Eshuura y’Ikumi
Obukama “Obutaricwekyerezibwa”
1. Ebitwire nibibaho okwiha aha kuhangwa kw’omuntu nibihamya ki?
EBIRIKUBAHO buri izooba nibihamya ngu okwanga obutegyeki bwa Yehova tikurugiiremu bantu busingye. Tihariho butegyeki bw’abantu obubaasize kureetera abantu boona ebirungi. N’obu abantu baraabe batunguukire omu bya sayansi okukira obwire obw’enyima, tibabaasize kumaraho endwara nari okufa, n’obu kwakuba okubikorera omuntu omwe. Obutegyeki bw’abantu tibubabaasize kumaraho entaro, obushaarizi, obugomi, obushomankuzi n’obworo. Omu mahanga maingi, gavumenti nizireebesa abantu enaku. (Omubuurizi 8:9) Tekinologiya, omururu gw’empiiha n’obutamanya byona hamwe nibireetaho okusiisikara kw’eitaka, amaizi, n’omwoya. Obushomankuzi omu beebembezi nibutuma kyagumira abantu baingi kutunga ebyetaago by’amagara. Emyaka mingi ei abantu baamara nibeetegyeka neehamya eki: “Omuhanda gw’omuntu tiguba mu bushoboorozi bwe, kandi omuntu weena ogyenda tabaasa kwehabura mu rugyendo rwe ahu yaahika hoona.”—Yeremia 10:23.
2. N’enki ekirikubaasa kumaraho oburemeezi bw’abantu?
2 Ekiraashoborore ebi niki? N’Obukama bwa Ruhanga obu Yesu yaayegyeise abeegi be kushaba bati: “Obukama bwawe bwije; eby’okunda bikorwe omu nsi nk’oku bikorwa omu iguru.” (Matayo 6:9, 10) Obukama bwa Ruhanga obw’omu iguru nibugambwaho omu 2 Petero 3:13 nka “eiguru erisya,” eriraategyeke “ensi ensya,” ekirikumanyisa abantu abahikiriire. Okumanya ngu Obukama bwa Ruhanga ni bukuru, Yesu akabuhindura omutwe gw’okubuurira kwe. (Matayo 4:17) Akooreka omwanya ogu bushemereire kugira omu magara gaitu obu yaagira ati: “Mubanze musherure obukama bwe n’okuhikiirira kwe.”—Matayo 6:33.
3. Ahabw’enki nikikuru munonga okwega aha Bukama bwa Ruhanga hati?
3 Okwega aha Bukama bwa Ruhanga nikikuru munonga omu bunaku obu ahabw’okuba, juba Obukama obwo nibuza kumaraho obutegyeki bw’ensi. Danieli 2:44 nirugira ruti aha kirikuza kubaho: “Omu busingye bw’abo bagabe [gavumenti eziriho hati] Ruhanga w’omu iguru aryataho obundi bugabe [omu iguru], obutaricwekyerezibwa ebiro byona, kandi obutegyeki bwabwo tiburihungurwa rindi ihanga [abantu tibarigaruka kutegyeka ensi]; kureka buryayatagura obwo bugabe bwona [oburiho hati], bubumareho, kandi bwo buryagumaho.” N’ahabw’ekyo, Obukama obwo nibwo buraacwekyereze obusingye obu obubi, butyo bukafundikira ebiro by’emperu. Obwo, Obukama bw’omu iguru buryategyeka ensi egi hataine orikubuhakanisa. Ka tushemereire kushemererwa okureeba ngu obukama buri haihi kutucungura!
4. Aha bikwatiraine n’Obukama, n’enki ekyabaireho omuri 1914, kandi ahabw’enki ekyo nikikuru ahariitwe?
4 Omu mwaka gwa 1914, Kristo Yesu akeemekwa nk’Omugabe kandi yaaheebwa obushoboorozi ‘okutegyeka ahagati omu bazigu be.’ (Zaaburi 110:1, 2) Kandi omu mwaka ogwo, ‘ebiro by’emperu’ y’obusingye obu obubi bikatandika. (2 Timoseo 3:1-5, 13) Omu bwire nibwo bumwe, ebi Danieli yaayorekirwe omu bunabi, buzima bikabaho omu iguru. Yehova Ruhanga, ‘Omukuru owa Iranaira,’ akaha Yesu Kristo, Omwana w’omuntu “obutegyeki, ekitiinisa n’obukama, ngu abantu b’amahanga goona, n’enganda zoona z’endimi ezitari zimwe, bagume bamuheereze.” Arikugamba aha kworekwa okwo, Danieli akahandiika ati: “Obutegyeki bwe n’obutegyeki bw’ebiro byona obutarihwaho, kandi n’obukama bwe n’obukama obutarimarwaho.” (Danieli 7:13, 14) Arikukoresa Obukama obu obw’omu iguru oburi omu mikono ya Kristo Yesu, Ruhanga aryaha abarikukunda okuhikiirira ebintu birungi bingi ebi yaabaire agyendereire obu yaata Adamu na Haawa omu Paradiso.
