Eishomo 6

Obukama bwa Ruhanga n’Enki?

Obukama bwa Ruhanga buri nkahi? (1) Omugabe waabwo n’oha? (2)

Hariho abandi abari kutegyeka n’Omugabe ogwo? Ku kiraabe kiri kityo nibangahi? (3)

N’enki ekiri kwooreka ngu turi omu biro by’aha mperu? (4)

Obukama bwa Ruhanga buryakorera ki abantu omu biro by’omu maisho? (5-7)

1. Obu yabaire ari omu nsi Yesu akeegyesa abakuratsi be kushaba Obukama bwa Ruhanga. Obukama ni gavumenti eri kwebemberwa omukama. Obukama bwa Ruhanga ni gavumenti y’omutaano. Eri omu iguru kandi neija kutegyeka ensi yoona. Neija kweeza eiziina rya Ruhanga. Neija kureetera Ruhanga ebi akunda kukorerwa omu nsi nk’oku bikorerwa omu iguru.—Matayo 6:9, 10.

2. Ruhanga akaraganisa ngu Yesu aryaaba Omugabe, omu Bukama Bwe. (Luka 1:30-33) Yesu obu yabaire ari omu nsi, akooreka nk’owakubaire Omutegyeki w’embabazi, ow’amazima kandi ohikiriire. Ku yagarukireyo omu iguru tarashutamiibwe ha kitebe nk’Omugabe w’Obukama bwa Ruhanga aho naaho. (Abaheburaayo 10:12, 13) Omu gwa 1914, Yehova akaha Yesu obushoborozi Obu yabaire omuraganiise. Okuruga obwo Yesu atuura nategyekyera omu iguru nk’Omugabe owayemekirwe Yehova.—Danieli 7:13, 14.

3. Yehova kandi atooraine bamwe aha bashaija n’abakazi abeesigwa okuruga omu nsi kuza omu iguru. Baryategyekyera hamwe na Yesu nk’abagabe, abaramuzi kandi abanyamurwa b’abantu. (Luka 22:28-30; Okushuuruurirwa 5:9, 10) Aba abari tegyekyera hamwe nawe omu Bukama bwe, Yesu akabeeta “obusyo obukye.” Omubaro gwaabo ni 144,000.—Luka 12:32; Okushuuruurirwa 14:1-3.

4. Aho naaho Yesu yaheza kuba Omugabe akanaga Sitaani na ba maraika be ababi kuruga omu iguru kuza ahu ensi eri. Egi niyo nshonga ahabw’enki ebintu bisisikaire munonga omunsi okuruga 1914. (Okushuuruurirwa 12:9, 12) Engamba, enjara, endwaara, n’okweyongyera kw’obugomi—ebi byoona n’ekicweeka kya “akamanyiso” akari kwooreka ngu Yesu nategyeka kandi ngu, obwiire obu buri omu biro byaabwo eby’aha mperu.—Matayo 24:3, 7, 8, 12; Luka 21:10, 11; 2 Timoseo 3:1-5.

5. Aho naaho Yesu naija kucweera abantu orubanja, arikubashoroora nkoku omuriisa ashoroora entaama omu mbuzi. “Entaama” naabo abaryeyoreka ku bari abantu be abeesigwa. Baryatunga amagara agatahwaho omu nsi. “Embuzi” naabo abariba bangire Obukama bwa Ruhanga. (Matayo 25:31-34, 46) Omu bwiire butari bwa hare, Yesu naija kuhwerekyereza boona abari kushushanisibwa embuzi. (2 Abatesalonika 1:6-9) Ku oraabe noyenda kuba emwe aha ‘ntaama’ za Yesu, noragirwa, kuhurikiza amakuru g’Obukama n’okugyendera aha by’ori kweega.—Matayo 24:14.

6. Hati ensi ebaganisibwemu amahanga maingi. Buri rimwe riine gavumenti yaaryo. Amahanga aga nigarwanagana obutoosha. Kwonka Obukama bwa Ruhanga nibwija kwihaho gavumenti z’abantu zoona. Nibwo buri kwiija kuba gavumenti yonka, eri kutegyeka ensi yoona. (Danieli 2:44) Obwo tiharibaho ngamba, obugomi n’obwitsi. Abantu boona baryatuura hamwe bakwataniise omu busingye.—Miika 4:3, 4.

7. Omu Butegyeki bwa Yesu obw’Emyaaka Rukumi, abantu abeesigwa baryahinduka abahikiriire n’ensi yoona eryahinduka ekibanja kya Ruhanga. Aha muheru gw’emyaaka rukumi Yesu aryaaba yaherize kukora buri kimwe eki Ruhanga yamuragiire. Obwo aryagarurira Ishe Obukama. (1 Abakorinso 15:24) Ahabw’enki otari kugambira banywaani baawe n’ab’ori kukunda aha by’Obukama bwa Ruhanga buri kora?

[Ekishushani ekiri aha rupapura 13]

Ahansi y’obutegyeki bwa Yesu tiharigaruka kubaho obwangani nari obutaikirizana