Obukama Bwa Ruhanga Niki?

1. Ni kushaba ki okurikumanywa gye oku turikuza kushwijuma?

ABANTU baingi munonga omu nsi yoona nibamanya okushaba oku baingi barikweta Okushaba kwa Mukama Waitu. Yesu akakoresa okushaba oku kwegyesa abeegi be oku bashemereire kushaba. Akashaba aha bikwatiraine na ki? Kandi ahabw’enki okushaba oku ni kukuru ahariitwe obunaku obu?

2. Ni bintu ki bishatu ebikuru ebi Yesu yaatwegyeise kushaba?

² Yesu akagira ati: “N’ahabw’ekyo mushabe muti: Tataitwe ow’omu iguru, eiziina ryawe ryezibwe. Obukama bwawe bwije. Ebi okunda bikorwe omu nsi nk’oku bikorwa omu iguru.” (Shoma Matayo 6:9-13.) Ahabw’enki Yesu yaatwegyeise kushaba aha bikwatiraine n’ebintu bishatu?—Reeba Ebirikukiraho 20.

3. Niki eki tushemereire kumanya aha Bukama bwa Ruhanga?

³ Twegire ngu eiziina rya Ruhanga ni, Yehova. Kandi twegire aha bikwatiraine n’ekigyendererwa eki Ruhanga ainiire abantu n’ensi. Kwonka shi Yesu akaba naamanyisa ki obu yaagira ati: “Obukama bwawe bwije”? Nitwija kwega eki Obukama bwa Ruhanga burikumanyisa, eki buraakore, n’oku buraayeze eiziina rya Ruhanga.

OBUKAMA BWA RUHANGA NIKI?

4. Obukama bwa Ruhanga niki, kandi Omugabe waabwo n’oha?

⁴ Yehova akataho gavumenti omu iguru kandi yaatoorana Yesu kuba Omugabe waayo. Baibuli neegira ngu gavumenti egi n’Obukama bwa Ruhanga. Yesu niwe “Omugabe w’abagabe kandi Omukama w’abakama.” (1 Timoseo 6:15) Yesu aine obushoboorozi bw’okukora ebirungi ebirikukira aha bi omutegyeki weena arikubaasa kukora kandi aine amaani kukira abategyeki boona waabagaita hamwe.

5. Gavumenti ya Ruhanga neetegyekyera nkahi, kandi neija kutegyeka ki?

⁵ Yesu akagaruka omu iguru bwanyima y’ebiro makumi ana aherize kuzooka. Ku haahingwireho obwire, Yehova yaamutoorana kuba Omugabe w’Obukama bwe. (Ebyakozirwe 2:33) Gavumenti ya Ruhanga neija kutegyeka ensi erikwema omu iguru. (Okushuuruurwa 11:15) Egi niyo nshonga ahabw’enki Baibuli neegira ngu Obukama bwa Ruhanga ‘n’obukama bw’omu iguru.’—2 Timoseo 4:18.

6, 7. Niki ekirikureetera Yesu kukira abagabe boona ab’abantu?

⁶ Baibuli neegira ngu Yesu naakira abagabe b’abantu, ahabw’okuba “niwe wenka oine okutafa.” (1 Timoseo 6:16) Abagabe b’abantu nibarugaho bafa, kwonka Yesu we tarikwija kufa. Ebirungi byona ebi Yesu araatukorere nibiija kugumaho ebiro byona.

⁷ Obunabi bwa Baibuli nibugira ngu Yesu naija kuba Omugabe murungi kandi omunyambabazi. Nibugira buti: ‘Omwoyo gwa Mukama guryaguma ahariwe, agire omwoyo gw’obwengye n’okwetegyereza, omwoyo gw’okuhanuura n’obushoboorozi, omwoyo gw’okumanya n’okutiina Mukama. Omu kutiina Mukama nimwo arishemerererwa. Taricwa rubanja rw’amaisho, n’obu rwakuba orw’okugambirwa, kureka aryacwera abooro emanja omu kuhikiirira, n’abacureezi b’omu nsi aryabashoboorora omu bwinganisa.’ (Isaaya 11:2-4) Nooyenda kugira omutegyeki nk’ogwo?

