Okuramya kw’Eka​​—Kureetere Kuba Kurungi

Omuzaire omushaija omuri Brazil akagira ati: “Ku turikuba turi omu kuramya kw’eka nituguma nituhikaanisa ebiteekateeko tuhitsya nyekiro naaba ntagambiire ab’omu ka yangye kurekyera aho.” Nyineeka omwe kuruga Japan naagira ngu omutabani ow’emyaka ikumi naba atarikufayo aha bwire beitu naba naayenda kugumizamu naayega. Ahabw’enki? “Naba aine ekihika ky’okwega kandi ekyo nikyongyera aha kushemererwa kwe,” Ishe nikwo yaagizire.

Buzima, ti baana boona ngu nibaba baine ekihika ky’okwega, abamwe tibarikukunda okuramya kw’eka. Kwonka shi ahabw’enki? Omuzaire omwe omushaija kuruga Togo akagira ati: “Okuramya Yehova tikushemereire kuba nikutama.” Okuramya kw’eka kwaba nikutama nikiba nikirugiirira aha muringo ogu okuramya okwo kurikwebemberwamu. Amaka maingi gashangire ngu okuramya kw’eka nikubaasa kubamu okushemererwa nk’oku Isaaya yaagambire ahari Sabato.​—Isa. 58:13, 14.

Abakristaayo baanyineeka baine kukimanya ngu okuramya kw’eka kubaasa kubamu okushemererwa, bashemereire kuba baikaikaine. Ralf, oine abaishiki bashatu n’omutabani omwe, akagira ngu okuramya kwabo okw’eka kuri nk’okugaaniira kandi buri omwe naakwejumbamu. Kwonka, kubaasa kureetera buri omwe kwejumba omu kuramya kw’eka ashemereirwe tikyorobi. Omuzaire omwe omukazi akagira ati: “Nyowe tindikubaasa kureetera okwega kw’eka kuba kurungi nk’oku naakubaire niinyenda.” Noobaasa kureetera ota okuramya kwawe kw’eka kuba kurungi?

HINDAHINDURA OMU BI MURIKWEGA

Omuzaire omushaija kuruga Germany oine abaana babiri naagira ngu nibahindahindura omu bi barikwega. Natalia nyina wa baana babiri akagira ati: “Ekintu kikuru omuka yaitu,” nitwega “ebitarikushushana, ebitarikushushana, ebitarikushushana.” Amaka maingi okwega kw’eka nigakubaganisamu ebicweka bingi. “Ekyo nikireetera okwega kuba kurungi kandi buri omwe omu ka naakwejumbamu,” nikwo Cleiton ishe w’abaana babiri omuri Brazil yaagizire. Abazaire kubaasa kworeka ngu nibafayo aha byetengo bya buri mwana kurugiirira aha myaka ye, baine kubaha obwire baaba bari omu kuramya kw’eka. Abazaire nibabaasa kuta omutima aha byetengo bya buri omwe omu ka kandi bahindahindure aha bi barikwegaho n’oku barabyegeho.

Amaka agamwe nigakora ki kugira bingi eby’okwegaho? Abamwe nibatandika okwega kw’eka barikweshongora kuhimbisa Yehova. “Nikireetera buri omwe kweteebekanisiza eki barikuba nibaza kwegaho,” nikwo Juan kuruga Mexico yaagizire. Nibeeshongora ebyeshongoro ebirikuhikaana n’eki barikuza kwegaho.

Amaka agamwe nigashomera hamwe ekicweka kuruga omu Baibuli. Ahabw’okwenda ngu buri omwe omu ka ayejumbemu, omwe naabaasa kushoma ebyabaireho reero abandi bashome nk’abaabaire bariho. Omuzaire omushaija omuri Japan akagira ngu we “ekyo kikaba kitari kya buriijo kushoma atyo.” Kwonka batabani be babiri bakaba bashemererwa kureeba abazaire baabo barikushoma hamwe nabo Baibuli. Amaka agamwe nigashoma ekicweka kya Baibuli nk’omuzaano. Abaana “obumwe nibareeba enshonga z’omu Baibuli itwe abazaire ezi turikuba tutareebire,” nikwo Roger, ishe w’aboojo babiri kuruga South Africa yaagizire.

