Okureeberera Abakaikwire

1, 2. (a) Ni buremeezi ki obu amaka maingi garikutunga, kandi eki nikireetaho bibuuzo ki? (b) Abazaire n’abaana nibabaasa kwetebeekanisiza bata empindahinduka ezirikureetwaho okukaikura?

NIKIBAASA kukureetera obusaasi bwingi waareeba abazaire baawe abaabaire baine amaani kandi barikwereeberera hati batakibaasa kwereeberera. Obumwe nyoko nari sho naabaasa kugwa ahendeke, atandikire kwebwa, nari bamukyebere bashange aine endwara y’amaani. Kwonka obumwe, nikibaasa kugumira abakaikwire kwikiriza empindahinduka ezibaireho omu magara gaabo, na munonga ekyo kyaba nikibaremesa kuguma baine obugabe bwabo. (Yob. 14:1) Niki ekirikubaasa kukorwa? Nibabaasa kureebererwa bata?

² Ekihandiiko kimwe ekirikukwata aha kureeberera abakaikwire nikigira kiti: “N’obu kiraabe kigumire kugamba aha nshonga z’okukaikura, ab’omu ka erikukwatwaho baagaaniira aha bi barikubaasa kukora n’oku baraabikore, nibaba betebeekaniise gye kushoboorora kyona ekiraabeho.” Omu kugaaniira nk’okwo, nikiba kiri kirungi kukimanya ngu okukaikura nikwija n’oburemeezi bwakwo obu tutarikubaasa kwetantara. Kwonka, nitubaasa kwetebeekanisa kandi tucwemu kare eki turaakore. Ka tushwijume tureebe oku amaka garikubaasa kukwatanisa kwetebeekanisiza okureeberera abakaikwire.

OKWETEBEEKANISIZA “EBIRO BIBI”

3. Abaana nibabaasa kukora ki abazaire baabo abakaikwire baaguma nibeyongyera kuhwa amaani? (Reeba ekishushani aha kutandika.)

³ Obwire nibuhika oshanga ngu abakaikwire tibarikubaasa kwereeberera kureka nibeetenga obuhwezi. (Shoma Omubuurizi 12:1-7.) Abazaire abakaikwire baaba batakibaasa kwereeberera, nibabaasa kukwatanisa hamwe n’abaana baabo kucwamu obuhwezi oburikwetengyesa. Nikiba kiri kirungi kugira orukiiko rw’eka kugaaniira aha ku baraakwatanise, aha birikwetengyesa, hamwe n’oku baraahikiirize obujunaanizibwa bwabo. Boona abarikukwatwaho, okukira munonga abazaire, baine kugamba oku barikwehurira kandi bakareeba n’oku baraashoboorore oburemeezi oburiho. Nibabaasa kugaaniira kureeba kyaba kiri eky’oburyo abazaire kuguma omu ka yaabo reero bakaguma nibabahwera.a Nari nibabaasa kugaaniira aha ku buri omwe omu ka arikubaasa kuhikiiriza obujunaanizibwa bwe. (Enf. 24:6) Nk’eky’okureeberaho, abamwe nibabaasa kuguma n’ogwo okaikwire barikumureeberera obutoosha kandi oshangye ngu abandi nibabaasa kuguma nibahayo sente. Boona bashemereire kwijuka ngu baine obujunaanizibwa, kwonka nibabaasa kuguma nibaihaihana omu kuhikiiriza obujunaanizibwa obwo.

