obumwe nikitugumira kworoba. Kwonka nitukunda Yehova, kandi nitumuha ekitiinisa, n’ahabw’ekyo nitukora kyona ekirikubaasika kumworobera. Yesu akatuteeraho eky’okureeberaho. Akaba naayorobera Yehova n’obu kyabaire kiba kitamworobeire, nari atarikwenda kuba nikyo yaakora. Niyo nshonga ahabw’enki yaagizire ishe ati: “Kirekye kuba nk’oku ndikwenda, kureka nka Iwe oku orikwenda.”​—Luka 22:42; reeba Ebirikukiraho 11.

8. Ni mu miringo ki emwe ei Yehova arikutwebemberamu? (Reeba akabokusi “Hurikiza Obuhabuzi.”)

⁸ Obunaku obu, Yehova naatwebembera omu miringo mingi. Nk’eky’okureeberaho atuhaire Baibuli. Kandi atuhaire abareeberezi b’ekibiina. Nitworeka ngu nitworobera obushoboorozi bwa Yehova twayorobera abu arikukoresa kutwebembera. Twayanga obuhabuzi bwabo, nituba turi nk’abaagomera Yehova. Abaisraeli ku baayangire Musa, ekyo kikagwisa kubi Yehova. Akareeba ngu niwe bangire.​—Okubara 14:26, 27; reeba Ebirikukiraho 12.

9. Rukundo neetuhiga eta kukuratira obuhabuzi?

⁹ Twayorobera abaine obushoboorozi, nikyoreka ngu nitukunda n’ab’eishe-emwe na banyaanyazi-itwe. Kiteekateekyeho! Haabaho ekihikiirizi, nihaba hariho guruupu y’abantu abarikukorera hamwe kucungura abantu baingi nk’oku kirikubaasika. Guruupu egyo kubaasa kukora gye, omuntu naaba aine kugitebeekanisa gye, kandi buri omwe aharibo naaba aine kukuratira obuhabuzi. Kwonka shi omuntu omwe ku yaakwehuzya obuhabuzi akakora eki arikwenda? N’obu yaakuba ataine bigyendererwa bibi, okutahurikiza kwe nikubaasa kureetera bagyenzi be oburemeezi, bahikweho akabi k’amaani. Omu muringo nigwo gumwe, twaba tutakuratiire obuhabuzi bwa Yehova n’abu ahaire obushoboorozi, abandi nibabaasa kutunga oburemeezi. Kwonka twayorobera Yehova, nitworeka ngu nitukunda ab’eishe-emwe kandi ngu nitworobera entebeekanisa ya Yehova.​—1 Abakorinso 12:14, 25, 26.

10, 11. Hati nituza kushwijuma ki?

¹⁰ Kyona eki Yehova arikutushaba kukora nikiba kiri eky’oburungi bwaitu. Twayorobera abaine obushoboorozi omu ka, omu kibiina, n’omu gavumenti, buri omwe naagasirwa.​—Eky’Ebiragiro 5:16; Abarooma 13:4; Abaefeso 6:2, 3; Abaheburaayo 13:17.

¹¹ Twayetegyereza enshonga ahabw’enki Yehova naayenda ngu tworobere abandi nikibaasa kutworobera kukikora. Ka tushwijume omu bwijwire oku turikubaasa kworobera abaine obushoboorozi omu mbeera ishatu.

OKWOROBA OMU KA

12. Omushaija naabaasa kworeka ata ngu naayorobera obushoboorozi bwa Yehova?

¹² Yehova niwe yaatandikireho eka, kandi akaha buri omwe omu ka obujunaanizibwa. Buri omwe omu ka yaamanya obujunaanizibwa obu Yehova amuhaire, entebeekanisa y’eka neekora gye, kandi eka yoona neegasirwa. (1 Abakorinso 14:33) Yehova akaha omushaija obujunaanizibwa bw’okuba omutwe gw’eka. Eki nikimanyisa ngu Yehova naayenda ngu omushaija areeberere gye omukazi we n’abaana, kandi abeebembere. N’ahabw’ekyo omushaija naajunaanwa ahari Yehova ahabw’oku arikureeberera eka ye. Nyineeka ashemereire kutwaza omu muringo gw’embabazi, kandi ogwa rukundo arikutwariza eka ye nk’oku Yesu arikutwariza ekibiina. Omushaija yaatwaza atyo, naayoreka ngu naaha Yehova ekitiinisa.​—Abaefeso 5:23; reeba Ebirikukiraho 13.

