Obukama Obumazire Emyaka 100 Bukugasiire Buta?
‘Mukama Ruhanga, ebi waakozire ni bikuru kandi n’eby’okutangaaza; Mukama w’amahanga.’—KUSH. 15:3.
1, 2. Obukama bwa Ruhanga nibwija kukora ki, kandi ahabw’enki turikuhamya ngu nibwija kwija?
OMU gwa 31 Yesu aherize kuzaarwa, aha rushozi haihi na Kaperenaumu, Yesu akeegyesa abakuratsi be kushaba bati: “Obukama bwawe bwije.” (Mat. 6:10) Obunaku obu, baingi nibabangaanisa yaaba Obukama nibuza kwija. Kwonka, twine amatsiko ngu okushaba okwo nikwija kugarukwamu.
2 Yehova naija kukoresa Obukama bwe kugaita hamwe ebihangirwe bye eby’omu iguru n’ebya omu nsi. Ekigyendererwa kye ekyo nikiija kuhikiirira. (Isa. 55:10, 11) Ebibaireho omu myaka 100 ehingwire nibyoreka ngu buzima Yehova yaabaire Omugabe. Ruhanga naakorera abaheereza be abeesigwa ebirungi bingi kandi ebirikushemeza. (Zek. 14:9; Kush. 15:3) Kwonka, Yehova okuba Omugabe nikitaana n’okwija kw’Obukama bwa Ruhanga obu Yesu yaatwegyeise kushaba ngu bwije. Ebi nibitaana bita kandi nibitukwataho bita?
OMUGABE OU YEHOVA ATORAINE YAATANDIKIRE KUHIKIIRIZA OMURIMO GWE
3. (a) Yesu akatandika ryari kutegyeka, kandi nkahi? (b) Noobaasa kworeka ota obuhame ngu Obukama bwa Ruhanga bukatandika kutegyeka 1914? (Reeba obugambo obw’ahansi.)
3 Ekyasha kya 19 kiri haihi kuhendera, obunabi obwahandiikirwe nabi Danieli emyaka nka 2,500 enyima, bukatandika kwetegyerezibwa: “Omu busingye bw’abo bagabe Ruhanga w’omu iguru aryataho obundi bugabe, obutaricwekyerezibwa ebiro byona.” (Dan. 2:44) Abeegi ba Baibuli bakaba bamazire emyaka mingi barikuteekateeka ngu omwaka 1914 nigwija kubamu ekintu ky’omutaano. Abantu baingi obunaku obwo bakaba baine amatsiko mingi. Bakaba bari nk’omuhandiiki omwe owaagizire ati: “Ensi omuri 1914 ekaba eine amatsiko g’ebirungi.” Bwanyima y’Orutaro rw’Ensi Yoona I kutandika omu mwaka ogwo, obunabi bwa Baibuli bukahikiirira. Enjara, emitsisa, endwara nyingi n’obunabi bwa Baibuli obundi, bikooreka ngu Yesu akaba yaatandikire kutegyeka omu iguru nk’Omugabe omuri 1914.a Yehova ku yaatooraine Omwana we kuba Omugabe, nawe akaba Omugabe omu muringo gw’omutaano!
4. Yesu akakora ki ahonaaho yaaheza kwemekwa nk’Omugabe, kandi bwanyima akakora ki?
4 Ekigyendererwa kya Yesu eky’okubanza kikaba kiri okurwanisa omuzigu omukuru owa Ishe, niwe Sitaane. Yesu na baamaraika be bakabinga Omuregi na baadaimoni be kuruga omu iguru. Eki kikareetaho okushemererwa omu iguru kwonka haabaho okubonabona omu nsi. (Shoma Okushuuruurwa 12:7-9, 12.) Ekyakuratsireho, Omugabe akata omutima aha bu araategyekye omu nsi, kubashemeza, kubatendeka, n’okubatebeekanisa kukora ebi Ruhanga akunda. Ka tureebe oku abantu baikiriize ebintu ebi bishatu ebi Omugabe yaatandikire kukora n’eki turikubeegyeraho.
