Ramya Yehova Omugabe ow’Ebiro n’Ebiro

1, 2. (a) “Mukama otahwaho,” nooha kandi ahabw’enki ekitiinisa ekyo kimushemereire? (Reeba ekishushani aha kutandika.) (b) Ahabw’enki nitwenda Yehova abe niwe yaatutegyeka?

OMUGABE SOBHUZA II owa Swaziland akategyeka emyaka nka 61. Akategyeka obwire buraingwa waamugyeragyeranisa n’abagabe b’obunaku obu. N’obu omugabe Sobhuza araabe yaategyekire obwire buringwa, hariho omugabe otaine bugarukiro omu kutegyeka. Baibuli neemweta “Mukama otahwaho.” (1 Tim. 1:17) Omuhandiiki wa zaaburi akagamba aha iziina ry’ow’Obushoboorozi Bwona arikugira ngu Yehova “niwe Mugabe ebiro n’ebiro.”​—Zab. 10:16.

² Okugira ngu obutegyeki bwa Ruhanga tibwine bugarukiro nikimutaanisa aha butegyeki bw’abantu. Kwonka, omuringo ogu arikutegyekamu nigwo gurikutureetera kumwirira haihi. Omugabe owaategyekire Israeli kumara emyaka 40 akahimbisa Ruhanga ati: “MUKAMA n’omunyambabazi kandi omusaasizi; tarahuka kuguubwa kubi, kureka agira okusaasira kwingi. MUKAMA akahamya ekitebe kye eky’obukama omu iguru, n’obukama bwe butegyeka byona.” (Zab. 103:8, 19) Yehova n’Omugabe kandi Tataitwe ow’omu iguru oine rukundo. Eki nikireetaho ebibuuzo bibiri ebi: Ni mu muringo ki ogu Yehova ari nka Tataitwe? Yehova ayorekire ata ngu atwire ari Omugabe kuruga obu obugomi bwatandika omuri Edeni? Eby’okugarukamu omu bibuuzo ebyo nibiija kutuhwera kwirira haihi na Yehova kandi tumuramye n’omutima gwaitu gwona.

OMUGABE OW’EBIRO N’EBIRO AKAHANGA BAAMARAIKA N’ABANTU

3. N’oha ou Ruhanga yaabandize kuhanga, kandi abaana be abandi abu yaahangire ni baahi?

³ Yehova ka aine kuba yaashemereirwe obu yaahanga Omwana we nyamunegyere! Yehova taratwire mwana we nk’owa hansi. Kwonka, akamukunda nk’omwana we yaamukoresa omu kuhanga ebihangirwe ebindi ebihikiriire. (Kol. 1:15-17) Ebihangirwe ebyo hakaba harimu na baamaraika baingi. Barikugambwaho nk’abaheereza “be abakora ebi akunda,” baamaraika nibaheereza Ruhanga bashemereirwe kandi nawe naabaha ekitiinisa arikubeeta ‘abaana’ be. Ni bamwe aha baheereza ba Yehova.​—Zab. 103:20-22; Yob. 38:7.

4. Yehova akahanga ryari Abaheereza be ab’omu nsi?

⁴ Yehova ku yaaherize kuhanga iguru n’ensi, yaahanga n’abantu. Ku yaaherize kuhanga ensi eri nk’eka erikwemariirira, akahanga omuntu w’okubanza Adamu omu nshusha ye. (Kut. 1:26-28) Yehova akaba aine amatsiko ngu Adamu naija kumworobera. Ebi Yehova yaabaire naayenda ngu Adamu akuratire, akabimuha omu muringo gw’embabazi kandi ogwa rukundo. Ebiragiro ebyo bikaba bitarikubamaraho busingye.​—Shoma Okutandika 2:15-17.

