“Kunda Mutaahi Waawe nk’Oku Oyekunda”

1, 2. (a) Yesu akagira ngu ekiragiro kya kabiri ekikuru ni kiiha? (b) Nituza kushwijuma bibuuzo ki?

OMUFARISAAYO arikuteeraho kutega Yesu, akamubuuza ati: “Mwegyesa, ekiragiro ekikuru omu biragiro nikiiha?” Nk’oku tureebire omu kicweka ekihwaire, Yesu akamugarukamu ngu ‘ekiragiro kikuru kandi eky’okubanza’ n’eki: “Kunda Mukama Ruhanga waawe n’omutima gwawe gwona, n’amagara gaawe goona, n’obwengye bwawe bwona.” Yesu akongyeraho ati: “Ekya kabiri ekirikukishusha n’eki, Kunda mutaahi waawe nk’oku oyekunda.”​—Mat. 22:34-39.

² Yesu akagira ngu twine kukunda bataahi baitu nk’oku turikwekunda. N’ahabw’ekyo, twine kwebuuza tuti: Bataahi baitu buzima ni baahi? Nitubaasa kworeka tuta ngu nitukunda bataahi baitu?

BATAAHI BAITU BUZIMA NI BAAHI?

3, 4. (a) Yesu akakoresa ky’okureeberaho ki kugarukamu ekibuuzo eki: “Mutaahi wangye n’oha”? (b) Omusamaria akahwera ata omushaija owaabaire aibirwe, atairwe, kandi ari haihi kufa? (Reeba ekishushani aha kutandika.)

³ Nitubaasa kuteekateeka ngu omutaahi n’omuntu orikutuura haihi naitwe kandi ori munywani waitu. (Enf. 27:10) Kwonka yetegyereze ebi Yesu yaagambire obu omushaija omwe orikweyendeza yaamubuuza ati: “Mutaahi wangye n’oha?” Yesu akamugarukamu arikumuha eky’okureeberaho ky’Omusamaria omurungi. (Shoma Luka 10:29-37.) Tukaateekateekire ngu omunyamurwa Omwisraeli, n’Omuleevi bakaba nibaija kutwaza nk’abataahi barungi baaheza kureeba omushaija owaabaire aibirwe, atairwe, atsigirweho ari haihi kufa. Kwonka, bakamurabaho baayanga kumuhwera. Omushaija ogwo akahwerwa Omusamaria owaabaire ari omwe aha bantu abarikuha ekitiinisa Ebiragiro bya Musa kwonka kandi Abayudaaya barikubatwara nk’ekirikunugwa.​—Yoh. 4:9.

⁴ Omusamaria kubaasa kuhwera omushaija ogwo kukira, akashuka amajuta na viinyo aha bironda bye. Edenaari ibiri ezi yaahaire ow’okumureeberera omu nju y’abagyenyi, nizingana n’omushaara gw’amazooba abiri. (Mat. 20:2) N’ahabw’ekyo, kyorobi kureeba owaabaire omutaahi w’omushaija ogwo owaabaire ahutaaziibwe. Eky’okureeberaho kya Yesu buzima nikitwegyesa ngu twine kukunda bataahi baitu kandi tukabagirira embabazi.

5. Abajurizi ba Yehova bakooreka bata ngu nibakunda bataahi baabo obu haabaho ekihikiirizi?

⁵ Kigumire kureeba abantu abaine embabazi nk’Omusamaria murungi. Na munonga omu ‘biro by’emperu’ ebi obu abantu baingi bataine rukundo, bari enshaarizi, kandi barikwanga ebirungi. (2 Tim. 3:1-3) Nk’eky’okureeberaho, haabaho ekihikiirizi abantu nibaba nibeetenga obuhwezi. Yetegyereze ekyabaireho obu eihunga eririkwetwa Sandy ryateera Orurembo New York omu Okwaikumi 2012. Omu kicweka kimwe ky’orurembo ekyasiisikaire munonga, abashuma bakaiba abantu abaabaire nibabonabona ahabw’okutagira mashanyarazi, n’ebindi ebirikwetengyesa. Kwonka Abajurizi ba Yehova bo, bakakora entebeekanisa eyaababaasiise kuhwerahwerana n’okuhwera abandi. Abakristaayo nibakora ebintu ebi ahabw’okuba nibakunda bataahi baabo. Ni miringo ki endiijo ei turikubaasa kworekamu ngu nitukunda bataahi baitu?

