Eiziina rya Ruhanga ni Riiha?

Waaba nooteeraho kumanya omuntu, noobanza kumubuuza, oti: “Eiziina ryawe ni riiha?” Waabuuza Ruhanga ekibuuzo ekyo, naakugarukamu ki?

“Eiziina ryangye ndi Yehova.”—Yeremia 16:21.

Eiziina eri ni risya ahariiwe? Nikibaasa kuba kiri kityo, ahakuba abavunuuzi ba Baibuli nibarikoresa eiziina rya Ruhanga emirundi mikye, nari obundi nibariihiramu kimwe omu Baibuli. Omu mwanya gwaryo nibatamu ekitiinisa “MUKAMA.” Kwonka omu bihandiiko ebyabandize eiziina rya Ruhanga nirishangwamu emirundi nka 7,000. Eiziina eryo riine enyuguta ina enteta ez’Oruheburaayo YHWH nari JHVH, kandi ritwire niryaturwa nka “Yehova” omu Runyankore.

Eiziina rya Ruhanga omu Ruheburaayo omu Mizingo ya Dead Sea — Omuzingo gwa Zaaburi ogwa Dead Sea Ekyasha ky’okubanza, ORUHEBURAAYO

Eiziina rya Ruhanga omu nvunuura ya Tyndale ey’Orungyereza — Eya Tyndale 1530, EY’ORUNGYEREZA

Eiziina rya Ruhanga omu rurimi rwa Spain envunuura eya Reina-Valera — Eya Reina-Valera 1602, EY’ORURIMI RWA SPAIN

Eiziina rya Ruhanga omu Ruchaina omu nvunuura eya Union — *Union Version* 1919, EY’ORUCHAINA

Eiziina rya Ruhanga riri omu bihandiiko by’Oruheburaayo n’omu nvunuura ezindi nyingi

AHABW’ENKI NI KIKURU OKUMANYA EIZIINA RYA RUHANGA?

Ruhanga naatwara eiziina rye nka rikuru. Tihaine owaahaire Ruhanga eiziina eri, niwe yaaryeyetsire. Yehova akagira ati: “Eryo niryo iziina ryangye ebiro byona, kandi okwo nikwo nshemereire kwijukwa obusingye bwona.” (Okuruga 3:15) Omu Baibuli eiziina rya Ruhanga ririmu emirundi mingi okukira ebitiinisa bye nk’ow’Obushoboorozi Bwona, Tataitwe, Mukama, nari Ruhanga, kandi nirishangwa omu Baibuli emirundi mingi okukira amaziina agandi goona nka Abrahamu, Musa, Daudi, nari Yesu. Okwongyera ahari ekyo, Yehova naayenda ngu eiziina rye rimanywe. Baibuli neegira eti: “Bamanye ngu niiwe wenka orikwetwa Yehova, okira boona.”—Zaaburi 83:18.

Yesu naatwara Eiziina eri nka rikuru. Omu kushaba okurikwetwa okwa Mukama waitu, Yesu akeegyesa abakuratsi be kushaba Ruhanga barikugira bati: ‘Tataitwe ow’omu iguru, eiziina ryawe ryezibwe.’ (Matayo 6:9) Yesu nawe akashaba Ruhanga ati: ‘Taata, himbisa eiziina ryawe.’ (Yohaana 12:28) Okuhaisa eiziina rya Ruhanga ekitiinisa kikaba kiri kikuru ahari Yesu, nikyo yaashabiire ati: “Nkabamanyisa eiziina ryawe, kandi ndyarimanyisa.”—Yohaana 17:26.

Abarikumanya Ruhanga eiziina rye nibaritwara nka rikuru. Ira abaheereza ba Ruhanga bakaba nibamanya ngu oburinzi bwabo n’amatsiko gaabo ag’okucungurwa nibyegamira aha kumanya eiziina rya Ruhanga. Eiziina Yehova “n’omunaara gugumire, ohikiriire ku aguhungiramu, aguma ari buhooro.” (Enfumu 18:10) ‘Abaritakira eiziina rya Mukama nibaija kujunwa.’ (Yoeli 2:32) Baibuli neeyoreka ngu abarikuheereza Ruhanga nibaija kumanyirwa aha iziina rye. “Ahabw’okuba amahanga goona nigagyenda, buri rimwe omu iziina rya ruhanga waaryo; kwonka itwe turyaguma nitugyendera omu iziina rya Mukama Ruhanga waitu okuhitsya ryari na ryari.”—Miika 4:5; Ebyakozirwe 15:14.

