Noogyenda Hamwe n’Ekibiina kya Yehova?

1. Ni kibiina ki ekyagiire omu mwanya gw’eihanga rya Israeli erigomi? (Reeba ekishushani aha kutandika.)

YEHOVA ashemereire kuhimbisibwa ahabw’okuba niwe yaatandikireho ekibiina Ekikristaayo omu kyasha ky’okubanza, kandi eki kihwereire kugaruraho okuramya okw’amazima omu obunaku obu. Nk’oku tureebire omu kicweka ekihweire, ekibiina ekyo kikaba kirimu abakuratsi ba Yesu aba ira, abaagiire omu mwanya gw’eihanga rya Israeli aryagomire. N’obu Yerusaalemu eraabe yaacwekyereiziibwe omu gwa 70 Yesu aherize kuzaarwa, ekibiina ekyo ekisya kikahonokaho. (Luk. 21:20, 21) Ebyabaireho omu kyasha ky’okubanza bikaba nibyoreka ekiraahikye aha baheereza ba Ruhanga obunaku obu. Ensi ya Sitaane eri haihi kucwekyerezibwa, kwonka ekicweka eky’omu nsi eky’ekibiina kya Ruhanga, nikiija kuhonokaho omu biro by’emperu. (2 Tim. 3:1) Ekyo nitubaasa kukihamya tuta?

2. Yesu akagamba ki aha ‘kubonabona kwingi,’ kandi nikwija kutandika kuta?

² Yesu arikugamba aha kubaho kwe n’emperu y’ensi egi, akagira ati: “Ahabw’okuba omu biro ebyo haryabaho okubonabona kwingi okutakabahoga okwiha aha kuhangwa kw’ensi okuhitsya hati, kandi tikuribaho.” (Mat. 24:3, 21) Okubonabona kwingi okwo nikwija kutandika, Yehova ku araacwekyereze “Babulooni Orurembo Orukuru,” orw’ediini z’ebishuba arikukoresa ab’eby’obutegyeki. (Kush. 17:3-5, 16) Niki ekiraabeho bwanyima y’ekyo?

OKUTAAHIRIRA KWA SITAANE NIKWIJA KURUGAMU HARAMAGEDONI

3. Bwanyima y’amadiini g’ebishuba kucwekyerezibwa, niki ekiraahikye aha baheereza ba Yehova?

³ Bwanyima y’okucwekyerezibwa kw’amadiini g’ebishuba, Sitaane n’abarikumushagika nibaija kutaahirira abaheereza ba Yehova. Nk’eky’okureeberaho, Ebyahandiikirwe nibigamba ahari “Googi omu nsi ya Magoogi,” biti: “Oryainamuka, oije ori nk’eihunga; oryaba nk’ekicu ekishwekire ensi, iwe n’amahe gaawe goona n’amahanga maingi agariba gari hamwe naiwe.” Ahabw’okugira ngu Abajurizi ba Yehova tibaine by’okurwanisa kandi n’abantu b’obusingye, nibaija kureebeka nk’aboorobi kutaahirirwa. Ka neija kuba eri enshobe kubataahirira!​—Ezk. 38:1, 2, 9-12.

4, 5. Yehova naija kukora ki, Sitaane ku araateereho kucwekyereza Abakristaayo?

⁴ Ruhanga naija kukora ki, Sitaane ku araateereho kucwekyereza Abakristaayo? Yehova naija kubarwanirira, kandi ekyo nikiija kworeka ngu niwe ahikire kutegyeka byona. Okutaahirira okwo Yehova naija kukureeba nk’okwakorwa ahariwe. (Shoma Zekaria 2:8.) N’ahabw’ekyo, Tataitwe ow’omu iguru naija kucungura abaheereza be. Yehova naija kugumizamu arikucungura abaheereza kuhitsya obu ensi ya Sitaane eraacwekyerezibwe ahari Haramagedoni, ‘orugamba orw’ekiro kikuru kya Ruhanga ow’obushoboorozi bwona.’​—Kush. 16:14, 16.