OKU TURIKWOREKA NGU NITUKUNDA ABATAAHI

6. Omurimo gwaitu gw’okubuurira gwine kakwate ki n’okuba abataahi barungi?

⁶ Hwera abantu omu by’omwoyo. Eki nitukikora turikuteeraho kubahuumuriza turikukoresa “Ebyahandiikirwe.” (Rom. 15:4) Hatariho kubanganisa, nitworeka ngu turi abataahi barungi twabuurira abandi amazima g’omu Baibuli. (Mat. 24:14) Ka twine omugisha gw’amaani kubuurira amakuru marungi g’Obukama kuruga ahari “Ruhanga Mukama w’amatsiko”!​—Rom. 15:13.

7. Yesu akaha musingye ki, kandi nitugasirwa tuta twagugyenderaho?

⁷ Twariza abandi nk’oku orikwenda bakutwarize. Yesu akagamba aha musingye ogu omu Rubazo rwe orw’aha Rushozi, arikugira ati: “Byona ebi mwenda ngu abantu babagirire, naimwe mube nikwo mwabagirira; ahakuba ebyo nibyo Biragiro kandi n’ebya Baanabi.” (Mat. 7:12) Twatwariza abandi nk’oku Yesu yaahabwire, nitworeka ngu nitutwaza omu muringo ogurikuhikaana n’omusingye oguri omu “Biragiro” (Okutandika kuhika aha Eky’Ebiragiro) na “Baanabi” (ebitabo eby’Oruheburaayo ebirimu obunabi). Ebiri omu bitabo ebyo nibyoreka ngu Ruhanga naaha omugisha abo abarikukunda abandi. Nk’eky’okureeberaho, Yehova arikurabira omuri Isaaya akagira ati: “Muhamire omu by’oburyo, mukore eby’okuhikiirira . . . Omuntu orikubikora aine omugisha.” (Isa. 56:1, 2) Buzima, nitutunga okushemererwa ahabw’okugira ngu bataahi baitu nitubatwariza omu muringo gwa rukundo kandi ogw’okuhikiirira.

8. Ahabw’enki twine kukunda abazigu baitu, kandi nihabaasa kurugamu ki twakikora?

⁸ Kunda abazigu baawe. Yesu akagira ati: “Mukahurira ku kyagambirwe ngu: Okunde mutaahi waawe, oyangye omuzigu waawe. Kwonka nyowe nimbagambira nti: Mukunde abazigu baanyu, kandi mushabire n’abarikubahiiga, mubone kuba abaana ba Shoimwe ori omu iguru.” (Mat. 5:43-45) Entumwa Paulo akagamba aha nshonga niyo emwe ati: “Omuzigu waawe ku araagire enjara, omugaburire; ku araakwatwe eiriho, omuhe eky’okunywa.” (Rom. 12:20; Enf. 25:21) Kurugiirira aha Biragiro bya Musa, omuntu akaba aine kuhwera omuzigu we kwimutsya endogoya ye yaaba egwire n’omugugu gwayo. (Kur. 23:5) Okukora hamwe omu muringo ogwo, kukaba nikubaasa kuhwera abazigu abo kugaruka kuba abanywani. Ahabw’okugira ngu nitukunda abazigu baitu, baingi aharibo babaasize kuhindura aha mitwarize yaabo. Twagirira omuzigu waitu rukundo, nangwa n’abo abarikutuhiiganisa, nikiija kutushemeza omwe aharibo yaahinduka Omukristaayo!

