Hurikiza Kandi Oyetegyereze Amakuru

1, 2. Ahabw’enki abantu baingi batarayetegyereize amakuru g’ebi Yesu yaagambire?

OMUNTU naabaasa kuhurira eiraka ry’omuntu ondiijo yaaba naagamba nawe. Naabaasa n’okumanya omuringo ogu arikugambamu. Mbwenu shi nikiba kiine mugasho ki yaaba atarikwetegyereza amakuru g’ebigambo ebi arikugamba? (1 Kor. 14:9) Omu muringo nigwo gumwe, abantu baingi bakahurira ebi Yesu yaabaire naagamba. Kandi akaba agamba nabo omu rurimi oru barikwetegyereza. Kwonka, ti boona ngu bakeetegyereza amakuru g’ebigambo bye. Egi niyo nshonga ahabw’enki Yesu yaagambiire abaabaire bamuhurikiize ati: “Mumpurire mwena, mwetegyereze.”​—Mak. 7:14.

² Ahabw’enki baingi batarayetegyereize amakuru g’ebi Yesu yaagambire? Bamwe bakaba baine ebigyendererwa bitahikire. Abari nk’abo Yesu akabagambaho ati: “Imwe mwine obwengye burungi obw’okwangiramu ebiragiro bya Ruhanga, ngu mubone kuhamira aha migyenzo yaanyu.” (Mak. 7:9) Abantu abo bakaba batarikufayo kumanya amakuru g’ebigambo bye. Ahabw’okuba bakaba batarikwenda kuhindura aha miteekateekyere yaabo. Bakaba bahurikiza kwonka emitima yaabo eri hare! (Shoma Matayo 13:13-15.) Mbwenu shi itwe nitubaasa kwigura tuta emitima yaitu kubaasa kugasirwa omu bi Yesu yaayegyeise?

OKUGASIRWA OMU KWEGYESA KWA YESU

3. Ahabw’enki abeegi ba Yesu baayetegyereize ebigambo bya Yesu?

³ Twine kutooreza abeegi ba Yesu abaabaire bari abacureezi. Akabagambaho ati: “Amaisho gaanyu gaine omugisha, ahabw’okuba nigareeba, n’amatu gaanyu, ahabw’okuba nigahurira.” (Mat. 13:16) Ahabw’enki baabaire nibeetegyereza n’obu abandi baabaire batarikwetegyereza? Enshonga y’okubanza, bakaba beeteekateekire kubuuza ebibuuzo n’okuteeraho kusherura amakuru g’ebigambo bya Yesu. (Mat. 13:36; Mak. 7:17) Eya kabiri, bakaba beeteekateekire kwongyera aha bi baabaire baikiriize omu mitima yaabo. (Shoma Matayo 13:11, 12.) Eya kashatu, bakaba beeteekateekire kugyendera aha bi baahuriire, kandi bakateeraho kubikoresa kuhwera abandi.​—Mat. 13:51, 52.

4. Kubaasa kwetegyereza eby’okureeberaho bya Yesu, ni bintu ki bishatu ebirikutwarirwamu?

⁴ Twaba nitwenda kwetegyereza eby’okureeberaho bya Yesu, twine kutooreza abeegi be abeesigwa. Kandi eki nikitwariramu ebintu bishatu. Eky’okubanza, twine kuba tweteekateekire kugira obwire bw’okushoma kandi tukateekateeka aha bi Yesu yaagambire, tukacondooza, kandi tukabuuza ebi tutarikwetegyereza. Eki nikirugamu okumanya. (Enf. 2:4, 5) Ekindi, nituba twine kureeba oku okumanya okwo kurikuhikaana n’ebi twegire, tukareeba oku birikutugasira. Ekyo nikirugamu okwetegyereza. (Enf. 2:2, 3) Eky’aha muheru, tushemereire kukoresa ebi twegire turikubigyenderaho. Eki nikiija kworeka ngu twine obwengye.​—Enf. 2:6, 7.

5. Okumanya, okwetegyereza, n’obwengye nibitaana bita?

⁵ Okumanya, okwetegyereza, n’Obwengye biine ntaaniso ki? Kubaasa kukyetegyereza nitubaasa kukoresa eky’okureeberaho eki: Teekateeka aha muntu oyemereire ahagati y’oruguuto reero baasi ekamwizira erikwiruka munonga. Eky’okubanza, naareeba ngu ni baasi, okwo n’okumanya. Ekindi, okumanya ngu yaaguma omu ruguuto baasi neemutomera, okwo n’okwetegyereza! Yaaguruka omu ruguuto akahiguza baasi, obwo n’obwengye! Niyo nshonga ahabw’enki Baibuli erikugira ngu twine kuguma “n’obwengye obuhikire.” Eki nikikwata aha magara gaitu!​—Enf. 3:21, 22; 1 Tim. 4:16.

