Ow’Akakiiko Akareeberezi Omusya

Omu Kwamwenda 5, aha Rwakashatu omu kasheeshe, 2012, aha Beseeli omuri United States na Canada bakashoma ekirango ngu haatoorainwe ow’eishe-emwe kuza aha Kakiiko Akareeberezi ak’Abajurizi ba Yehova. Okwamwenda 1, 2012, Mark Sanderson akatandika kuheereza aha Kakiiko Akareeberezi.

Ow’eishe-emwe Sanderson akoororwa abazaire be Abakristaayo omuri San Diego, California, omuri U.S.A., kandi akabatizibwa omu Kwakabiri 9, 1975. Akatandika kuheereza nka payoniya omu Kwamwenda 1, 1983 omuri Saskatchewan, Canada. Omu Kwaikumi n’Abiri 1990, nibwo yaahendera okutendekwa omu Ishomero ry’Okutendeka Abareeberezi n’Abaheereza, (hati eririkwetwa Eishomero ry’Ab’eishe-emwe Abatakagiire omu Bushwere) erya mushanju omuri United States. Omu Kwakana 1991, Ow’eishe-emwe Sanderson akatooranwa kuheereza nka payoniya ow’omutaano aha kirwa kya Newfoundland omuri Canada. Bwanyima y’okuheereza nk’omuhwezi w’omureeberezi orikutaayaayira ebibiina, omu Kwakabiri 1997 akeetwa kuheereza aha Beseeli ey’omuri Canada. Omu Kwaikumi na Kumwe 2000, akatwarwa aha Beseeli ey’omuri United States, ahu yaatandikire kuheereza aha kakiiko akarikukora aha by’okuha obuhwezi omu by’obujanjabi, reero bwanyima yaaheereza aha kakiiko akarikukora aha by’obuheereza.

Omu Kwamwenda 2008, Ow’eishe-emwe Sanderson akaza omu Ishomero ry’Okutendeka ab’Akakiiko k’Eitaagi, bwanyima yaatooranwa kuheereza aha Kakiiko k’Eitaagi erya Philippines. Omu Kwamwenda 2010, akeetwa kugaruka omuri United States, ahu yaaheereize nk’omuhwezi aha Kakiiko k’Obuheereza ak’Akakiiko Akareeberezi.