Nooshoboorokyerwa “Ebyahandiikirwe”?

1, 2. Yesu akagumya ata abeegi be obu yaazooka?

OBU Yesu yaazooka, babiri aha beegi be bakaba nibaza omu kyaro kimwe ekiri omu mahiro nka mushanju kuruga Yerusaalemu. Ahabw’okutamanya ngu Yesu akaba azookire, bakaba beerarikiriire ahabw’ebyabaire biherize kubaho. Ahonaaho Yesu akaija yaabahika yaatandika kugyenda nabo. Akahuumuriza abeegi be aba. Mu muringo ki? Akatandikira “ahari Musa na baanabi boona, yaabashobororera omu Byahandiikirwe byona ebyamuhandiikirweho.” (Luk. 24:13-15, 27) Omu bwire obwo, emitima yaabo ekatandika kushashaanuka ahabw’okugira ngu ‘akabashuuruurira ebyahandiikirwe,’ nari akabibashoboororera.​—Luk. 24:32.

² Omu mwabazyo ogwo, abeegi aba babiri bakagaruka Yerusaalemu. Ku bahikire aha beegi bagyenzi baabo, bakabagambira byona ebyabaho. Ku baabaire nibakigamba, Yesu yaabeyoreka boona. Kwonka, bakagira obwoba. Bakagira okubanganisa omu mitima yaabo. Yesu akabagumya ata? Ebyahandiikirwe nibigira ngu akashuuruura “obwengye bwabo, ngu bashoborokyerwe Ebyahandiikirwe.”​—Luk. 24:45.

3. Ni buremeezi ki obu turikubaasa kutunga, kandi niki ekirikubaasa kutuhwera kugira emiteekateekyere etagwereire rubaju?

³ Nk’abeegi ba Yesu abo, naitwe obumwe nitwerarikirira. Obundi nitubaasa kuba twine bingi by’okukora omu murimo gwa Mukama, kwonka twine amaganya ahabw’okuba titurikureeba ebirikurugamu. (1 Kor. 15:58) Nari obundi noobaasa kushusha ngu abu turikwegyesa Baibuli nibatunguuka mpora. Abandi abu turikuhwera nibabaasa kutagumizamu barikuheereza Yehova. Nitubaasa kukora ki kugira emiteekateekyere etagwereire rubaju aha kubuurira? Ekintu kimwe ekirikubaasa kutuhwera n’okwetegyereza eby’okureeberaho bya Yesu ebiri omu Byahandiikirwe Ebirikwera. Ka tushwijume bishatu aha by’okureeberaho ebyo, reero tureebe eki turikubyegaho.

OMUBIBI OWAABYAMIRE

4. Eky’okureeberaho kya Yesu eky’omubibi owaabyamire kiine makuru ki?

⁴ Shoma Mako 4:26-29. Eky’okureeberaho kya Yesu eky’omubibi owaabyamire kiine makuru ki? Omushaija omu ky’okureeberaho ekyo naajwekyera buri muntu orikubuurira aha Bukama. Embibo n’amakuru g’Obukama agarikubuurirwa abantu abacureezi. Omu mbeera eza butoosha, omubibi naabyama nyekiro kandi aimuka nyomushana. Embibo nizitwara obwire kuruga obu zirikubyarwa kuhika aha kushaaruurwa. Obwire obwo bwona, ‘embibo nizimera, zikura.’ Eki nikibaho ahabwakyo, kandi mporampora. Nikyo kimwe, okutunguuka omu by’omwoyo nikubaho mporampora. Omuntu ku arikutunguuka kuhika aha kwenda kuheereza Ruhanga, naayana ebyana ekirikumanyisa okwehayo ahari Yehova kandi akabatizibwa.

