Omu Kubuurira Twariza Abandi nk’Oku Orikwenda Bakutwarize

1. Mbwenu shi oku turikutwariza abandi omu kubuurira ni kikuru? Ha eky’okureeberaho. (Reeba ekishushani aha kutandika.)

EMYAKA mikye ehingwire, omushaija n’omukazi we Abajurizi ba Yehova omuri Fiji bakaba bari omu kampeyini y’okweta abantu aha Kiijutsyo ky’okufa kwa Kristo. Enjura ekatandika kugwa barikugamba n’omukazi aheeru y’enju ye. Ow’eishe-emwe akaha omukazi omutaka reero we n’omukazi we baayesangira gumwe. Ab’eishe-emwe abo bakashemererwa ku baareebire omukazi ogwo aha Kiijutsyo. Omukazi ogwo naagira ngu tarikwijuka bingi aha bi baamugambiire obu baamubuurira. Kwonka omuringo ogu baamutwariizemu nigwo gwamushemeize munonga, ekyo kikamureetera kwija aha Kiijutsyo. Ab’eishe-emwe abo bakakuratira obuhabuzi bwa Yesu oburikukwata aha ku tushemereire kutwariza abandi.

2. Yesu akaha buhabuzi ki, kandi nitubaasa kubugyenderaho tuta?

² Ni buhabuzi ki obu Yesu yaahaire? Akagira ati: “Ebi mwenda ngu abantu babagirire, naimwe mube nikwo mwabagirira.” (Mat. 7:12) Nitubaasa kubugyenderaho tuta? Tushemereire kwebuuza tuti, ‘Ku ogire ngu niinye, nkaayenzire kutwarizibwa nta?’ Kandi twine n’okuteeraho kutwariza abantu abandi nk’oku turikwenda batutwarize.​—1 Kor. 10:24.

3, 4. (a) Shoboorora ahabw’enki obuhabuzi bwa Yesu butarikukwata aha ku twine kutwariza ab’eishe-emwe bonka. (b) Nituza kwega ki omu kicweka eki?

³ Nitukira kugyendera aha buhabuzi bwa Yesu obwo omu kukwatanisa n’ab’eishe-emwe. Kwonka Yesu taragizire ngu tushemereire kubugyenderaho twaba nitukoragana n’ab’eishe-emwe bonka. Akaha obuhabuzi obwo, obu yaabaire naashoboorora oku tushemereire kutwariza abantu boona otwariiremu n’abazigu baitu. (Shoma Luka 6:27, 28, 31, 35.) Ku turaabe twine kutwariza gye abazigu baitu, nikiba kiri kikuru munonga kutwariza gye abu turikubuurira, obu baingi aharibo barikubaasa kuba baine ekyetengo ky’okutunga amagara agatahwaho.​—Byak. 13:48.

⁴ Hati nituza kushwijuma ebibuuzo bina, ebi twine kwijuka twaba nitubuurira: Ni baahi abu ndikuza kubuurira? Nimbaasa kubashanga nkahi? Nshemereire kubuurira ryari? Nshemereire kutandika kugaaniira nta nabo? Nk’oku turikuza kureeba, ebibuuzo ebi nibiza kutuhwera kwetegyereza oku abandi barikwehurira reero tumanye omuringo murungi gw’okubabuurira.​—1 Kor. 9:19-23.

NI BAAHI ABU NDIKUZA KUBUURIRA?

5. Ni bibuuzo ki ebi turikubaasa kwebuuza?

⁵ Twaba nitubuurira nitukira kugamba n’omuntu omwe omwe. Abantu tibarikushushana oku baakuziibwe n’oburemeezi obu baine. (2 Bus. 6:29) Waaba noobuurira omuntu, yebuuze oti: ‘Ku ogire ngu niwe ariyo naambuurira, nkaayenzire ngu antwarize ata? Mbwenu shi nkaayenzire ngu omuntu ateebereze eki ndi atabandize kummanya?’ Okushwijuma ebibuuzo nk’ebi nikibaasa kutuhwera kutwariza buri muntu ou turikubuurira omu muringo gwe.

6, 7. Tushemereire kutwaza tuta twabuurira omuntu akatutwariza kubi?

⁶ Tihariho orikwenda ngu bamureebe nk’oine emiteekateekyere egwire. Nk’eky’okureeberaho: Abakristaayo twine kugyendera aha buhabuzi bwa Baibuli oburikugira ngu ‘ebigambo byaitu bigume biri eby’embabazi.’ (Kol. 4:6) Kwonka ahabw’okugira ngu tituhikiriire, obumwe nitugamba ebigambo bwanyima tubyefuuza. (Yak. 3:2) Twagambira omuntu omu muringo mubi ahabw’okugira ngu twine ekiniga, naija kuteekateeka ngu twine emicwe mibi nari ngu titurikufayo aha bandi. Kwonka tukaayenzire ngu omuntu ogwo ayetegyereze ahabw’enki twatwaza tutyo. Niitwe niyo miteekateekyere ei tushemereire kugira, omuntu yaatutwariza kubi.

