EBIBUUZO EBI BAIBULI ERIKUGARUKAMU
Ahabw’enki twine kwijuka okufa kwa Yesu?
Okufa kwa yesu nikwija kureetaho biro ki eby’omumaisho?—isaaya 25:8; 33:24
Okufa kwa Yesu ni kukuru omu byafaayo, ahabw’okuba akafa kugaruraho amagara g’abantu nk’oku gaabaire gashemereire kuba. Omuntu tarahangirwe ari ow’okukora ebibi, ari ow’okurwara nari kufa. (Okutandika 1:31) Kwonka ekibi kikaija omu nsi kurabira omu muntu w’okubanza, Adamu. Yesu akahayo amagara ge kutujuna ekibi n’okufa.—Shoma Matayo 20:28; Abarooma 6:23.
Ruhanga akooreka rukundo y’omutaano arikwohereza omwana we kutufeera. (1 Yohaana 4:9, 10) Yesu akagambira abakuratsi be kwijuka okufa kwe barikukora omukoro gworobi barikukoresa omugaati na viinyo. Okukikora buri mwaka nikyoreka ngu nitusiima rukundo ei Yehova na Yesu baatworekire.—Shoma Luka 22:19, 20.
Ni baahi abaine kurya aha mugaati bakanywa n’ahari viinyo?
Obu Yesu yaabanza kugambira abeegi be kwijuka okufa kwe, akagamba aha ndagaano. (Matayo 26:26-28) Endagaano egyo ekabaha amatsiko, yaabaasisa n’abandi bakye kwija kutegyeka nawe omu iguru nk’abagabe. N’obu obukaikuru bw’abantu barikwijuka okufa kwa Yesu, abo bonka abari omu ndagaano egyo nibo barikurya aha mugaati bakanywa n’ahari viinyo.—Shoma Okushuuruurwa 5:10.
Kumara emyaka nka 2,000, Yehova atwire naatoorana abaraabe abagabe. (Luka 12:32) Ni bakye wabagyeragyeranisa n’abaraatuure omu nsi ebiro byona.—Shoma Okushuuruurwa 7:4, 9, 17.