⁵ Baibuli erikugamba ahari Haramagedoni neegira ngu Yehova “aine eki arikufa n’amahanga; naija kutonganisa abaine omubiri boona, n’ababi abaitse rurara; nikwo [Yehova] arikugira. Oku nikwo [Yehova] ow’amahe arikugamba naagira ati: Reeba, akabi nikagyenda nikaranda, nikaruga omu ihanga nikaza omu rindi; eihunga ry’amaani niriimuka, niritandikira aha muheru gw’ensi. Kandi abariitwa [Yehova] eryo izooba baryashangwa hoona okuruga aha muheru gumwe gw’ensi okuhika aha gundi. Tibaricurirwa, tibarishanguruzibwa n’obu kwakuba okuziikwa, kureka baryaba nk’amasha aha itaka.” (Yer. 25:31-33) Ensi egi embi neija kucwekyerezibwa ahari Haramagedoni. Ensi ya Sitaane neija kuba etakiriho kwonka ekicweka eky’omu nsi eky’ekibiina kya Yehova nikiija kugumaho.

ENSHONGA AHABW’ENKI ABAJURIZI BA YEHOVA NIBEEYONGYERA KUKANYA

6, 7. (a) Ni baahi abarikutwarirwa omu mutwe muhango gw’abantu? (b) Habaireho kweyongyera ki omu myaka egi?

⁶ Ekicweka eky’omu nsi eky’ekibiina kya Ruhanga nikyeyongyera kutunguuka ahabw’okugira ngu kirimu abantu abu Ruhanga arikusiima. Baibuli neetuhamiza ngu Yehova amaisho “agata aha bahikiriire, n’amatu ge agatega okushaba kwabo.” (1 Pet. 3:12) Abahikiriire nibatwariramu “omutwe muhango gw’abantu” kandi “nibo baarugire omu kubonabona kwingi.” (Kush. 7:9, 14) Abaraahonokeho ti bantu bakye bonka, beitu ‘n’omutwe muhango gw’abantu’ ekirikumanyisa ngu n’abantu baingi. Mbwenu shi noija kuba omwe aha baraahonokeho “omu kubonabona kwingi”?

⁷ Abarikutwarirwa omu mutwe muhango gw’abantu nibaruga nkahi? Nibarundaanwa hamwe ahabw’okugira ngu Yesu akakigambaho nka kimwe aha bumanyiso oburaayorekye okubaho kwe. Akagira ati: “Kandi engiri egi ey’obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.” (Mat. 24:14) Ogu nigwo murimo mukuru gw’abaheereza ba Yehova omu biro ebi eby’emperu. Ahabw’omurimo gw’okubuurira n’okwegyesa abantu Baibuli ogurikukorwa Abajurizi ba Yehova, abantu baingi babaasize kwega kuramya Ruhanga “omu Mwoyo n’omu mazima.” (Yoh. 4:23, 24) Nk’eky’okureeberaho, omu myaka ikumi ehingwire, kuruga omu mwaka gw’obuheereza 2003 kuhika 2012 abantu abarikurenga 2,707,000 bakabatizibwa barikworeka okwehayo kwabo ahari Ruhanga. Omu nsi yoona Abajurizi ba Yehova nibarenga omu 7,900,000, kandi hariho n’abandi baingi abarikuteeranira hamwe nabo okukira munonga abarikwija aha Kiijutsyo. Titurikwehimbisa ahabw’okugira ngu omubaro ni muhango, ahabw’okuba ‘Ruhanga niwe arikubikuza.’ (1 Kor. 3:5-7) Nitushemererwa ahabw’okugira ngu omutwe muhango gw’abantu nibaguma nibeeyongyera buri mwaka.

