Abari aha Kakiiko Akareeberezi Abasya Babiri
OMURI OKITOBA 5, 2024, hakarangwa ekirango ky’omutaano aha ruteerane rw’omwaka ngu: Ow’eishe-emwe Jody Jedele na Jacob Rumph batoorainwe kuza aha Kakiiko Akareeberezi ak’Abajurizi ba Yehova. Ab’eishe-emwe abo bombi baheereize Yehova omu bwesigwa kumara emyaka mingi.
Jody Jedele n’omukazi we, Damaris
Ow’eishe-emwe Jedele akazaarirwa omuri Missouri, U.S.A. kandi akakurira omu mazima. Eka yaabo ekaba eri haihi n’ekicweka ekyabaire kitarikukira kubuurirwamu. N’ahabw’ekyo akabaasa kumanya ab’eishe-emwe kuruga omu bicweka bitarikushushana abaabaire baija kubuurira omu kicweka kyabo. Rukundo n’obumwe ebi baabaire baine bikamukwataho munonga. Akabatizibwa akiri omushogoyo omuri Okitoba 15, 1983. Ahabw’okugira ngu akaba naakunda okubuurira, bwanyima y’okumara siniya akaba payoniya w’obutwire omuri Seputemba 1989.
Obu Ow’eishe-emwe Jedele yaabaire ari omunyeeto, abazaire be bakaba bakira kumutwara na munyaanya kutaayaaya aha Beseeli. Bombi ekyo kikabahiga kutaho ekigyendererwa ky’okuheereza aha Beseeli—eki baabaasize kuhikaho. Ow’eishe-emwe Jedele akaija aha Beseeli omuri Wallkill omuri Seputemba 1990. Akabanza kukora omu Kitongore eky’Okuyonja bwanyima omu ky’eby’Obujanjabi.
Omu bwire obwo, ebibiina ebyabaire biri haihi ebirikukoresa Orusipania bikaba nibitunguuka, kandi birikwetenga ab’eishe-emwe. N’ahabw’ekyo Ow’eishe-emwe Jedele akaza omuri kimwe aharibyo yaatandika kwega Orusipania. Bwanyima akabugana Damaris, munyaanyazi-itwe owaabaire ari payoniya omu saketi niyo emwe. Empereruka bakataaha omu bushwere yaamwegaitaho aha Beseeli.
Omu 2005 bakaruga aha Beseeli kuza kureeberera abazaire baabo abeesigwa. Omu bwire obwo, bakaheereza nka baapayoniya ab’obutwire. Ow’eishe-emwe Jedele akahwera omu kwegyesa omu Ishomero rya Baapayoniya, kandi yaahwera aha Kakiiko Akarikuhikaanisa Abarwaire n’Eirwariro n’akarikukora aha by’Okwombeka.
Omu 2013, Ow’eishe-emwe na Munyaanyazi-itwe Jedele bakeetwa kugaruka aha Beseeli kuhwera omu kwombeka Warwick. Bwanyima, bakaheereza aha Patterson na Wallkill. Ow’eishe-mwe Jedele aheereize aha omu kitongore ky’okwombeka n’okuhunduuza, n’omu ofiisi erikuha obuhwezi omu by’obujanjabi. Omuri Maaci 2023, akatooranwa kuhwera aha Akakiiko k’Obuheereza. Ku arikuteekateeka aha buheereza bwe, naagira: “Ku orikutunga obuheereza busya, obumwe nooba otiinire. Kwonka nibwo oine kwijuka kwesigira kimwe Yehova ahakuba niwe arikutubaasisa kukora ebi arikutushaba kukora.”
Jacob Rumph n’omukazi we, Inga
Ow’eishe-emwe Rumph akazaarirwa omuri California, U.S.A. Obu yaabaire akiri muto, nyina akaba atakibuurira, kwonka nabwo akateeraho kumwegyesa amazima g’omu Baibuli. Kandi buri omwaka akaba ataayaayira nyinenkuru owaabaire ari Omujurizi wa Yehova omwesigwa. Nyinenkuru akamuhwera kwimutsya ekyetengo ky’okwenda kumanya amazima g’omu Baibuli, kandi aha myaka 13 akashaba kwegyesibwa Baibuli. Omu Seputemba 27, 1992, akabatizibwa akiri omushogoyo. Ekirikushemeza, nyina akagaruka yaatandika kubuurira, kandi abanyabuzaare be boona bakatandika kwega Baibuli kandi baabatizibwa.
Obu Ow’eishe-emwe Rumph yaabaire akiri omunyeeto, akareeba oku baapayoniya baabaire bashemereirwe omu buheereza bwabo. N’ahabw’ekyo ku yaaherize kushoma akatandika kuheereza nka payoniya omuri Seputemba 1995. Omu 2000, akaza Ecuador kuheereza ahu ababuurizi baabaire nibendwa munonga. Okwo niyo yaabugaine munyaanyazi-itwe Inga payoniya kuruga Canada, kandi bataaha omu bushwere. Bwanyima y’okutaaha omu bushwere, bakaza omu tauni emwe omuri Ecuador ahaabaire hari guruupu nkye y’ababuurizi. Kwonka hati n’ekibiina kihami.
Bwanyima Ow’eishe-emwe na Munyaanyazi-itwe Rumph bakatooranwa kuba baapayoniya ab’omutaano, kandi bwanyima baaza omu buheereza obwa saketi. Omu 2011 bakeetwa omu Ishomero rya Gileadi erya 132. Ku baaherize eishomero, bakaheereza omu mahanga gatari gamwe, kandi baashemererwa kuheereza omu buheereza obutari bumwe nk’aha Beseeli, okuba abamiisani n’okutaayaayira ebibiina. Ow’eishe-emwe Rumph akatunga omugisha gw’okwegyesa omu Ishomero ry’Ababuurizi b’Obukama.
Ahabw’ekigwererezi kya COVID-19, Ow’eishe-emwe na Munyaanyazi-itwe Rumph bakagaruka omuri United States. Bakeetwa kuheereza aha Beseeli eya Wallkill ahu Ow’eishe-emwe Rumph yaatendekirwe kuheereza omu Ofiisi y’Obuheereza. Bwanyima bakagaruka bayoherezibwa aha Beseeli ya Ecuador ahu Ow’eishe-emwe Rumph yaaheereize aha Kakiiko k’Eitaagi. Omu 2023 bakatwarwa Warwick. Omu Jenwari 2024, Ow’eishe-emwe Rumph akatooranwa kuheereza k’omuhwezi ah’Akakiiko k’Obuheereza. Ku arikuteekateeka ahu aheereize hoona, naagira ati: “Ekirikureetera obuheereza bwaba obw’omutaano ti mwanya kureka abantu abu orikuheereza.”
Nitusiima munonga ab’eishe-emwe abo ahabw’okukora n’amaani, kandi abantu nk’abo nitubatwara nk’ab’omuhendo.—Fil. 2:29.