Nookora Eki Ruhanga Arikwenda?

“Kyona eki orikwenda kingambire, niinyija kushemererwa kukikora.” Ebigambo nk’ebyo noobaasa kutabigambira omuntu ou otarikumanya nari ou orikumanya kakye. Kwonka, munywani waawe ow’ahamara nikibaasa kutakugumira kubimugambira. Omuntu nikimworobera kukorera munywani we ow’ahamara eki arikumushaba.

Baibuli neeyoreka ngu Yehova butoosha naakora eki arikureeba ngu nikiija kushemeza abarikumuramya. Nk’eky’okureeberaho, Omugabe Daudi, owaabaire aine omukago murungi na Ruhanga, akagira ati: “Ai MUKAMA Ruhanga wangye, eby’okutangaaza, ebi waakozire, n’ebiteekateeko ebi otuteekateekaho ka ni bingi! . . . Ni bingi, tibirikubaasa kubarwa.” (Zaaburi 40:5) Nangwa Yehova n’abo abatarikumumanya, naabakorera ebirikubashemeza, ‘arikubahaazya eby’okurya, akaijuza emitima yaabo okushemererwa.’​—Ebyakozirwe 14:17.

Obu Yehova arikukunda kukora ebirikureetera abandi okushemererwa, n’eky’oburyo kuteekateeka ngu abo abarikwenda kuba banywani be baine kukora ‘ebirikushemeza omutima gwe.’ (Enfumu 27:11) Niki eki orikubaasa kukora kushemeza omutima gwa Ruhanga? Baibuli neegarukamu eti: “Mutarireka kukorera abantu ebirungi, n’okukwatanisa omu bi mwine; ahakuba ebitambo nk’ebyo nibyo bishemeza Ruhanga.” (Abaheburaayo 13:16) Mbwenu shi eki nikimanyisa ngu okukora ebirungi n’okukwatanisa nikyo kyonka ekirikwetengyesa kubaasa kushemeza Yehova?

“Otarikwikiriza tarikubaasa kushemeza Ruhanga,” Baibuli nikwo erikugira. (Abaheburaayo 11:6) Buzima, bwanyima ya ‘Abrahamu kwikiriza Ruhanga’ nibwo “yaayetwa munywani wa Ruhanga.” (Yakobo 2:23) Yesu Kristo nawe akooreka ngu ni kikuru kwikiririza omuri “Ruhanga,” twaba nitwenda kutunga emigisha ye. (Yohaana 14:1) Noobaasa kugira ota okwikiriza oku Ruhanga arikureeba omuri abo abu arikweyiriza haihi? Noobaasa kutandika orikwega Ekigambo kya Ruhanga Baibuli obutoosha. Waakora ekyo, noija kutunga “okumanya” reero omanye oku orikubaasa kumushemeza “omuri byona.” Ku orikweyongyera kutunga okumanya okuhikire okurikukwata ahari Yehova kandi okagyendera aha misingye ye erikwera ei orikwega, noija kwongyera kumwikiririzamu kandi omwirire haihi.​—Abakolosai 1:9, 10.