Hwera Ou Orikubuurira Kugamba Eki Arikuteekateeka
1. Ni muringo ki ogw’okubuuriramu ogurikukirayo oburungi?
1 Omuringo murungi ogw’okubuuriramu niguuha? N’okugambira omuntu ekihikire kwonka, nari n’okuhikaanisa nawe ebiteekateeko akahika aha kwemanyira ekihikire? Entumwa Paulo akahikaanisa ebiteekateeko n’Abayudaaya obu yaabaire naagamba nabo omuri Tesalonika, ekyarugiremu ‘bamwe aharibo bakahinduka abaikiriza.’ (Byak. 17:2-4) Niki ekirikutwarirwa omu kuhikaanisa n’abandi ebiteekateeko?
2. Nitubaasa kutooreza tuta eky’okureeberaho kya Paulo twaba nitubuurira amakuru marungi?
2 Fayo aha Nyehurira Zaabo Kandi Omanye Ebi Barikwiriza: Twaba nitumanya ebi abantu b’omu kicweka kyaitu barikwikiriza hamwe n’enyehurira zaabo nikituhwera kuhikaanisa gye nabo ebiteekateeko. Paulo, ahari Areopaago akatandika kubuurira Abagriika abaabaire batari baikiriza arikugamba ebintu ebi baabaire nibamanya kandi nibaikiriza. (Byak. 17:22-31) N’ahabw’ekyo, waaba nootebeekanisa enyanjura yaawe, teekateeka aha bi abu orikuza kubuurira barikwikiriza n’ebi batarikwikiriza. (1 Kor. 9:19-22) Ou orikubuurira yaagira eki yaahakanisa teeraho kugamba aha ki murikubaasa kwikirizanaho reero mube nikyo mwahikaanisaho ebiteekateeko.
3. Nitubaasa kuhikaanisa gye tuta n’abandi ebiteekateeko turikukoresa gye ebibuuzo?
3 Koresa gye Ebibuuzo: Titurikubaasa kurangira omuntu omuhanda ogurikumuhitsya ei arikuza twaba tutarikumanya ei arikuba ari. Nikyo kimwe, titurikubaasa kuhwera ou turikubuurira kuhika aha kumanya ekihikire twaba tutarikumanya eki arikuteekateeka. Yesu atakahikaaniise ebiteekateeko n’omuntu, butoosha akaba abanza yaamubuuza kumanya eki arikuteekateeka. Nk’eky’okureeberaho, omuntu omwe ku yaabuurize Yesu ati: “Nkore ki okuhungura amagara agatahwaho?” Yesu atakamugarukiremu akabanza yaamubuuza eki arikuteekateeka. (Luk. 10:25-28) Obundi, Petero ku yaagarukiremu ekigwire, Yesu akakoresa gye ebibuuzo kumuhwera kumanya ekihikire. (Mat. 17:24-26) N’ahabw’ekyo, ou orikubuurira yaabuuza ekibuuzo nari yaagamba ekitahikire, noobaasa kukoresa ebibuuzo kumuhwera kumanya ekihikire.
4. Ahabw’enki tushemereire kuteeraho kuhwera ou turikubuurira kugamba eki arikuteekateeka?
4 Twahwera ou turikubuurira kugamba eki arikuteekateeka, nituba nitutooreza Omwegyesa Mukuru, Yesu, n’abandi babuurizi barungi ab’omu kyasha ky’okubanza. Nituba nituha ekitiinisa ou turikubuurira. (1 Pet. 3:15) Ekyo nikibaasa kumureetera kutwikiriza kugarukayo.