⁷ Waaba noobuurira omuntu akakutwariza kubi, nikiba kiri kirungi kwetegyereza ahabw’enki yaatwaza atyo. Noobaasa kushanga ngu aine oburemeezi aha murimo nari aha ishomero. Naabaasa kuba aine endwara y’amaani. Emirundi mingi abantu abaabandize kutwaza kubi, bakaija baasiima amazima, ahabw’okugira ngu Abajurizi ba Yehova bakabatwariza gye omu kubanza.​—Enf. 15:1; 1 Pet. 3:15.

8. Ahabw’enki tushemereire kubuurira abantu b’emiringo yoona?

⁸ Nitubuurira abantu b’emiringo yoona. Nk’eky’okureeberaho, omu myaka mikye ehingwire, eby’okureeberaho 60 bihandiikirwe omu Watchtower omu kicweka “Baibuli Neehindura Emitwarize y’Abantu.” Bamwe abarikugambwaho omu bicweka ebi, bakaba bari abashuma, abasinzi, nari barikukoresa emibazi y’ekitabura bwongo. Abandi bakaba bari ab’eby’obutegyeki, abeebembezi b’amadiini, nari barikwemarira aha mirimo y’ahaiguru. Abamwe bakaba bari abashambani. Kwonka boona ku baahuriire amakuru marungi, baikiriza kwega Baibuli, baahindura emitwarize yaabo kandi baija omu mazima. N’ahabw’ekyo, titushemereire kuteekateeka ngu abantu abamwe tibarikubaasa kwikiriza amakuru g’Obukama. (Shoma 1 Abakorinso 6:9-11.) Omu mwanya gw’ekyo, tushemereire kukimanya ngu abantu b’emiringo yoona nibabaasa kwikiriza amakuru marungi.​—1 Kor. 9:22.

NIMBAASA KUBASHANGA NKAHI?

9. Ahabw’enki tushemereire kutwaza gye twahika aha maju g’abandi?

⁹ Nitushanga nkahi abantu twaba nitubuurira? Nitukira kubashanga owaabo. (Mat. 10:11-13) Twena nituba nitwenda ngu abantu abandi batazaanazaanira aha maju gaitu n’ebintu byaitu. Ekyo kiri kityo, ahabw’okugira ngu amaju gaitu n’ebintu byaitu nitubitwara nka bikuru. Nituba nitwenda ngu twaba turi omu maka gaitu tube twehereire kandi twine oburinzi. Tushemereire kutwariza abataahi omu muringo nigwo gumwe. N’ahabw’ekyo twaba nitubuurira, twine kuteeraho kuteekateeka aha ku tushemereire kutwaza twahika aha nju y’omuntu.​—Byak. 5:42.

10. Nitubaasa kwetantara tuta kugwisa kubi abantu omu kubuurira?

¹⁰ Omu nsi egi eijwiremu okuhenda ebiragiro, abantu baingi nibeerarikirira abu batarikumanya. (2 Tim. 3:1-5) Tushemereire kwetantara kukora ekintu kyona ekirikubaasa kureetera abantu kwongyera kutwerarikirira. Nk’eky’okureeberaho, noobaasa kuhika aha nju y’omuntu oiguze. Haaba hataine okwiguriireho, noobaasa kwohibwa kuringuriza omu dirisa, nari kwetooroora enju orikusherura mukama waayo. Mbwenu shi omu kicweka kyanyu, ekyo nikigwisa kubi abantu? Abataahi nibabaasa kuteekateeka ki? N’amazima ngu twaba nitubuurira tushemereire kubuurira boona. (Byak. 10:42) Twine ekihika kujanjaaza amakuru marungi kandi twine ebigyendererwa birungi. (Rom. 1:14, 15) Kwonka, tushemereire kwetantara kukora ekintu kyona ekiraagwise kubi abantu omu kicweka eki turikubuuriramu. Entumwa Paulo akahandiika ati: “Nikyo twerindira kutateeza omuntu weena ntsibo, ngu obuheereza bwaitu burekye kugaywa.” (2 Kor. 6:3) Twahika aha nju y’omuntu tukatwaza gye, nikibaasa kumureetera kuhurikiza.​—Shoma 1 Petero 2:12.

NSHEMEREIRE KUBUURIRA RYARI?

