Omukago Gwawe na Yehova n’Ogwabuzima?

1. Ahabw’enki twine kuhamya omukago gwaitu na Yehova?

ORI Omujurizi wa Yehova obatiziibwe? Ku kiraabe nikwo kiri, oine ekintu ky’omuhendo, nigwo omukago gwawe na Ruhanga. Kwonka, ensi ya Sitaane n’okutahikiirira kwaitu nibibaasa kuturemesa kuguma twine omukago murungi na Ruhanga. Eki nikihika aha Bakristaayo boona. N’ahabw’ekyo, omukago gwaitu na Yehova gushemereire kuba guhami nk’oku kirikubaasika.

2. (a) Okugira omukago nikimanyisa ki? (Reeba obugambo obw’ahansi.) (b) Nitubaasa kuhamya tuta omukago gwaitu na Yehova?

² Omukago gwawe na Yehova n’ogwabuzima? Nooyenda kuguhamya? Yakobo 4:8 nihooreka oku turikubaasa kukikora hati: “Mwirire haihi Ruhanga, nawe abone kubairira haihi.” Yetegyereze ngu Omukago gwawe na Yehova nigutwariramu iwe na Yehova.a Ku turikwirira haihi Yehova, nawe naatwirira haihi. Waaguma nookora ekyo, mporampora nikihamya omukago gwawe na Yehova. Ekirikurugamu, omukago ogwo niguba ogwabuzima. Naitwe nitugira obumanzi nka Yesu obu yaagira ati: ‘Owantumire n’ow’amazima, kandi nyowe nimmumanya.’ (Yoh. 7:28, 29) Noobaasa kukora ki kwirira haihi Yehova?

3. Niki ekirikutubaasisa kugaaniira na Yehova?

³ Okugaaniira na Yehova butoosha ni kikuru omu kumwirira haihi. Noobaasa kugaaniira ota na Ruhanga? Mbwenu shi noogaaniira ota na munywani waawe orikutuura hare? Obundi, nimuba nimuhandiikirana amabaruha kandi mugambira aha simu. Noogaaniira na Yehova waaba noomushaba obutoosha. (Shoma Zaaburi 142:2.) Kandi noikiriza Yehova kugamba naiwe butoosha waaba nooshoma Ekigambo kye ekihandiikirwe kandi okakiteekateekaho. (Shoma Isaaya 30:20, 21.) Ka tureebe oku okugaaniira oku kurikuhamya omukago gwaitu na Yehova, ekirikureetera omukago gwaitu nawe kuba ogwabuzima.

OMU KWEGA BAIBULI NOOBA NOOGAANIIRA NA YEHOVA

4, 5. Yehova naagaaniira ata naiwe kurabira omu Kigambo kye? Ha eky’okureeberaho.

⁴ Hatariho kubanganisa, noikiriza ngu Baibuli erimu obutumwa bwa Ruhanga aha bantu boona. Kwonka shi Baibuli neeyoreka n’oku orikubaasa kwirira haihi na Yehova? Eego buzima. Eta shi? Butoosha waaba nooshoma Baibuli kandi okeega ebirimu, yetegyereze oku orikutwara ebirimu kandi oteekateekye aha ku orikubaasa kubigyenderaho omu mbeera yaawe; obwo nooba noikiriza Yehova kugaaniira naiwe kurabira omu Kigambo kye. Eki nikikureetera kumwirira haihi.—Heb. 4:12; Yak. 1:23-25.

⁵ Nk’eky’okureeberaho, shoma kandi oteekateekye aha bigambo bya Yesu ebirikugira ngu “mutaryebiikira eitungo omu nsi.” Ku oraabe noomanya ngu waatandikire kwebembeza eby’Obukama, noija kumanya ngu Yehova naakusiima. Kwonka, waareeba ngu oine kugira eriisho eririkureeba hamwe okata omutima aha by’Obukama, kimanye ngu Yehova ariyo naakworeka ahu oine kuhinduramu kubaasa kumwirira haihi.—Mat. 6:19, 20.

6, 7. (a) Okwega Baibuli nikukwata kuta aha ku turikukunda Yehova n’oku arikutukunda? (b) Tushemereire kuba twine kigyendererwa ki twaba nitweyegyesa?

⁶ Okushwijuma Ebyahandiikirwe nikikira aha kureeba ahu oine kukora empindahinduka omu by’omwoyo. Nikituhwera n’okwongyera kusiima emitwarize ya Yehova, ekirikutureetera kwongyera kumukunda. Kandi twayeyongyera kukunda Ruhanga, nawe naayeyongyera kutukunda, ekirikurugamu omukago gwaitu nawe niguhama.—Shoma 1 Abakorinso 8:3.

