Twine Kuba Abarikwera omu Mitwarize Yaitu Yoona

1, 2. (a) Yehova naayenda ngu abaheereza be batwaze bata? (b) Nituza kugarukamu bibuuzo ki omu kicweka eki?

YEHOVA akahwera entumwa Petero kujuriza ebiri omu kitabo kya Abaleevi n’okushoboorora ngu Abakristaayo baine kuba abarikwera. (Shoma 1 Petero 1:14-16.) “Orikwera” Yehova, naayenda ngu abashukirweho amajuta ‘n’ab’entaama ezindi’ bateereho kuba abarikwera omu mitwarize yaabo yoona beitu etari emwe aha mitwarize yaabo.​—Yoh. 10:16.

² Okugaruka kushwijuma ebiri omu kitabo kya Abaleevi, n’okugyendera aha bi turikwega, nikiija kutuhwera kuguma turi abarikwera omu mitwarize yaitu yoona. Nituza kushwijuma ebibuuzo nk’ebi: Tushemereire kureeba tuta okuhenda emisingye ya Baibuli? Ekitabo kya Abaleevi nikitwegyesa ki aha bikwatiraine n’okushagika Yehova nk’ohikire kutegyeka byona? Nitubaasa kwega ki aha bitambo ebyabaire biheebwayo ira?

YETANTARE OKUHENDA EMISINGYE YA BAIBULI

3, 4. (a) Ahabw’enki Abakristaayo baine kwetantara kuhenda ebiragiro hamwe n’emisingye ya Baibuli? (b) Ahabw’enki tutashemereire kuhoora enzigu nari kubiika enziika?

³ Twaba nitwenda kushemeza Yehova, twine kuhamira aha misingye ye n’ebiragiro bye, tukeetantara okubihenda nkana, kandi tukanga n’ekintu kyona ekitashemeire. N’obu turaabe tutari hansi y’Ebiragiro bya Musa, emisingye erimu neetuhwera kumanya eki Ruhanga arikusiima n’eki atarikusiima. Nk’eky’okureeberaho, Abaisraeli bakaragiirwa bati: “Otarihoora abantu b’eihanga ryawe, n’obu kwakuba okubagiraho enziika; kureka okunde mutaahi waawe, nk’oku oyekunda. Niinye MUKAMA.”​—Lev. 19:18.

⁴ Yehova naayenda ngu twetantare okuhoora enzigu n’okubiika enziika. (Rom. 12:19) Twayehuzya ebiragiro n’emisingye ya Ruhanga, Omuregi naija kushemererwa, kandi nitwija n’okujumisa eiziina rya Ruhanga. Nangwa n’obu omuntu yaakutugwisa kubi akigyendereire, titushemereire kubiika enziika. Baibuli neegira ngu turi ‘enyabya z’eibumba’ ezirimu eky’eitungo. Kandi eky’eitungo ekyo, n’obuheereza bwaitu. (2 Kor. 4:1, 7) Enziika eri nka asidi, n’ahabw’ekyo titurikubaasa kugibiika hamwe n’eky’eitungo kyaitu omu nyabya nk’ezo!

5. Nitubaasa kwega ki aha birikukwata ahari Arooni n’okufa kw’abatabani? (Reeba ekishushani aha kutandika.)

⁵ Omu Abaleevi 10:1-11 nihooreka ekyabaireho ekyareeteire eka ya Arooni obusaasi bwingi. Bashemereire kuba baagwereirwe akagwe, omuriro ku gwarugire omu iguru gukootsya batabani ba Arooni Nadabu na Abihu omu ihema. Ekyo ka kiine kuba kyagyerize okwikiriza kwa Arooni n’ab’omu ka ye, ahabw’okutaikirizibwa kucurira abanyabuzaare baabo abaafiire! Naiwe nooyoreka ngu ori orikwera orikwetantara kukwatanisa n’ab’omu ka yaanyu ababingirwe?​—Shoma 1 Abakorinso 5:11.

6, 7. (a) Twaba nitucwamu yaaba turaayejumbe omu kugaitwa okuri omu kanisa, twine kuteekateeka ahari ki? (Reeba obugambo obw’ahansi.) (b) Nitubaasa kushoboororera tuta abanyabuzaare abatari Bajurizi ba Yehova ahabw’enki turikubaasa kwanga kwejumba omu kugaitwa okuraabe omu kanisa?