6. Nituza kwebuuza bibuuzo ki bina twaba nitushwijuma eby’okureeberaho bya Yesu mushanju? (Reeba ebibuuzo ebiri omu kabokisi.)

⁶ Omu kicweka eki n’ekirikukurataho, nitwija kushwijuma eby’okureeberaho mushanju ebi Yesu yaakoreise. Twaba nitubishwijuma, nitwija kwebuuza ebibuuzo ebi: Eky’okureeberaho eki nikimanyisa ki? (Eki nikituhwera kutunga okumanya.) Ahabw’enki Yesu yaatuhaire eky’okureeberaho eki? (Eki nikituhwera kwetegyereza.) Ebiri omu ky’okureeberaho eki nibibaasa kutuhwera bita hamwe n’abandi? (Obu n’obwengye.) Eky’aha muheru, eki nikitwegyesa ki ahari Yehova na Yesu?

AKAJUMA KA SINAAPI

7. Eky’okureeberaho ky’akajuma ka sinaapi kiine makuru ki?

⁷ Shoma Matayo 13:31, 32. Eky’okureeberaho kya Yesu eky’akajuma ka sinaapi kiine makuru ki? Akajuma nikajwekyera amakuru g’Obukama n’ebirikuruga omu kubuurira amakuru ago, nikyo kibiina Ekikristaayo. Nk’oku akajuma ka sinaapi kari “kakye okukira embibo zoona,” ekibiina Ekikristaayo kikatandika kiri kikye omu gwa 33. Kwona bwanyima y’emyaka mikye, ekibiina kikakura ahonaaho. Okutunguuka kukaba okw’amaani munonga. (Kol. 1:23) Kandi kukaba okw’omugasho ahakuba Yesu naagira ngu “enyonyi z’omu mwanya” zikabaasa kwarika “omu mataagi gaagwo.” Enyonyi ezi ez’akamanyiso nizijwekyera abantu b’emitima mirungi abarikutunga eby’okurya by’omwoyo, ekibunda, n’obuhuumuriro omu kibiina Ekikristaayo.​—Gyeragyeranisa na Ezekieli 17:23.

8. Ahabw’enki Yesu yaakoreise eky’okureeberaho ky’akajuma ka sinaapi?

⁸ Ahabw’enki Yesu yaakoreise eky’okureeberaho eki? Akagamba aha kukura kw’akajuma aka omu muringo ogurikutangaaza, kworeka oku Obukama bwa Ruhanga bwine amaani g’okurinda, g’okujanjaara, n’okusingura ebirikuteeraho kuburemesa. Kuruga 1914, ekicweka ekirikureebwa eky’ekibiina kya Ruhanga kyeyongyeire kuba eky’omutaano! (Isa. 60:22) Abari omu kibiina eki batwire baine oburinzi bw’eby’omwoyo. (Enf. 2:7; Isa. 32:1, 2) Kandi, ahabw’eby’Obukama kweyongyera kujanjaara, kyorekire ngu tiburikubaasa kwemerezibwa kureka ngu nibusingura boona abarikubuhakanisa.​—Isa. 54:17.

9. (a) Niki eki turikwegyera aha ky’okureeberaho ky’akajuma ka sinaapi? (b) Eki nikitwegyesa ki ahari Yehova na Yesu?

⁹ Niki eki turikwegyera aha ky’okureeberaho ky’akajuma ka sinaapi? Obundi nitutuura omu kicweka ahari Abajurizi ba Yehova bakye, nari ahu tutarikurahuka kureeba ebirikuruga omu kubuurira kwaitu. Kwonka twamanya ngu Obukama nibusingura byona ebirikuteeraho kuburemesa, nikiija kutureetera kugumisiriza. Nk’eky’okureeberaho, obu ow’eishe-emwe Edwin Skinner yaahika India omuri 1926, hakaba hariyo Abajurizi ba Yehova bakye. Omu kubanza, hakaba hariyo okutunguuka kukye, kandi omurimo gw’okubuurira gukaba nigugambwaho “nk’ogugumire munonga.” Kwonka akagumizamu naabuurira kandi yaareeba oku amakuru g’Obukama gaabaire nigasingura embeera ezigumire. Hati omuri India hariyo Abajurizi ba Yehova abarikurenga 37,000, kandi abantu barikurenga 108,000 nibo baizire aha Kiijutsyo omwaka oguhweire. Kandi teekateeka n’aha ku amakuru agarikukwata aha Bukama gajanjaire. Omu mwaka nigwo gumwe obu ow’eishe-emwe Skinner yaahika omuri India, nibwo baabaire batandikire n’okubuurira omuri Zambia. Hati ababuurizi abarikurenga 170,000 nibo barikubuurirayo, kandi 763,915 nibo baizire aha Kiijutsyo omu 2013. Eki nikimanyisa ngu omuntu 1 ahari 18 omuri Zambia akaija aha Kiijutsyo. Okutunguuka oku ka nikutangaaza!