13. Omukazi naabaasa kworeka ata ngu naayorobera obushoboorozi bwa iba?

¹³ Omukazi Omukristaayo nawe aine obujunaanizibwa bukuru kandi obw’ekitiinisa. Naashagika iba yaaba naakora n’amaani kuba omutwe gw’eka murungi. We na iba, baine obujunaanizibwa bw’okutendeka abaana baabo. Omuringo gumwe ogu arikwegyesamu abaana be kuha abandi ekitiinisa, n’okubateeraho eky’okureeberaho kirungi. (Enfumu 1:8) Naaha iba ekitiinisa kandi naakwatanisa nawe omu bi arikucwamu. N’obu arikuba atarikwikirizana nawe aha nshonga emwe, naagamba oku arikwehurira omu muringo gw’embabazi kandi ogw’ekitiinisa. Omukazi Omukristaayo yaaba ari omu bushwere n’otari Mujurizi wa Yehova, naaba aine embeera z’omutaano ezigumire. Kwonka yaagumizamu naatwariza iba omu muringo gwa rukundo arikumuha n’ekitiinisa, obundi iba nyentsya naabaasa kwenda kumanya Yehova kandi amuramye.​—Shoma 1 Petero 3:1.

14. Abaana nibabaasa kworeka bata ngu niboorobera obushoboorozi bw’abazaire baabo?

¹⁴ Abaana n’ab’omuhendo ahari Yehova, kandi okukira munonga baine kurindwa kandi bakahaburwa. Abaana baayorobera abazaire baabo, nibareetera abazaire baabo okushemererwa. Kandi ekikuru munonga, baayorobera abazaire baabo, nibooreka ngu niboorobera Yehova, kandi nibamushemeza. (Enfumu 10:1) Omu maka maingi, abaana niboororwa omuzaire omwe. Eki nikibaasa kugumira omuzaire n’abaana. Kwonka abaana baaba nibamworobera kandi barikumushagika, embeera omu ka tizirikuguma munonga. Omu mbeera zoona, tihariho eka ehikiriire. Kwonka buri ka neebaasa kushemererwa buri omwe ogirimu yaakuratira obuhabuzi bwa Yehova. Eki nikihaisa Yehova ekitiinisa, owaatandikireho eka.​—Abaefeso 3:14, 15.

OKWOROBA OMU KIBIINA

15. Nitubaasa kworeka tuta ngu nitworobera abaine obushoboorozi omu kibiina?

¹⁵ Yehova naatuha obuhabuzi kurabira omu kibiina Ekikristaayo, kandi ahaire Yesu obushoboorozi bwingi kwebembera ekibiina eki. (Abakolosai 1:18) Yesu nawe ahaire ‘omwambari omwesigwa kandi ow’obwengye’ obujunaanizibwa bw’okureebera abaheereza ba Ruhanga omu nsi. (Matayo 24:45-47) Obunaku obu, ‘omwambari omwesigwa kandi ow’obwengye’ niko Kakiiko Akareeberezi. Akakiiko Akareeberezi nikatuha eby’okurya by’omwoyo omu bwire obuhikire kutuhwera kuhamya okwikiriza kwaitu. Abareeberezi, abaheereza, n’abarikutaayaayira ebibiina nibahwera ebibiina omu nsi yoona, kandi Akakiiko Akareeberezi niko karikubaha eby’okukuratira. Ab’eishe-emwe aba boona baine obujunaanizibwa bw’okutureeberera omu by’omwoyo. Nibajunaanwa ahari Yehova oku barikuhikiiriza obujunaanizibwa obu. N’ahabw’ekyo twaha abashaija aba ekitiinisa, nituba twakiha Yehova.​—Shoma 1 Abatesalonika 5:12; Abaheburaayo 13:17; reeba Ebirikukiraho 14.

16. Ahabw’enki turikubaasa kugira ngu abareeberezi n’abaheereza nibatooranwa omwoyo gurikwera?

¹⁶ Abareeberezi n’abaheereza nibahwera abari omu kibiina kuguma bari abeesigwa kandi barikukwatanisa. Amazima gari ngu nabo tibahikiriire nkaitwe. Mbwenu shi nibatooranwa bata? Ab’eishe-emwe aba nibaba baine kuhikiiriza ebirikwetengyesa ebiri omu Baibuli. (1 Timoseo 3:1-7, 12; Tito 1:5-9) Yehova akakoresa omwoyo gurikwera kuhwera abaahandiikire Baibuli kushoboorora ebirikwetengyesa ebi baine kuhikiiriza. Abareeberezi nibashaba Yehova kubaha omwoyo gurikwera baaba nibashwijuma emitwarize y’omuntu oshemereire kuba omureeberezi nari omuheereza. Buzima, ebibiina byona nibikuratira obuhabuzi bwa Yehova na Yesu. (Ebyakozirwe 20:28) Abashaija abatoorainwe kutuhwera n’okutureeberera n’ebiconco kuruga ahari Ruhanga.​—Abaefeso 4:8.