4. Abaana abarikureeberera abazaire baabo abakaikwire nibabaasa kwiha nkahi obuhwezi?

⁴ Waatandika kureeberera omuzaire waawe, teeraho kumanya ebirikumukwataho n’embeera ye. Omuzaire waawe yaaba arwaire endwara erikuguma neeyeyongyera kumumaramu amaani, teeraho kumanya ebi endwara egyo erikubaasa kureetaho omu biro by’omumaisho. (Enf. 1:5) Noobaasa kuza omu bitongore bya gavumenti ebirikuha obuhwezi. Manya entebeekanisa ezitairweho omu kicweka kyanyu ezirikubaasa kukuhwera omu kureeberera omuzaire waawe okaikwire. Waaba nooteekateeka aha mpindahinduka ezi ezigumire, noobaasa kutandika kugira amaganya, okushoberwa, nari okutamanya eky’okukora. Noobaasa kugaaniiraho na munywani waawe oku orikwehurira. Okukira byona, gambira Yehova ebi kuri aha mutima. Naabaasa kukuha obusingye obu orikwetenga oburaakuhwere kwemera embeera yoona.​—Zab. 55:22; Enf. 24:10; Fil. 4:6, 7.

5. Ahabw’enki kiri eky’obwengye kucwamu kare aha bikwatiraine n’obuhwezi oburaheebwe abazaire abakaikwire?

⁵ Nikiba kiri kirungi abakaikwire n’ab’omu maka gaabo kumanya kare emiringo erikubaasa kubahwera aha bikwatiraine n’okutunga obuhwezi. Nk’eky’okureeberaho, nibabaasa kuhikaanisa ebiteekateeko kureeba kyaba nikibaasika omuzaire okaikwire kutuura n’omutabani nari omuhara nari kuza omu irwariro eririkureebererwamu abakaikwire nari obundi buhwezi oburiho. Omu muringo ogu, nibabaasa kwetebeekanisiza ‘okufa kubi n’okureeba enaku’ ebirikureetwaho okukaikura. (Zab. 90:10) Baingi tigarikutebeekanisa kare, n’ahabw’ekyo nibagyemeserezibwa kucwamu ahonaaho haaheza kubaho oburemeezi. Obu “nibuba buri obwire bubi munonga bw’okucwamu,” omuhangu omwe nikwo yaagizire. Omu mbeera nk’egyo, ab’eka erimu okaikwire nibaba bashobeirwe kandi nibabaasa kutaikirizana aha ki baraakore. Okutebeekanisa kare, nikubaasa kutuhwera kukora empindahinduka ahonaaho.​—Enf. 20:18.

6. Abazaire n’abaana nibabaasa kugasirwa bata baagaaniira hamwe aha buhwezi oburikwetengyesa?

⁶ Noobaasa kushanga kigumire kugamba n’abazaire baawe aha kukora empindahinduka omu ka yaabo nari kubafurura kubatwara ahandi. Kwonka baingi bashangire ngu okugaaniira nk’okwo buzima nikurugamu ebirungi. Ahabw’enki? Ahabw’okuba nikibahwera kugaaniira aha nshonga ezigumire, reero bakora kare entebeekanisa hatakabaireho buremeezi. Bashangire ngu okugaaniira omu muringo gwa rukundo n’embabazi, nikihwera omu kucwamu ebi barikwenda kukora. Abazaire nibabaasa kucwamu ngu nibenda kuguma nibatuura bonka nk’oku kirikubaasika. Abazaire baagaaniira n’abaana baabo aha buhwezi obu barikwetenga, nikiija kuhwera buri omwe kuguma naamanya obuhwezi oburikwetengyesa haabaho oburemeezi.

7, 8. Ab’omu ka y’omuzaire okaikwire, baine kugaaniira ahari ki, kandi ahabw’enki?

⁷ Omu kugaaniira okwo, abazaire abakaikwire mwine kugambira abaana baanyu ebi murikwetenga, esente ezi murikushohoza, n’emiringo ei murikwenda kureebererwamu. Waaba otakibaasa kwecweramu, abaana baawe nibabaasa kucwamu omu muringo oguhikire kuhikaana n’ebi orikwenda. Nibabaasa kwikirizana n’ebi orikwenda kandi oshangye ekyo kyarinda obugabe bwawe. (Efe. 6:2-4) Nk’eky’okureeberaho, nooyenda ngu omwe aha baana baawe akutware owe atuure naiwe nari haine ekindi eki orikwenda? Gira emiteekateekyere etagwereire rubaju omanye ngu n’abandi omu ka nibabaasa kuba baine emiteekateekyere erikutaana n’eyaawe, kandi ngu nikitwara obwire kuhindura emiteekateekyere yaabo.

