Ijuka Abo Abari omu Buheereza obw’Obutwire

1. Paulo akaba naareeba ata abo abaabaire nibakora n’obweziriki kuheereza Yehova?

ENTUMWA Paulo akaba aijuka abo abaabaire nibakora n’obweziriki ahabw’amakuru marungi. Paulo akahandiika ati: “Nitwijuka obutoosha omu maisho ga Ruhanga Tataitwe emirimo yaanyu erikuruga omu kwikiriza, n’okukora okurikuruga omu kukunda, n’okugumisiriza okurikuruga omu matsiko agu mwine omuri Mukama waitu Yesu Kristo.” (1 Tes. 1:3) Buzima, Yehova nawe naijuka obuheereza bw’abo abarikumuheereza omu bwesigwa, yaaba embeera zaabo nizibabaasisa kukora bingi nari bikye.​—Heb. 6:10.

2. Nituza kushwijuma ki omu kicweka eki?

² Baingi aha baheereza bagyenzi baitu aba ira n’ab’ebiro ebi babaasize kwefeerereza munonga kuheereza Yehova omu buheereza obw’obutwire. Ka tureebe oku bamwe baabaasize kuheereza omu kyasha ky’okubanza. Kandi nituza n’okushwijuma bumwe aha buheereza obw’obutwire obw’obunaku obu, reero tureebe oku turikubaasa kwijuka abo abeehaireyo kuheereza omu muringo ogu ogw’omutaano.

ABAKRISTAAYO AB’OMU KYASHA KY’OKUBANZA

3, 4. (a) Bamwe bakaba baheereza bata omu kyasha ky’okubanza? (b) Bakaba batunga bata eby’okubabaisaho?

³ Yesu aherize kubatizibwa akatandikaho omurimo ogwabaire gwine kubuga ensi yoona. (Luk. 3:21-23; 4:14, 15, 43) Bwanyima y’okufa kwe, entumwa ze bakagumizamu barikukora omurimo ogu ogw’okubuurira. (Byak. 5:42; 6:7) Abakristaayo abamwe nka Filipo, bakaheereza nk’ababuurizi b’engiri kandi abamiisani omuri Palestine. (Byak. 8:5, 40; 21:8) Paulo n’abandi bakaza n’omu bicweka bya hare. (Byak. 13:2-4; 14:26; 2 Kor. 1:19) Abamwe nka Siluwano (Siila), Mako, na Luka bakakora nk’abahandiiki. (1 Pet. 5:12) Bamwe ahari banyaanyazi-itwe nabo bakaheereza hamwe n’ab’eishe-emwe aba abeesigwa. (Byak. 18:26; Rom. 16:1, 2) Ebi byona ebi baakozire ebiri omu Byahandiikirwe eby’Orugriika nibishemeza okubishoma, kandi nibyoreka ngu Yehova naijuka abaheereza be.

⁴ Ababuurizi b’obutwire ira bakaba nibareebererwa bata omu by’omubiri? Obumwe abantu abandi bakaba babagirira obufura nari bahwerwa Abakristaayo bagyenzi baabo, kwonka bakaba batashaba buhwezi obwo. (1 Kor. 9:11-15) Ab’eishe-emwe abamwe n’ebibiina bakaba babashagika. (Shoma Ebyakozirwe 16:14, 15; Abafilipi 4:15-18.) Paulo hamwe n’abo abu yaabaire naagyenda nabo bakaba bakora endiijo mirimo ey’okwebaisaho.

ABABUURIZI AB’OBUTWIRE AB’OBUNAKU OBU

5. Omushaija n’omukazi we bakagamba ki aha buheereza bwabo obw’obutwire?

⁵ N’omu bunaku obu baingi nibeejumba omu buheereza obw’obutwire. (Reeba akabokisi “Obuheereza obw’Obutwire.”) Nitutwara tuta okucwamu kwabo kuza omu buheereza obu? Noobaasa kubabuuza ekibuuzo ekyo, kandi nikibaasa kukuhiga kuza omu buheereza obu. Teekateeka aha ky’okureeberaho eki. Ow’eishe-emwe owaaheereize nka payoniya ow’obutwire, payoniya ow’omutaano, omumiisani, n’aha Beseeli omu ihanga erindi naagira ati: “Ninteekateeka ngu okuza omu buheereza obw’obutwire ni kimwe aha kucwamu kurungi oku ndakozire. Aha myaka 18, nkaba nyine kucwamu kuza aha yunivasite, kukora omurimo ogurikutwara obwire bwingi, nari kuba payoniya. Nyereebeire n’agangye ngu Yehova tarikubaasa kwebwa abarikwefeerereza kumuheereza omu buheereza obw’obutwire. Mbaasize kukoresa etalanta zangye n’okubaasa kwangye ebi Yehova yaampaire, omu miringo ei ntakubaasize kubikoresa ku ogire ngu nkacwamu kukora omurimo gw’ensi.” Omukazi we naagira ati: “Obuheereza bwona obu tugiiremu bumpwereire kutunguuka omu by’omwoyo. Tureebire oku Yehova agumire naaturinda kandi akatuha n’obuhabuzi omu miringo obundi etakubaasikire ku ogire ngu tituragiire mu buheereza obw’obutwire. Ninsiima Yehova buri izooba ahabw’omugisha gw’okuza omu buheereza bw’obutwire.” Naiwe nooyenda kutunga okushemererwa nk’okwo?

