Noogaaniira na Ruhanga?

Omuntu nk’oku embeera erikumubaasisa naabaasa kugaaniira na munywani we arikumuteerera esimu, kurabira aha vidiyo, nari arikumuhandiikira ebaruha. Kubaasa kwirira haihi na Ruhanga, twine kugaaniira nawe butoosha. Eki nitubaasa kukikora tuta?

Nitubaasa kugamba na Yehova kurabira omu kushaba. Okushaba Ruhanga, tikurikushushana n’okugaaniira na munywani waitu butoosha. Twine kukimanya ngu ku turikushaba, nituba nitugamba n’omuhangi w’ebintu byona. Eki nikituhiga kumushaba omu muringo gw’ekitiinisa. Ruhanga kubaasa kugarukamu okushaba kwaitu twine kugira ebi twahikiiriza. Aha hariho bishatu aharibyo.

Eky’okubanza, tushemereire kushaba Yehova Ruhanga beitu atari Yesu, abarikwera, nari ebishushani. (Okuruga 20:4, 5) Baibuli neegira eti: “Omuri byona mumanyise Ruhanga ebi murikwetenga omu kushaba n’okweshengyereza, kandi musiime.” (Abafilipi 4:6) Ekya kabiri, tushemereire kushaba turikurabira omu iziina rya Yesu Kristo omwana wa Ruhanga. Yesu akagira ati: “Tihariho oija ahari Isheboona, atarabire muriinye.” (Yohaana 14:6) Ekya kashatu, ebi turikushaba bishemereire kuba nibihikaana n’ebi Ruhanga arikukunda. Baibuli neegira eti: “Ku tushaba ekintu kyona nk’oku akunda, atuhurira.”a​—1 Yohaana 5:14.

Buzima, omukago tigurikubaasa kuhangaara omuntu omwe yaaba niwe arikugamba. Nk’oku buri omwe aha banywani aine kugamba baaba nibagaaniira, tushemereire kwikiriza Ruhanga akagamba naitwe kandi tukamuhurikiza. Noomanya oku Ruhanga arikugamba naitwe?

Obunaku obu, Yehova Ruhanga naagamba naitwe kurabira omu Kigambo kye Baibuli. (2 Timoseo 3:16, 17) Ahabw’enki? Teekateeka aha ky’okureeberaho eki: Ka tugire ngu waatunga ebaruha kuruga ahari munywani waawe. Bwanyima y’okugishoma noobaasa kugambira abandi oti: “Naaheza kuhurizana na munywani wangye!” Nooba nooshusha ngu waagamba nawe buzima, n’obu araabe yaaba atari aho naiwe. Omu muringo nigwo gumwe, waaba nooshoma Baibuli, Ruhanga naaba ari nk’orikugamba naiwe. Gina, ou twaba twagambireho omu kutandika, naagira ati: “Ninteekateeka ngu naaba niinyenda ngu Ruhanga andeebe nka munywani we, nshemereire kushwijuma ‘ebaruha’ ei atuhandiikiire, niyo Baibuli.” Naayongyera agira ati: “Okushoma Baibuli buri izooba kimpwereire kwirira haihi Ruhanga.” Noikiriza Yehova kugaaniira naiwe orikushoma Ekigambo kye Baibuli buri izooba? Waakora ebyo byona, nibiija kukuhwera kuhurira ori haihi munonga na Ruhanga.