9. Yesu akagamba ki aha bikwatiraine n’ab’eishe-emwe okugaruraho obusingye?

⁹ “Mwezirikye okugira obusingye n’abantu boona.” (Heb. 12:14) Hatariho kubanganisa, eki nikitwariramu ab’eishe-emwe, ahakuba Yesu akagira ati: “Ku oraabe oreetsire empongano yaawe aha itambiro, waijukira aho eki oshobeize mugyenzi waawe, otsigye empongano yaawe omu maisho g’eitambiro, ogyende, obanze ogarukane nawe, bwanyima ogarukye oheyo empongano yaawe egyo.” (Mat. 5:23, 24) Ruhanga naija kutuha omugisha twayoreka ngu nitukunda ab’eishe-emwe kandi tukateeraho kugaruraho obusingye.

10. Ahabw’enki tutashemereire kusherura enshobe omu bandi?

¹⁰ Reka kusherura enshobe omu bandi. Yesu akagira ati: “Mutaricwa orubanja, nyentsya naimwe mutarirucwerwa. Ahabw’okuba orubanja oru mucwa, naimwe muryarucwerwa; kandi endengo ei murengamu, naimwe niyo murirengyerwamu. Ahabw’enki nooreeba akatokoozi akari omu riisho rya mugyenzi waawe, haza empimbi eri omu ryawe otagyeteho? Nari shi noija kugambira mugyenzi waawe oti, ka nkutokoore, haza obwo bwona empimbi eri omu riisho ryawe? Iwe ndyarya ‘we, banza oyekize empimbi eri omu riisho ryawe, obone kureeba gye oku oraatokoore mugyenzi waawe.” (Mat. 7:1-5) Egi ka n’enshonga nkuru ngu titushemereire kucwera abandi orubanja ahabw’enshobe nkye ezi barikukora, kandi obwo itwe turikubaasa kuba twine enshobe mpango!

OMURINGO GW’OMUTAANO OGW’OKWOREKA NGU NITUKUNDA ABATAAHI

11, 12. Ni muringo ki ogw’omutaano ogu turikworekamu ngu nitukunda bataahi baitu?

¹¹ Nitwenda kworeka ngu nitukunda abataahi omu muringo gw’omutaano. Naitwe nitubuurira amakuru marungi nka Yesu. (Luk. 8:1) Yesu akaragiira abeegi be kuza ‘omu mahanga goona, kuhindura abantu abeegi.’ (Mat. 28:19, 20) Twakora kyona ekirikubaasika kuhikiiriza ekiragiro ekyo, nituhwera bataahi baitu kuruga omu eirembo rihango eririkuhitsya omu kucwekyerera bakataaha omu eirembo erifunzire erikuhitsya omu magara agatahwaho. (Mat. 7:13, 14) Hatariho kubanganisa, Yehova naaha omugisha okuteeraho nk’okwo.

¹² Naitwe nka Yesu, nituhwera abantu kumanya ekyetengo kyabo eky’eby’omwoyo. (Mat. 5:3) Haagira abaatuhurikiza, nitubahwera kwigutsa ekyetengo ekyo turikubabuurira “engiri ya Ruhanga.” (Rom. 1:1) Abo abarikwikiriza amakuru marungi g’Obukama, nibagarukana na Ruhanga kurabira omuri Yesu Kristo. (2 Kor. 5:18, 19) Twabuurira amakuru marungi, nitworeka ngu nitukunda bataahi baitu omu muringo gw’omutaano kandi ogurikukirayo obukuru.

