Ekicweka 8
Ekigyendererwa kya Ruhanga Kiri Haihi Kuhikiirizibwa
1, 2. Ruhanga atwire naayoreka ata ngu naija kumaraho okubonabona?
OBUTEGYEKI bw’abantu abagomi na baadaimoni butwire nibutegyeka kubi abantu kumara emyaka mingi. Kwonka, Ruhanga tayehugize kubonabona kwaitu. Kureka okumara ebyasha ebyo byona, aine eki atwire naakora kubaasa kukomoorora abantu kuruga omu bubi n’okubonabona.
2 Ku haabaireho obugomi omuri Edeni, Ruhanga yaatandika kumanyisa abantu ngu naija kutaho gavumenti eraije kuhindura ensi egi paradiso kutuurwamu abantu. (Okutandika 3:15) Bwanyima, Yesu nk’omugambirizi mukuru wa Ruhanga, akahindura gavumenti ya Ruhanga egi eraije omutwe mukuru omu kwegyesa kwe. Akagira ngu niyo gavumenti yonka ei abantu bashemereire kugiramu amatsiko.—Danieli 2:44; Matayo 6:9, 10; 12:21.
3. Gavumenti eraije omu nsi, Yesu akagyeta ata, kandi n’ahabw’enki?
3 Gavumenti ya Ruhanga egyo erikwija, Yesu akagyeta “obukama bw’omu iguru,” ahabw’okugira ngu ekaba neija kutegyekyera omu iguru. (Matayo 4:17) Kandi hoona, akagyeta “obukama bwa Ruhanga,” obu Ruhanga Niwe yaabaire naija kugitaho. (Luka 17:20) Okumara ebyasha bingi, Ruhanga akaha abahandiiki be omwoyo gwe kuhandika obunabi oburikukwata ahari abo abarikora gavumenti egyo kandi n’aha ki yaabaire neija kuhikiiriza.
Omugabe w’Ensi Omusya
4, 5. Ruhanga akooreka ata ngu Yesu niwe yaabaire ari Omugabe ou atooraine?
4 Emyaka nk’enkumi ibiri ehingwire, Yesu niwe yaahikiriize obunabi bwingi obwabaire nibukwata ahari ogwo owaabaire naija kuba Omugabe w’Obukama bwa Ruhanga. Yesu akooreka ngu niwe Ruhanga atooraine kuba Omutegyeki wa gavumenti ey’omu iguru eraategyekye abantu. Ruhanga akazoora Yesu, yaamuha amagara omu iguru nk’ekihangirwe ky’omwoyo eky’amaani kandi ekitarikufa. Ni baingi abaahamize okuzooka kwe.—Ebyakozirwe 4:10; 9:1-9; Abarooma 1:1-4; 1 Abakorinso 15:3-8.
5 Yesu obwo “akashutama aha rubaju rwa buryo rwa Ruhanga.” (Abaheburaayo 10:12) Akategyereza obwire obu Ruhanga yaabaire naija kumuha obushoboorozi kukora nk’Omugabe w’Obukama bwa Ruhanga obw’omu iguru. Eki kikahikiiriza obunabi oburikushangwa omuri Zaaburi 110:1, ahu Ruhanga arikumugira ati: “Shutama aha rubaju rwangye rwa buryo, okuhitsya obu ndigira abazigu baawe akatebe k’ebigyere byawe.”
6. Yesu akooreka ata ngu akaba ahikire kuba Omugabe w’Obukama bwa Ruhanga?
6 Obu Yesu yaabaire ari omu nsi akooreka ngu ahikire kuba omugabe w’obukama obwo. N’obu araabe yaahiiganisiibwe, akaguma ari omwesigwa ahari Ruhanga. Omu kukora ekyo, akooreka ngu Sitaane akaba naabeiha obu yaagira ngu tihariho omuntu orikubaasa kuguma ari omwesigwa ahari Ruhanga yaagyezibwa. Yesu, omuntu ohikiriire, ‘Adamu owa bwanyima,’ akooreka ngu Ruhanga tarakozire nshobe okuhanga abantu abahikiriire.—1 Abakorinso 15:22, 45; Matayo 4:1-11.
7, 8. Ni birungi ki ebi Yesu yaakozire obu yaabaire ari omu nsi, kandi bikaba nibyoreka ki?
7 Ni mutegyeki ki oraakozire ebirungi bingi nk’ebi Yesu yaakozire omu myaka mikye ei yaamazire omu buheereza bwe? Arikuhwerwa omwoyo gwa Ruhanga, Yesu akatambira abarwaire, ebimuga, empumi, ebifa-matu, n’ebiteta. Kandi akazoora n’abafu! Bikye ebi yaakozire bikooreka ebi araije kukorera abantu omu nsi yoona arikutegyeka nk’Omugabe.—Matayo 15:30, 31; Luka 7:11-16.