Omuringo ogundi ogu turikubaasa kugira bingi by’okwega n’okukorera hamwe nk’okwombeka obwato bwa Noa nari hekalu ya Sulemaani. Ekyo nikyetengyesa okucondooza kubaasa kukikora gye. Nk’eky’okureeberaho, omuri Asia omwishiki w’emyaka etaano n’abazaire hamwe na nyinenkuru baketeeranira hamwe omu kishengye. Bakazaana omuzaano ogurikukwata aha ngyendo z’entumwa Paulo omu murimo gwe gw’obumiisani. Amaka agandi nigazaana emizaano erikukwata aha biri omu kitabo kya Okuruga. Okugira bingi by’okwegaho “kikareeta okushemererwa omu kuramya kwaitu kw’eka n’omu ka yaitu,” nikwo Donald ow’emyaka 19 kuruga Togo yaagizire. Noobaasa kuteekateeka aha bi murikubaasa kwegaho omu kuramya kwanyu okw’eka.

OKUTEBEEKANISA NI KIKURU

N’obu okuhindahinduramu n’okugira bingi by’okwega kurikubaasa kureetera okuramya kw’eka kuba kurungi, kwonka kubaasa kureetera buri omwe kugira omuhimbo, boona baine kutebeekanisa. Obumwe abato nibaruha, n’ahabw’ekyo baishebo baine kuteekateeka kare aha bi barikuza kwegaho kandi bakatebeekanisa gye. Omuzaire omwe omushaija akagira ati: “Ku ndikuba ntebeekaniise gye, buri omwe naagasirwa omu kwega.” Omuzaire omushaija omuri Germany naagambira ab’omu ka ye kare hakirikuburayo obwire aha bi barikuza kwegaho. Ishe w’abaana mukaaga omuri Benin ku arikutebeekanisa ngu bareebe vidiyo erikukwata aha by’omu Baibuli omu kwega kwabo kw’eka, naabaha ebibuuzo bukiri kare. Buzima, okutebeekanisa nikureetera okuramya kw’eka kuba kurungi.

Ab’omu ka ku barikumanya kare eki baine kwegaho, nibabaasa kukigaaniiraho omu saabiiti, ekirikubareetera kugira omuhimbo. Buri omwe omu ka yaheebwa eky’okukora kare, okuramya kw’eka naija kukureeba nk’okwe.

MUTEEREHO KUHAMIRA AHA NTEBEEKANISA

Amaka maingi tigarikworoberwa kugira okuramya kw’eka butoosha.

Baanyineeka nibakora munonga kubaasa kureeberera amaka gaabo. Nk’eky’okureeberaho, omuzaire omushaija omuri Mexico naaruga omu ka shaaha ikumi na ibiri z’akasheeshe agaruka shaaha ibiri z’ekiro. Obumwe, nitubaasa kuhindura izooba eri turikugiriraho okuramya kw’eka ahabw’okugira ngu izooba eryo hariho entebeekanisa y’eby’omwoyo endiijo.

Kwonka, tushemereire kumariirira kuguma nitugira okuramya kw’eka tutarikwosha. Loïs ow’emyaka ikumi na gumwe kuruga Togo naagira ati: “N’obu turaabe obumwe nitutandika okuramya kw’eka tukyerereirwe ahabw’okugira ngu haine ekyabaho, twine kuhamya ngu okuramya okwo kwabaho.” Noobaasa kwetegyereza ahabw’enki amaka agamwe nigagira okuramya kw’eka aha kutandika kwa saabiiti. Haagira ekyabaho, nibabaasa kugira okuramya kw’eka aha muheru gwa saabiiti.

Ekigyendererwa ky’okuramya kw’eka n’okuramya Yehova. Twena ka tuteereho kureetera Yehova “empongano z’eminwa yaitu erikuhimbisa” buri saabiiti. (Hos. 14:2) Ekyo kishemereire kureetera buri omwe omu ka okushemererwa, “ahabw’okuba okushemerererwa omuri MUKAMA nigo maani gaanyu.”​—Neh. 8:9, 10.