EBIBUUZO AHA BY’OMU BAIBULI NIBIGARUKWAMU
Okufa kwa Yesu nikutugasira kuta?
Obu Ruhanga yaahanga abantu, akaba naayenda ngu bagumeho ebiro byona batarikubonabona, batarikurwara nari kufa. Kwonka omuntu w’okubanza Adamu, akagomera Omuhangi kandi yaafeerwa omugisha gw’okugumaho ebiro byona. Ahabw’okugira ngu turi baijukuru ba Adamu, tukahungura okufa kuruga ahariwe. (Abarooma 5:8, 12; 6:23) Ruhanga ow’amazima Yehova, akahayo Omwana we Yesu ngu afe abaase kugaruraho eki Adamu yaatufeerereize.—Shoma Yohaana 3:16.
Yesu akafa ngu abantu babaase kutunga amagara agatahwaho. Teekateeka aha magara agatahwaho omu nsi.
Okufa kwa Yesu nikutubaasisa kusaasirwa ebibi byaitu n’okutunga amagara agatahwaho. Baibuli neetworeka oku embeera ziraabe nizishusha omu nsi, obu haraabe hatarimu kukaikura, okurwara n’okufa.—Shoma Isaaya 25:8; 33:24; Okushuuruurwa 21:4, 5.
Twine kwijuka tuta okufa kwa Yesu?
Omu mwabazyo ogwahereerukireyo Yesu atakafiire, akagambira abakuratsi be kuguma nibaijuka okufa kwe. Okwijuka okufa kwa Yesu omu muringo ogwo buri mwaka, nikituhwera kuteekateeka munonga aha rukundo ei Yesu na Yehova bainiire abantu.—Shoma Luka 22:19, 20; 1 Yohaana 4:9, 10.
Omwaka ogu, Ekiijutsyo nikiija kubaho Okwakana, Orwokubanza 14, bwanyima y’eizooba kurenga. Nooyetwa kwija kuba n’Abajurizi ba Yehova aha mukoro ogwo omu kicweka kyanyu.—Shoma Abarooma 1:11, 12.