OMUGABE W’OBUKAMA KUSHEMEZA ABU ARAATEGYEKYE
5. Ni kushemezibwa ki okwabaireho kuruga 1914 kuhitsya aha kutandika kwa 1919?
5 Yesu ku yaaherize kubinga Sitaane na baadaimoni be omu iguru, Yehova akamwohereza kushwijuma n’okuboneza abakuratsi be ab’omu nsi omu by’omwoyo. Nabi Malaki akakishoboororaho nk’okushemezibwa okw’eby’omwoyo. (Mal. 3:1-3) Ebyafaayo nibyoreka ngu eki kikabaho kuruga 1914 kuhitsya aha kutandika kwa 1919.b Ku turaabe nitwenda kuba bamwe aha baheereza ba Yehova, twine kuba abashemeire, nari abarikwera. (1 Pet. 1:15, 16) Twine kwetantara amadiini g’ebishuba nari eby’obutegyeki eby’ensi egi.
6. Eby’okurya eby’omwoyo nitubitunga tuta, kandi eby’okurya ebyo nibituhwera bita?
6 Bwanyima y’ekyo Yesu akakoresa obushoboorozi bwe nk’Omugabe kutoorana ‘omwambari ow’okwesigwa kandi ow’obwengye.’ Omwambari ogwo akaba naija kuguma naaha “obusyo bumwe” eby’okurya eby’omwoyo arikwebemberwa Yesu. (Mat. 24:45-47; Yoh. 10:16) Kuruga 1919, ab’eishe-emwe bakye abashukirweho amajuta batwire nibahikiiriza obujunaanizibwa bwabo obw’okuriisa “ab’omu ka ye.” Eby’okurya eby’omwoyo ebi omwambari arikutuha nibituhwera kugira okwikiriza kuhami. Eki nikihamya okumariirira kwaitu kuguma turi abeecumi omu by’omwoyo, omu micwe, omu by’omubiri, n’ebiteekateeko. Eby’okurya ebi nibitutendeka kandi bitubaasisa kwejumbira kimwe omu murimo mukuru ogurikukorwa omu nsi obunaku obu. Butoosha norya eby’okurya ebyo eby’omwoyo?
OMUGABE NAATENDEKA ABU ARAATEGYEKYE KUBUURIRA OMU NSI YOONA
7. Ni murimo ki omukuru ogu Yesu yaatandikireho omu nsi, kandi gukaba nigwija kugumizamu kuhitsya ryari?
7 Obu Yesu yaatandika obuheereza bwe omu nsi, akagira ati: “Nshemereire kubuurira ebigambo ebirungi by’Obukama bwa Ruhanga omuri tauni ezindi nazo; ahabw’okuba nikyo naatumiirwe.” (Luk. 4:43) Emyaka eshatu n’ekicweka ei Yesu yaamazire naabuurira, omurimo ogwo akagutwara nka mukuru. Akaragiira abeegi be ati: “Omu kugyenda mugyende nimugamba muti: Obukama bw’omu iguru bwiriire haihi.” (Mat. 10:7) Yesu ku yaaherize kuzooka, yaagambira abakuratsi ngu bakaba baine kubuurira amakuru aga “n’okuhitsya aha muheru gw’ensi.” (Byak. 1:8) Akabaraganisa ngu akaba naija kuba hamwe nabo omu murimo ogu mukuru kuhitsya n’omu bunaku bwaitu.—Mat. 28:19, 20.
