EBIBUUZO EBI BAIBULI ERIKUGARUKAMU
Abaana nibabaasa kwega bata kukunda Ruhanga?
Koresa ebyahangirwe kuhwera omwana waawe kumanya Ruhanga kandi akamukunda
Abaana baawe nibabaasa kwega kukunda Ruhanga baaba baine obuhame ngu ariho kandi ngu naabakunda. Kubaasa kukunda Ruhanga, baine kumumanya. (1 Yohaana 4:8) Nk’eky’okureeberaho, baine kumanya eby’okugarukamu by’ebibuuzo nk’ebi: Ahabw’enki Ruhanga yaahangire abantu? Ahabw’enki Ruhanga naareka okubonabona kukabaho? Ruhanga naija kukorera ki abantu omu biro by’omumaisho?—Shoma Abafilipi 1:9.
Kubaasa kuhwera abaana baawe kukunda Ruhanga, oine kukibooreka ngu naiwe noomukunda. Ku barikureeba ekyo, nibabaasa kukutooreza.—Shoma Eky’Ebiragiro 6:5-7; Enfumu 22:6.
Noobaasa kuhika ota abaana baawe aha mutima?
Ekigambo kya Ruhanga kiine amaani. (Abaheburaayo 4:12) N’ahabw’ekyo hwera abaana baawe kwega enyegyesa za Baibuli ezirikutandikirwaho. Yesu kubaasa kuhika aha mitima y’abantu, akaba akoresa ebibuuzo, abahurikiza, kandi ashoboorora Ebyahandiikirwe. Kubaasa kuhika abaana baawe aha mutima, noobaasa kutooreza emiringo ei Yesu yaayegyeisemu.—Shoma Luka 24:15-19, 27, 32.
Kandi, ebiri omu Baibuli ebirikworeka oku Ruhanga yaakoragaine n’abantu nibibaasa kuhwera abaana kumanya Ruhanga kandi bakamukunda. Ebitabo ebitebeekanisiibwe ahabw’ekigyendererwa eki, biri aha www.jw.org.—Shoma 2 Timoseo 3:16.