Ahabw’Enki Oine Kumanya Ebiri omu Baibuli?

Baibuli n’ekitabo ekirikukirayo kumanywa omu nsi yoona. Ahabw’enki? Ahabw’okuba eyorobi kwetegyereza. Kandi neegamba aha ku abantu baabaire nibakoragana n’oku baabaire nibakoragana na Ruhanga. Ebiri omu Baibuli nitubaasa kugira eki twabyegyeraho, biri omu bigambo byorobi ebirikubaasa kuvunuurwa omu ndimi nyingi kandi buri muntu naabaasa kubyetegyereza. Emisingye ya Baibuli butoosha neebaasa kutuhwera.

Ekikuru munonga, Baibuli neegamba ahari Ruhanga kandi niwe yagihandiikiise. Neeyoreka eiziina rye, emitwarize ye, n’ekigyendererwa kye eky’okuhanga ensi n’abantu. Baibuli neegamba aha ku abantu batwire nibarwana n’ekibi kubaasa kukora ekihikire kandi eyoreka n’oku ekibi kiraije kuhwaho omu byahangirwe byona. Okushoma Baibuli oine emiteekateekyere ehikire nikikuhwera kugira okwikiriza n’amatsiko.

Ebiri omu Baibuli tihaine handi ahu turikubaasa kubishanga. Nk’eky’okureeberaho, Baibuli netugambira amazima agarikukwata aha nshonga nk’ezi:

• Oku abantu baabaireho n’enshonga ahabw’enki nitubonabona

• Oku Ruhanga yaatebeekaniise kucungura abantu

• Eki Yesu atukoreire

• Ebiraabeho omu biro by’omumaisho aha bantu n’ensi

Nooshabwa kureeba ebiri aha mpapura ezirikukurataho kubaasa kumanya eki Baibuli erikwegyesa.