8 Yesu akakora ebirungi bingi obu yaabaire ari omu nsi kyareetera omwegi we Yohaana kugira ati: “Hariho n’ebindi bingi ebi Yesu yaakozire; kuri noogira ngu byona bikahandiikwa buri kimwe, ninteekateeka nti, ebitabo ebyakuhandiikirwe bikaashaagire omu nsi.”—Yohaana 21:25.a
9. Ahabw’enki abantu b’emitima egororokire baizire ahari Yesu?
9 Yesu akaba ari omunyambabazi kandi ainiire abantu esaasi na rukundo mpango. Akahwera abooro hamwe n’abaabaire nibatwarizibwa kubi, kwonka tarashoroire mu batungi nari ab’ekitiinisa. Abantu ab’emitima egororokire bakaikiriza okweta kwa Yesu obu yaagira ati: “Imwe mwena abaruhire n’abaremereirwe, mwije ahariinye, mbaruhuure. Mwekorere omugamba gwangye, muunyegyereho; ahabw’okuba nintwaza gye, kandi ndi omucureezi omu mutima; naimwe muryatunga okuhuumura omu mitima yaanyu, ahakuba omugamba gwangye tigurikuremeera, n’omutwaro gwangye gwanguhi.” (Matayo 11:28-30) Abantu abarikutiina Ruhanga bakaija ahari Yesu kandi n’ekihika baategyereza obutegyeki bwe.—Yohaana 12:19.
Abarikutegyeka Nawe
10, 11. Ni baahi abaraije kutegyeka na Yesu ensi?
10 Nk’oku abategyeki b’abantu baine abu barikutegyeka nabo, nikyo kimwe n’omu Bukama bwa Ruhanga obw’omu iguru. Hariho n’abandi abarikwija kutegyekyera hamwe na Yesu ensi, ahakuba akaraganisa banywani be ngu nibaija kutegyeka nawe nk’abagabe.—Yohaana 14:2, 3; Okushuuruurwa 5:10; 20:6.
11 N’ahabw’ekyo, omubaro mukye gw’abantu nibazoorwa baheebwa amagara omu iguru kuba hamwe na Yesu. Nibakora Obukama bwa Ruhanga oburaije kureetera abantu emigisha ey’ebiro n’ebiro. (2 Abakolosai 4:14; Okushuuruurwa 14:1-3) Yehova ataireho omusingye gw’obutegyeki oburaije kureetera abantu emigisha ey’ebiro n’ebiro.
Obutegyeki Obutari bwa Ruhanga Okuhwaho
12, 13. Obukama bwa Ruhanga hati buri haihi kukora ki?
12 Omu kyasha ekyahweire Ruhanga akataaha omu nshonga z’ensi. Nk’oku Ekicweka 9 eky’akatabo aka kiraayorekye, obunabi bw’omu Baibuli nibworeka ngu Obukama bwa Ruhanga oburi ahansi ya Kristo bukateebwaho omu mwaka gwa 1914, kandi hati buri haihi kucwekyereza ensi ya Sitaane yoona. Obukama obwo bweteekateekire kugyenda ‘nibusingura ahagati omu bazigu ba Kristo.’—Zaaburi 110:2, NW.
13 Aha bikwatiraine n’ekyo, obunabi oburikushangwa omuri Danieli 2:44 nibugira buti: “Omu busingye bw’abo bagabe [gavumenti eziriho hati] Ruhanga w’omu iguru aryataho obundi bugabe [omu iguru], obutaricwekyerezibwa ebiro byona, kandi obutegyeki bwabwo tiburihungurwa rindi ihanga [obutegyeki bw’abantu tiburigaruka kutegyeka ensi]. Kureka [Obukama bwa Ruhanga] buryayatagura obwo bugabe bwona, bubumareho kandi bwo buryagumaho ebiro byona.”—Revised Standard Version.
14. Ni birungi ki ebimwe ebiraije kubaho ahabw’okucwekyerezibwa kw’obutegyeki bw’abantu?
14 Obutegyeki bwona obutari hansi ya Ruhanga ku buriheza kwihwaho, Obukama bwa Ruhanga buryategyeka ensi yoona. Kandi ahabw’okugira ngu Obukama obwo nibutegyekyera omu iguru, abantu tibarikubaasa kubushiisha. Obushoboorozi bw’okutegyeka nibwija kugarukira Ruhanga omu iguru nk’oku kyabaire kiri omu kubanza. Kandi obu obutegyeki bwa Ruhanga burikwija kutegyeka ensi yoona, tihariho origaruka kubeihwabeihwa amadiini g’ebishuba, ebigunjano by’abantu ebitaine mugasho nari eby’obutegyeki. Tihariho na kimwe ahari ebyo ekiriikirizibwa kubaho.—Matayo 7:15-23; Okushuuruurwa, eshuura 17 kuhika 19.
[Ebigambo aha Kanyonyoozi]
a Okubaasa kwetegyereza ebindi bingi ebirikukwata aha magara ga Yesu, reeba ekitabo The Greatest Man Who Ever Lived, ekyateirwe Abajurizi ba Yehova omu gwa 1991.
[Ekishushani ekiri aha rupapura 18]
Obu Yesu yaabaire ari omu nsi, akakiza abarwaire kandi yaazoora abafu okworeka eki arikwija kukora omu nsi ensya
[Ekishushani ekiri aha rupapura 19]
Obukama bwa Ruhanga obw’omu iguru nibwija kwatagura obutegyeki obw’emiringo yoona oburiho hati obwetaaniise ahariwe