6. Twine buhame ki aha ku Yehova arikutwara obuheereza obw’obutwire?

⁶ Buzima, abamwe embeera zaabo hati tizirikubabaasisa kuza omu buheereza obw’obutwire. Twine amatsiko ngu Yehova naabasiima ahabw’okukora kwabo n’amaani. Teekateeka ahari abo abu Paulo yaagambireho omu Filemooni 1-3, otwariiremu boona abaabaire bari omu kibiina kya Kolosai. (Hashome.) Paulo akabasiima, kandi Yehova nawe akabasiima. Omu muringo nigwo gumwe, Tataitwe ow’omu iguru naasiima obuheereza bwawe. Mbwenu shi noobaasa kushagika ota abo abari omu buheereza obw’obutwire obunaku obu?

OKUHWERA BAAPAYONIYA

7, 8. Okuheereza nka payoniya nikitwariramu ki, kandi abandi omu kibiina nibabaasa kubahwera bata?

⁷ Nk’ababuurizi b’omu kyasha ky’okubanza, baapayoniya ab’obunaku obu nibagumya abandi omu bibiina ebi barimu. Baingi nibateeraho kumara eshaaha 70 omu kubuurira buri kwezi. Noobaasa kubahwera ota?

⁸ Munyaanyazi-itwe orikwetwa Shari akagira ati: “Baapayoniya nibareebeka nk’abataine buremeezi bwona, ahabw’okugira ngu nibaba bari omu kubuurira buri izooba. Kwonka nabo baine kuhuumurizibwa.” (Rom. 1:11, 12) Munyaanyazi-itwe ondiijo owaabaasize kuba payoniya kumara obwire buraingwa akagamba aha baapayoniya omu kibiina ati: “Nibakora munonga kandi buri izooba. Abandi baayehayo kubavuga kubatwara kuza kubuurira, baabeeta kurya nabo, baabaha esente z’okugura amajuta g’emotoka nari z’okubahwera, nibashemererwa. Nikyoreka ngu buzima nibabafaho.”

9, 10. Abamwe bakozire ki kuhwera baapayoniya omu kibiina kyabo?

⁹ Okaayenzire kuhwera baapayoniya omu kubuurira? Payoniya orikwetwa Bobbi akagira ati: “Nituba nitwenda abaraatushagike omu saabiiti.” Payoniya mugyenzi we ou ari nawe omu kibiina kimwe akongyeraho ati: “Okutunga ow’okubuurira nawe omu ihangwe kigumire.” Munyaanyazi-itwe omwe orikuheereza aha Beseeli omuri Brooklyn naagamba aha buheereza bwe obu yaabaire ari payoniya ati: “Munyaanyazi-itwe owaabaire aine emotoka akangira ngu eshaaha yoona ei ndaabe ntaine w’okukora nawe, muteerere esimu naija kugyenda naanye omu kubuurira. Buzima akampwera kugumizamu ndi payoniya.” Kandi Shari we akagira ati: “Bwanyima y’okubuurira, baapayoniya abatari mu bushwere nibaba bari bonka. Noobaasa kuguma nooyeta ab’eishe-emwe n’abanyaanyazi-itwe aba abatari mu bushwere kwejumba nabo omu kuramya okw’eka obwire butari bumwe na bumwe. Okukora nabo emirimo endiijo nakyo nikibaasa kubahwera kuguma bahami.”

¹⁰ Munyaanyazi-itwe omwe amazire omu buheereza obw’obutwire emyaka nka 50, arikugamba aha kuheereza kwe nka payoniya ari n’abandi banyaanyazi-itwe abatari mu bushwere naagira ati: “Abareeberezi baitu bakaba bataayaayira baapayoniya buri kuhinguraho ameezi makye. Bakaba batubuuza oku amagara gaitu gari, emirimo yaitu, nari ku turaabe twine ebindi ebirikutwerarikiriza. Bakaba bakimanyiise. Bakaba baija ahu turikuraara kureeba ku turaabe nitwetenga obuhwezi.” Eki nikibaasa kukuhwera kwijuka okusiima kwa Paulo ahabw’ebi eka emwe omuri Efeso yaamukoreire.​—2 Tim. 1:18.

