Waayorekire Omuntu Oku Arikubaasa kwegyesibwa Baibuli aha Murundi gw’Okubanza Kumubuurira?

Abamwe abu turikubuurira baashabwa kwegyesibwa Baibuli, nibagira ngu tibarikwenda nari ngu nibegyesibwa Baibuli omu makanisa gaabo. Obu barikuba batarikumanya ngu oku turikwegyesa Baibuli tikurikushushana n’oku amadiini agandi garikugyegyesa, nibaba batarikumanya ngu okwikiriza kugyega nikibaasa kubahwera kumanya bingi kandi ebirikushemeza. N’ahabw’ekyo, omu mwanya gw’okubashaba kubegyesa Baibuli kwonka, twara obudakiika bukye oboorekye oku turikwega Baibuli n’abantu aha murundi gw’okubanza kubabuurira. Otakaabagambira aha ntebeekanisa y’okwega Baibuli kwonka, beitu omu bugufu oshemereire kubooreka oku barikubaasa kugyega. Oku nikwo orikubaasa kukikora omu dakiika nkye, orikukoresa obuhabuzi oburi omu Our Kingdom Ministry aka Jenwari 2006 aha rupapura 6.

“Nooteekateeka ngu ebigambo ebi biraahikiirizibwa? [Shoma Isaaya 33:24, reero otegyereze agarukyemu.] Ka nkworekye ekintu ekirikushemeza ekirikukwata aha nshonga egi.” Ha ou orikubuurira akatabo Eki Baibuli Erikwegyesa, reero omushabe kuza aha rupapura 36, akacweka 22. Shoma ekibuuzo eky’ekicweka ekyo ekiri ahaifo kandi oshabe ou orikubuurira kusherura eky’okugarukamu waaba noomushomera akacweka. Buuza ekibuuzo omurundi ogundi, reero ohurikize eki araagarukyemu. Mushomere ekyahandiikirwe ekindi aha biri omu kacweka ako. Mubuuze ekibuuzo eki oraagarukyemu waaba ogarukireyo kumutaayaayira, kandi kora nawe entebeekanisa kwija kugarukayo. Obwo nooba waatandika kwegyesa omuntu Baibuli!