8. Omugabe w’Obukama bwa Ruhanga akahiga ata abakuratsi be omu nsi kubuurira?
8 Omuri 1919, “engiri egi ey’obukama” ekatwarirwamu ekintu kisya. (Mat. 24:14) Omugabe w’Obukama bwa Ruhanga akaba naategyeka omu iguru, kandi akaba aherize kutoorana n’okushemeza abakuratsi be bakye omu nsi. Bakakorera aha kiragiro kya Yesu eky’okubuurira amakuru marungi g’Obukama bwa Ruhanga omu nsi yoona. (Byak. 10:42) Nk’eky’okureeberaho, omu Kwamwenda 1922 ababuurizi b’Obukama abarikuhika haihi 20,000 bakateeranira hamwe omuri Cedar Point, Ohio, U.S.A. Teekateeka aha kushemererwa okwabaireho obu Ow’eishe-emwe Rutherford yaaha orubazo orwine omutwe “Obukama,” reero akagira ati: “Mureebe, Omugabe naategyeka! Niimwe mutoorainwe kuranga ebirikumukwataho. N’ahabw’ekyo murangye, murangye, murangye, omugabe n’obugabe bwe.” Ababuurizi enkumi ibiri abaabaire bariho bakeejumba omu kubuurira aha “Izooba ry’Obuheereza” ery’omutaano barikugyenda mahiro 45 kuhika omu maka g’abantu kuruga ahu oruteerane rwabaire ruri. Omwe aha babuurizi akagira ati: “Tindikubaasa kwebwa oku baatuhigire kuranga Obukama n’omujinya gw’abo abaabaire bariho!”
9, 10. (a) Ni ntebeekanisa ki ezitairweho kutendeka ababuurizi b’Obukama? (b) Ogasiirwe ota omu kutendekwa oku?
9 Omuri 1922, ababuurizi b’Obukama abarikurenga omuri 17,000 bakaba nibabuurira omu mahanga 58 omu nsi yoona. Kwonka, bakaba baine kutendekwa. Omu kyasha ky’okubanza, Omugabe akahabura abeegi oku baraabuurire, ebi baraabuurire, n’ahu baraabuurire. (Mat. 10:5-7; Luk. 9:1-6; 10:1-11) N’obunaku obu, Yesu naahamya ngu abo boona abarikwejumba omu kubuurira baatunga okutendekwa n’eby’okukoresa ebirikubahwera kubuurira gye. (2 Tim. 3:17) Kurabira omu kibiina Ekikristaayo, Yesu naatendeka abakuratsi be omu murimo gw’okubuurira. Omuringo gumwe ogu arikubatendekamu n’okukoresa Eishomero ry’Obuheereza omu bibiina ebirikurenga 111,000 omu nsi yoona. Barikugyendera aha kwegyesibwa okwo, ababuurizi abarikurenga omu bukaikuru mushanju batendekirwe kubuurira n’okwegyesa abantu b’emiringo yoona.—Shoma 1 Abakorinso 9:20-23.
10 Okwongyerera aha Ishomero ry’Obuheereza, hatairweho amashomero agandi kubaasa kutendeka abareeberezi b’ekibiina, baapayoniya, ab’eishe-emwe abatakagiire mu bushwere, Abakristaayo abashweraine, abari aha Kakiiko k’Eitaagi n’abakazi baabo, abareeberezi abarikutaayaayira Ebibiina n’abakazi baabo n’abamiisani.c Bamwe aha baagiire omu Eishomero ery’Abakristaayo abashweraine bakooreka okusiima kwabo barikugira bati: “Okutendekwa okw’omutaano oku twatungire kwongyeire ahari rukundo ei twiniire Yehova kandi kituhwereire kwongyera kumanya gye oku turikubaasa kuhwera abantu abandi.”