5. Yehova akataho ntebeekanisa ki ey’okwijuza ensi?

⁵ Yehova tarikushushana n’abagabe b’ensi, we naaha abantu abu arikutegyeka obujunaanizibwa, arikubeesiga nka bamwe aha bari omu ka ye. Nk’eky’okureeberaho, akaha Adamu obushoboorozi aha byahangirwe byona, yaamuragiira n’okubiha amaziina. (Kut. 1:26; 2:19, 20) Ruhanga tarahangire abantu abahikiriire nyamwingi kwijuza ensi. Kureka, akacwamu kuhanga omukazi Haawa kuba muka Adamu. (Kut. 2:21, 22) Bwanyima, akabaha obujunaanizibwa bw’okuzaara abaana bakaijuza ensi. Mporampora abantu bakaahindwire ensi yoona kuba paradiso. Bakaba nibaija kuramya Yehova nk’abaheereza be. Buzima bakaba nibaija kutunga ebirungi bingi kandi ekyo kikooreka ngu Yehova akaba naabakunda!

ABAANA ABAGOMI BAKAANGA OBUTEGYEKI BWA RUHANGA

6. (a) Obugomi omu ka ya Ruhanga bukatandikaho buta? (b) Mbwenu shi obugomi obwo bukooreka ngu Yehova aremirwe?

⁶ Eky’obusaasi, Adamu na Haawa bakanga Ruhanga kuba omutegyeki waabo. Bakacwamu kukuratira omwana wa Ruhanga ow’omwoyo owaagomire. (Kut. 3:1-6) Obutegyeki obutari bwa Ruhanga bureetsireho obusaasi, okubonabona n’okufa aha baijukuru baabo boona. (Kut. 3:16-19; Rom. 5:12) Obwire obwo, Ruhanga akaba atakiine baheereza be abeesigwa omu nsi. Mbwenu shi eki nikimanyisa ngu akaba aremirwe kworeka obushoboorozi bwe aha bantu omu nsi? Ngaaha! Akooreka obushoboorozi bwe arikubinga Adamu na Haawa omu musiri, kandi yaataho na baamaraika kubazibira kugaruka. (Kut. 3:23, 24) Obwire obwo, akooreka rukundo ye ahabw’abantu arikuraganisa ngu naija kuhikiiriza ekigyendererwa kye. Akaraganisa ngu nihaija kubaho oruzaaro oruraacwekyereze Sitaane kandi rukaihaho ekibi ekyaretsirweho Adamu.​—Shoma Okutandika 3:15.

7, 8. (a) Omu bunaku bwa Noa ensi ekaba eri mu mbeera ki? (b) Yehova akataho ntebeekanisa ki kuboneza ensi n’okurinda abantu abeesigwa?

⁷ Omu byasha ebyakuratsireho, abantu abamwe bakacwamu kuguma bari abeesigwa ahari Yehova. Abeeli na Enoka nibo bamwe aharibo. Kwonka abantu abarikukira obwingi bakanga Yehova kuba Omugabe waabo kandi Ishebo. Nk’omu bwire bwa Noa ensi ekaba “eijwire eiraro.” (Kut. 6:11) Mbwenu shi eki kikaba nikimanyisa ngu Yehova aremirwe? Eki Baibuli neekigambaho ki?

⁸ Yehova akaragiira Noa kwombeka emeeri mpango ei we n’eka ye baabaire nibaza kuhonokyeramu. Yehova akooreka rukundo ei ainiire abantu obu yaaragiira Noa kuba “omurangi w’okuhikiirira.” (2 Pet. 2:5) Noa akahiga abantu kweteisa kandi yaabarabura n’aha kucwekyerezibwa okwabaire nikuza kubaho, kwonka tihaine owaahurikiize. Kumara emyaka mingi Noa n’eka ye bakaba nibatuura omu nsi eyaabaire erimu obushaarizi n’obushambani. Nk’omuzaire, Yehova akarinda abantu abo munaana kandi yaabaha n’omugisha. Yehova akacwekyereza abantu abagomi kandi ababi arikukoresa omwegyemure, kyayoreka ngu buzima takaremirwe. Buzima Yehova akooreka ngu aine obushoboorozi.​—Kut. 7:17-24.