5. Ni bintu ki ebirikukwata aha Bukama ebi tushemereire kumanya, kandi n’ahabw’enki?
5 Oine ekyetengo ky’okuba omwe aha baraategyekwe Obukama obwo? Kyaba kiri kityo, noija kwetenga kumanya abari omu gavumenti egyo ey’omu iguru hamwe n’oku erikutegyeka. Nooza n’okwetenga kumanya eki Obukama buriyo nibukora hati, eki burikora kandi n’eki burikukwenza. Oku oraayeyongyere kushwijuma Obukama obu nikwo oraayeyongyere kubusiima. Ku oraikirize kutegyekwa obukama obwo, noija kugira ebirikwetengwa okubaasa kugambira abandi ebintu birungi ebi Obukama bwa Ruhanga buraije kukorera abarikumworobera.—Zaaburi 48:12, 13.
Abategyeki b’Obukama bwa Ruhanga
6. (a) Ebyahandiikirwe nibyoreka ngu n’obutegyeki bw’oha oburikworekyerwa omu Bukama oburikutegyekwa Mesia? (b) Ebi turikwega aha Bukama bishemereire kutureetera kukora ki?
6 Kimwe aha bintu ebi oraabanze kwetegyereza n’eki: Obukama bwa Ruhanga oburikutegyekwa Mesia n’omuringo ogu Yehova arikworekyeramu obutegyeki bwe. Yehova niwe yaahaire Omwana we “obutegyeki, ekitiinisa n’obukama.” Omwana wa Ruhanga ku yaaherize kuheebwa obushoboorozi kutandika kutegyeka nk’Omugabe, amaraka omu iguru gakagira gati: “Obukama bw’ensi bwahinduka obwa Mukama waitu [Yehova Ruhanga] n’obwa Kristo we, kandi [Yehova] aryaguma aha ngoma ebiro n’ebiro.” (Okushuuruurwa 11:15) N’ahabw’ekyo, byona ebi turikumanya aha Bukama obu, otwariiremu n’ebi burikuhikiiriza nibitwiriza haihi na Yehova. Ebi turikwega bishemereire kutuhiga kwenda kworobera obutegyeki bwe ebiro n’ebiro.
7. Eky’okugira ngu Yesu Kristo n’Omutegyeki wa Kabiri ahari Yehova nikikuru kita ahariitwe?
7 Teekateeka n’aha ky’okugira ngu Yehova akeemeka Kristo nk’Omutegyeki wa Kabiri ahariwe. Nk’Omukozi Mukuru ou Ruhanga yaakoreise omu kuhanga ensi n’abantu, Yesu naamanya gye ebyetengo byaitu okukira oku itwe turikubimanya. Ekindi, okwiha aha kuhangwa kw’omuntu, akooreka ‘ku arikukunda abantu.’ (Enfumu 8:30, 31; Abakolosai 1:15-17) Ahabwa rukundo mpango ei ainiire abantu, Yesu we wenyine akaija omu nsi, yaahayo amagara ge nk’ekitambo ahabwaitu. (Yohaana 3:16) Atyo, yaatuteeraho omuhanda gw’okuruga omu kibi n’omu kufa, kandi yaatuha n’omugisha gw’okutunga amagara agatahwaho.—Matayo 20:28.
8. (a) Obutashushana n’obutegyeki bw’abantu, ahabw’enki gavumenti ya Ruhanga erigumaho obutwire bwona? (b) Ni kakwate ki akari ahagati ‘y’Omwambari omwesigwa kandi ow’obwengye’ na gavumenti y’omu iguru?