11. Okuheereza nka payoniya nikitwariramu ki?

¹¹ Ebibiina ebimwe birimu baapayoniya ab’omutaano. Baingi ahari aba nibateeraho kumara eshaaha 130 omu kubuurira buri kwezi. Ahabw’eshaaha ezi barikumara omu kubuurira n’okuhwera omu miringo endiijo, nibaba bataine bwire bw’okukora emirimo ey’okwebaisaho. Ofiisi y’eitaagi neebahwera omu by’esente buri kwezi kugira ngu bate omutima aha kubuurira.

12. Abareeberezi n’abandi nibabaasa kuhwera bata baapayoniya ab’omutaano?

¹² Nitubaasa kuhwera tuta baapayoniya? Omureeberezi omwe orikuheereza aha ofiisi y’eitaagi orikukira kuhurizana nabo naashoboorora ati: “Abareeberezi baine kugamba nabo, kubaasa kumanya embeera zaabo reero bakamanya oku barikubaasa kubahwera. Ab’eishe-emwe abamwe nibateekateeka ngu baapayoniya ab’omutaano tibaine byetengo ahabw’okugira ngu nibahwerwa omu by’esente, kwonka nibabaasa kubahwera omu miringo mingi.” Nka baapayoniya ab’obutwire, baapayoniya ab’omutaano nibashemererwa kuba baine ab’okubuurira nabo. Noobaasa kubahwera orikubuurira nabo?

OKUHWERA ABAREEBEREZI ABARIKUTAAYAAYIRA EBIBIINA

13, 14. (a) Tushemereire kuguma nitwijuka ki aha bikwatiraine n’abareeberezi abarikutaayaayira ebibiina? (b) Noobaasa kukora ki kuhwera abo abarikutaayaayira ebibiina?

¹³ Abareeberezi abarikutaayaayira ebibiina hamwe n’abakazi baabo, nibareebwa nk’abahami omu by’omwoyo. Eki kihikire, kwonka nabwo nibaba baine kugumibwa, nibaba nibeetenga ab’okubuurira nabo, n’ab’okuba nabo omu by’okweshemeza. Kandi shi ku baakurwara bakateebwa aha kitanda, obundi barikwetenga kushemezibwa nari kunaanuurwa omubiri? Ka nikibagaruramu amaani ab’eishe-emwe na banyaanyazi-itwe baabahwera omu bi barikwetenga kandi bakooreka ngu nibabafaho. Paulo n’abu yaabaire naagyenda nabo baine kuba baashemereirwe ahabw’okugira ngu Omushaho Luka owaahandiikire ekitabo kya Ebyakozirwe akabafaho.​—Kol. 4:14; Byak. 20:5–21:18.

¹⁴ Abareeberezi abarikutaayaayira ebibiina hamwe n’abakazi baabo nibashemererwa kutunga abanywani ab’ahamara. Omureeberezi omwe orikutaayaayira ebibiina akahandiika ati: “Banywani bangye nooshusha oti nibamanya obu ndikuba ninyetenga obuhwezi. Nibabuuza ebibuuzo ebirikworeka ngu nibafayo, kandi eki nikimpwera kubagambira oburemeezi bwangye. Okumpurikiza gye kyonka, nikimpwera munonga.” Abareeberezi abarikutaayaayira ebibiina n’abakazi baabo nibasiima munonga obuhwezi obu ab’eishe-emwe na banyaanyazi-itwe barikubaha.

OKUHWERA ABARIKUHEEREZA AHA BESEELI

15, 16. Abarikuheereza aha Beseeli n’abarikwombeka ebyombeko ebirikubamu enteerane empango nibahwera bata, kandi nitubaasa kubashagika tuta?

¹⁵ Omu nsi yoona abo abarikuheereza aha Beseeli, abarikwombeka ebyombeko ebirikubamu enteerane empango, nibahwera kihango omu murimo gw’Obukama ogurikureebererwa ofiisi y’eitaagi ey’ihanga ryabo. Omu kibiina eki orimu kyaba kirimu Ababeseeli, noobaasa kworeka ota ngu noobaijuka?

¹⁶ Ku barikuba bakiri basya aha Beseeli, nibabaasa kuhurira bainiire ab’omu maka gaabo na banywani baabo orushusho, ahabw’okugira ngu babatsigireho. Ka nikibashemeza Ababeseeli bagyenzi baabo n’ab’omu bibiina ebi barimu baabafaho! (Mak. 10:29, 30) Obuheereza bwabo aha Beseeli nibubabaasisa kuza omu nteerane n’okwejumba omu kubuurira buri saabiiti. Kwonka obumwe Ababeseeli nibaba baine obujunaanizibwa obundi. Abari omu kibiina ku barikwetegyereza eki kandi bakooreka ngu nibasiima Ababeseeli hamwe n’ebi barikukora, buri omwe naagasirwa.​—Shoma 1 Abatesalonika 2:9.