11. Ahabw’enki nituba nitwenda ngu abandi bafeyo aha bwire bwaitu?

¹¹ Baingi ahariitwe twine bingi by’okukora. Ahabw’okwenda kuhikiiriza obujunaanizibwa bwaitu, nitutebeekanisa gye kandi twebeembeza ebintu ebikuru. (Efe. 5:16; Fil. 1:10) Haagira ekyateganisa entebeekanisa yaitu, nituhurira kubi. N’ahabw’ekyo, nituba nitwenda ngu abandi bafeyo aha bwire bwaitu, baija kugira eki baatugambira boorekye okwetegyereza barikumara obwire bukye. Turikukuratira obuhabuzi oburikugira ngu tutwarize abandi nk’oku turikwenda batutwarize, nitubaasa kworeka tuta ngu nituha abu turikubuurira ekitiinisa?

12. Nitubaasa kumanya tuta obwire burungi bw’okubuurira abantu omu kicweka kyaitu?

¹² Tushemereire kuteeraho kumanya obwire burungi obu tushemereire kuba nituza kubuurira. Omu kicweka eki turikubuuriramu, ni ryari obu abantu barikuba bari omuka? Kandi ni ryari obu barikubaasa kuhurikiza? Nikiba kiri kirungi kuhindahindura omu ntebeekanisa yaitu nk’oku kirikubaasika. Omu mahanga agamwe, nikiba kiri kirungi kubuurira enju aha nju omu ihangwe nari omu mwabazyo. Ku kiraabe nikwo kiri omu kicweka kyanyu, noobaasa kukora entebeekanisa kubuurira enju aha nju omu bwire obwo. (Shoma 1 Abakorinso 10:24.) Twine obuhame ngu Yehova naija kutuha emigisha, ahabw’okwefeerereza kwejumba omu kubuurira omu bwire obu abantu omu kicweka kyaitu, barikuba bari omuka.

13. Noobaasa kworeka ota ngu ou orikubuurira noomuha ekitiinisa?

¹³ Nitubaasa kukora ki ekindi kworeka ngu nituha ekitiinisa abu turikubuurira? Omuntu yaayoreka ngu n’omucureezi, twine kumubuurira, kwonka titushemereire kumara obwire bwingi. Obwire obwo naabaasa kuba yaacwamu kubukoresa eki arikureeba ngu ni kikuru. Yaagira ngu aine bingi by’okukora, noobaasa kumugira ngu torikwija kutwara obwire bwingi, kandi oshemereire kuhamira aha ki waagamba. (Mat. 5:37) Waaba noohendera okugaaniira, noobaasa kumubuuza obu arikwenda ngu ogarukye. Ababuurizi abamwe bashangire ngu ni kirungi kugira ou barikubuurira bati: “Nkayeenzire kugaruka kukutaayaayira. Mbwenu shi noofayo naakuteerera esimu nari nkakwoherereza obutumwa ntakaizire?” Twateeraho kuhindahindura omu ntebeekanisa yaitu kuhikaana n’ey’abantu abari omu kicweka kyaitu, nitwija kuba nitutooreza eky’okureeberaho ky’entumwa Paulo owaabaire ‘atarikusherura by’okwegasira wenka, kureka eby’okugasira baingi, ngu bajunwe.’​—1 Kor. 10:33.

NSHEMEREIRE KUTANDIKA KUGAANIIRA NTA NABO?

14-16. (a) Ahabw’enki twine kushoboororera gye abatuhurikiize ekyatureeta? Ha eky’okureeberaho. (b) Ni nyanjura ki ei omureeberezi orikutaayaayira ebibiina ashangire ngu neekora gye?

¹⁴ Ka tugire ngu omuntu yaakuteerera esimu kwonka torikumanya eiraka rye. Torikumumanya, kwonka akubuuza eby’okurya ebi orikukunda kurya. Noobaasa kwebuuza omuntu ogwo n’oha, kandi oyebuuze n’eki arikwenda. Ahabw’okugira ngu torikwenda kumutwariza kubi, noobaasa kugaaniira nawe kakye, kwonka omworekye ngu nooyenda kuhendera okugaaniira okwo. Kwonka omuntu ogwo yaakwemanyisa, akakworeka ngu naaha obuhabuzi aha bikwatiraine n’eby’okurya ebirikwombeka omubiri kandi akakugira ngu naayenda kukuha obuhabuzi oburaakuhwere, noobaasa kumuhurikiza. Nikitushemeza omuntu yaatugambira eki arikwenda omu muringo gw’obwengye. Mbwenu shi nitubaasa kutwariza tuta abantu omu muringo nk’ogwo omu kubuurira?

