OMUTWE OGURI AHA MUNAARA | NOOBAASA KUBA HAIHI NA RUHANGA
Noohurira Ori Haihi na Ruhanga?
“Okugira omukago murungi na Ruhanga nikikureetera kuhurira aine oburinzi kandi ohami. Nooba nooshusha ngu Ruhanga naakora kyona ekirikubaasika kukuhwera.”—CHRISTOPHER OMWOJO MUTO KURUGA GHANA.
“Ruhanga naakureeba waaba ori omu busaasi, ayoreka ngu naakukunda kandi ngu naakufaho kukira oku orikubaasa kumushaba.”—HANNAH, OMWISHIKI W’EMYAKA 13 KURUGA ALASKA, U.S.A.
“Nikiba kiri eky’omuhendo kandi ekirikuhuumuriza kumanya ngu oine omukago murungi na Ruhanga!”—GINA, OMUKAZI W’EMYAKA NKA 40 KURUGA JAMAICAN.
Christopher, Hannah, na Gina tibo bonka abarikwehurira batyo. Abantu baingi omu nsi yoona nibahamya ngu Ruhanga naabareeba nka banywani be. Kandi shi iwe? Noohurira ori haihi na Ruhanga? Nari noohurira orikwenda kumwirira haihi? Obundi noobaasa kuba nooyebuuza oti: ‘Buzima omuntu naabaasa kugira omukago murungi na Ruhanga ow’Obushoboorozi Bwona? Ku kiraabe nikwo kiri, nikibaasika kita?’
NIKIBAASIKA KUBA HAIHI NA RUHANGA
Baibuli neeyoreka ngu nikibaasika kugira omukago murungi na Ruhanga. Neeyoreka ngu Ruhanga akeeta Abrahamu “munywani” we. (Isaaya 41:8) Kandi Yakobo 4:8 nihagira hati: “Mwirire haihi Ruhanga, nawe abone kubairira haihi.” Buzima okugira omukago murungi na Ruhanga nikibaasika. Kwonka shi obu Ruhanga atarikureebwa, noobaasa ‘kumwirira haihi’ ota kandi okagira omukago murungi nawe?
Kubaasa kugarukamu ekibuuzo eki, teekateeka aha birikutwarirwa omu kugira omukago n’omuntu. Abantu babiri kubaasa kugira omukago, nibatandika barikumanyana amaziina. Baaguma nibagaaniira hamwe barikuhikaanisa ebiteekateeko omukago gwabo niguhama. Kandi baaguma nibahwerahwerana, omukago gwabo niguhamira kimwe. Nikyo kimwe n’okugira omukago murungi na Ruhanga. Ka tushwijume oku turikubaasa kukikora.