EKITUMBISA

10. Eky’okureeberaho ky’ekitumbisa kiine makuru ki?

¹⁰ Shoma Matayo 13:33. Eky’okureeberaho ky’ekitumbisa kiine makuru ki? Eki nakyo nikikwata aha makuru g’Obukama n’ebirikurugamu. Esaano “yoona” neejwekyera amahanga goona, okutumba nikujwekyera okujanjaara kw’amakuru g’Obukama kurabira omu kubuurira. N’obu okukura kw’akajuma ka sinaapi kuraabe nikureebwa gye, kwonka okujanjaara kw’ekitumbisa omu kubanza tikurikureebwa. Haahinguraho obwire, amaani g’ekitumbisa nigareebwa ahakuba nikitumbisa ekintu kiba kihango.

11. Ahabw’enki Yesu yaakoreise eky’okureeberaho ky’ekitumbisa?

¹¹ Ahabw’enki Yesu yaakoreise eky’okureeberaho eki? Akaba naayoreka ngu amakuru g’Obukama gaine amaani g’okujanjaara munonga gakareetaho empinduka. Amakuru g’Obukama gahikire omu bicweka by’ensi ebya hare. (Byak. 1:8) Obwire obwingi empinduka terikureebwa. Kwonka empinduka neebaho abarikwikiriza amakuru marungi barikweyongyera, kandi bakahindura n’emitwarize yaabo.​—Rom. 12:2; Efe. 4:22, 23.

12, 13. Ha eby’okureeberaho ebirikworeka oku omurimo gw’okubuurira aha Bukama gutunguukire nk’oku kirikugambwaho omu ky’okureeberaho ky’ekitumbisa.

¹² Ebirikuruga omu kubuurira nibiija bireebwa bwanyima. Nk’eky’okureeberaho, Franz n’omukazi we Margit, hati abarikuheereza aha ofiisi y’eitaagi endiijo, omuri 1982 bakaba nibaheereza aha ofiisi y’eitaagi omuri Brazil. Bakabuurira omu katauni kakye k’ekyaro. Bamwe aha bu baayegyeiseho Baibuli akaba ari omukazi hamwe n’abaana be bana. Omutabani omukuru owaabaire aine emyaka 12 obwire obwo akaba aine enshoni, kandi akaba ateeraho kweshereka batakatandikire kwega. Ahabw’okugira ngu ow’eishe-emwe n’omukazi we bakaza ahandi, tibarabaasize kugumizamu nibabeegyesa. Kwonka bwanyima y’emyaka 25 bakagaruka baataayaaya omu katauni ako. Bakashangayo ki? Ekibiina ekirimu ababuurizi 69, kandi 13 aharibo bakaba bari baapayoniya ab’obutwire. Kandi bakaba baine Ekyombeko ky’Obukama kisya. Kandi shi omwojo owaabaire aine enshoni? Hati naaheereza nk’omuhikaanisa w’akakiiko k’abareeberezi! Nk’ekitumbisa eki Yesu yaakoreise omu ky’okureeberaho, amakuru g’Obukama gakajanjaara kandi gaahindura baingi, ekyo kikashemeza ow’eishe-emwe ogwo n’omukazi we abaabaire bataayaayire!

¹³ Oku amakuru g’Obukama garikuhindura abantu, nikureeberwa omu mahanga ahu omurimo gw’Okubuurira gurikuzibirwa. Kigumire kumanya ahu amakuru marungi gahikire omu mahanga nk’ago, kandi butoosha ebirikurugamu nibitutangaaza. Nk’eky’okureeberaho, omuri Cuba amakuru g’Obukama gakahikayo omuri 1910, kandi ow’eishe-emwe Russell akataayaayayo omuri 1913. Kwonka, omu kubanza entunguuka ekaba eri nkye. Hati niki eki turikureeba omuri Cuba? Hariyo ababuurizi abarikurenga 96,000 abarikubuurira amakuru marungi, kandi 229,726 nibo baizire aha Kiijutsyo omu 2013, ekirikumanyisa omuntu 1 ahari 48. Nangwa n’omu mahanga ahu omurimo gwaitu gw’okubuurira gutarikuzibirwa, amakuru g’Obukama nigabaasa kuba gahikire omu bicweka ahu Abajurizi ba Yehova abariyo barikuteekateeka ngu tihaine kihango ekirikubaasa kukorwa.a​—Mub. 8:7; 11:5.

14, 15. (a) Nitugasirwa tuta omu ky’okureeberaho ky’ekitumbisa? (b) Eki nikitwegyesa ki ahari Yehova na Yesu?

