Ow’Akakiiko Akareeberezi Omusya

OMU kasheeshe Orwakashatu, Okwokubanza 24, 2018, Ababeseeli aba United States n’aba Canada bakashemererwa kuhurira ekirango ky’omutaano ngu Ow’eishe-emwe Kenneth Cook, Jr., atoorainwe kuba omwe aha b’Akakiiko Akareeberezi ak’Abajurizi ba Yehova.

Ow’eishe-emwe Cook akazaarirwa omuri Pennsylvania, U.S.A, kandi yaaba niyo yaakurira. Omwegi w’eishomero mugyenzi we niwe yaamwegyeise amazima arikuza kuhendera emishomo ye omu siniya, reero yaabatizibwa Okwamukaaga 7, 1980. Akaba payoniya ow’obutwire omu Kwamwenda 1, 1982. Bwanyima y’okuheereza nka payoniya kumara emyaka ebiri, akeetwa aha Beseeli, reero yaatandika kuheereza omuri Wallkill, New York, Okwaikumi 12, 1984.

Emyaka 25 eyaakuratsireho, Ow’eishe-emwe Cook akakora emirimo etari emwe n’emwe nk’omu iteerero ry’ebitabo n’omu ofiisi aha Beseeli. Akataaha omu bushwere na Jamie, omuri 1996, kandi nawe akamwegaitaho aha Beseeli omuri Wallkill. Omu Kwaikumi-n’ebiri 2009, Ow’eishe-emwe na Munyaanyazi-itwe Cook bakahindurwa baatwarwa Patterson, omuri New York ahu amashomero g’obuheereza garikuba, reero Ow’eishe-emwe Cook yaaheebwa obujunaanizibwa bw’okukora aha by’okuhandiika amabaruha. Omu Kwakana 2016, bwanyima y’akaanya kakye Ow’eishe-emwe na Munyaanyazi-itwe Cook bagarukire Wallkill, bakatwarwa Brooklyn, omuri New York. Bwanyima y’ameezi ataano, nibwo ofiisi enkuru zaatwarwa Warwick, omuri New York. Omu Kwokubanza 2017, Ow’eishe-emwe Cook akatooranwa nk’omuhwezi w’Akakiiko Akahandiiki akari ahansi y’Akakiiko Akareeberezi ak’Abajurizi ba Yehova.