⁸ Abari omu ka baakora entebeekanisa kandi bakagaaniira gye, nibetantara oburemeezi bwingi. (Enf. 15:22) Nimubaasa kugaaniira aha bujanjabi n’ebindi ebirikwetengyesa. Mwine kugaaniira aha bujanjabi obu Abajurizi ba Yehova barikubaasa kwikiriza. Buri muntu aine kumanyisibwa obujanjabi obu barikuza kumuha reero ayecweremu kwikiriza nari kwanga obu atarikwenda. Ebi omuntu arikuba acwiremu kare nibiba nibyoreka obujanjabi obu omuntu arikubaasa kwikiriza. Waatoorana omujwekyerwa ou orikwesiga omu by’obujanjabi, naija kukucweramu kyayetengyesa. Abo boona abarikukwatwaho bashemereire kuba baine kopi y’ekihandiiko ekirikworeka ebi ocwiremu. Abamwe ekihandiiko eki nibakibiika n’ebihandiiko byabo ebindi ebikuru nk’oburagwa, ekyapa ky’eitaka n’ebindi.

OKWEMERA EMPINDAHINDUKA EZIRIKUBAHO

9, 10. Ni ryari obu abazaire barikubaasa kwetenga munonga obuhwezi bw’abaana baabo?

⁹ Emirundi mingi, abaana nibaikirizana n’abazaire baabo ngu bagume baine obugabe bwabo nk’oku amaani gaabo garikubabaasisa. Nibabaasa kuba nibeetekyera, barikuboneza ahu barikutuura, barikumira emibazi, kandi barikugaaniira n’abantu bataine buremeezi bwona. N’ahabw’ekyo nibabaasa kugira ngu tibarikwenda abaana baabo beetasye omu nshonga zaabo zoona. Kwonka obwire bwagyenda nibuhinguraho, abazaire baaba batakibaasa kugyenda gye, batakibaasa kuza kugura ebintu nari barikwebwa juba, obwo abaana baabo nibaba baine kutandika kubahwera.

¹⁰ Abakaikwire nibabaasa kushoberwa, kugira amaganya, kutandika kwebwa, nari kutahweza. Ebintu nk’ebyo byatandika kubaho, nikiba kiri kirungi kusherura obujanjabi. Abaana bashemereire kuba nibo baayebembera omu kukora entebeekanisa ezirikukwata aha ku omuzaire araatungye obujanjabi. Obwire bwagyenda nibuhinguraho, nibabaasa n’okutandika kucwamu aha nshonga ezi omuzaire abaire naayecweramu. Abaana kubaasa kuhamya ngu abazaire baabo baatunga obuhwezi oburikwetengyesa, nibabaasa kutandika kukora nk’abagambirizi baabo, kubatwara kureeba omushaho, n’ebindi.​—Enf. 3:27.

11. Niki ekirikubaasa kukorwa kuhwera abakaikwire kwikiriza empindahinduka ezirikukorwa abaana baabo?

¹¹ Abazaire baawe baaba baine oburemeezi obutarikubaasa kurugaho, nikibaasa kwetengyesa kuhindura aha bujanjabi obu barikutunga nari kuruga omu ka ei barikutuuramu. Empindahinduka zaaba ziri nkye, nabo nikiboorobera kuzikuratira. Waaba nootuura hare n’abazaire baawe, noobaasa kushaba ow’eishe-emwe nari omutaahi orikutuura haihi nabo agume naabataayaayira reero akumanyise oku bari. Noobaasa kushanga ngu nibenda obuhwezi omu kubateekyera n’okuboneza. Okukora empindahinduka nkye omu nju nikibaasa kubahwera kwenaabisa, n’ebindi. Obundi noobaasa kushanga ngu nibenda omuntu w’okubahwera omu ka, ekyo kibahwere kuguma baine obugabe. Kwonka, ekyo kyaba kitarikubaasa kubahwera, abaana nibaba baine kutaho entebeekanisa y’okubahwera obwire bwona. Omu mbeera zoona, muteereho kucondooza kumanya obuhwezi oburikuheebwa abakaikwire omu kicweka kyanyu.b​—Shoma Enfumu 21:5.