⁶ Nitubaasa kutahikwaho buremeezi nk’obwahikire ahari Arooni n’eka ye. Kwonka shi ku twakushabwa kwejumba omu kugaitwa kw’omunyabuzaare otari Mujurizi wa Yehova okurikuza kuba omu kanisa? Tihariho kiragiro kuruga omu Byahandiikirwe ekirikutuzibira kwejumba omu kugaitwa nk’okwo, kwonka hariho emisingye ya Baibuli erikubaasa kutuhwera kucwamu.a

⁷ Okucwamu kwaitu kuguma turi abarikwera omu maisho ga Yehova, nikibaasa kushobera abanyabuzaare baitu abatari Bajurizi ba Yehova. (1 Pet. 4:3, 4) Nituteeraho kutabagwisa kubi, turikugamba nabo omu muringo gw’embabazi, kwonka turikuhamira aha kihikire. Obundi eki nikibaasa kukorwa kare omukoro gutakahikire. Nitubaasa kubeebaza tubagire ngu nitushemererwa ahabw’okutweta aha kugaitwa okwo. Bwanyima nitubaasa kugira ngu ahabw’enshonga z’ediini, okwejumba omu kugaitwa okwo nikubaasa kushiisha okushemererwa aha izooba ryabo ery’omutaano, kandi ekyo kireeteho okuhemuka. Ogu n’omuringo gumwe ogurikubaasa kutuhwera kwetantara okuhenda emisingye ya Baibuli.

SHAGIKA YEHOVA OMUTEGYEKI WA BYONA

8. Ekitabo kya Abaleevi nikyoreka kita ngu Yehova niwe ahikire kutegyeka byona?

⁸ Ekitabo kya Abaleevi nikigamba ahari Yehova nk’ohikire kutegyeka byona. Emirundi erengire ahari 30, ebiragiro ebiri omu kitabo kya Abaleevi nibigambwaho nk’ebirikuruga ahari Yehova. Eki Musa akaba naakimanya kandi akakora nk’oku Yehova yaamuragiire. (Lev. 8:4, 5) Naitwe butoosha tushemereire kukora ebi Yehova ow’Obushoboorozi Bwona arikutushaba kukora. Omu nshonga egi, twine obushagiki bw’ekibiina kye. Kwonka nitubaasa kugyezibwa twaba turi twenka, nk’oku Yesu yaagyeziibwe obu yaabaire ari omu ihamba wenka. (Luk. 4:1-13) Twaba tutaire omutima aha kushagika Yehova nk’omutegyeki wa byona kandi turikumwesiga, tihaine orikubaasa kutureetera kuhenda emisingye ya Baibuli kandi titurikwija kutiina.​—Enf. 29:25.

9. Ahabw’enki abaheereza ba Ruhanga nibangwa omu mahanga goona?

⁹ Obu turi abakuratsi ba Kristo kandi Abajurizi ba Yehova, nituhiiganisibwa omu mahanga agu turimu omu nsi yoona. Eki kiine kubaho ahakuba Yesu akagambira abeegi ati: “Baryabahayo okubonabonesibwa n’okwitwa; muryayangwa amahanga goona ahabw’eiziina ryangye.” (Mat. 24:9) Kwonka omu kwangwa nk’okwo, nitugumisiriza turikubuurira kandi nitugumizamu kukyoreka ngu turi abarikwera omu maisho ga Yehova. N’obu turaabe turi abeesigwa, turikutwaza gye, kandi turikurinda ebiragiro by’eihanga, ahabw’enki nitwangwa? (Rom. 13:1-7) N’ahabw’okugira ngu nitwikiriza ngu Yehova aine Obushoboorozi bw’okutegyeka byona! Niwe turikuramya “wenka” kandi titurikwenda kuhenda emisingye ye n’ebiragiro bye ebihikiriire.​—Mat. 4:10.

