Okwongyera Kubuurira Gye—Okugaba Akatabo Eki Baibuli Erikwegyesa

Ahabw’Enki Ni Kikuru: Akatabo Eki Baibuli Erikwegyesa ni kamwe aha ebi turikukira kukoresa omu kwegyesa abantu Baibuli. Kwonka, tutakakakoreise mu kwegyesa omuntu Baibuli, twine kubanza twakamuha. N’ahabw’ekyo, twena twine kumanya omuringo murungi gw’okugabamu akatabo Eki Baibuli Erikwegyesa omu kubuurira. (Enf. 22:29) Hariho emiringo mingi y’okugaba akatabo aka kandi ababuurizi baine kucwamu omuringo ogurikukora gye.

Oku Turikubaasa Kukikora:

Koresa ekibuuzo ekirikubaasa kureetera ou orikubuurira kuhurikiza kandi ekiraakuhwere kumutwara omu shuura erikuhikaana n’eki murikugaaniiraho. Noobaasa kukoresa kimwe aha bibuuzo ebiri aha kutandika kw’eshuura. Ou orikubuurira yaaheza kugarukamu, shoma ekyahandiikirwe ekirikuhikaana n’enshonga ei orikugambaho, reero omworekye akacweka akarikugamba aha nshonga egyo kandi kyabaasika mukahikaaniiseho ebiteekateeko omu bugufu.
Omuringo ogundi n’okukoresa ebiri aha mpapura ezirikubanza omu katabo eki Baibuli erikwegyesa, kureetera ou orikubuurira kuhurikiza reero omworekye eshuura erikushoboorora eki Baibuli erikwegyesa. Nk’eky’okureeberaho, noobaasa kugamba aha kabi akahererukire kubaho aku boorekire omu makuru reero oshoboorore ngu baingi nibebuuza ebibuuzo ebirikworekwa aha rupapura 3. Nari noobaasa kugira ngu nootaayaayira abantu b’omu kicweka kyanyu kubooreka amatsiko marungi agarikukwata aha birabeho omu biro by’omumaisho. Reero omworekye ebishushani ebiri aha rupapura 4-5 bwanyima omubuuze, “Niki eki waakwenzire kureeba nikihikiirira ahari ebi?” Nari noobaasa kugira ngu nootaayaayira abantu kubooreka eby’okugarukamu by’ebibuuzo ebi abantu baingi bari kwebuuza. Reero yoreka ou orikubuurira ebibuuzo ebiri aha rupapura 6, reero omushabe kutooranamu ekyamushemeza.
Tandika kwegyesa omuntu Baibuli aha murundi gw’okubanza otarikwekiikuura. Noobaasa kugira oti: “Nituha abantu akatabo aka aku turikukoresa omu kwega n’abo Baibuli. Oraakareebireho? [Tegyereza agarukyemu.] Waaba oine akiire kakye, nkaayenzire kukworeka oku orikubaasa kukakoresa omu kwega Baibuli yaawe.”

Teeraho Kukora Eki Okwezi Oku:

Mwegyezemu mwaba muri omu kuramya kw’eka.
Waaba ori omu kubuurira, teeraho kugambira ababuurizi abandi ebi otebeekaniise kugamba. (Enf. 27:17) Kora empindahinduka omu nyanjura yaawe yaaba etakozire gye.