⁷ Kwonka kubaasa kwirira haihi Yehova, ni kikuru ngu twegye twine ekigyendererwa kirungi. Yohaana 17:3 nihagira hati: ‘Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.’ N’ahabw’ekyo, ekigyendererwa kyaitu tikishemereire kuba okutunga obwengye kwonka, beitu “okumanya” gye Yehova.—Shoma Okuruga 33:13; Zab. 25:4.

8. (a) Nitubaasa kwebuuza ki aha bikwatiraine n’oku Yehova yaatwariize Omugabe Uziya nk’oku kirikworekwa omu 2 Abagabe 15:1-5? (b) Okumanya Yehova nikutuhwera kuta kutabanganisa aha bikorwa bye?

⁸ Twamanya gye Yehova titurikwija kuhwamu amaani, Ebyahandiikirwe ebimwe byatureetera kwebuuza ahabw’enki yaatwarize omu muringo ogumwe. Nk’eky’okureeberaho, nootwara ota omuringo ogu Yehova yaatwariizemu Omugabe Uziya owa Yuda? (2 Bag. 15:1-5) Yetegyereze ngu n’obu ‘abantu baraabe baabaire nibakitamba ebitambo omu myanya mikuru, kandi bakagyoteeraho obubaane,’ we Uziya akaguma ‘naakora ebirikusiimwa’ Yehova. Kwonka, Yehova akareetera ‘omugabe, kurwara ebibembe, okuhitsya aha izooba eri yaafeereireho.’ Ahabw’enki? Ebiri omu kyahandiikirwe eki tibirikworeka enshonga ahabw’enki. Mbwenu shi eki kishemereire kututeganisa nari kutureetera kwebuuza yaaba Yehova yaafubiire Uziya hataine ki akozire? Ekyo tikirikwija kubaho twaba nitumanya gye emitwarize ya Yehova. Eki nikitwariramu okumanya ngu Yehova butoosha naafubira abantu aha rurengo oruhikire. (Yer. 30:11) Okumanya nk’oku, nikutuhamiza ngu n’obu turaabe tutarikumanya ahabw’enki Yehova yaatwariize atyo Uziya, nitubaasa kuhamya ngu okucwamu Kwe kukaba kuhikire.

9. Ni nshonga ki ezirikutuhwera kumanya ahabw’enki Yehova yaareeteire Uziya kurwara ebibembe?

⁹ Kwonka, omu Byahandiikirwe ebindi nitubaasa kutungamu ebirikushoboorora enshonga egyo. Ebiri omu 2 Obusingye 26:3-5, 16-21, nibituhwera kumanya ngu n’obu Uziya yaakozire ebirikusiimwa Yehova kumara obwire, bwanyima ‘akagira amaryo gaamwita.’ Akeeragiira yaakora emirimo y’abanyamurwa eyaabaire etari mu bushoboorozi bwe. Abanyamurwa kinaana n’omwe bakaija kumuhana. Uziya akatwaza ata? Oku yaatwarize kukooreka ngu akaba aine amaryo. Uziya akagirira “ekiniga” abanyamurwa abo. Nikyo Yehova yaamureeteire kurwara ebibembe!

10. Ahabw’enki Yehova atashemereire kutushoboororera ebi arikukora, kandi nitubaasa kwongyera tuta kumwesiga?

¹⁰ Nitwega nshonga ki enkuru? Kwonka shi Baibuli yaaba etarikugamba bingi aha nshonga, noija kukora ki? Nikiija kukureetera kubanganisa aha kuhikiirira kwa Ruhanga? Nari noija kwikiriza ngu Baibuli erimu bingi ebirikutuhamiza ngu Yehova butoosha naakora ebihikire? (Bir. 32:4) Twamanya gye Yehova, nitwija kweyongyera kumukunda n’okusiima emitwarize ye kuhika n’aha kutenda kutushoboororera buri kimwe eki arikukora. Kubaasa kumanya ekyo oine kuba noogaaniira na Ruhanga orikuteeraho kwega Ekigambo kye kandi okakiteekateekaho. (Zab. 77:12, 13) Ekiraarugyemu, noija kuhamya omukago gwawe na Yehova, kandi gube ogwabuzima.

OMU KUSHABA NOOBA NOOGAMBA NA YEHOVA

11-13. Noomanya ota ngu Yehova naahurira okushaba? (Reeba ekishushani aha kutandika.)

¹¹ Twaba nitushaba nitwirira haihi na Yehova. Nitumuhimbisa, tumwebaza, kandi tumushaba obuhabuzi. (Zab. 32:8) Kwonka omukago gwawe na Yehova kubaasa kuba ogwabuzima, oine kuba noohamya ngu naahurira okushaba.

¹² Abantu baingi nibaikiriza ngu okushaba nikuhwera omuntu kuba gye kwonka. Nibagira ngu waaba nooteekateeka ngu okushaba kwawe nikugarukwamu, n’ahabw’okugira ngu noota ebiteekateeko byawe omu bigambo, omanya oburemeezi bwawe, reero ota omutima aha kubushoboorora. Oyihireho emigasho egyo yoona, noobaasa kumanya ota yaaba Yehova naahurira okushaba kwawe?