8. Niki ekirikureetera ekicweka eky’omu nsi eky’ekibiina kya Yehova kweyongyera kutunguuka?

⁸ Habaireho okweyongyera kuhango omu mubaro gw’abaheereza ba Yehova ahabw’okugira ngu naabashagika. (Shoma Isaaya 43:10-12.) Okweyongyera okwo kukagambwaho kuti: “Orikukira boona obuto aryarugwamu oruganda, n’orikukira boona obukye arugyemu eihanga ry’amaani. Niinye [Yehova]; kandi ndyakirahutsya omu bunaku bwakyo.” (Isa. 60:22) Hariho obunaku obu abashukirweho amajuta baabaire bari ‘bakye,’ kwonka omubaro gwabo gukeeyongyera obu Abaisraeli ab’omwoyo abandi baija omu kibiina kya Ruhanga. (Gal. 6:16) Kumara emyaka mingi Yehova atwire naaha emigisha abaheereza be ekibasiise baingi kwegaita aha mutwe muhango gw’abantu.

EKI YEHOVA ARIKWENDA NGU TUKORE

9. Twine kukora ki kubaasa kugira ebiro birungi by’omumaisho?

⁹ Yaaba turi Abakristaayo abashukirweho amajuta nari ab’entaama ezindi, nitwija kugira ebiro birungi by’omumaisho ebirikugambwaho omu Baibuli. Kwonka kubaasa kutunga ebirungi ebyo, twine kukora ebi Yehova arikwenda. (Isa. 48:17, 18) Teekateeka aha ky’okureeberaho ky’Abaisraeli abaabaire barikutegyekwa Ebiragiro bya Musa. Kimwe aha bigyendererwa by’ebiragiro kukaba kuri okurinda Abaisraeli aha bikwatiraine n’okuteerana, okukoragana omu by’obushuubuzi, okureeberera abaana, okutwarizana, n’ebindi. (Kur. 20:14; Lev. 19:18, 35-37; Bir. 6:6-9) Okukora ebi Yehova arikwenda nikitugasira omu muringo nigwo gumwe, kandi buzima tikirikutugumira kukora ebi akunda. (Shoma 1 Yohaana 5:3.) Buzima, nk’oku Abaisraeli baabaire barindwa ebiragiro, twayorobera ebiragiro bya Yehova Ruhanga n’emisingye ye, nibiturinda kandi bituhwera “kuhamira omu kwikiriza.”​—Tit. 1:13.

10. Ahabw’enki twine kutaho obwire bw’okweyegyesa Baibuli n’Okuramya kw’Eka?

¹⁰ Ekicweka eky’omu nsi eky’ekibiina kya Yehova nikigyenda omu maisho omu miringo mingi. Nk’eky’okureeberaho, nituguma nitweyongyera kwetegyereza gye amazima g’omu Baibuli. Ekyo kiri kityo ahabw’okugira ngu “omuhanda gw’abahikiriire ni nk’omushana ogw’omu kasheeshe ogugumizamu nigwaka gukahitsya omu ihangwe.” (Enf. 4:18) Kwonka twena nitubaasa kwebuuza tuti: ‘Niingyenda n’empindahinduka nsya ezirikubaho omu ku turikwetegyereza Ebyahandiikirwe? Mbwenu shi ninshoma Baibuli buri izooba? Ninkunda kushoma ebitabo byaitu? Nyowe n’ab’omu ka yangye twine entebeekanisa y’Okuramya kw’Eka buri saabiiti?’ Baingi ahariitwe nitubaasa kugira ngu tikigumire kukora ebintu ebyo. Ekirikwetengyesa n’okutaho obwire bw’okubikora. Ni kikuru kuguma nitweyegyesa, nitugyendera aha bi turikwega, kandi tukatunguuka omu by’omwoyo na munonga ahabw’okugira ngu turiyo nitwirira haihi n’okubonabona kwingi.