13. Nootwara ota okwejumba omu murimo gw’omutaano ogw’okubuurira amakuru g’Obukama?

¹³ Kurabira omu kugarukayo ahari abo abarikwenda kumanya ebirikukiraho n’okwegyesa abantu Baibuli, nitutunga okumarwa ahabw’okuhwera abantu kugyendera aha mitindo ya Ruhanga erikwera. Eki nikibaasa kuhwera omwegi wa Baibuli kuhindura emitwarize ye. (1 Kor. 6:9-11) Buzima, nikishemeza kureeba oku Ruhanga arikuhwera abo abaine ekyetengo ky’okutunga amagara agatahwaho, kukora empindahinduka ezirikwetengyesa kubaasa kugira omukago murungi nawe. (Byak. 13:48) Abataine matsiko ku barikuheza kwega Baibuli, bagira okushemererwa, kandi abaine okwerarikirira nibeesiga Tataitwe ow’omu iguru. Ka nikishemeza kureeba abasya barikutunguuka omu by’omwoyo! N’omugisha kworeka ngu nitukunda bataahi baitu kurabira omu murimo ogu ogw’omutaano.

OKU PAULO YAAGAMBIRE AHARI RUKUNDO

14. Paulo akashoboorora ata ahari rukundo omu 1 Abakorinso 13:4-8.

¹⁴ Twakunda bataahi baitu nk’oku Paulo yaashobooroire, Yehova naija kutuha emigisha, twetantare oburemeezi bwingi, kandi tutungye n’okushemererwa. (Shoma 1 Abakorinso 13:4-8.) Omu bugufu, ka tushwijume ebi Paulo yaagambire aha kukunda, reero tureebe oku turikubaasa kuhikaanisa ebigambo bye n’omukago gwaitu na bataahi baitu.

15. (a) Ahabw’enki twine kugira okugumisiriza n’embabazi? (b) Ni nshonga ki eziine kutureetera kwetantara eihari n’okwetunguura?

¹⁵ ‘Okukunda kugumisiriza, kugira n’embabazi.’ Nk’oku Ruhanga ayorekire okugumisiriza n’embabazi arikukoragana n’abantu abatahikiriire, naitwe twine kugumisiriza kandi tukagirira abandi embabazi baakora enshobe nari baatutwariza kubi. “Okukunda tikugira ihari,” n’ahabw’ekyo, rukundo neija kutuhwera kutegomba ebintu nari obujunaanizibwa bw’abandi omu kibiina. Kandi, twaba twine rukundo, titurikwija kwetunguura nari kugira amaryo. Ahakuba, “ekitsyori n’omutima gw’amaryo niyo tabaaza y’ababi; byombi n’ekibi.”​—Enf. 21:4.

16, 17. Nitubaasa kugyendera tuta aha biri omu 1 Abakorinso 13:5, 6?

¹⁶ Rukundo neija kutureetera kutwariza bataahi baitu omu muringo murungi. Titurikwija kubagambira ebishuba, kubaiba, nari kukora ekintu kyona ekirikuhenda ebiragiro n’emisingye ya Yehova. Rukundo neija kutuhwera kuteesherurira byaitu twenka, kureka nitwija kworeka ngu nitufayo n’aha bandi.​—Fil. 2:4.

¹⁷ Okukunda okwabuzima tikuguubwa kubi kandi “tikuteekateeka kibi aha muntu,” nari kubiika enziika okashusha ngu nituguma nituhandiika ebibi ebi abandi barikutukorera. (1 Tes. 5:15) Twabiika enziika, titurikubaasa kushemeza Ruhanga, kandi nituba turi nk’abarikutandika kuhemba omuriro mpora mpora ogurikubaasa kwaka gukaba ogw’akabi ahariitwe n’abandi. (Lev. 19:18) Rukundo neetuhwera kushemerererwa amazima, kandi etuhwera kutashemerererwa “kutahikiirira,” n’obu omuntu orikutwanga yaakuba naatwarizibwa kubi nari arikubonabonesibwa.​—Shoma Enfumu 24:17, 18.

