Obukama bwa Ruhanga Niki?

1. Obukama bwa Ruhanga niki?

Obukama bwa Ruhanga n’obutegyeki oburi omu iguru. Nibwija kwihaho obutegyeki obundi bwona kandi bubaasise ebi Ruhanga akunda kukorwa omu nsi nk’oku bikorwa omu iguru. Amakuru agarikukwata aha Bukama bwa Ruhanga ka ni marungi! Juba Obukama bwa Ruhanga nibwija kureetera abantu boona omu nsi kugira obumwe, buhikiirize ekyetengo kyabo eky’okwenda obutegyeki burungi.​—Shoma Danieli 2:44; Matayo 6:9, 10; 24:14.

Obukama bushemereire kuba bwine omugabe. Yehova akatoorana Omwana we Yesu Kristo, kuba Omugabe w’Obukama Bwe.​—Shoma Okushuuruurwa 11:15.

2. Ahabw’enki Yesu n’Omugabe murungi?

Yesu niwe mutegyeki murungi ahakuba aine embabazi kandi naahamira aha bihikire. (Yohaana 1:14) Kandi aine amaani maingi g’okuhwera abantu ahakuba naija kutegyeka ensi ari omu iguru. Ku yaazookire, yaatemba omu iguru yaashutama aha rubaju rwa buryo orwa Yehova. (Abaheburaayo 10:12, 13) Bwanyima, Ruhanga akamuha obushoboorozi kutandika kutegyeka.​—Shoma Danieli 7:13, 14.

3. Ni baahi abaraategyeke na Yesu?

Ekibiina ‘ky’abarikwera’ nibaija kutegyeka na Yesu omu iguru. (Danieli 7:27) Entumwa za Yesu nibo abarikwera abaabandize kutooranwa. Yehova akagumizamu naatoorana abashaija n’abakazi abeesigwa nk’abarikwera okuhitsya na hati. Nibazoorwa baine omubiri gw’omwoyo nka Yesu.​—Shoma Yohaana 14:1-3; 1 Abakorinso 15:42-44.

Ni bangahi abaraaze omu iguru kutegyeka na Yesu? Yesu akabeeta “obusyo obukye.” (Luka 12:32) Nibaija kuhika 144,000. Bo na Yesu nibaija kutegyeka ensi.​—Shoma Okushuuruurwa 14:1.

4. Niki ekyabaireho Yesu ku yaatandikire kutegyeka?

Obukama bwa Ruhanga bukatandika kutegyeka omuri 1914.a Yesu eki yaabandize kukora n’okunaga Sitaane na baadaimoni be omu nsi. Sitaane akagira ekiniga kingi yaatandika kureeta oburemeezi omu nsi yoona. (Okushuuruurwa 12:7-10, 12) Okuruga obwo, oburemeezi omu nsi butwire nibweyongyera. Entaro, enjara, endwara n’emitsitsa byona ‘n’akamanyiso’ akarikworeka ngu Obukama bwa Ruhanga buri haihi kutandika kutegyeka ensi.​—Shoma Luka 21:7, 10, 11, 31.

5. Obukama bwa Ruhanga buriyo nibuhikiiriza ki?

Kurabira omu murimo gw’okubuurira omu nsi yoona, buriyo nibuhwera abantu baingi omu mahanga goona kugira obumwe. Abantu baingi abacureezi bariyo nibaikiriza Yesu kuba omutegyeki waabo. Obukama bwa Ruhanga nibwija kubarinda bwaba nibucwekyereza ensi egi embi. N’ahabw’ekyo boona abarikwenda kugasirwa omu Bukama obwo baine kworobera Yesu.​—Shoma Okushuuruurwa 7:9, 14, 16, 17.

Omu myaka 1,000, Obukama obu nibwija kuhikiiriza ekigyendererwa kya Ruhanga ahabw’abantu. Obwo ensi yoona neija kuhinduka paradiso. Bwanyima, Yesu naija kugarurira Ishe Obukama. (1 Abakorinso 15:24-26) Noobaasa kugambira abandi aha Bukama bwa Ruhanga?​—Shoma Zaaburi 37:10, 11, 29.