11. Ahabw’enki abaheereza ba Yehova nibaza omu nteerane eza buri saabiiti, ez’ebiro bibiri n’ez’ebiro bishatu?

¹¹ Ekibiina kya Yehova nikituhiga kukuratira obuhabuzi bwa Paulo obu: “Ka tuteekateekye oku twakwezirikisana kukundana n’okukora ebirungi, tutarikureka kuteeranira hamwe, nk’oku abamwe bagira, kureka tugumyane, kandi nk’oku murikureeba ngu ekiro ekyo kiri haihi n’okuhika, mweyongyere kutwaza mutyo.” (Heb. 10:24, 25) Obugyenyi obwabaire bubaho buri mwaka n’okweteeranira hamwe kuramya, bikaba byombeka Abaisraeli omu by’omwoyo. Kandi obugyenyi nk’obw’Ensiisira obwabaireho omu bunaku bwa Nehemia, bukaba bubareetera kushemererwa. (Kur. 23:15, 16; Neh. 8:9-18) Naitwe obunaku obu nitugira okushemererwa nk’okwo omu nteerane eza buri saabiiti, ez’ebiro bibiri n’ez’ebiro bishatu. Ka tuteereho kukoresa buri mugisha gwona kugasirwa omu ntebeekanisa ezi, tubaase kuguma tushemereirwe kandi tuhami omu by’omwoyo.​—Tit. 2:2.

12. Omurimo gw’okubuurira amakuru marungi tushemereire kugutwara tuta?

¹² Ahabw’okugira ngu turi bamwe abarikutwarirwa omu kicweka eky’omu nsi eky’ekibiina kya Ruhanga, nitushemererwa kwejumba omu ‘murimo gw’engiri ya Ruhanga.’ (Rom. 15:16) Okwejumba omu murimo ogu ogurikwera, nituba nitukorera hamwe na Yehova. (1 Kor. 3:9; 1 Pet. 1:15) Okubuurira amakuru marungi nikihwera omu kuhimbisa eiziina rya Ruhanga eririkwera. Ka n’omugisha gw’amaani kuheebwa obujunaanizibwa bw’okubuurira “engiri y’ekitiinisa eya Ruhanga orikusiimwa.”​—1 Tim. 1:11.

13. Twaba nitwenda kugira omukago murungi na Yehova n’amagara agatahwaho twine kukora ki?

¹³ Ruhanga naayenda ngu tugume twine omukago murungi nawe kandi tushagike ekibiina kye omu miringo etari emwe n’emwe. Musa akagambira Abaisraeli ati: “Eri izooba niinyeta eiguru n’ensi kubashinja, ku naata omu maisho gaanyu amagara n’okufa, omugisha n’omukyeeno; n’ahabw’ekyo mutoorane amagara, mubone kugumaho, imwe n’oruzaaro rwanyu, okukunda [Yehova] Ruhanga waanyu, okuhurira eiraka rye, n’okumuhamiraho, ahabw’okuba niwe magara gaanyu n’okuhangaara kwanyu, mubone kuguma omu nsi ei [Yehova] yaarahiire kuha baashwenkuriimwe, Abrahamu, Isaaka na Yakobo.” (Bir. 30:19, 20) Twaba nitwenda kutunga amagara agatahwaho tushemereire kukunda Yehova, tukakora ebi arikukunda, tukamworobera, tukahamira n’aha biragiro bye.

14. Ow’eishe-emwe omwe akaba naareeba ata ekicweka eky’omu nsi eky’ekibiina kya Yehova?

¹⁴ Ow’eishe-emwe Pryce Hughes, owaahamiire ahari Yehova yaaguma naashagika ekicweka eky’omu nsi eky’ekibiina kye, akahandiika ati: “Nyine okushemererwa ahabw’okugira ngu kuruga omwaka 1914 gutakahikire ntwire nimmanya ekigyendererwa kya Yehova . . . Haaba hariho ekintu kyona ekigumire kiri kikuru ahariinye, n’okuguma haihi n’ekicweka eky’omu nsi eky’ekibiina kya Yehova. Nkeega ngu ni kikuru kuguma nyine emiteekateekyere mirungi kandi ntarikwesiga biteekateeko by’abantu. Ekyo kikaandeetera kumariirira n’okuguma haihi n’ekibiina kya Yehova. Ogu nigwo muringo gwonka ogu omuntu arikubaasa kusiimwa Yehova n’okutunga emigisha ye?”

GUMA NOOGYENDA OMUMAISHO N’EKIBIINA KYA YEHOVA

15. Ha eky’okureeberaho kuruga omu Byahandiikirwe kworeka oku tushemereire kutwaza haabaho enyetegyereza nsya ez’Ebyahandiikirwe.