10. Niki ekyabaireho ow’eishe-emwe omwe ku yaikiriize kuza omu mahe?

¹⁰ Tituri “b’ensi.” N’ahabw’ekyo, titurikugira rubaju omu ntaro n’eby’obutegyeki eby’ensi egi. (Shoma Yohaana 15:18-21; Isaaya 2:4.) Bamwe abeehaireyo ahari Ruhanga baremirwe kuguma bataine rubaju. Kwonka baingi aharibo babaasize kweteisa kandi baagaruka baagira omukago murungi na Tataitwe ow’omu iguru. (Zab. 51:17) Beitu bakye bangire kweteisa. Nk’eky’okureeberaho omu Rutaro II orw’Ensi Yoona, abeebembezi bakarundaana ab’eishe-emwe 160 ab’emyaka eri ahansi ya 45 abaabaire bari omu bihome omuri Hungary baabatwara omu tauni emwe. Ku baabahikizeyo bakabaragiira ngu baze omu mahe. Ab’eishe-emwe abeesigwa bakaguma baangire, kwonka mwenda aharibo bakaikiriza kuza omu mahe baabaha na yunifoomu. Bwanyima y’emyaka ebiri, omwe aha baikiriize kuza omu mahe, akeeshanga ari omwe ahari abo abaabaire batoorainwe kwita Abajurizi ba Yehova abeesigwa. Omuri abo hakaba harimu ou arikuzaarwa nawe! Kwonka ku byagire kuhendera, tibarabaasize kubaita nk’oku baabaire nibabatiinatiinisa.

HA YEHOVA EKIRIKUKIRAYO OBURUNGI

11, 12. Niki eki turikubaasa kwegyera aha bitambo ebyabaire biheebwayo omu Israeli eya ira?

¹¹ Ebiragiro ebyahairwe Musa bikaba nibyoreka ebitambo ebi Abaisraeli baabaire baine kuhayo. (Lev. 9:1-4, 15-21) Ebitambo ebyo bikaba biine kuba bitaine kamogo ahakuba bikaba nibijwekyera ekitambo kya Yesu ekihikiriire. Kandi, haine ebyabaire biine kukuratirwa omu kuhayo ekitambo. Nk’eky’okureeberaho, teekateeka aha ki omukazi yaabaire aine kukora yaaheza kuzaara. Abaleevi 12:6 nihagira hati: “Ebiro by’okutashemera kwe ku birihwa, yaaba by’omwojo nari eby’omwishiki, aryareeta omwana gw’entaama oguhikize omwaka kuba ekitambo ky’okwotsya, n’enkombe nto nari akaiba kuba empongano y’ekibi, abireetere omunyamurwa aha muryango gw’Eihema ry’okubugaabuganiramu.” N’obu ebiragiro biraabe byabaire nibyoreka eki baine kuhayo, kwonka bikaba nibikyoreka gye ngu Ruhanga aine rukundo. Omukazi ozaire ku yaabaire aba atarikubaasa kuhayo ntaama, akaba aikirizibwa kuhayo obwiba bubiri nari enkombe nto ibiri. (Lev. 12:8) N’obu yaabaire aba ari omworo, Yehova akaba ayoreka ngu naamukunda kandi naamusiima kwingana n’ogwo owaareeta ekiheebwayo eky’omuhendo. Nitwega ki omuri eki?

¹² Entumwa Paulo akahiga ab’eishe-emwe bagyenzi be kuha Ruhanga “ekitambo ky’okusiima.” (Heb. 13:15) Nituhayo ekitambo ky’okusiima ku turikugambira abandi eiziina rya Ruhanga. Ab’eishe-emwe na banyaanyazi-itwe abateta nibakoresa orurimi rwabo rw’abateta kuhimbisa Ruhanga. Abakristaayo abatarikubaasa kwimuka, nibahimbisa Ruhanga barikukoresa amabaruha, barikukoresa esimu kubuurira, kandi nibabuurira n’abarikubataayaayira. Eki turikubaasa kukora kuhimbisa Yehova nikiija kurugiirira aha ku amagara gaitu gari n’okubaasa kwaitu, kwonka kyona eki turikuha Yehova kishemereire kuba nikikirayo oburungi.​—Rom. 12:1; 2 Tim. 2:15.

