Hariho Ediini Ei Orikubaasa Kwesiga aha by’Emicwe?
SYLVIA owaabaire naakora omu mwanya ogu abakaikwire barikureebererwamu akagira ati: “Baingi abu naashomire nabo omu itendekyero bakaba nibeetwara nk’abanyadiini. “Kwonka, bakaba nibaiba ebigyezo kandi barikukoresa n’emibazi y’ekitabura bwonko. Ediini zaabo tiziraabahwereire kuhindura emitwarize yaabo.”
Omushaija orikwetwa Lionel naagira ati: “Abu ndikukora nabo nibabeiha ngu barwaire kandi obwo buzima batarwaire. Ediini n’ekintu eki baine, kwonka eki batarikukoresa. Ni nk’ekibaizirwe eky’okworeka kwonka ekitari ky’okukoresa.”
Amadiini tigabaasize kuhwera abantu baingi kugira emicwe mirungi. Baingi obunaku obu ‘nibahamya emigyenzo y’ediini,’ kwonka ‘bahakanisa obushoboorozi bwayo.’ (2 Timoseo 3:5) Abeebembezi baabo b’ediini tibabaasize kubateeraho eky’okureeberaho kirungi, kandi tibarikuha abu barikwebembera obuhabuzi kuruga omu Byahandiikirwe kubahwera kugira emicwe mirungi. Niyo nshonga ahabw’enki abantu baingi nibagira ngu Ruhanga tarikufayo aha mitwarize yaabo.
NIKI EKI BAIBULI ERIKWEGYESA?
Baibuli neeyoreka ngu Ruhanga naakwatwaho emitwarize yaitu. Ira Abaisraeli ku baabaire bamugomera, bakaba ‘bamugwisa kubi.’ (Zaaburi 78:40) Kwonka, nihabaho okushemererwa kwingi omu iguru omuntu ku arikweteisiza kimwe akareka emicwe ye mibi. (Luka 15:7) Omuntu ku arikwetegyereza emitwarize mirungi ya Ruhanga, naayongyera kumukunda, kimuhiga kukunda ebi Ruhanga arikukunda n’okwanga ebi arikwanga.—Amosi 5:15.
ABAJURIZI BA YEHOVA BO NIBATWAZA BATA?
Orupapura rw’amakuru Deseret News orwa Salt Lake City, Utah, omuri U.S.A. rukagira ngu Abajurizi ba Yehova “nibahwera abantu kugira amaka gahami, kuba ab’omugasho n’okuba abeesigwa.” Orupapura orwo rukongyera rwagira ruti: “Nibagyendera aha misingye erikukwata aha micwe. Nibaikiriza ngu okureetsa, obusinzi, okukoresa emibazi y’ekitabura bwonko, okuteera zaara, obushambani n’obutiingwa n’ebikorwa bibi munonga.”
Mbwenu shi abeebembezi b’ediini babaasize kuhwera abu barikwebembera kugyendera aha mitindo ya Ruhanga erikukwata aha micwe?
Okwetegyereza emitwarize ya Ruhanga nikuhwera kuta Abajurizi ba Yehova? Sylvia owaaba yaagambirweho naagira ati: “Omu myanya ei abakaikwire barikureebererwamu harimu obushomankuzi. Kikaabaire kyorobi nanye kubyejwanzyamu. Kwonka ahabw’okwetegyereza ngu Yehovaa naayanga obushomankuzi, nikimphwera kukora ekihikire. Ekyo kindeeteire okushemererwa n’okugira obugwa gye.” Sylvia naahamiza kimwe ngu okugyendera aha misingye ei ayegyesiibwe omu diini ye kimuhwereire munonga.
a Yehova n’eiziina rya Ruhanga nk’oku ririkworekwa omu Baibuli.