¹⁵ Twaba nitwenda kusiimwa Yehova kandi tukatunga emigisha ye, tushemereire kushagika ekicweka eky’omu nsi eky’ekibiina kye kandi twikirize enyetegyereza nsya ez’Ebyahandiikirwe. Teekateeka ahari eki: Bwanyima ya Yesu kufa, hakaba hariho Abayudaaya Abakristaayo abaabaire bahamiire aha biragiro batarikwenda kubireka. (Byak. 21:17-20) Kwonka ahabw’okuhwerwa ebaruha ei Paulo yaahandiikiire Abaheburaayo, bakaikiriza ngu tibarayeziibwe bitambo ebyabaire “biheebwayo nk’oku Ebiragiro biragiira” kwonka “ahabw’okuheebwayo kw’omubiri gwa Yesu Kristo rimwe akaheza.” (Heb. 10:5-10) Hatariho kubanganisa, Abakristaayo baingi abaabaire bari Abaheburaayo bakahindura emiteekateekyere yaabo baagumizamu nibatunguuka. Naitwe tushemereire kuba abeegi barungi ba Baibuli kandi tukagira emiteekateekyere mirungi haaba hariho enyetegyereza nsya ez’Ebyahandiikirwe, nari haabaho empindahinduka omu murimo gw’okubuurira.

16. (a) Ahabw’enki Paradiso neija kuba neeshemeza? (b) Niki eki orikwenda kureeba nikihikiirira?

¹⁶ Boona abaraagume bari abeesigwa ahari Yehova n’ekibiina kye, naija kuguma naabaha emigisha. Abaashukirweho amajuta abeesigwa nibaija kushemererwa ahabw’okutegyeka na Yesu omu iguru. (Rom. 8:16, 17) Waaba oine amatsiko g’okutuura omu nsi, teekateeka aha ku kiraabe nikishemeza kutuura omu Paradiso. Obu turi bamwe aha kicweka eky’omu nsi eky’ekibiina kya Yehova, ka nikishemeza kugira omugisha gw’okugambira abandi ebi Ruhanga aturaganiise omu nsi ensya! (2 Pet. 3:13) Zaaburi 37:11 nihagira hati: “Abacureezi baryahungura ensi, beesiime ahabw’okugira obusingye bwingi.” Abantu “baryayombeka amaju, bagatuuremu” kandi nibaija kushemerererwa “ebi emikono yaabo ekozire.” (Isa. 65:21, 22) Tiharigaruka kubaho kubonabona, obworo n’enjara. (Zab. 72:13-16) Babulooni Orurembo Orukuru tirurigaruka kubeihabeiha abantu ahabw’okuba nirwija kuba rutakiriho. (Kush. 18:8, 21) Abaafiire nibaija kuzoorwa babe abahuriire ebiro byona. (Isa. 25:8; Byak. 24:15) Ka neija kuba eri emigisha y’amaani aha bantu nyamwingi abeehaireyo ahari Yehova! Waaba nooyenda kureeba ebiraganiso ebyo birikuhikiirira, oshemereire kuguma nootunguuka omu by’omwoyo kandi orikugyenda n’ekibiina kya Yehova.

17. Tushemereire kugira miteekateekyere ki ahari Yehova n’ekibiina kye?

¹⁷ Obu ensi ya Sitaane eri haihi kucwekyerezibwa, ka tugume tuhami omu kwikiriza kandi tusiime entebeekanisa y’okuramya ei Yehova atutereireho. Egyo niyo miteekateekyere ei Daudi yaabaire aine obu yaayeshongora ati: “Ekigambo eki nshabire [Yehova] ni kimwe, kandi nikyo ndiguma ninsherura; nikwo kuguma omu nju ya [Yehova] ebiro byona eby’amagara gangye, okureeba oburungi bwa [Yehova], n’okwehanuuza omuri hekalu ye.” (Zab. 27:4) Ka tuteereho kuguma tuhamiire ahari Ruhanga, tugume haihi n’abaheereza be kandi tugume nitugyenda hamwe n’ekibiina kye.