Okufa Tiyo Muheru!

Besania ekaba eri haihi na Yerusaalemu nka mahiro ibiri. (Yohaana 11:18) Harikuburayo saabiiti nkye Yesu akaitwa, haine owafiire omuri Besania. Laazaaro, omwe ahari banywani ba Yesu ow’ahamara, akarwara munonga kandi yaafa.

Yesu ku yaahuriire amakuru, akagambira abeegi be ngu Laazaaro akaba agwejegyeire kandi ngu akaba naaza kumusisiimura. (Yohaana 11:11) Kwonka abeegi ba Yesu tibaramwetegyereize, n’ahabw’ekyo akabagambira butunu ati: “Laazaaro afiire.”​—Yohaana 11:14.

Bwanyima y’ebiro bina baherize kuziika Laazaaro, Yesu akahika Besania kuza kuhuumuriza Mariza munyaanya nyakufa. Mariza akagira ati: “Kuri obaire ori aha, munyaanyazi takufiire.” (Yohaana 11:17, 21) Yesu akamugarukamu ati: “Niinye kuzooka n’amagara; orikunyikiriza n’obu yaakufa, aryaba ohuriire.”​—Yohaana 11:25.Yesu kubaasa kworeka ngu ebigambo ebyo bihikire, akahika haihi n’ekituuro reero yaagamba n’eiraka rihango ati: “Laazaaro, shohora, oije.” (Yohaana 11:43) Abantu boona abaabaire bariho, kikabatangaaza munonga kureeba omuntu owaabaire afiire arikuzooka.

Yesu akaba aherize kuzoora abantu babiri enyimaho. Izooba rimwe akazoora omwishiki muto muhara wa Yairo. Yesu akagambira abantu ngu omwishiki ogwo agwejegyeire atakamuzoire.​—Luka 8:52.

Yetegyereze ngu okufa kwa Laazaaro n’okwa muhara wa Yairo Yesu akakugyeragyeranisa n’okugwejegyera. Okugyeragyeranisa okwo kuhikire. Ahabw’enki? Omuntu ogwejegyeire naaba ataine ki arikumanya kandi naaba ahuumwire atarikushaasha nari kubonabona. (Omubuurizi 9:5; reeba akabokisi “Okufa ni nk’Okugwejegyerera Kimwe.”) Abeegi ba Yesu aba ira bakaba nibeetegyereza gye amakuru g’okufa. “Abakuratsi ba Yesu bakaba nibamanya ngu okufa ni nk’okugwejegyera, kandi ekituuro ni nk’omwanya gw’okuhuumuriramu . . . Ahari abo abaafiire baine okwikiriza,”a nikwo ekitabo Encyclopedia of Religion and Ethics kyagizire.

Nikituhuumuriza kumanya ngu abafu nibaba bagwejegyeire omu kituuro kandi ngu tibarikubonabona. N’ahabw’ekyo, nituba tutakitiina kufa ahabw’okugira ngu nitukwetegyereza gye.

“OMUNTU KU AFA, AGARUKA ABAHO?”

N’obu kiraabe nikitushemeza kugwejegyera nyekiro, n’oha orikwenda kuguma agwejegyeire obutasisiimuka ebiro byona? Mbwenu shi abaafiire abagwejegyereire omu bituuro nibaija kuzooka nka Laazaaro na muhara wa Yairo?

Yobu akabuuza ekibuuzo nk’ekyo obu yaabaire ari haihi kufa. Akabuuza ati: “Omuntu ku afa, agaruka abaho?”​—Yobu 14:14.

Yobu arikugambira Ruhanga akagarukamu ekibuuzo kye ati: “Ku waakuunyeta, nkaakwetaba; kandi naiwe okaayetenga kureeba eki emikono yaawe yaakozire.” (Yobu 14:15) Yobu akaba naahamya ngu Yehova aine ekihika ky’okuzoora abaheereza be abeesigwa. Mbwenu shi Yobu akaba ainiire ekihika ekintu ekyabaire kitarikubaasa kubaho? Ngaaha buzima.

Abantu abu Yesu yaazoire n’obuhame ngu Ruhanga akamuha amaani g’okusingura Rufu. Kandi na Baibuli nayo neegira ngu Yesu aine “ebishumuruzo bya Rufu.” (Okushuuruurwa 1:18) Nk’oku Yesu yaabaire aine obushoboorozi bw’okuzoora Laazaaro, aine obushoboorozi bw’okuzoora abantu omu biro by’omumaisho.

Baibuli emirundi mingi neeyoreka ngu abantu nibaija kuzooka. Maraika akahamiza nabi Danieli ati: “Oryahuumura, oyemerere omu mwanya ogwakuteereirweho, aha muheru gw’ebyo biro.” (Danieli 12:13) Yesu akagambira Abasadukaayo, abeebembezi ba Abayudaaya abaabaire batarikwikiririza omu kuzooka ati: “Muhabire, ahabw’okutamanya Ebyahandiikirwe n’obu gaakuba amaani ga Ruhanga.” (Matayo 22:23, 29) Entumwa Paulo akagira ati: “Nyine amatsiko ahari Ruhanga . . . ngu haryabaho okuzooka kw’abahikiriire n’abatahikiriire.”​—Ebyakozirwe 24:15.

ABAFU NIBAIJA KUZOORWA RYARI?

Okuzooka kw’abahikiriire n’abatahikiriire nikwija kubaho ryari? Maraika akagambira Danieli ngu naija kuzoorwa “aha muheru gw’ebyo biro.” Mariza nawe akaba naikiriza ngu Laazaaro naija kuzooka “aha kuzooka okw’aha mperu.”​—Yohaana 11:24.

Baibuli neeyoreka ngu okuzooka oku okw’aha muheru nikwija kubaho Kristo yaaba naategyeka. Paulo akahandiika ati: “[Kristo] ashemereire kutegyeka okuhitsya obu arita abazigu be boona ahansi y’ebigyere bye. Omuzigu orihererukayo kwihwaho ni rufu.” (1 Abakorinso 15:25, 26) Egi niyo nshonga ahabw’enki tushemereire kushaba ngu Obukama bwa Ruhanga bwije n’ebi akunda bikorwe omu nsi.b

Nk’oku Yobu yaabaire nakimanya gye, Ruhanga aine ekihika ky’okuzoora abafu. Obwire obwo ku buraahikye, okufa nikwija kumarwaho. Kandi obwo tihaine origaruka kwebuuza ati: ‘Mbwenu shi okufa niyo muheru?’