8. Nitumanya tuta ngu Yesu tarikwija kutegyeka wenka?

⁸ Ruhanga atooraine abandi bantu kuza kutegyeka na Yesu omu gavumenti y’omu iguru. Nk’eky’okureeberaho, entumwa Paulo akagambira Timoseo ati: “Ku turigumisiriza, turyayema tutegyekye nawe.” (2 Timoseo 2:12) Ni bangahi abarikwija kutegyeka na Yesu nk’abagabe?

9. Ni bangahi abaraategyeke na Yesu, kandi Ruhanga akatandika kubatoorana ryari?

⁹ Nk’oku twegire omu Shuura ya 7, entumwa Yohaana omu kworekwa akareeba Yesu ari Omugabe omu iguri ari n’abagabe abandi 144,000. Aba 144,000 ni baahi? Yohaana akashoboorora ati: “Aha buso bwabo hahandiikirweho eiziina [rya Yesu] n’eiziina rya Ishe.” Kandi akongyeraho ati: “Abo nibo barikukuratira Omwana gw’entaama [niwe Yesu] ei arikuza yoona. Abo bakacungurwa omu bantu.” (Shoma Okushuuruurwa 14:1, 4.) Abo 144,000 n’Abakristaayo abeesigwa abu Ruhanga atooraine ‘kutegyeka’ na Yesu, barikutegyeka ensi. Ku barikufa, nibazooka baza omu iguru. (Okushuuruurwa 5:10) Okwiha omu biro by’entumwa, Ruhanga atwire naatoorana Abakristaayo abeesigwa kuba bamwe aha bagabe 144,000.

10. Nikyoreka ki Yehova okutoorana Yesu n’abandi 144,000 kutegyeka abantu?

¹⁰ Yehova naatufaho munonga ahabw’okutoorana abantu kwija kutegyeka na Yesu. Yesu naija kuba omutegyeki murungi ahabw’okuba naatwetegyereza. Naamanya gye obuhangwa bw’abantu n’okubonabona kwabo. Paulo akagira ngu Yesu naabaasa “kusaasira hamwe naitwe omu bweremwa bwaitu,” kandi akagyezibwa “omu miringo yoona nkaitwe.” (Abaheburaayo 4:15; 5:8) Abagabe 144,000 nabo nibamanya gye embeera z’abantu. Kandi obu barikuba bari omu nsi nibaba bari abatahikiriire kandi barikurwara. N’ahabw’ekyo nitubaasa kuhamya ngu Yesu n’abandi 144,000, nibaija kuba nibatwetegyereza gye n’oburemeezi obu twine!

OBUKAMA BWA RUHANGA NIBWIJA KUKORA KI?

11. Mbwenu shi boona omu iguru batwire nibakora ebi Ruhanga arikukunda?

¹¹ Ahabw’enki Yesu yaayegyeise abeegi be kushaba ngu ebi Ruhanga arikukunda bikorwe omu nsi nk’oku birikukorwa omu iguru? Omu Shuura ya 3 twegire ngu Sitaane Omuregi akagomera Yehova. Bwanyima ya Sitaane kugoma, Yehova akamwikiriza na baamaraika abagomi, nari baadaimoni, kuguma omu iguru kumara obwire. N’ahabw’ekyo ti boona omu iguru ngu bakaba nibakora ebi Ruhanga arikukunda. Omu Shuura ya 10, nitwija kwongyera kwega ebirikukwata ahari Sitaane na baadaimoni.

12. Ni bintu ki bibiri bikuru ebirikushoboororwaho omu Okushuuruurwa 12:10?

¹² Baibuli neeshoboorora ngu ahonaaho Yesu yaaheza kuteebwaho nk’Omugabe w’Obukama bwa Ruhanga, akarwanisa Sitaane. (Shoma Okushuuruurwa 12:7-10.) Omushororongo 10 nigushoboorora ebintu bibiri bikuru. Yesu kutandika kutegyeka omu Bukama bwa Ruhanga, na Sitaane okunagwa omu nsi kuruga omu iguru. Nk’oku turikuza kwega, ebintu ebi byabaireho.

13. Niki ekyabaire omu iguru bwanyima ya Sitaane kubingwayo?

¹³ Baibuli neegamba aha kushemererwa oku baamaraika abeesigwa baagizire bwanyima ya Sitaane na baadaimoni kubingwa omu iguru. Neegira eti: “Iwe eiguru naimwe abarituuramu, mushemererwe!” (Okushuuruurwa 12:12) Hati omu iguru hariyo obumwe n’obusingye ahabw’okuba buri omwe oriyo naakora ebi Ruhanga arikukunda.