AMAKURU G’EIZIINA ERYO

Nirireetera Ruhanga kuba ow’omutaano. Abacondooza baingi nibaikiriza ngu eiziina Yehova nirimanyisa “Mbaho” nari Naabaasisa kuba. Yehova Ruhanga akatushoboororera amakuru g’eiziina rye obu yaagambira Musa ati: “Ndi Mbaho.” (Okuruga 3:14) N’ahabw’ekyo eiziina rya Ruhanga niritumanyisa bingi kukira aha kugira ngu niwe Muhangi w’ebintu byona. Eiziina eri niryoreka ngu naabaasa kuba kyona eki arikwenda kuba nari naareetera ebihangirwe bye kuba eki arikwenda kubaasa kuhikiiriza ebigyendererwa bye. Ebitiinisa bya Ruhanga nibituhwera kumanya obushoboorozi bwe, amaani ge n’okutumanyisa ngu niwe arikukirayo obukuru, kwonka eiziina rye Yehova niryoreka eki ari, kandi ngu naahikiiriza kyona eki arikwenda.

Eiziina rye niryoreka ngu naatufaho. Amakuru g’eiziina rya Ruhanga nigatuhwera kumanya rukundo ei ainiire ebihangirwe bye otwariiremu naitwe abantu. Ahabw’okugira ngu Ruhanga atumanyiise eiziina rye nikituhamiza ngu naayenda tumumanye. Ijuka ngu niwe yaabandize kutugambira eiziina rye nangwa tutakamanyire ngu nitubaasa n’okubuuza yaaba ariine. Buzima, Ruhanga tarikwenda tumureebe nk’ekintu ekirikuramibwa ekitarikwetegyerezibwa, beitu nk’owaabuzima, kandi ou turikubaasa kwirira haihi.—Zaaburi 73:28.

Okukoresa eiziina rya Ruhanga nikyoreka ngu nitwenda kumumanya. Nk’eky’okureeberaho, omuntu ou orikwenda kunywana noobaasa kumumanyisa eiziina ryawe kugira ngu arikwete. Nooyehurira ota ku arikwanga akigyendereire kukweta eiziina ryawe? Haahinguraho obwire noobaasa kwebuuza yaaba omuntu ogwo buzima naayenda kuba munywani waawe. Nikyo kimwe na Ruhanga. Atugambiire eiziina rye, kandi naayenda ngu turikorese. Twakikora, nitworeka Yehova ngu nitwenda kuba banywani be. Ahakuba abo ‘abarikuteekateeka aha iziina rye’ nari abo abarikuritwara nka rikuru naabataho omutima.—Malaki 3:16.

Okwega aha iziina rya Ruhanga niyo ntandikiro y’okumumanya. Kwonka titushemereire kugarukira aho. Twine kwongyera kumanya mukama waaryo. Twine kumanya emitwarize ye.

EIZIINA RYA RUHANGA NI RIIHA? Eiziina rya Ruhanga ni Yehova. Eiziina ry’omutaano eri n’erya Ruhanga wenka orikuhikiiriza ebigyendererwa bye

N’OHA OWAAHANGIRE RUHANGA?

Eki n’ekibuuzo eki abantu batwire nibeebuuza. Obundi naiwe orakyebuurize. Ekibuuzo eki nitubaasa kukibuuza omu muringo ogundi tuti: Eby’omu nsi n’omu iguru ku haraabe hariho owaabihangire, Ruhanga we n’oha owaamuhagire?

Abanyasaayansi nibaikiriza ngu ebiri omu iguru n’ensi biine obutandikiro. Naitwe nitwikirizana nabo, ahakuba nikihikaana n’omushororongo gw’okubanza omu Baibuli ngu ‘omu kutandika Ruhanga akahanga iguru n’ensi.’—Okutandika 1:1.

Ebintu tibirikubaasa kuba byayehangire, ekirikumanyisa ngu tibirikubaasa kuba byarugire ahari busha. Tihaine ekirikubaasa kuruga omu kintu ekitariho. Ku ogire ngu tihaine owaabaire ariho eiguru n’ensi bitakahangirwe, na hati ku hatariho ekintu kyona. N’obu eki kigumire kwetegyereza gye, haine kuba haabaire hatwireho ekintu ekyareeteire ebindi byona kubaho kwonka kyo kitari kicweka ky’eiguru n’ensi. Yehova Ruhanga oine omubiri gw’omwoyo kandi ow’amaani agataine bugarukiro niwe Bukomooko bwa buri kimwe.—Yohaana 4:24.

Baibuli neetugambira ahari Ruhanga eti: “Ebibungo bitakabaireho, otakahangire nsi n’ebirimu byona, okwiha obusingye bwona n’okuhitsya obusingye bwona niiwe Ruhanga.” (Zaaburi 90:2) Ekirikumanyisa ngu Ruhanga atwireho. Kandi “omu kutandika” akahanga iguru n’ensi.—Okushuuruurwa 4:11.