OKU ABAMWE BARIKUHIKIIRIZA OBUJUNAANIZIBWA OBWO

12, 13. Abaana abarikutuura hare n’abazaire baabo babaasize bata kuguma nibabaha ekitiinisa kandi barikubareeberera?

¹² Abaana nibaba nibenda ngu abazaire baabo batungye ebi barikwetenga. Nibagira obusingye baamanya ngu abazaire baabo nibareebererwa gye. Kwonka abaana abamwe nooshanga baine obujunaanizibwa obundi, ekyo kibareetera kutuura hare n’abazaire baabo. Omu mbeera nk’ezo, abamwe nibakoresa ebiro byabo by’okuhuumura bataayaayira abazaire baabo, kandi babahwera aha mirimo ei batarikubaasa kukora. Abaana nibabaasa kuhamiza abazaire baabo ngu nibabakunda barikubateerera esimu butoosha, nari buri izooba kyaba nikibaasika, barikubahandiikira amabaruha, nari barikuboherereza obutumwa.​—Enf. 23:24, 25.

¹³ N’obu waakuba nootuura hare, oine kumanya obuhwezi obu abazaire baawe barikwetenga buri izooba. Waaba nootuura hare kandi abazaire baawe bari Abajurizi ba Yehova, noobaasa kubuuza abareeberezi omu kibiina eki abazaire baawe barimu kukugambira obuhwezi obu barikubaasa kuba nibeetenga. Kandi oine kushaba Yehova aha bikwatiraine n’enshonga egyo. (Shoma Enfumu 11:14.) N’obu abazaire baawe baakuba batari Bakristaayo oine kugyendera aha musingye ogurikugira ngu “otiine sho na nyoko.” (Kur. 20:12; Enf. 23:22) Buzima, amaka goona tigarikucwamu ebirikushushana. Abamwe nibatebeekanisa kugira ngu abazaire baabo baije batuure nabo nari haihi nabo. Kwonka, obumwe ekyo tikirikubaasika. Abazaire abamwe tibarikukunda kutuura n’abaana baabo, ahabw’okwenda kuguma baine obugabe bwabo kandi batari mugugu aha baana baabo. Abamwe nibabaasa kuba baine ebintu byabo, kandi nibabaasa kucwamu kuguma nibereeberera bari omu ka yaabo.​—Mub. 7:12.

14. Niki ekirikubaasa kubaho omwe aha baana yaaba niwe arikukira kureeberera omuzaire waabo okaikwire?

¹⁴ Omu maka agamwe, obujunaanizibwa bw’okureeberera omuzaire okaikwire nibakira kuburekyera omutabani nari omuhara orikuba ari haihi. Kwonka, abaana bashemereire kuringaaniza obujunaanizibwa bw’okureeberera abazaire baabo n’obw’okureeberera amaka gaabo. Buri muntu aine obugarukiro aha bikwatiraine n’obwire n’amaani. Embeera z’ogwo orikuhwera okaikwire zaahinduka, eka eine kushwijuma embeera eziriho. Omwe aha baana yaaba niwe aine obujunaanizibwa bwingi omu kureeberera omuzaire waabo, nikibaasa kwetengyesa abaana abandi nabo kwejumba omu kuha obuhwezi barikwihaihana.