OBWEBEMBEZI BWA YEHOVA BWANYIMA Y’OMWEGYEMURE

9. Yehova akaha abantu mugisha ki bwanyima y’Omwegyemure?

⁹ Noa n’eka ye kubashohoire kuruga omu meeri bakaba nibabaasa kwitsya omwoya murungi bari omu nsi nungi eboneziibwe barikushemererwa ahabwa Yehova kubarinda n’okubareeberera. Ahonaaho, Noa akombeka itambiro yaatambira Yehova ebitambo arikumuramya. Yehova akaha Noa n’eka ye omugisha yaabaragiira ati: “Muzaare, mukanye, mwijure ensi.” (Kut. 8:20–9:1) Abantu bakagira omugisha gw’okugarukamu kuramya Yehova n’okwijuza ensi.

10. (a) Bwanyima y’Omwegyemure okugomera obutegyeki bwa Yehova kukatandikira nkahi kandi kuta? (b) Yehova akakora ki kureetera ekigyendererwa kye kuhikiirira?

¹⁰ Kwonka omwegyemure tiguraihireho kutahikiirira, kandi Sitaane na baadaimoni bakaba nibakiteganisa abantu. Hakahinguraho obwire bukye abantu baagaruka baagomera obutegyeki bwa Yehova. Nk’eky’okureeberaho, mwizikuru wa Noa orikwetwa Nimuroodi akagomera Yehova. Nimuroodi naagambwaho ‘nk’omuhiigi rugambwa.’ Akombeka endembo z’amaani, nka Babeeli kandi yaaba omugabe omu nsi ya “Shinaari.” (Kut. 10:8-12) Mbwenu shi Yehova akaba naija kukorera ki omugabe ogu omugomi owaabaire naahakanisa ekigyendererwa kye eky’okwijuza ensi? Ruhanga akahindura orurimi rw’abantu, ekyareeteire abantu abu Nimuroodi yaabaire naategyeka “kutaataanira hoona omu nsi yoona.” Ei baagiire hoona, bakagumizamu n’okuramya kwabo okw’ebishuba n’obutegyeki bwabo bubi.​—Kut. 11:1-9.

11. Niki ekirikworeka ngu Yehova akaguma naarinda munywani we Abrahamu?

¹¹ N’obu abantu baingi baraabe baabaire nibaramya baaruhanga b’ebishuba bwanyima y’Omwegyemure, abantu abeesigwa bo bakagumizamu kuha Yehova ekitiinisa. Omwe aharibo akaba ari Abrahamu. Akaba aine eka nungi omuri Uri, kwonka akoorobera Yehova yaatsigaho orurembo orwo yaatandika kutuura omu mahema kumara emyaka mingi. (Kut. 11:31; Heb. 11:8, 9) Omu nsi ezi Abrahamu yaabaire atuuramu nk’omushuhuuki zikaba zirimu abagabe, kandi baingi aharibo bakaba nibatuura omu ndembo ezeetooroirwe engo. Kwonka Yehova akarinda Abrahamu hamwe n’eka ye. Omuhandiiki wa Zaaburi arikugamba aha ku Yehova arikurinda abantu be, akagira ati: “[Ruhanga] taraikiriize muntu weena kubakora kubi; akateisa abagabe ahabwabo.” (Zab. 105:13, 14) Yehova arikworeka ngu naija kuguma na munywani we Abrahamu, akamuragaanisa ati: ‘Abagabe baryakukomookamu.’​—Kut. 17:6; Yak. 2:23.