14. Niki ekirikubaho omu nsi ahabw’okugira ngu Sitaane akabingwa omu iguru?

¹⁴ Kwonka omu nsi embeera n’ez’omutaano. Ebintu bibi nibihika aha bantu ‘ahabw’okuba omuregi akaija n’ekiniga kingi, ahakuba naamanya ku aine omwanya mukye.’ (Okushuuruurwa 12:12) Sitaane aine obukambwe. Akabingwa omu iguru, kandi naamanya ngu omu bwire butari bwa hare naija kucwekyerezibwa. Naakora kyona ekirikubaasika kureeta oburemeezi, obusaasi, n’okubonabona omu nsi.

15. Ekigyendererwa kya Ruhanga ahabw’ensi niki?

¹⁵ Kwonka ekigyendererwa kya Ruhanga ahabw’ensi tikihindukire. Na hati naayenda ngu abantu abahikiriire batuure omu paradiso omu nsi ebiro byona. (Zaaburi 37:29) Mbwenu shi Obukama bwa Ruhanga nibwija kubaasisa buta eki kubaho?

16, 17. Obunabi oburi omu Danieli 2:44 nibutumanyisa ki aha Bukama bwa Ruhanga?

¹⁶ Obunabi oburi omuri Danieli 2:44 nibugira buti: “Omu busingye bw’abo bagabe Ruhanga w’omu iguru aryataho obundi bugabe, obutaricwekyerezibwa ebiro byona, kandi obutegyeki bwabwo tiburihungurwa rindi ihanga; kureka buryayatagura obwo bugabe bwona, bubumareho kandi bwo buryagumaho.” Obunabi obu nibutwegyesa ki aha bikwatiraine n’Obukama bwa Ruhanga?

¹⁷ Eky’okubanza, nibutumanyisa ngu Obukama bwa Ruhanga bukaba nibwija kutandika kutegyeka “omu busingye bw’abo bagabe.” Eki nikimanyisa ngu gavumenti ezindi zikaabaire zikiriho omu nsi Obukama bwa Ruhanga bwaba nibutandika kutegyeka. Ekya kabiri, nibutumanyisa ngu Obukama bwa Ruhanga nibwija kugumaho ebiro byona, kandi tiburikwija kuhungurwa gavumenti endiijo. Ekya kashatu, hakaabaireho orutaro ahagati y’Obukama bwa Ruhanga na gavumenti z’ensi egi. Obukama bwa Ruhanga bukaasingwire kandi buba nibwo bwaguma nibutegyeka ensi yoona. Ebi byona byaheza kubaho, abantu nibaija kutunga gavumenti erikukirirayo kimwe oburungi.

18. Orugamba rw’aha muheru orurikwija kuba ahagati y’Obukama bwa Ruhanga na gavumenti z’ensi egi nirwetwa ruta?

¹⁸ Obukama bwa Ruhanga nibwija kuza buta omu mwanya gw’obutegyeki bw’ensi? Orutaro orw’aha muheru orurikwetwa Haramagedoni rutakabaireho, baadaimoni nibaija kuhabisa ‘abagabe b’ensi zoona, okubateeranira hamwe kuza omu rugamba orw’ekiro kikuru kya Ruhanga ow’Obushoboorozi Bwona.’ Buzima, gavumenti z’abantu niziija kurwanisa Obukama bwa Ruhanga.—Okushuuruurwa 16:14, 16; reeba Ebirikukiraho 10.

19, 20. Ahabw’enki nitwenda ngu Obukama bwa Ruhanga butegyeke ensi yoona?

¹⁹ Ahabw’enki nitwetenga Obukama bwa Ruhanga? Hariho enshonga ishatu. Ey’okubanza, turi abasiisi, n’ahabw’ekyo niturwara kandi tufa. Kwonka Baibuli neegira ngu Obukama bwa Ruhanga ku buratandikye kututegyeka, nitwija kutuuraho ebiro byona. Nangwa na Yohaana 3:16 nihagira hati: “Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.”