13. Ahabw’enki twine kuhayo ripoota zaitu z’okubuurira?

¹³ Ebitambo byaitu eby’okuhimbisa nitubihayo ahari Ruhanga twekundiire ahabw’okugira ngu nitumukunda. (Mat. 22:37, 38) Kwonka nitushabwa kuguma nituhayo eshaaha ezi turikumara omu kubuurira. Mbwenu shi tushemereire kuba twine miteekateekyere ki aha ntebeekanisa egi? Ripoota ezi turikuhayo buri kwezi nizooreka ngu nituha Ruhanga ekitiinisa. (2 Pet. 1:7) Kwonka, tihaine n’omwe ahariitwe oshemereire kuhurira naagyemeserezibwa ngu aine kumara eshaaha nyingi omu kubuurira, kubaasa kuhayo ripoota nungi ey’okubuurira. Egi niyo nshonga ahabw’enki omubuurizi orikuba akuriire kimwe nari oine amaani mabi arikubaasa kuhayo edakiika 15. Yehova naasiima omubuurizi ogwo ahabw’okuhayo edakiika ezo nk’ekitambo kye ekirikukirayo oburungi, n’ahabw’okworeka ngu naasiima omugisha gw’okuba omwe aha Bajurizi ba Yehova. Nk’Abaisraeli abamwe baabaire batarikubaasa kuhayo ekitambo eky’omuhendo mwingi, Yehova naasiima abaheereza be abaine amagara mabi, kwonka abarikuhayo ripoota y’okubuurira. Ripoota yaawe y’okubuurira neegaitwa aha z’abandi omu nsi yoona, ekyo kihwera ekibiina kutebeekanisiza kare omurimo gwaitu gw’okubuurira. Mbwenu shi, okushabwa kuhayo ripoota zaitu z’okubuurira n’ekintu ekitarikubaasika?

OKWESHOMESA KWAITU HAMWE N’EBITAMBO BY’OKUSIIMA

14. Shoboorora ahabw’enki twine kushwijuma omuringo ogu turikweshomesamu.

¹⁴ Bwanyima y’okushwijuma bimwe ebiri omu kitabo kya Abaleevi, noobaasa kuba nooteekateeka oti: ‘Hati ninyetegyereza gye ahabw’enki ekitabo eki ni kimwe aha Byahandiikirwe ebirikwera.’ (2 Tim. 3:16) Hati noobaasa kumariirira kuguma ori orikwera, ahabw’okugira ngu Yehova naayenda ngu okikore n’ahabw’okwenda kumushemeza. Obundi ebi oyegire omu kitabo kya Abaleevi omu bicweka ebi bibiri bikureeteire kugira ekihika ky’okwongyera kushwijuma Ebyahandiikirwe byona. (Shoma Enfumu 2:1-5.) Shaba kandi oshwijume omuringo ogu orikweshomesamu. Hatariho kubangaanisa nooyenda ngu ebitambo byawe bisiimwe Yehova. Oshangire ngu okureeba tiivi, emizaano y’aha Intaneeti, eby’okweshemeza, nari ebindi ebi orikukunda, nibikuhuzya nari nibikuremesa kutunguuka omu by’omwoyo? Ku kiraabe nikwo kiri, noobaasa kushanga kirikuhwera kuteekateeka aha bigambo bimwe eby’entumwa Paulo ebihandiikire omu kitabo kya Abaheburaayo.

15, 16. Ahabw’enki Paulo yaagambire butunu obu yaabaire naahandiikira Abakristaayo Abaheburaayo?

¹⁵ Paulo akagamba butunu obu yaahandiikira Abakristaayo Abaheburaayo bagyenzi be. (Shoma Abaheburaayo 5:7, 11-14.) Entumwa Paulo tararumire mu bigambo bye! Akabagira ngu bakaba bahindukire “abarikuhurira kubi.” Ahabw’enki Paulo yaabagambiire butunu, atarikwekiikuura? Akaba naayoreka rukundo nk’eya Yehova arikufayo kuhwera Abakristaayo abo abaabaire nibateeraho kutungwa amate omu by’omwoyo. Okumanya enyegyesa z’Ekikristaayo ez’okubandizaho ni kikuru. Kwonka, “eby’okurya ebigumire” nibyetengyesa kubaasa kuhwera Omukristaayo kukura omu by’omwoyo.

¹⁶ Abaheburaayo omu mwanya gw’okutunguuka kuhika aha kwegyesa abandi, bakaba nibeetenga omuntu ondiijo kubeegyesa. Ahabw’enki? Ahakuba bakaba nibeetantara “eby’okurya ebigumire.” Noobaasa kwebuuza oti: ‘Nyine emiteekateekyere mirungi aha by’okurya by’omwoyo ebigumire? Nimba nyine ekihika ky’okubyega? Nari tindikufayo kushaba n’okwejumba omu kucondooza aha nyegyesa za Baibuli ezigumire? Ku kiraabe nikwo kiri, omuringo ogu ndikweshomesamu nigwo mubi?’ Ekigyendererwa kyaitu n’okubuurira abantu, tukabeegyesa kandi tukabahindura abeegi.​—Mat. 28:19, 20.