11. Ababuurizi b’Obukama babaasize bata kugumisiririza okuhiiganisibwa?
11 Omuzigu Sitaane naamanya oku omurimo gw’okubuurira n’okwegyesa abantu Baibuli gurikugyenda omu maisho. Naakoresa emiringo yoona kuremesa omurimo gw’okubuurira n’abo abarikugwejumbamu. Kwonka tarikwija kusingura. Yehova omwana we amutaire “ahaiguru munonga y’obutegyeki bwona n’obushoboorozi bwona n’amaani goona n’obugabe bwona.” (Efe. 1:20-22) Yesu naakoresa obushoboorozi bwe nk’Omugabe kurinda n’okuha obuhabuzi abeegi be kuhamya ngu baakora ebi Ishe akunda.d Amakuru marungi nigabuurirwa, kandi abantu nyamwingi abacureezi nibeegyesibwa emihanda ya Yehova. Ka n’omugisha gw’amaani kwejumba omu murimo ogu omukuru!
OMUGABE NAATEBEEKANISA ABU ARAATEGYEKYE KWEJUMBA OMU BUHEEREZA
12. Yoreka empindahinduka ezitwire nizibaho kuruga obu Obukama bwateebwaho.
12 Kuruga obu Obugabe buteebwaho omu 1914, Omugabe waabwo atwire naatebeekanisa abakuratsi be kukora ebi Ishe akunda. (Shoma Isaaya 60:17.) Omuri 1919, buri kibiina kikatoorana orikutebeekanisa eby’obuheereza kwebembera omurimo gw’okubuurira. Omuri 1927 hakatandikaho entebeekanisa y’okubuurira enju aha nju aha Sande. Omuri 1931 abarikushagika eby’Obukama, bakeetwa eiziina Abajurizi ba Yehova kuruga omu Byahandiikirwe. (Isa. 43:10-12) Omuri 1938, abarikuheereza omu kibiina bakatandika kutooranwa omwoyo gurikwera omu mwanya gw’okuteererwa akaruuru. Omuri 1972, obujunaanizibwa bw’okureeberera ekibiina bukaheebwa akakiiko k’abareeberezi omu mwanya gw’okuheebwa omureeberezi omwe omu kibiina. Boona abaabaire bahikire kuba abareeberezi nari abaheereza bakahigwa kwejumba omu murimo ‘gw’okuriisa gye obusyo bwa Ruhanga, obu baakwatsiibwe.’ (1 Pet. 5:2) Omuri 1976, hakateebwaho Obukiiko mukaaga obw’Akakiiko Akareeberezi kureeberera omurimo gw’okubuurira omu nsi yoona. Kuruga obwo, Yesu atwire naatebeekanisa abakuratsi be mporampora kukora ebintu nk’oku Ruhanga arikukunda.
13. Obukama obumazire emyaka 100 burikutegyeka bukugasiire buta?
13 Teekateeka aha bi Omugabe w’Obukama bwa Ruhanga ahikiriize omu myaka 100 ey’okutegyeka kwe. Ashemeize abantu abarikwetererwa eiziina rya Yehova. Ayebembeire omurimo gw’okubuurira amakuru g’Obukama omu mahanga 239, kandi atendekire abantu nyamwingi emihanda ya Yehova. Ahwereire abantu abarikurenga obukaikuru mushanju kugira obumwe, buri omwe arikwehayo ayekundiire kukora ebi Ruhanga akunda. (Zab. 110:3) Buzima Ruhanga akozire eby’amaani kandi ebirikushemeza kurabira omu Bukama. Kandi akiineyo ebindi bingi ebi araakore omu bwire bw’omumaisho!
EBIRUNGI EBIRAAREETWEHO OBUKAMA OMU BIRO BY’OMUMAISHO
14. (a) Nikimanyisa ki okugira ngu: “Obukama bwawe bwije”? (b) Ekyahandiikirwe ky’omwaka ekya 2014 nikiiha, kandi ahabw’enki ebigambo ebyo nibihikaana n’obunaku obu?