²⁰ Enshonga endiijo ahabw’enki nitwetenga Obukama bwa Ruhanga n’ahabw’okugira ngu ensi erimu abantu babi munonga. Abantu baingi nibabeiha, nibaiba, kandi nibashambana. Tihaine eki turikubaasa kukora kubamaraho, kwonka Ruhanga naija kubaihiraho kimwe. Abantu abarikuguma nibakora ebintu bibi nibaija kucwekyererezibwa aha rugamba rwa Haramagedoni. (Shoma Zaaburi 37:10.) Enshonga ya kashatu ahabw’enki nitwetenga Obukama bwa Ruhanga eri ngu gavumenti z’abantu tiziine maani, nizitwariza kubi abantu, kandi zirimu obushomankuzi. Tiziine kigyendererwa ky’okuhwera abantu kworobera Ruhanga. Baibuli neegira ngu “omuntu naayekuriza ahari mugyenzi we kumukora kubi.”—Omubuurizi 8:9.

21. Obukama nibwija kuhamya buta ngu ebi Ruhanga arikukunda byakorwa omu nsi?

²¹ Bwanyima ya Haramagedoni, Obukama bwa Ruhanga nibwija kuhamya ngu ebi Ruhanga arikukunda byakorwa omu nsi. Nk’eky’okureeberaho, nibwija kwihaho Sitaane na baadaimoni be. (Okushuuruurwa 20:1-3) Ekiraarugyemu, tihaine orikwija kurwara nari kufa. Ahabw’ekitambo, abantu boona abahikiriire nibaija kutuura omu Paradiso ebiro byona. (Okushuuruurwa 22:1-3) Obukama bwa Ruhanga nibwija kweza eiziina rye. Eki nikimanyisa ki? Nikimanyisa ngu Obukama bwa Ruhanga ku buraabe nibutegyeka ensi, abantu boona nibaija kuha ekitiinisa eiziina rya Ruhanga, Yehova.—Reeba Ebirikukiraho 21.

YESU AKABA OMUGABE RYARI?

22. Nitumanya tuta ngu Yesu tarabaire Mugabe akiri omu nsi nari ahonaaho aherize kuzooka?

²² Yesu akeegyesa abeegi be kushaba bati: “Obukama bwawe bwije.” N’ahabw’ekyo kikaba nikireebwa butunu ngu gavumenti ya Ruhanga ekaba neija kwija bwanyima. Yehova akaba naija kubanza kutaho gavumenti ye, reero abone kutaho Yesu kuba Omugabe waayo. Mbwenu shi Yesu akaba Omugabe ahonaaho yaaheza kugaruka omu iguru? Ngaaha, akaba aine kutegyereza. Ku haahingwireho obwire Yesu aherize kuzooka, Petero na Paulo bakooreka gye ngu obunabi oburi omu Zaaburi 110:1 nibukwata ahari Yesu. Omu bunabi obwo Yehova akagira ati: “Shutama aha rubaju rwangye rwa buryo, okuhitsya obu ndigira abazigu baawe akatebe k’ebigyere byawe.” (Ebyakozirwe 2:32-35; Abaheburaayo 10:12, 13) Yesu akaba aine kutegyereza Yehova kumuhindura Omugabe kuhitsya ryari?

23. (a) Yesu akatandika ryari kutegyeka nk’Omugabe w’Obukama bwa Ruhanga? (b) Nituza kwega ahari ki omu shuura erikukurataho?

²³ Kumara emyaka mingi, omwaka 1914 gutakahikire, Abakristaayo abeesigwa bakye bakaba nibamanya ngu omwaka ogwo nigwija kuba mukuru omu bunabi bwa Baibuli. Ebitwire nibibaho omu nsi kuruga 1914 nibyoreka ngu bakaba bahikire. Yesu akatandika kutegyeka nk’Omugabe omu mwaka ogwo. (Zaaburi 110:2) Ahonaaho bwanyima y’ekyo, Sitaane akanagwa omu nsi, kandi hati “aine omwanya mukye.” (Okushuuruurwa 12:12) Omu shuura erikukurataho, nitwija kureeba obuhame ngu hati turi omu bwire bukye obwo. Kandi nitwija kwega ngu ahonaaho Obukama bwa Ruhanga nibwija kuhamya ngu ebi Ruhanga arikukunda byakorwa omu nsi.—Reeba Ebirikukiraho 22.