17. Munyaanyazi-itwe obumwe naaba aine kukora ki kworeka ngu naayorobera entebeekanisa y’ekibiina kya Yehova?

¹⁷ Obumwe nooshanga hatariho abareeberezi nari abaheereza b’okuhikiiriza obujunaanizibwa omu kibiina. Kyaba kityo, ab’eishe-emwe ababatiziibwe nibabaasa kuhwera, kwonka haaba hatariho ow’eishe-emwe n’omwe obatiziibwe, munyaanyazi-itwe naabaasa kuhikiiriza obujunaanizibwa obwo. Omu mbeera egyo, naagira eki yaayetwekyerera aha mutwe obundi nk’ekitambaara nari enkofiira. (1 Abakorinso 11:3-10) Eki nikyoreka ngu naayorobera entebeekanisa ya Yehova ey’okwebembera, omu ka, n’omu kibiina.​—Reeba Ebirikukiraho 15.

OKUHA EKITIINISA ABEEBEMBEZI BA GAVUMENTI

18, 19. (a) Nitwega ki omu Abarooma 13:1-7? (b) Nitubaasa kworeka tuta ngu nituha abakozi ba gavumenti ekitiinisa?

¹⁸ Obunaku obu, Yehova naikiriza gavumenti z’abantu kugira obushoboorozi buringaniire, n’ahabw’ekyo twine kuha ekitiinisa abeebembezi baazo. Gavumenti ezi nizitebeekanisa abantu omu mahanga, n’ebicweka ebirikutuurwamu kugira ngu buri kimwe kigyende gye. Kandi nizibahwera n’okutunga obuheereza oburikwetengyesa. Abakristaayo niboorobera obuhabuzi oburi omu Abarooma 13:1-7. (Kishome.) Nitworobera “abakama abarikutegyeka” nari ab’obushoboorozi bw’ahaiguru, kandi nitworobera ebiragiro by’eihanga nari ekicweka ahu turikutuura. Ebiragiro ebi nibibaasa kuhwera omu nshonga z’eka, ez’eby’obushuubuzi, nari omu nshonga ez’amataka. Nk’eky’okureeberaho, nitushashura emishoro, kandi nitwijuza n’ebihandiiko ebi gavumenti zirikutwenza. Kwonka shi twine kukora ki gavumenti zaatushaba kukora ebirikuhenda ebiragiro bya Ruhanga? Entumwa Petero akagira ati: “Tushemereire kworobera Ruhanga okukira abantu.”​—Ebyakozirwe 5:28, 29.

¹⁹ Twaba nitukoragana n’abakozi ba gavumenti, nk’abaramuzi nari abaporiisi, butoosha twine kubaha ekitiinisa. Abakristaayo abato nibaha ekitiinisa abashomesa n’abakozi b’eishomero abandi. Aha murimo, twine kuha ekitiinisa bakama baitu, n’obu abakozi abandi baakuba batarikukibaha. Twakora tutyo, nituba nitutooreza entumwa Paulo, owaabaire naaha ekitiinisa abeebembezi n’obu obumwe kyabaire kigumire. (Ebyakozirwe 26:2, 25) N’obu abandi baakututwariza kubi, nituguma nitubaha ekitiinisa.​—Shoma Abarooma 12:17, 18; 1 Petero 3:15.

20, 21. Twaha abandi ekitiinisa nihabaasa kurugamu birungi ki?

²⁰ Omu nsi yoona, abantu nibaguma nibeeyongyera kwanga kuha abandi ekitiinisa. Kwonka abaheereza ba Yehova n’ab’omutaano. N’ekigyendererwa kyaitu kuha buri omwe ekitiinisa. Nitukuratira obuhabuzi bw’entumwa Petero obu: “Muhe abantu boona ekitiinisa.” (1 Petero 2:17) Twaha abandi ekitiinisa, nibakireeba. Yesu akagira ati: ‘Mujwise omushana gwanyu omu maisho g’abantu, kugira ngu bareebe emicwe yaanyu emirungi, babone kuhimbisa Shoimwe.’​—Matayo 5:16.

²¹ Twayorobera abatwineho obushoboorozi omu ka, omu kibiina, n’omu mbeera ezindi, eky’okureeberaho kyaitu kirungi nikibaasa kureetera abandi kwenda kwega ahari Yehova. Kandi twaha abandi ekitiinisa, nitworeka ngu nitukiha Yehova. Eki nikishemeza Yehova, kandi nikyoreka ngu nitumukunda.