Ahabw’Enki Abantu Nibashaba?

Nooshaba butoosha? Abantu baingi nibashaba nangwa n’abo abatarikwikiririza omuri Ruhanga. Ahabw’enki abantu nibashaba? Kurugiirira aha kucondooza kumwe omuri France, kimwe kya kabiri eky’abantu abarikutuura omu ihanga eryo nibashaba nari nibagira obwire bw’okuteekateeka barikwenda “kuhurira gye kwonka.” Nk’abandi bantu omuri Buraaya, Abafaransa tibarikushaba ahabw’okwenda kuramya Ruhanga. Kwonka, abandi nibashaba Ruhanga baaba baine eki barikwenda, barikuteekateeka ngu nibaija kukitunga ahonaaho.​—Isaaya 26:16.

Kandi shi iwe? Mbwenu shi okushaba n’omuringo ogurikukuhwera kugira ebiteekateeko birungi kwonka? Ku oraabe noikiririza omuri Ruhanga, nooreeba okushaba kurikukuhwera? Nari nooreeba ngu obumwe okushaba kwawe tikurikugarukwamu? Baibuli neebaasa kukuhwera kwetegyereza ngu okushaba nikukuhwera kwirira haihi Yehova beitu kutari kukureetera kuhurira gye kwonka.