17, 18. (a) Ahabw’enki butoosha twine kuguma niturya eby’okurya by’omwoyo ebigumire? (b) Nitubaasa kureeba tuta okukoresa amaarwa twaba turi haihi kuza omu nteerane?

¹⁷ Baingi ahariitwe nikibaasa kuba nikitugumira kweshomesa. Buzima, Yehova tarikuteeraho kuhiga abantu be kweshomesa arikubareetera kugira omuntu w’omunda orikubashinja. Kwonka, n’obu twakuba tumazire emyaka mingi nari mikye twehaireyo ahari Yehova, twine kugumizamu niturya eby’okurya by’omwoyo ebigumire. Okukora ekyo ni kikuru ku turaabe nitwenda kuguma turi abarikwera.

¹⁸ Kubaasa kuba abarikwera, twine kushwijuma gye Ebyahandiikirwe kandi tukakora ebi Ruhanga arikwenda ngu tukore. Teekateeka ahari batabani ba Arooni Nadabu na Abihu, abaacwekyereziibwe ahabw’okukoresa omuriro ogu Ruhanga atarabaragiire,’ obundi ahabw’okugira ngu bakaba basinzire. (Lev. 10:1, 2) Yetegyereze eki Ruhanga yaagambiire Arooni. (Shoma Abaleevi 10:8-11.) Mbwenu shi ekyahandiikirwe eki nikimanyisa ngu titushemereire kunywa ekintu kyona ekirikusinza twaba turi haihi kuza omu nteerane? Teekateeka ahari eki: Titwakiri hansi y’Ebiragiro. (Rom. 10:4) Omu mahanga agamwe, ab’eishe-emwe bagyenzi baitu nibanywa otwarwa tukye baaba nibarya eby’okurya bari haihi kuza omu nteerane. Ebikopo bina bya viinyo bikakoresibwa aha Kuhingurwaho. Obu Yesu yaatandikaho omukoro gw’Ekiijutsyo, entumwa ze zikanywa viinyo eyaabaire neejwekyera eshagama ye. (Mat. 26:27) Baibuli neeyanga okunywa amaarwa maingi n’obusinzi. (1 Kor. 6:10; 1 Tim. 3:8) Kandi Abakristaayo abamwe omuntu waabo ow’omunda tarikubaikiriza kunywa ebirikusinza barikuza kwejumba omu buheereza oburikwera. Kwonka, embeera tizirikushushana omu mahanga gatari gamwe na gamwe, kandi ekikuru kiri ngu Abakristaayo baine “kutaanisa ebirikwera n’ebitarikwera” kugira ngu babaase kushemeza Ruhanga ahabw’okutwaza nk’abarikwera.

19. (a) Tushemereire kuguma nitwijuka ki aha bikwatiraine n’okuramya kw’eka hamwe n’okweshomesa? (b) Omaririire kukora ki kubaasa kuguma ori orikwera?

¹⁹ Hariho ebintu bingi eby’omwoyo ebi twine kucondoozaho omu Kigambo kya Ruhanga. Koresa ebi twine bikuhwere omu kucondooza kubaasa kwongyera amaani omu kuramya kwawe okw’eka n’omu kweshomesa kwawe. Yeyongyere kumanya Yehova hamwe n’ekigyendererwa kye. Yeyongyere kumwirira haihi. (Yak. 4:8) Shaba Ruhanga nk’omuhandiiki wa zaaburi owaagizire ati: “Humuura amaisho gangye, mbone kureeba eby’okutangaaza eby’omu biragiro byawe.” (Zab. 119:18) Yetantare okuhenda nkana ebiragiro hamwe n’emisingye ya Baibuli. Teeraho kworobera ekiragiro ky’ogwo “orikwera,” Yehova kandi n’obweziriki oyejumbe omu ‘murimo gw’engiri ya Ruhanga’ ogurikwera. (1 Pet. 1:15; Rom. 15:16) Guma ori orikwera omu biro ebi eby’akabi kaingi. Twena ka tuteereho kuba abarikwera omu mitwarize yaitu kandi tushagike Yehova, Ruhanga nk’ohikire kutegyeka byona.