Ahabw’Enki Oine Kwega Baibuli?

Oreebuurizeho ebibuuzo nk’ebyo? Ku oraabe oraabyebuurizeho, tori wenka. Abantu omu nsi yoona nibateekateeka aha bibuuzo bikuru. Noobaasa kutunga eby’okugarukamu?

Abantu baingi nibabaasa kugarukamu ngu, “eego!” Ahabw’enki? Ahabw’okuba kuruga omu Baibuli batungire eby’okugarukamu ebirikureeta okumarwa. Okaayenzire kumanya eki Baibuli erikugamba? Noobaasa kugasirwa omu ntebeekanisa y’Abajurizi ba Yehova ey’okwegyesa abantu Baibuli batashashwire.a

N’amazima, ku kirikuhika aha kushwijuma ebiri omu Baibuli, abamwe nibagira bati: “Nyine bingi by’okukora.” “Egumire munonga.” “Tindikwenda kwetaho bujunaanizibwa.” Kwonka abandi baine emiteekateekyere endiijo. Nibaikiriza omugisha gw’okwega eki Baibuli erikwegyesa. Yetegyereze bimwe aha by’okureeberaho:

• “Nkaba ninza omu kanisa y’Abakaturiki n’Abaporotesitanti, hekalu ya Sikh, ey’Abuddha, kandi aha yunivasite nkega ebirikukwata ahari Ruhanga n’enyikiriza z’ediini. Kwonka ebibuuzo byangye bingi ebirikukwata ahari Ruhanga tibiragarukirwemu. Bwanyima omwe aha Bajurizi ba Yehova akaija aha nju yangye. Ahabw’okugarukamu ebibuuzo byangye arikukoresa Baibuli, nkaikiriza kwega Baibuli.”—Gill, kuruga England.

• “Nkaba nyine ebibuuzo bingi ebirikukwata aha magara, kwonka ebi pasita w’ekanisa ei naabaire ndimu yaangarukiremu tibiraammazire. Kwonka omwe aha Bajurizi ba Yehova akagarukamu ebibuuzo byangye arikukoresa Baibuli. Ku yaambuurize naaba niinyenda kwega ebirikukiraho, nkaikiriza.”—Koffi, kuruga Benin.

• “Nkaba niinyenda kumanya embeera y’abafu. Nkaba niinyikiriza ngu abafu nibabaasa kukora kubi abahuriire, kwonka nkaba niinyenda kumanya eki Baibuli erikugamba. N’ahabw’ekyo nkatandika kwega Baibuli na munywani wangye owaabaire ari Omujurizi wa Yehova.”—José, kuruga Brazil.

• “Nkateeraho kushoma Baibuli kwonka tindagyetegyereize. Bwanyima Abajurizi ba Yehova bakantaayaayira baashoboorora gye obunabi bwingi bwa Baibuli. Nkaba niinyenda kureeba ekindi eki ndikubaasa kwega.”—Dennize, kuruga Mexico.

• “Nkaba niinyebuuza yaaba buzima Ruhanga naanfaho. Nkacwamu kushaba Ruhanga orikugambwaho omu Baibuli. Eizooba eryakuratsireho Abajurizi ba Yehova bakaiguza aha rwigi rwangye, kandi naikiriza kwega Baibuli.”—Anju, kuruga Nepal.

Eby’okureeberaho ebyo nibitwijutsya ebigambo bya Yesu ebirikugira ngu baine okushemererwa abaine ekyetengo ky’eby’omwoyo. (Matayo 5:3) Buzima, abantu omu buhangwa, baine ekyetengo ky’okumanya Ruhanga. Ruhanga wenka niwe arikubaasa kwigutsa ekyetengo ekyo, kandi naakikora kurabira omu Kigambo kye Baibuli.

Mbwenu shi, okwega Baibuli nikutwariramu ki? Nikubaasa kukugasira kuta? Ebibuuzo ebi nibigarukwamu omu kicweka ekirikukurataho.