12. Yehova akooreka Misri ata ngu n’ow’obushoboorozi bwona, kandi eki kikakwata kita aha baheereza be?

¹² Ruhanga akaraganisa mutabani wa Abrahamu Isaaka n’omwijukuru Yakobo kubaha omugisha. Kandi ekyo kikaba nikitwariramu okukomookwamu abagabe. (Kut. 26:3-5; 35:11) Kwonka ekyo kitakabaireho, baijukuru ba Yakobo bakahinduka abahuuku omuri Misri. Mbwenu shi eki kikaba nikimanyisa ngu Yehova tarikwija kuhikiiriza ekiraganiso kye nari ngu takiine bushoboorozi aha nsi? Ngaaha buzima! Omu bunaku bwe obuhikire, Yehova akooreka amaani ge n’obushoboorozi bwe ahari Faraho owaabaire aine amaryo. Abaisraeli abaabaire bari omu bukwatwa bakeesiga Yehova, owaabacungwire omu muringo gw’omutaano kuraba omu Nyanja Erikutukura. Hatariho kubanganisa, Yehova akaba akiri ow’Obushoboorozi Bwona, kandi nk’omuzaire orikufayo, akakoresa amaani ge kurinda abaheereza be.​—Shoma Okuruga 14:13, 14.

YEHOVA AKABA OMUGABE W’ABAISRAELI

13, 14. (a) Abaisraeli bakagamba ki aha butegyeki bwa Yehova omu kweshongora? (b) Yehova akaraganisa ki Daudi aha bikwatiraine n’okuba omugabe?

¹³ Ahonaaho Abaisraeli baaheza kucungurwa, bakeeshongora ekyeshongoro barikuhimbisa Yehova. Ekyeshongoro ekyo ekiri omu Okuruga eshuura 15, orunyiriri 18 nikyoreka ngu Yehova “aryaguma aha ngoma ebiro byona.” Buzima, Yehova akaba Omugabe wa ihanga risya. (Bir. 33:5) Kwonka, abantu bakaba batamazirwe ahabw’okugira ngu Yehova Omutegyeki waabo akaba atarikureebwa. Bwanyima y’emyaka nka 400 baherize kuruga Misri, bakashaba Ruhanga kubateeraho Omugabe orikureebwa barikwenda kutooreza amahanga amakafiire. (1 Sam. 8:5) N’obu kiraabe kyabaire kityo, Yehova akaba akiri Omugabe kandi ekyo kikeeyoreka omu bunaku bwa Daudi omugabe wa Israeli owa kabiri.

¹⁴ Daudi akareeta eshanduukye y’endagaano omuri Yerusaalemu. Omu bwire obu obw’okushemererwa, Abaleevi bakeeshongora ekyeshongoro ky’okuhimbisa ekiri omu 1 Obusingye 16:31 aharikugira hati: “Bagambire omu mahanga nibagira bati: MUKAMA ari aha ngoma!” Omuntu naabaasa kwebuuza ati: ‘Obu Yehova ari Omugabe ow’ebiro n’ebiro, akaza ata aha ngoma omu bunaku obwo?’ Yehova akaba Omugabe ahabw’okugira ngu akakoresa obushoboorozi bwe kutoorana omuntu oraamujwekyere. Okumanya oku Yehova yaabaire Omugabe ni kikuru munonga. Daudi atakafiire, Yehova akamuraganisa ngu obugabe bwe bukaba nibwija kugumaho ebiro byona: “Ndyayemeka omwana waawe ou oryezaarira, akuhungurire, kandi mpamye obugabe bwe.” (2 Sam. 7:12, 13) Ekiraganiso eki kikahikiirira obu “mwijukuru” wa Daudi yaareebeka bwanyima y’emyaka erikurenga 1,000. Ogwo akaba ari oha, kandi ni ryari obu yaaba Omugabe?

YEHOVA OKUTOORANA OMUGABE OMUSYA

15, 16. Ni ryari obu Yesu yaatooranwa kuba Omugabe, kandi obu Yesu yaabaire ari omu nsi, akakora ntebeekanisa ki ey’obutegyeki bwe?