15. Niki ekirikubaasa kuhwera ogwo orikuba naareeberera okaikwire kutarahuka kuruha?

¹⁵ Omuzaire okaikwire yaaba naayetenga obuhwezi obwire bwona, ogwo orikuba naamureeberera naabaasa kurahuka kuruha. (Mub. 4:6) Abaana nibabaasa kukora kyona ekirikubaasika ahabw’abazaire baabo, kwonka obuhwezi obu abazaire baabo barikuba nibeetenga obumwe nibaba batarikububaasa. Orikuba naareeberera okaikwire aine kugira emiteekateekyere etagwereire rubaju, kyaba nikibaasika ashabe obuhwezi. Obuhwezi obu arikutunga nibubaasa kumuhwera kugumizamu naareeberera okaikwire kitarikwetengyesa kutwara okaikwire omu marwariro agu barikureebereramu abakaikwire.

16, 17. Ni buremeezi ki obu abaana abarikureeberera abazaire baabo abakaikwire barikutunga, kandi nibabaasa kubwemera bata? (Reeba akabokisi “Marwa Ahabw’Obuhwezi Obu Orikuha.”)

¹⁶ Waareeba ebi omuzaire waawe okaikwire arikurabamu, noobaasa kugira obusaasi bwingi. Baingi abarikureeberera abakaikwire, obumwe nibagira ekiniga, beerarikirira, bagira omutima ogurikweshinja, nari amaganya. Obumwe okaikwire naabaasa kugamba ebigambo ebirikworeka ngu tarikusiima. Ekyo kyabaho, otarahuka kuguubwa kubi. Omuhangu omwe orikukora aha ndwara z’omutwe naagira ati: “Omuringo murungi gw’okwemeramu enyehurira yoona, okukira munonga egyo erikukuteganisa munonga, n’okwikiriza embeera nk’oku eri. Yetantare kwanga ngu oine enyehurira egyo nari okwecwera orubanja ahabw’okwehurira otyo.” Gambira ou ori nawe omu bushwere, omwe aha b’omu ka yaanyu, nari munywani waawe ou orikwesiga, oku orikwehurira. Okugaaniira nk’okwo nikubaasa kukuhwera kwetegyereza enyehurira yaawe n’okuguma oine emiteekateekyere etagwereire rubaju.

¹⁷ Obwire nibubaasa kuhika oshangye ngu tikyakibaasika kugumizamu nimuha omuzaire waanyu okaikwire obuhwezi obu arikwetenga. Abaana nibabaasa kucwamu ngu omuzaire waabo okaikwire otungye obuhwezi omu irwariro eririkureebererwamu abakaikwire. Munyaanyazi-itwe omwe akaba ataayaayira nyina omu irwariro eririkureebererwamu abakaikwire haihi buri izooba. Naagamba aha ka yaabo ati: “Tukaba tutarikubaasa kureeberera Maaweitwe buri izooba eshaaha 24. Okwikiriza kutwarwa omu irwariro eririkureebererwamu abakaikwire kikaba kitamworobeire. Kurugiirira aha nyehurira ye, kikaba kimugumiire munonga. Kwonka, akaikiriza ngu okumutwara omu irwariro eryo, nikyo kyabaire nikikirayo oburungi na munonga aha meezi agaahererukireyo atakafiire.”

18. Abarikureeberera abakaikwire nibaba baine buhame ki?

¹⁸ Obujunaanizibwa bw’okureeberera abazaire abakaikwire nibubaasa kuguma munonga. Ku kirikuhika aha kureeberera omuzaire okaikwire, tihariho buhabuzi oburikubaasa kworobera buri omwe kukuratira. Kwonka, okutebeekanisa gye, okukwatanisa, okuhikaanisa ebiteekateeko, n’okushaba, nibibaasa kubahwera kuhikiiriza obujunaanizibwa bwanyu obw’okubareeberera. Mwakora mutyo, nimwija kutunga okumarwa murikumanya ngu abazaire baanyu nibatunga obuhwezi oburikwetengyesa kandi ngu nimubafaho. (Shoma 1 Abakorinso 13:4-8.) Ekirikukira obukuru, nimwija kutunga obusingye ahabw’okumanya ngu Yehova naaha omugisha abo abarikuha abazaire baabo ekitiinisa.​—Fil. 4:7.