Hariho Ediini Ei Orikubaasa Kwesiga?

KU HARAABE hariho ediini eyaakureebize, nikibaasa kukugumira kugira ediini ei waayesiga. Kwonka kimanye ngu hariho ediini ei orikubaasa kwesiga. Obu Yesu yaabaire ari omu nsi, akatoorana abakuratsi be abeesigwa kandi yaabeegyesa kugyendera aha mitindo ya Ruhanga. Hariho abakuratsi ba Kristo ab’amazima kandi abarikufayo kugyendera aha misingye y’Ekikristaayo. Nibo baahi?

Estelle owaaba yaagambirweho omu munaara ogu, akagira ati: “Bwanyima nkatandika kwega Baibuli n’Abajurizi ba Yehova. Tikiraangumiire kwetegyereza ebiri omu Yohaana 8:32, aharikugira hati: Muryamanya amazima, n’amazima garyabahindura ab’obusingye.”

Ray nawe owaaba yaagambirweho naagira ati: “Ku naayegire Baibuli n’Abajurizi ba Yehova, naayetegyereza ngu Ruhanga tiwe arikureetaho okubonabona. Kikanshemeza kumanya ngu n’obu Ruhanga araabe naareka okubonabona kukabaho, naaraganisa ngu ari haihi kukwaihaho.”

Buzima nikiba kitoorobi kukora ekihikire obu abantu baingi baine emitwarize mibi. Kwonka buzima nikibaasika. Abantu baingi baine kuhwerwa kwetegyereza ebiri omu Baibuli kandi bakabigyenderaho. Niyo nshonga ahabw’enki Abajurizi ba Yehova nibeegyesa Baibuli abantu baingi omu nsi yoona. Buri saabiiti, abantu baingi nibeega eki Baibuli buzima erikwegyesa. Ekyo nikibahwera kugira omukago murungi n’Omuhangi waabo n’okushemererwa.a

Ku oraagaruke kureeba Abajurizi ba Yehova, noobaasa kubabuuza ahabw’enki nibeesiga ediini yaabo. Teeraho kushwijuma enyegyesa zaabo n’ebirikubakwataho, reero oyereebere ku haraabe hariho ediini ei orikubaasa kwesiga.