¹⁵ Omu gwa 29 Yesu aherize kuzaarwa, Yohaana Omubatizi akatandika kubuurira ngu “obukama bw’omu iguru bwiriire haihi.” (Mat. 3:2) Obu Yohaana yaabatiza Yesu, Yehova akashuka ahari Yesu amajuta kuba Mesia kandi nk’owaakubaire Omugabe w’Obukama bwa Ruhanga omu biro by’omumaisho. Yehova akooreka ngu naakunda Yesu arikukoresa ebigambo ebi: “Ogu n’Omwana wangye ou nkunda, kandi ou nshemerererwa munonga.”​—Mat. 3:17.

¹⁶ Yesu omu buheereza bwe bwona akahimbisa Ishe. (Yoh. 17:4) Ekyo akakikora arikubuurira aha Bukama bwa Ruhanga. (Luk. 4:43) Kandi akagambira abakuratsi be kushaba ngu Obukama obwo bwije. (Mat. 6:10) Ahabw’okugira ngu Yesu akaba naija kuba omugabe omu biro by’omumaisho, akabaasa kugambira abazigu be ati: “Obukama bwa Ruhanga” buri ahagati yaanyu. (Luk. 17:21) Bwanyima, omu mwabazyo ogwahererukireyo Yesu atakafiire, akakora endagano y’obukama n’abakuratsi be. Eki kikaba nikimanyisa ngu bamwe aha beegi be nibaija kuba abagabe hamwe na Yesu omu Bukama bwa Ruhanga.​—Shoma Luka 22:28-30.

17. Omu kyasha ky’okubanza Yesu akatandika kutegyeka baahi, kandi akaba aine kubanza kutegyereza ki?

¹⁷ Yesu akaba naija kutandika ryari kutegyeka nk’Omugabe w’Obukama bwa Ruhanga? Akaba atarikwija kukikora ahonaaho. Omu mwabazyo ogu Yesu yaitiirweho, abakuratsi be bakataataana. (Yoh. 16:32) Kwonka, nk’oku kyabaire kiri enyima, Yehova akaguma aine obushoboorozi. Aha kiro kya kashatu, Yehova akazoora omwana we kandi aha Pentekoote omu gwa 33, Yesu akatandika kwebembera ekibiina Ekikristaayo eky’abashukirweho amajuta. (Kol. 1:13) Kwonka Yesu mwijukuru wa Daudi owaaraganisiibwe, akaba aine kubanza yaategyereza kubaasa kuheebwa obushoboorozi bw’okutegyeka ensi yoona omu bwijwire. Yehova akagambira Omwana we ati: “Shutama aha rubaju rwangye rwa buryo, okuhitsya obu ndigira abazigu baawe akatebe k’ebigyere byawe.”​—Zab. 110:1.

RAMYA OMUGABE OW’EBIRO N’EBIRO

18, 19. Nituhigwa kukora ki, kandi nitwija kwega ki omu kicweka ekirikukurataho?

¹⁸ Kumara emyaka mingi, obutegyeki bwa Yehova bukateganisibwa omu iguru n’omu nsi. Kwonka Yehova atwire aine obushoboorozi kandi arikutegyeka. Nk’omuzaire, akarinda kandi yaareeberera abaheereza be nka Noa, Abrahamu, na Daudi. Eki kishemereire kutuhiga kworobera Omugabe waitu kandi tukamwirira haihi.

¹⁹ Kwonka nitubaasa kwebuuza tuti: Yehova n’Omugabe mu muringo ki obunaku obu? Nitubaasa kworeka tuta ngu nitworobera Obukama bwa Yehova kandi ngu turi abaheereza be abeesigwa? Nikimanyisa ki okushaba ngu Obukama bwa Ruhanga bwije? Ebibuuzo ebi nibiija kugarukwamu omu kicweka ekirikukurataho.