14 N’obu Yehova araabe yaataireho Omwana we Yesu Kristo kuba Omugabe omuri 1914, oku kukaba kutari kugarukamu omu bwijwire okushaba okurikugira ngu “Obukama bwawe bwije.” (Mat. 6:10) Baibuli ekagira ngu Yesu akaba naija ‘kutegyeka ahagati omu bazigu be.’ (Zab. 110:2) Obutegyeki bw’abantu oburikwebemberwa Sitaane nibuhakanisa Obukama bwa Ruhanga. N’ahabw’ekyo, ku turikushaba ngu Obukama bwa Ruhanga bwije, nituba nitushaba Ruhanga ngu Omugabe n’abu araategyekye nabo baije bacwekyereze obutegyeki bw’abantu oburikuhakanisa Obukama bwa Ruhanga. Eki nikiija kuhikiiriza ebiri omu Danieli 2:44 aharikugira ngu Obukama bwa Ruhanga “buryayatagura obwo bugabe bwona, bubumareho.” Obukama bwa Ruhanga nibwija kwihiraho kimwe abazigu baabwo. (Kush. 6:1, 2; 13:1-18; 19:11-21) Ekyo kiri haihi kubaho. Nikihikaana n’ebiri omu kyahandiikirwe ky’omwaka ekya 2014, kuruga omuri Matayo 6:10 ekirikugira kiti: “Obukama bwawe bwije.” Hahingwireho emyaka 100 okwiha obu Yesu yaatandika kutegyeka nk’Omugabe omu iguru!
Ekyahandiikirwe ky’omwaka 2014: “Obukama bwawe bwije.”—Matayo 6:10
15, 16. (a) Ni bintu ki ebirikushemeza ebiraabeho omu butegyeki bw’emyaka rukumi? (b) Niki eki Yesu araahererukye kukora nk’Omugabe w’Obukama bwa Ruhanga, kandi ekyo nikiija kukwata kita aha kigyendererwa kya Ruhanga ahabw’ebihangirwe bye?
15 Omugabe ku araije kucwekyereza abazigu ba Ruhanga, naija kuboha Sitaane na baadaimoni be kumara emyaka rukumi. (Kush. 20:1-3) Obubi ku buraahweho, Obukama bwa Ruhanga nibwija kugumizamu kuhwera abantu kugasirwa omu kitambo kya Yesu n’okwihaho ekibi kya Adamu. Omugabe naija kuzoora abantu nyamwingi abaafiire kandi naija kutaho entebeekanisa y’okubeegyesa ebirikukwata ahari Yehova. (Kush. 20:12, 13) Ensi yoona neija kushusha nk’oku omusiri Edeni gwabaire guri. Abantu boona abeesigwa nibaija kuba abahikiriire.
16 Obukama nibwija kuhikiiriza ekigyendererwa kya Ruhanga omu myaka rukumi ei Yesu araamare arikutegyeka. Bwanyima, Yesu naija kugarurira Ishe obutegyeki. (Shoma 1 Abakorinso 15:24-28.) Nihaija kuba hatakiriho omuteerani w’abantu na Ruhanga. Abaana ba Ruhanga ab’omu iguru n’ab’omu nsi nibaija kuba eka emwe.
17. Omaririire kukora ki ahabw’Obukama?
17 Ebibaireho omu myaka 100 ei Obukama bwa Ruhanga bumazire burikutegyeka nibituhamiza ngu Yehova ariyo naakora kandi naija kuhikiiriza ekigyendererwa kye ahabw’ensi. Ka tugumizemu tuhamiire aha Mugabe w’Obukama bwa Ruhanga turikuranga omugabe ogwo hamwe n’Obukama bwe. Nitukora ekyo twine obuhame ngu Yehova ari haihi kugarukamu okushaba kwaitu oku: “Obukama bwawe bwije”!
a Reeba akatabo Niki Eki Baibuli Buzima Erikwegyesa? orupapura 88-92.
c Reeba Watchtower eya Seputemba 15, 2012, orupapura 13-17, “Amashomero g’Obuheereza n’Obuhame ngu Yehova Naatukunda.”
d Reeba Watchtower eya Desemba 1, 1998, orupapura 19-22, kureeba eby’okureeberaho by’emishango eyaasingirwe omu mahanga maingi.