8 Obukama bwa Ruhanga ni gavumenti ehamire kandi ey’ebiro n’ebiro. Obukama bwa Ruhanga n’obw’obutwire bwona ahabw’okugira ngu we tafa. (Zaaburi 146:3-5, 10) Obutashushana n’abategyeki ab’abantu, Yesu Kristo, ou Ruhanga ahaire obutegyeki nawe tarikubaasa kufa. (Abarooma 6:9; 1 Timoseo 6:15, 16) Abaheereza ba Ruhanga abeesigwa abarikuhika 144,000 kuruga omu nganda zoona n’endimi zoona n’abantu boona n’amahanga goona baryashutama na Kristo aha ntebe z’obukama. Aba nabo nibaheebwa okutafa. (Okushuuruurwa 5:9, 10; 14:1-4; 1 Abakorinso 15:42-44, 53) Abarikukira obwingi aharibo baahikire omu iguru kandi abakitsigaire nibo barikwetwa ‘omwambari omwesigwa kandi ow’obwengye,’ orikutwara omu maisho emirimo y’Obukama omu nsi.—Matayo 24:45-47.
9, 10. (a) Ni bintu ki ebi Obukama buriihaho? (b) Ni bintu ki ebi tushemereire kwetantara twaba tutarikwenda kuba abazigu b’Obukama bwa Ruhanga?
9 Omu bunaku obu ataireho obutari hare, Yehova naaza kwohereza amahe ge kuboneza ensi. Nigaija kucwekyereza abantu abarikwanga nkana kwikiriza obutegyeki bwa Ruhanga kandi abatarikusiima entebeekanisa ezi ataireho kurabira omuri Yesu Kristo. (2 Abatesalonika 1:6-9) Eizooba eryo riryaba eizooba rya Yehova, eizooba eri arihamizaho ku niwe ahikire Kutegyeka Ebihangirwe Byona. ‘Reeba, eizooba rya MUKAMA niriija, ritarikusaasira, riine ekiniga kingi, ngu ricwekyereze abasiisi kandi ribamareho.’ (Isaaya 13:9) “Eryo izooba n’eizooba ry’ekiniga, ery’enaku n’obusaasi, ery’okucwekyereza n’okumariraho kimwe, ery’ekibunda n’omwirima, ery’ebicu n’omwirima ndindindi.”—Zefania 1:15.
10 Ediini zoona ez’ebishuba na gavumenti z’abantu n’amahe gaazo ebi Sitaane omutegyeki w’ensi egi otareebwa atwire naakoresa nibiza kucwekyerezibwa. Abo boona abarikushagika ensi egi barikwesherurira ebyabo, abatari beesigwa kandi abarikukora emicwe yaayo mibi nibaija kucwekyerezibwa. Sitaane na baadaimoni be baryakomwa okumara emyaka rukumi bataine nkorengana n’abantu omu nsi. Obwo, Obukama bwa Ruhanga buryagira obushoboorozi aha by’omu nsi byona. Abarikukunda eby’okuhikiirira boona ka nibaija kuruhuuka!—Okushuuruurwa 18:21, 24; 19:11-16, 19-21; 20:1, 2.
Oku Ebigyendererwa by’Obukama Biraahikiirizibwe
11. (a) Obukama oburikutegyekwa Mesia buryahikiiriza buta ekigyendererwa kya Yehova ahabw’ensi? (b) Obutegyeki bw’Obukama buryagasira buta abantu abariba nibatuura omu nsi omu bwire obwo?
11 Obukama oburikutegyekwa Mesia nibwija kuhikiiriza ekigyendererwa kya Ruhanga ahabw’ensi. (Okutandika 1:28; 2:8, 9, 15) Okuhitsya n’eri izooba, abantu bangire kushagika ekigyendererwa ekyo. Kwonka “ensi eribaho” eryateebwa ahansi ya Yesu Kristo, Omwana w’omuntu. Boona abarikira obu Yehova aricwekyereza obusingye obu obubi, baryakorera hamwe ahansi ya Kristo Omugabe, n’okushemererwa bakore kyona eki aribaragiira, kugira ngu ensi ehinduke paradiso. (Abaheburaayo 2:5-9) Abantu boona nibaija kushemerererwa emirimo y’emikono yaabo kandi bagasirwe omweru gw’ensi omu bwijwire.—Zaaburi 72:1, 7, 8, 16-19; Isaaya 65:21, 22.
