EISHOMO 02

Baibuli Neeha Amatsiko

Ekiteirwe

Abantu omu nsi yoona baine oburemeezi oburikubareetera kugira enaku, okwerarikirira, n’obusaasi. Oragizireho oburemeezi nk’obwo? Obundi nooteganisibwa okurwara nari oine obusaasi bw’okufeerwa omukundwa. Noobaasa kwebuuza oti: ‘Embeera niziija kuhinduka kuba nungi?’ Oku Baibuli erikugarukamu ekibuuzo ekyo nikutuha amatsiko.

1. Baibuli neeha eta amatsiko?

Baibuli neeshoboorora ahabw’enki omu nsi harimu oburemeezi, erimu n’amakuru marungi ngu oburemeezi obu ti bw’obutwire, beitu ngu juba nibwija kwihwaho. Ebi Baibuli erikuraganisa nibibaasa kutuhwera kugira “amatsiko” g’okugira ebiro birungi by’omumaisho. (Shoma Yeremia 29:11, 12.) Okuraganisa oku nikutuhwera kwemera oburemeezi obu twine hati, kuba n’emiteekateekyere mirungi, n’okugira amatsiko g’okushemererwa obutwire.

2. Baibuli neegira ngu nihaija kubaho mbeera ki omu biro by’omumaisho?

Baibuli neeyoreka ngu omu biro by’omumaisho nihaija kuba ‘hatariho okufa, okucura, okurira, n’obusaasi.’ (Shoma Okushuuruurwa 21:4.) Oburemeezi oburikutureetera kwehwa amatsiko, nk’obworo, obutari buringaaniza, endwara, n’okufa tibirikwija kugaruka kubaho. Baibuli neeraganisa ngu abantu nibaija kutuuraho ebiro byona omu Paradiso omu nsi.

3. Noobaasa kwongyera ota kwesiga ebi Baibuli erikuraganisa?

Abantu baingi nibaba baine amatsiko g’okutunga ebirungi, kwonka nibaba batarikuhamya yaaba baraabitungye. Ebi Baibuli erikuraganisa n’eby’omutaano. Nitubaasa kwongyera kwesiga Baibuli ‘turikushwijuma gye Ebyahandiikirwe.’ (Ebyakozirwe 17:11) Waaba nooyega Baibuli, noija kwecweramu yaaba oraikirize eki erikugamba aha biro by’omumaisho.

SHWIJUMA GYE

Shwijuma zimwe aha mbeera ezi Baibuli erikuraganisa ngu niziija kubaho omu biro by’omumaisho. Reeba oku ebiraganiso ebi birikuhwera abantu obunaku obu.

Ebishushani: Bimwe ebirikworeka embeera mbi ei abantu barikurabamu hati n’ebi Baibuli erikuraganisa omu biro by’omumaisho. Ebishushani ebi nibigaruka byorekwa ahaifo.

4. Baibuli neeraganisa ngu nitwija kutunga amagara agatahwaho omu mbeera ezihikiriire

Reeba bimwe aha bi Baibuli erikuraganisa. Okukira munonga ni biiha ebirikukushemeza, kandi ahabw’enki?

Shoma ebyahandiikirwe ebiri omu maisho g’okuraganisa oku, kubaasa kugarukamu ebibuuzo ebi:

Mbwenu shi ebyahandiikirwe ebi nibikuha amatsiko? Nibibaasa kuha amatsiko ab’eka yaawe na banywani baawe?

Teera akashushani orikutuura omu nsi ahu

BURI OMWE ARAABE . . .	BURI MUNTU . . .
ataine busaasi, atarikuteganisibwa bukuru, nari okufa.—Isaaya 25:8.	araabaase kureeba abakundwa be abaafiire barikuzooka, kutuura omu nsi.—Yohaana 5:28, 29.
atarikurwara nari kugira obumuga.—Isaaya 33:24; 35:5, 6.	araagire amagara marungi n’amaani g’obutsigazi.—Yobu 33:25.
atarikuhikwaho obutari buringaaniza.—Isaaya 32:16, 17.	araabe aine eby’okurya bingi, eka nungi, n’emirimo erikureeta okumarwa.—Zaaburi 72:16; Isaaya 65:21, 22.
atarikubonabona ahabw’entaro.—Zaaburi 46:9.	araabe aine obusingye obwabuzima.—Zaaburi 37:11.
atarikuteganisibwa ebiteekateeko bibi, nari okwijuka ebintu bibi.—Isaaya 65:17.	araabaase kugumaho ebiro byona omu mbeera nungi.—Zaaburi 37:29.