¹³ Teekateeka ahari eki: Obu Yesu yaabaire atakaizire mu nsi, akaba naareeba Yehova arikugarukamu okushaba kw’abaheereza be omu nsi. Obu Yesu yaabaire naaheereza omu nsi, akaba agambira Ishe ow’omu iguru enyehurira ze kurabira omu kushaba. Mbwenu shi akaashabire kumara ekiro kyona, ku yaabaire naamanya ngu Yehova buzima tarikuhurira ebi arikumushaba? (Luk. 6:12; 22:40-46) Mbwenu shi akaayegyeise abeegi be kushaba ku yaabaire naamanya ngu okushaba n’ekintu ekirikuhwera omuntu kuba gye kwonka? Buzima, Yesu akaba naamanya ngu waaba nooshaba nooba noogamba na Yehova. Izooba rimwe, akashaba Ishe ati: “Taata, ninkusiima, ahabw’okuba wampurira. Kandi naamanya ku ompurira obutoosha.” Naitwe nitubaasa kugira obuhame ngu Yehova ‘naahurira okushaba.’—Yoh. 11:41, 42; Zab. 65:2.

14, 15. (a) Nitugasirwa tuta twashaba Yehova turikumugambira kyenyine eki turikwenda? (b) Okushaba kwa munyaanyazi-itwe omwe kukamuhwera kuta kuhamya omukago gwe na Yehova?

¹⁴ Waaba nooshaba kyenyine eki orikwenda, noija kumanya gye ngu Yehova naagarukamu okushaba, n’obu obumwe araabe naagarukamu omu muringo ogutarikurahuka kureebwa. Okushaba kwawe kwagarukwamu, noija kureeba Yehova nk’owaabuzima. Kandi, oku orikweyongyera kugambira Yehova ebirikukwerarikiriza, nikwo arikweyongyera kukwirira haihi.

¹⁵ Teekateeka aha ky’okureeberaho kya Kathy.b Akaba atarikukunda kubuurira n’obu araabe yaabaire naakwejumbamu obutoosha. Naashoboorora ati: “Nkaba ntarikukunda kubuurira. Nimmanyisa ngu buzima nkaba ntarikukunda. Ku naahuumwire aha murimo, omureeberezi akangira ngu akaba aine amatsiko ngu ninyija kuba payoniya ow’obutwire; kandi akampa na foomu y’okwijuza. Nkacwamu kuba payoniya, kwonka nkatandika kushaba Yehova ngu ampwere kukunda okubuurira.” Mbwenu shi Yehova akamugarukamu? Kathy naagira ati: “Hati ndi omu mwaka gwa kashatu ndi payoniya. N’ekirugiremu ahabw’okumara obwire bwingi omu kubuurira kandi ndikwegyera aha banyaanyazi-itwe abandi, mporampora mbaasize kwongyera kubuurira gye. Hati tindikwenda kubuurira kwonka, kureka niinkukunda. N’ekirikukira obukuru, omukago gwangye na Yehova gweyongyeire kuhama kukira oku kyabaire kiri.” Buzima, okushaba kwa Kathy kukamuhwera kugira omukago ogwabuzima na Yehova.

GIRA EKI WAAKORA

16, 17. (a) Twine kukora ki omukago gwaitu na Yehova kubaasa kweyongyera kuhama? (b) Ni nshonga ki ey’omutaano erikuza kugambwaho omu kicweka ekirikukurataho?

¹⁶ Okugira omukago murungi na Yehova n’eky’ebiro by’amagara gaawe byona. Twine kugira eki twakora kubaasa kwirira haihi Ruhanga, twaba nitwenda ngu nawe atwirire haihi. N’ahabw’ekyo, ka tukore kyona ekirikubaasika kuguma nitugaaniira na Ruhanga kurabira omu kwega Baibuli n’okushaba. N’ekiraarugyemu, omukago gwaitu na Yehova gwaguma nigweyongyera, nigwija kutubaasisa kusingura ebirikutugyeza.

¹⁷ Kwonka embeera neebaasa kuguma, twashaba omu bwesigwa kwonka tukaguma twine oburemeezi. Omu bwire nk’obwo, obwesigye bwaitu ahari Yehova nibubaasa kutuuba. Nitubaasa kutandika kwebuuza yaaba Yehova buzima naahurira okushaba kwaitu, nari ku araabe aine omukago naitwe. Enshonga egyo nitubaasa kugikwata tuta twine obuhame ngu omukago gwaitu na Ruhanga n’ogwabuzima? Ekicweka ekirikukurataho nikiija kugarukamu ekibuuzo ekyo.