12. Abariba nibategyekwa Obukama baryahindurwa bata abahikiriire omu mubiri n’omu biteekateeko?
12 Obu Adamu na Haawa baahangwa, bakaba bahikiriire, kandi kikaba kiri ekigyendererwa kya Ruhanga ngu ensi eijure baijukuru baabo, abahikiriire omu biteekateeko n’omu mubiri. Ekigyendererwa ekyo nikiija kuhikiirira obu Obukama buriba nibutegyeka. Eki nikyetengyesa okwihaho ekibi na byona ebi kyareetsireho. N’ahabw’ekyo, Kristo aryakora nk’Omugabe, kandi Omunyamurwa Omukuru. N’obugumisiriza, aryahwera abarikumworobera okugasirwa ekitambo kye.
13. Ni migisha ki ei abantu baraije kutunga omu butegyeki bw’Obukama?
13 Omu butegyeki bw’Obukama, abariba nibatuura omu nsi baryatunga emigisha mingi. “Obwo amaisho g’empumi garyahumuurwa, n’amatu g’ebifa-matu gaaryaigurwa; ekirema kiryaguruka nk’empara, n’orurimi rw’ekiteta rweshongore ahabw’okushemererwa.” (Isaaya 35:5, 6) Emibiri ekookoosire ahabwa bukuru nari esiisirwe endwara eryagaruka ebonere ebe nk’ey’abaana bato, n’endwara ezitarikukira zoona ziryahwaho. “Omubiri gwe gugarukye gube muto nk’ogw’omwana, agire amaani nk’agu yaabaire aine omu butsigazi bwe.” (Yobu 33:25) Eizooba riryahika, obu hariba hatariho orikugira ati “Ndwaire.” Ahabw’enki? Ahabw’okuba abarikutiina Ruhanga baryaba baihirweho omutwaro gw’ekibi n’ebi kirikureeta. (Isaaya 33:24; Luka 13:11-13) Buzima, Ruhanga “aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.”—Okushuuruurwa 21:4.
14. Nikitwariramu ki omuntu okuba ohikiriire?
14 Okuba ohikiriire tikirikumanyisa okugira omubiri n’ebiteekateeko ebitaine kamogo kwonka. Nikitwariramu n’okworeka emitwarize ya Yehova ahabw’okugira ngu tuhangirwe omu muringo gwe ‘n’omu nshusha ye.’ (Okutandika 1:26) Okubaasa kuba abahikiriire, haryayetengyesa okwegyesibwa kw’amaani. Ensi ensya ‘eryabamu okuhikiirira.’ N’ahabw’ekyo, nk’oku Isaaya yaarangire, ‘abarigituuramu baryayega eby’okuhikiirira.’ (2 Petero 3:13; Isaaya 26:9) Okuhikiirira nikureeta obusingye omu bantu b’erangi zoona, omu banywani, omu ka y’omuntu kandi okukira byona, ahagati yaabo na Ruhanga. (Zaaburi 85:10-13; Isaaya 32:17) Abo abariyega okuhikiirira, baryagumizamu nibeegyesibwa ebi Ruhanga arikubenza. Rukundo ei bariba bainiire Yehova ku erigyenda neehama omu mitima yaabo, baryakuratira emihanda ye omuri buri kintu omu magara gaabo. Baryabaasa kugamba nk’ebi Yesu yaagambire obu yaagira ati: “Obutoosha nkora ebimushemeza.” (Yohaana 8:29) Amagara ka nigaija kuba marungi abantu boona ku bariheza kuhikiiriza ekyo!
Ebi Obukama Bwaherize Kukora
15. Orikwejunisa ebibuuzo ebiri omu kacweka aka, yoreka ebi Obukama bukozire hamwe n’ebi tushemereire kuba nitukora omu bunaku obu.
15 Ebikozirwe Obukama bwa Ruhanga n’abu burikutegyeka nibireebwa butunu. Ebibuuzo hamwe n’ebyahandiikirwe ebirikukurataho nibiiza kukwijutsya bimwe ahari ebyo ebi bukozire, hamwe n’ebishemereire kuba nibikorwa abarikutegyekwa obwo Bukama boona.
N’oha ou Obukama bwabandize kurwanisa, kandi n’enki ekyarugiremu? (Okushuuruurwa 12:7-10, 12)
Ni ntsigarira za kibiina ki ezitwire nizirundaanwa okwiha obu Kristo yaayemekwa? (Okushuuruurwa 14:1-3)
Okurugiirira ahari Matayo 25:31-33, ni murimo ki ogu Yesu yaagizire ngu akaba naija kukora bwanyima y’okutandika kw’okubonabona kwingi?
