Noomanya Eiziina rya Ruhanga Kandi Orikoresa?

Hariho munywani waawe ou otarikumanya eiziina? Ngaaha. Omukazi omwe kuruga Bulgaria orikwetwa Irina akagira ati: “Torikubaasa kwirira haihi Ruhanga waaba otarikumanya eiziina rye.” Nk’oku twaba twareebire omu kicweka ekyabanza, Ruhanga naayenda ngu omwirire haihi. Kurabira omu Baibuli, naakweyanjurira arikugira ati: “Niinye Yehova.”​—Okuruga 6:2.

Mbwenu shi Yehova naakitwara nka kikuru kumanya eiziina rye kandi okarikoresa? Teekateeka ahari eki: Eiziina rya Ruhanga erihandiikirwe omu nyuguta ina ez’Oruheburaayo ezirikumanywa nka Tetragrammaton, riri omu Byahandiikirwe by’Oruheburaayo emirundi nka 7,000. Tihariho eiziina erindi erihandiikirwe omu Baibuli emirundi mingi nk’egyo. Ekyo nikyoreka ngu Yehova naayenda ngu turimanye kandi turikorese.a

Abantu abamwe nibabaasa kuteekateeka ngu twakoresa eiziina rya Ruhanga, nituba tutarikumuha kitiinisa ahabw’okugira ngu n’orikwera kandi ow’Obushoboorozi Bwona. Buzima, nikiba kitahikire kukoresa eiziina rya Ruhanga omu muringo gugwaire, nk’oku kitahikire kukoresa kubi eiziina rya munywani waawe. Kwonka, n’ekigyendererwa kya Yehova ngu abo abarikumukunda bahe eiziina rye ekitiinisa kandi barimanyise abandi. (Zaaburi 69:30, 31; 96:2, 8) Yesu akeegyesa abakuratsi be kushaba bati: “Tataitwe ow’omu iguru, eiziina ryawe ryezibwe.” Nitubaasa kuba bamwe ahari abo abarikweza eiziina rya Ruhanga turikurimanyisa abandi. Twakora ekyo nikiija kutuhwera kwirira haihi nawe.​—Matayo 6:9.

Baibuli neeyoreka ngu Ruhanga naafayo ahari abo ‘abarikuteekateeka aha iziina rye.’ (Malaki 3:16) Abantu nk’abo Yehova naabaraganisa ati: “Ndyamukiza ahakuba naamanya eiziina ryangye. Ku arintakira, ndyamugarukamu; ndyaguma nawe omu naku.” (Zaaburi 91:14, 15) Ni kikuru okumanya kandi tukakoresa eiziina rya Ruhanga twaba nitwenda kugira omukago murungi nawe.