18. Nitwega ki ahari rukundo kuruga omu 1 Abakorinso 13:7, 8?

¹⁸ Yetegyereze oku Paulo yaayongyeire kushoboorora ahari rukundo. Akagira ngu “okukunda kwemera byona.” Omuntu yaatugwisa kubi kwonka akatushaba okusaasirwa, rukundo neetuhiga kumusaasira. Okukunda “kwikiriza byona” ebiri omu Kigambo kya Ruhanga, kandi nikutuhwera kusiima eby’okurya by’omwoyo ebi turikutunga. Okukunda “kugira amatsiko ahari byona” ebiri omu Baibuli, kandi nikutuhiga kugambira abandi ahabw’enki twine amatsiko ago. (1 Pet. 3:15) Nitushaba kandi tugira amatsiko n’obu twakuba turi omu mbeera zigumire. Okukunda “kugumisiririza byona,” n’obu byakuba ebibi ebi abandi barikutukorera, okuhiiganisibwa, nari okugyezibwa okundi kwona. Kandi, “okukunda tikuhwaho ebiro byona.” Abantu abarikworobera Ruhanga nibaija kuguma baine rukundo ebiro n’ebiro.

GUMIZAMU NOOKUNDA BATAAHI BAAWE NK’OKU ORIKWEKUNDA

19, 20. Ni buhabuzi ki obw’Ebyahandiikirwe obushemereire kutuhwera kugirira bataahi baitu rukundo?

¹⁹ Twagyendera aha misingye ya Baibuli, nitubaasa kugumizamu nitukunda bataahi baitu. Rukundo ey’omuringo nk’ogwo neetwariramu abantu boona, batari abo bonka ab’oruganda nari orurimi rwaitu. Kandi twine kwijuka ngu Yesu akagira ati: “Kunda mutaahi waawe nk’oku oyekunda.” (Mat. 22:39) Ruhanga na Kristo bombi nibenda ngu tukunde bataahi baitu. Omu mbeera ezimwe ezirikukwata ahari bataahi baitu, twaba tutarikumanya eki twine kukora, ka tuteereho kushaba Ruhanga kutuha obuhabuzi arikukoresa omwoyo gwe ogurikwera. Twakora tutyo, nitwija kutunga emigisha ya Yehova kandi kituhwere kutwaza omu muringo gwa rukundo.​—Rom. 8:26, 27.

²⁰ Ekiragiro ky’okukunda omutaahi nk’oku orikwekunda nikyetwa “ekiragiro kya Mukama.” (Yak. 2:8) Paulo bwanyima y’okugamba ahari bimwe aha Biragiro bya Musa, akagira ati: “N’ebindi biragiro byona, biteeranira omu kigambo eki ngu: Kunda mutaahi waawe nk’oku oyekunda. Oine okukunda tagirira mutaahi we kubi; n’ahabw’ekyo okukunda nikwo kuhitsya Ebiragiro.” (Rom. 13:8-10) N’ahabw’ekyo, twine kugumizamu kugirira bataahi baitu rukundo.

21, 22. Ahabw’enki twine kukunda Ruhanga n’abataahi?

²¹ Twateekateeka aha nshonga ahabw’enki twine kukunda abataahi, twine n’okuteekateeka aha bigambo bya Yesu ngu Ishe “eizooba rye arijwisiza ababi n’abarungi, kandi agwisiza enjura abahikiriire n’abatahikiriire.” (Mat. 5:43-45) Yesu akaba naayegyesa ngu twine kukunda abantu boona. Nk’oku twaba twareebire, omuringo mukuru ogw’okugiriramu bataahi baitu rukundo, n’okubabuurira amakuru marungi. Ka n’emigisha mingi ebiikiirwe bataahi baitu abarikwikiriza amakuru marungi kandi bakagasiima!

²² Twine enshonga nyingi ezishemereire kutureetera kukundira kimwe Yehova tutarikwesaasira. Hariho emiringo mingi ei turikubaasa kworekamu ngu nitukunda abataahi. Twayoreka ngu nitukunda Ruhanga hamwe n’abataahi, nitworeka ngu nituha ekitiinisa ebi Yesu yaagambire aha nshonga ezi enkuru. Okukira munonga, nitushemeza Tataitwe ow’omu iguru Yehova.