Ni murimo ki oguriyo nigukorwa omu bunaku obu? Ni baahi abagwejumbiremu? (Zaaburi 110:3; Matayo 24:14; Okushuuruurwa 14:6, 7)
Ahabw’enki ab’eby’obutegyeki n’ab’amadiini batabaasize kwemereza omurimo gw’okubuurira? (Zekaria 4:6; Ebyakozirwe 5:38, 39)
Ni mpindahinduka ki ezibaireho omu magara g’abo abaikiriize obutegyeki bw’Obukama? (Isaaya 2:4; 1 Abakorinso 6:9-11)
Obukama obw’Emyaka Rukumi
16. (a) Kristo aryategyeka kumara bwire ki? (b) Ni bintu ki ebirikutangaaza ebirikorwa omuri obwo bwire na bwanyima yaabwo?
16 Bwanyima y’okukomwa kwa Sitaane na baadaimoni be, Yesu Kristo hamwe na 144,000 abahunguzi bataahi be baryategyeka nk’abagabe kandi abanyamurwa okumara emyaka rukumi. (Okushuuruurwa 20:6) Omu bwire obwo, abantu baryakira ekibi n’okufa ebyakomookire ahari Adamu, batyo bahinduke abahikiriire. Aha muheru gw’Obutegyeki obwo obw’Emyaka Rukumi Yesu aherize kuhikiiriza omurimo ogwamuhairwe nka Mesia, Omugabe kandi Omunyamurwa, ‘aryakwatsa Ruhanga Ishe obukama’ kugira ngu “Ruhanga abone kuba byona ahari boona.” (1 Abakorinso 15:24-28) Obwo, Sitaane aryarekurwa okumara akaanya kakye, abantu abacungwirwe bagyezibwe okureeba yaaba buzima nibashagika obutegyeki bwa Yehova. Okugyeza okwo ku kurihwa, Yehova aryacwekyereza Sitaane n’abagomi abarikumushagika. (Okushuuruurwa 20:7-10) Abo abarishagika Obutegyeki bwa Yehova baryaba boorekire gye ngu n’abeesigwa ahariwe. Obwo baryahinduka batabani be na bahara be, atyo abahe amagara agatahwaho.—Abarooma 8:21.
17. (a) N’enki ekirihika aha Bukama aha muheru gw’emyaka rukumi? (b) Ni mu muringo ki ogu Obukama ‘butaricwekyerezibwa’?
17 N’ahabw’ekyo, omurimo gwa Yesu hamwe n’ogw’abantu 144,000 guryahinduka. Baryakora murimo ki ogundi? Baibuli terikugugambaho. Ku turaashagike obutegyeki bwa Yehova omu bwesigwa, nitwija kuba turiho aha muheru gw’Obutegyeki bw’Emyaka Rukumi okureeba eki Yehova ariba abateekateekiire, bo hamwe n’ebihangirwe ebindi byona. Kwonka nabwe, obutegyeki bwa Kristo buryaba ‘obw’ebiro byona’ kandi Obukama bwe “n’obukama obutarimarwaho.” (Danieli 7:14) Mu muringo ki? Eky’okubanza; obutegyeki tiburihungurwa bandi abaine ebigyendererwa bibi, ahakuba Yehova niwe ariba ari Omutegyeki. Ekyakabiri, Obukama ‘tiburicwekyerezibwa’ ahabw’okuba ebi burikora biryagumaho ebiro n’ebiro. (Danieli 2:44) N’ekindi, Mesia Omugabe kandi Omunyamurwa hamwe n’abarikutegyeka nawe baryaheebwa ekitiinisa ahabw’obwesigwa bwabo omu kuheereza Yehova.
Eby’Okweijutsya
• Ahabw’enki Obukama bwa Ruhanga nibwo bwonka oburimaraho oburemeezi bw’abantu? Omugabe w’Obukama bwa Ruhanga akatandika kutegyeka ryari?
• N’enki ekirikukushemeza aha Bukama bwa Ruhanga, kandi nibuza kukora ki?
• Ni bintu ki ebi turikureeba ebi Obukama bukozire, kandi twine mugabo ki omuri ebyo?
[Ekishushani ekiri aha rupapura 92, 93]
Omu Bukama bwa Ruhanga, abantu boona nibaija kwega okuhikiirira