¹⁵ Omu bicweka ebimwe, twine kumanyisa omuntu ou turikuza kubuurira ekyatureeta. Buzima obutumwa obu twine ni burungi kandi abantu baine kubuhurira. Kwonka shi ku waakuba oteyaanjwire reero okatandika noobuuza ekibuuzo nk’eki: “Waaba noobaasa kwihaho oburemeezi omu nsi egi, ni buuha obu orikwihaho?” Nitukimanya ngu ekigyendererwa ky’okubuuza ekibuuzo ekyo n’okwenda kumanya eki omuntu arikuteekateeka, reero obaase kumworeka Ebyahandiikirwe. Kwonka ou orikubuurira naabaasa kwebuuza ati: ‘Ogu n’oha, kandi ahabw’enki naambuuza ekibuuzo eki? Niki eki arikwenda?’ N’ahabw’ekyo, titushemereire kureetera abu turikubuurira kwerarikirira. (Fil. 2:3, 4) Ekyo nitubaasa kukikora tuta?

¹⁶ Omureeberezi omwe orikutaayaayira ebibiina akeetegyereza ngu obuhabuzi oburi ahaifo nibukora gye. Bwanyima y’okuramukanya, naaha omuntu ou arikuza kubuurira kaaturakiti Nooyenda Kumanya Amazima? reero agira ati: “Turiyo nituha buri omwe kaaturakiti aka. Kariho ebibuuzo mukaaga ebi abantu barikukira kwebuuza. Aka n’akaawe.” Ow’eishe-emwe ogwo naagira ngu abantu abarikukira obwingi nibaikaikana bwanyima y’okumanya ekigyendererwa kyaitu ky’okubataayaayira. Bwanyima, nikyoroba kutandika kugaaniira n’omuntu. Ku arikuheza naabuuza ekibuuzo eki: “Aha bibuuzo ebi hariho eki oraayebuurizeho?” Omuntu yaatooranamu kimwe, ow’eishe-emwe ogwo naashuuruura omu kaaturakiti ako bagaaniira aha ki Baibuli erikugamba aha kibuuzo ekyo. Omuntu yaaba atatoorainemu kibuuzo, we naatoorana eki baragaaniireho atarikwenda kumubuza obusingye. Hatariho kubanganisa, hariho emiringo mingi y’okutandika kugaaniira n’omuntu. Omu bicweka ebimwe, omuntu naabaasa kwenda ngu tubanze tweyanjure tutakatandikire kugamba ekyatureeta. Enshonga enkuru eri ngu, tushemereire kuhindahindura omu nyanjura zaitu kurugiirira aha ku abantu barikutwaza omu kicweka.

OMU KUBUURIRA KURATIRA OBUHABUZI BWA YESU OBURIKUKWATA AHA MITWARIZE

17. Nk’oku twareeba omu kicweka eki, omu kubuurira nitubaasa kukuratira tuta obuhabuzi bwa Yesu oburikukwata aha mitwarize?

¹⁷ Omu kubuurira nitubaasa kukuratira tuta obuhabuzi bwa Yesu oburikukwata aha mitwarize? Omu kubuurira, tushemereire kutwariza buri muntu omu muringo gwe. Tushemereire kutwaza gye twahika aha nju y’omuntu. Twine kuteeraho kuza omu kubuurira obu abantu barikuba bariyo kandi barikwenda kuhurikiza. Kandi tushemereire kwanjura amakuru marungi omu muringo oguraareetere abantu kutuhurikiza.

18. Ahabw’enki omu kubuurira ni kikuru kutwariza abandi nk’oku turikwenda batutwarize?

¹⁸ Twatwariza abari omu kicweka kyaitu nk’oku turikwenda batutwarize, nikirugamu ebirungi. Twatwaza omu muringo gw’embabazi tukateekateeka n’aha bandi, nituba nitujwisa omushana gwaitu, nituba nitworeka obukuru bw’okugyendera aha misingye ya Baibuli kandi nituhaisa Tataitwe ow’omu iguru ekitiinisa. (Mat. 5:16) Ka tuteereho kureetera abantu kukunda amazima ahabw’omuringo ogu turikubabuuriramu. (1 Tim. 4:16) Abu turikubuurira yaaba baikiriza nainga banga, nitutunga okumarwa ahabw’okugira ngu nituteeraho kuhikiiriza obuheereza bwaitu. (2 Tim. 4:5) Ka tuteereho kutooreza entumwa Paulo owaahandiikire ati: “Byona mbikora ahabw’engiri, ngu ntungye aha migisha yaayo.” (1 Kor. 9:23) N’ahabw’ekyo, ka tuteereho kuguma nitutwariza abandi nk’oku turikwenda batutwarize.