¹⁴ Eky’okureeberaho kya Yesu eky’ekitumbisa nikitugasira kita? Twateekateeka aha makuru agari omu ky’okureeberaho kya Yesu, nitwetegyereza ngu titwine kwerarikirira oku amakuru g’Obukama garaahikye abantu nyamwingi abatakagamanyire. Buri kimwe kiri ahansi y’obushoboorozi bwa Yehova. Itwe niki eki twine kukora? Ekigambo kya Ruhanga nikigarukamu kiti: “Omu kasheeshe ogume obibe embibo, kandi n’omu mwabazyo orekye kugwisa omukono; ahabw’okuba torikumanya ekiryera, yaaba eki nari kiriya, nari shi yaaba byombi biriba birungi.” (Mub. 11:6) Kandi twine n’okushaba ngu omurimo gw’okubuurira gugyende gye na munonga omu mahanga ahu gurikuzibirwa.​—Efe. 6:18-20.

¹⁵ Okwongyera ahari ekyo, titushemereire kuhwamu amaani omu kubanza twaba tutarikureeba ebirungi ebirikurugamu. Titurikwenda kugaya “ebintu nibikitandika.” (Zek. 4:10) Nihabaasa kurugamu ebirungi kukira oku turikuteekateeka!​—Zab. 40:5; Zek. 4:7.

OMUSHUUBUZI HAMWE N’EKY’OBUTUNGI EKYASHEREKIRWE

16. Eky’okureeberaho ky’omushuubuzi hamwe n’eky’obutungi ekyasherekirwe biine makuru ki?

¹⁶ Shoma Matayo 13:44-46. Eky’okureeberaho ky’omushuubuzi hamwe n’eky’obutungi ekyasherekirwe biine makuru ki? Omu bunaku bwa Yesu, abashuubuzi bakaba bagyenda bahika aha Indian Ocean kusherura eruuru nungi. Omushuubuzi omu ky’okureeberaho eki, naajwekyera abantu b’emitima mirungi abarikuteeraho kwigutsa ekyetengo kyabo eky’eby’omwoyo. Eruuru “ey’obuguzi bwingi” neejwekyera amazima g’Obukama ag’omuhendo. Omushuubuzi ku yaaherize kumanya ngu eruuru n’ey’obuguzi bwingi, ahonaaho akagyenda yaaguza ebi aine byona yaagigura. Kandi Yesu akagamba aha mushaija owaabaire naakora omu musiri reero akagwa aha ky’obutungi “ekyasherekirwe.” Okutashushana n’omushuubuzi, omushaija ogu akaba atarikusherura ky’obutungi. Kwonka nawe akaba ayeteekateekire kuguza “ebye byona” kubaasa kutunga eky’obutungi.

17. Ahabw’enki Yesu yaahaire eky’okureeberaho ekirikukwata aha mushuubuzi n’eky’obutungi ekyasherekirwe?

¹⁷ Ahabw’enki Yesu yaahaire eby’okureeberaho ebi bibiri? Akaba naayoreka ngu abantu nibabaasa kutunga amazima omu miringo etarikushushana. Abamwe nibagasherura kandi bakozire kyona ekirikubaasika kubaasa kugatunga. Kandi abandi n’obu baraabe batarikugasherura, babaasize kugatunga obundi garikubashanga ahu bari. Kwonka abashaija aba bombi, bakamanya omuhendo gw’ebi baatungire kandi baayefeerereza bingi kubaasa kuguma nabyo.

18. (a) Nitubaasa kugasirwa tuta omu by’okureeberaho ebi bibiri? (b) Nibitwegyesa ki ahari Yehova na Yesu?

¹⁸ Nitubaasa kugasirwa tuta omu by’okureeberaho ebi bibiri? (Mat. 6:19-21) Yebuuze oti: ‘Nyine emiteekateekyere nk’ei abashaija aba baabaire baine? Nintwara amazima nk’ag’omuhendo? Nyeteekateekire kwefeerereza kubaasa kuguma nago, nari ebintu ebindi nk’emirimo y’obutoosha nibimpuzya?’ (Mat. 6:22-24, 33; Luk. 5:27, 28; Fil. 3:8) Twaba twine okushemererwa ahabw’okutunga amazima, nitwija kumariirira kwebembeza ebirikugakwataho.

19. Nituza kureeba ki omu kicweka ekirikukurataho?

¹⁹ Ka tworekye ngu twahurikiza kandi twayetegyereza amakuru g’eby’okureeberaho ebi ebirikukwata aha Bukama. Ijuka ngu, ekyo nitukikora twayetegyereza amakuru gaabyo kandi okukira munonga twagyendera aha bi turikubyegaho. Omu kicweka ekirikukurataho, nituza kureeba ebindi by’okureeberaho bishatu n’eki turikubyegaho.