OKUHWERA ABARIKUHEEREZA OMU MAHANGA AGANDI

17, 18. Ni buheereza ki oburikutwariramu okuheereza omu mahanga agandi?

¹⁷ Abo abarikwikiriza kuheereza omu mahanga agandi nibashangayo eby’okurya, endimi, emigyenzo, n’embeera ezirikutaana aha bi bamanyiriire. Ahabw’enki nibacwamu kwikiriza embeera nk’ezo?

¹⁸ Abamwe n’abamiisani abu ekigyendererwa kyabo ekikuru kiri okubuurira omu bicweka ei abandi barikugasirwa omu kutendekwa oku baatungire. Ofiisi y’eitaagi neebaha oburaaro n’esente ezirikubabaasisa kugura ebi barikwetenga. Abamwe abarikuheereza omu mahanga agandi, nibooherezibwa aha ofiisi y’eitaagi nari kuhwera omu kwombeka ofiisi z’amataagi, ofiisi z’abavunuuzi, ebyombeko ebirikubamu enteerane empango nari Ebyombeko by’Obukama. Nibaheebwa eby’okurya, oburaaro, n’obundi buhwezi. Nabo nibeejumba omu nteerane n’omu kubuurira nk’Ababeseeli, n’ahabw’ekyo, n’ab’omugasho omu miringo mingi.

19. Twine kuguma nitwijuka ki ahari abo abarikuheereza omu mahanga agandi?

¹⁹ Noobaasa kuguma noijuka ota abari omu buheereza nk’obwo? Guma noijuka ngu omu kubanza nibaba batakamanyiriire eby’okurya by’ihanga eryo. Noobaasa kuguma noijuka ekyo waaba noobeeta kurya nabo. Noobaasa kubabuuza eby’okurya ebi barikwenda kurya nari ebi barikwenda kwega kurya. Bagumisiririze baaba nibeega orurimi rusya n’emigyenzo y’ekicweka eki barimu. Nikitwara obwire kubaasa kwetegyereza buri kimwe eki orikugamba, kwonka omu muringo murungi noobaasa kubahwera kwatura gye ebigambo. Nibaba nibenda kwega!

20. Ni muringo ki omurungi ogu turikubaasa kuguma nitwijukamu abari omu buheereza obw’obutwire hamwe n’abazaire baabo?

²⁰ Abari omu buheereza obw’obutwire nibakura, kandi nikyo kimwe n’abazaire baabo. Abazaire baabo baaba bari Abajurizi ba Yehova, obundi nibaba nibenda ngu abaana baabo bagume omu buheereza bwabo. (3 Yoh. 4) Hatariho kubangaanisa, abari omu buheereza obw’obutwire nibakora kyona ekirikubaasika kwija kuhwera abazaire baabo baaba baine oburemeezi. Kwonka, ab’eishe-emwe abari haihi n’abazaire baabo abari omu buheereza obw’obutwire nabo nibabaasa kuhwera. Guma noijuka ngu abari omu buheereza obw’obutwire baine obujunaanizibwa bw’amaani omu murimo ogurikukirayo obukuru omu nsi. (Mat. 28:19, 20) Iwe nari ab’omu kibiina nimubaasa kuhwera omuzaire w’ogwo ori omu buheereza obw’obutwire yaaba aine oburemeezi?

21. Abo abari omu buheereza obw’obutwire nibahurira bata waabagumya nari okabaha obuhwezi?

²¹ Abo abarikuza omu buheereza obw’obutwire tibarikuzayo ahabw’okwenda kukora sente, kureka n’ahabw’okwenda kuheereza Yehova hamwe n’abandi. Nibasiimira kimwe obuhwezi bwona obu orikubaasa kubaha. Munyaanyazi-itwe orikuheereza omu ihanga erindi naagira ati: “Nangwa n’okutunga akabaruha nikyoreka ngu abandi nibakuteekateekaho kandi ngu nibasiima ebi orikukora.”

22. Obuheereza obw’obutwire noobutwara ota?

²² Okuheereza Yehova omu buheereza obw’obutwire buzima nikyo kirikukirayo kureeta okumarwa. Obuheereza obu nibwetengyesa okukora n’amaani, nibwegyesa, nibureeta n’okumarwa. Kandi nibutebeekanisa gye abaheereza ba Yehova ahabw’obuheereza oburaareete okushemererwa okwabuzima, Obukama bwa Ruhanga ku buraabe nibutegyeka. Ka tugume ‘nitwijuka emirimo n’okukora’ kw’abari omu buheereza obw’obutwire.​—1 Tes. 1:3.