Omwojo owaabaire arwaire hati ari gye naagwa nyina omu kifuba.

Omushaija owaabaire ari omugurusi hati ni muto ariyo naatsindika kahuuba eyijwire emboga.

5. Ebi Baibuli erikuraganisa nibituhwera kugira amatsiko

Oburemeezi oburi omu nsi nibureetera abantu baingi kwehurira kubi nangwa n’abandi nibagira ekiniga. Abamwe nibateeraho munonga kuhindura embeera zaabo kuba nungi. Reeba oku okuraganisa kwa Baibuli ngu embeera niziija kuba nungi kurikugasira abantu hati. Zaana VIDIYO, kubaasa kugarukamu ebibuuzo ebirikukurataho.

VIDIYO: Nkaba Niinyenda Kurwanisa Obutari Buringaaniza (4:07)

Ebishushani: Ebimwe kuruga omu vidiyo ‘Nkaba Niinyenda Kurwanisa Obutari Buringaaniza.’ 1. Obu Rafika yaabaire naashaaruura pamba n’abantu b’erangi ye akiri omwishiki. 2. Rafika ashemereirwe ahabw’okureeba abantu b’erangi zitarikushushana nibakwatanisa obu yaaza aha ruteerane oruhango orw’Abajurizi ba Yehova ogw’okubanza.

Omu vidiyo egi, Rafika akaba naateganisibwa butari buringaaniza ki?
N’obu obutari buringaaniza obwo buraabe butararugireho, Baibuli ekamuhwera eta?

Amatsiko agu Baibuli erikutuha aha biro by’omumaisho nigabaasa kutuhwera kurwanisa okwehurira kubi n’okwemera gye oburemeezi bwaitu. Shoma Enfumu 17:22 na Abarooma 12:12, kubaasa kugarukamu ebibuuzo ebi:

Ahabw’enki obutumwa bwa Baibuli oburikuha amatsiko burikubaasa kuhindura embeera zaawe hati?

ABAMWE NIBAGIRA NGU: “Ebi Baibuli erikuraganisa aha biro by’omumaisho tibirikubaasa kuhikiirira.”

Ahabw’enki nooteekateeka ngu ni kikuru kwetungira obuhame?

OMU BUGUFU

Baibuli neetuhwera kugira amatsiko n’okwemera embeera zigumire erikuturaganisa nyentsya erimu okushemererwa kwonka.

Okweijutsya

Ahabw’enki abantu baine kugira amatsiko?
Baibuli neegamba ki aha biro by’omumaisho?
Okugira amatsiko aha biro by’omumaisho nikikuhwera kita hati?

Obu eishomo ryahendera

Ekigyendererwa

Manya gye ebi Baibuli erikuraganisa, orikushoma ebyahandiikirwe ebiri omu ishomo eri.

Ekindi:

Your other goal

JUMBURA EBINDI

Yega ebirikukiraho aha bikwatiraine n’amaani g’okugira amatsiko.

“Noobaasa Kwiha Nkahi Amatsiko?” (Awake!, Apuri 22, 2004)

Yetegyereze oku amatsiko g’ebiro by’omumaisho garikubaasa kuhwera abaine endwara ezitarikukira juba.

“Baibuli Neebaasa Kukuhwera Waaba Oine Endwara Etarikukira Juba?” (Eky’aha mukura)

Waaba nooreeba vidiyo y’ekyeshongoro egi, teera akashushani iwe n’eka yaawe mwine amagara marungi omu Paradiso ei Baibuli erikugira ngu neija kubaho.

Teekateeka aha Bwire (3:37)

Shoma oreebe oku omuntu owaabaire naakunda obwesharingo yaahindukire bwanyima y’okwega eki Baibuli erikugamba aha biro by’omumaisho.

“Tinkiteekateeka ngu Nyine Kuhindura Ensi” (Omunaara gw’Omurinzi, Gyuraayi 1, 2013)