5. Ahabw’enki Yesu yaakoreise eky’okureeberaho ky’omubibi owaabyamire?

⁵ Ahabw’enki Yesu yaakoreise eky’okureeberaho eki? Yesu naatuhwera kumanya ngu Yehova niwe arikureetera amazima kukura omu mitima yaabo abaine ebyetengo birungi. (Byak. 13:48; 1 Kor. 3:7) Nitubyara kandi twitirira, kwonka titwine bushoboorozi aha kukura. Titurikubaasa kukugyema nari kukurahusya. Nk’omushaija orikugambwaho omu ky’okureeberaho kya Yesu, titurikumanya oku okukura okwo kurikubaho. Okukura okwo titurikukureeba twaba nitukora emirimo yaitu ya butoosha. Ku harikuhinguraho obwire, embibo y’Obukama neebaasa kwana ebyana. Bwanyima omwegi omusya naatwegaitaho omu murimo gw’okushaaruura, kandi nitugasirwa omu buhwezi bwe.​—Yoh. 4:36-38.

6. Tushemereire kumanya ki aha bikwatiraine n’okutunguuka omu by’omwoyo?

⁶ Niki eki turikwegyera aha ky’okureeberaho eki? Eky’okubanza kya byona, twine kwikiriza ngu titwine bushoboorozi aha kutunguuka kw’eby’omwoyo okw’abeegi ba Baibuli. Twaba turi abacureezi, nitwija kwetantara kugyemesereza omwegi wa Baibuli ngu abatizibwe. Nitukora kyona ekirikubaasika kumuhwera kandi tukamushagika, kwonka omu bucureezi twine kwikiriza ngu aha bikwatiraine n’okwehayo niwe aine kwecweramu. Omuntu ashemereire kwehayo ayekundiire n’ahabw’okukunda Ruhanga. Omuntu yaaba atakozire ekyo Yehova tarikumusiima.​—Zab. 51:12; 54:6; 110:3.

7, 8. (a) Ni nshonga ki ezindi ezi turikwegyera aha ky’okureeberaho ky’omubibi owaabyamire? Ha eky’okureeberaho. (b) Eki nikitwegyesa ki ahari Yehova na Yesu?

⁷ Ekya kabiri, okwetegyereza amakuru g’eky’okureeberaho eki, nikiija kutuhwera kutahwamu maani twaba tutarikureeba ebirikuruga omu murimo gwaitu omu kubanza. Twine kugumisiriza. (Yak. 5:7, 8) N’obu embibo yaakuba etaanire byana, twaba tukozire kyona ekirikubaasika kuhwera omwegi, kyona ekiraarugyemu tikirikwija kworeka ngu tituri abeesigwa. Yehova naikiriza embibo kukurira omu mitima y’abacureezi abeteekateekire kukora empindahinduka. (Mat. 13:23) N’ahabw’ekyo okukora gye kwaitu omu kubuurira titushemereire kukureebera aha birikurugamu. Okukora gye kwaitu omu kubuurira Yehova tarikukureebera aha ku abu turikwegyesa barikutwara ebi turikubeegyesa. Kureka, eki arikutwara nka kikuru n’okuteeraho kwaitu n’obwesigwa.​—Shoma Luka 10:17-20; 1 Abakorinso 3:8.

⁸ Ekya kashatu, obutoosha titurikureeba empindahinduka ezi omuntu arikukora. Nk’eky’okureeberaho, omushaija n’omukazi abu omumiisani yaabaire naayegyesa Baibuli, bakamugira ngu nibenda kuba ababuurizi abatakabatiziibwe. Omumiisani ogwo akabamanyisa ngu kubaasa kuba ababuurizi abatakabatiziibwe, baine kurekyera aho okureetsa. Ekyamutangaarize, bakamugira ngu bakaba barekyeire aho okureetsa ameezi maingi enyima. Ahabw’enki baakucwire? Bakaba beetegyereize ngu Yehova akaba naabareeba barikureetsa, kandi ngu naayanga oburyarya. N’ahabw’ekyo bakaba baine kucwamu kuguma nibareetseza omu maisho g’omumiisani ogwo nari kurekyera kimwe okureetsa. Rukundo ei baabaire bainiire Yehova ekabahiga kucwamu gye. Bakaba batunguukire omu by’omwoyo, n’obu omumiisani araabe yaabaire atarikumanya empindahinduka ezi baabaire nibakora.

AKATIMBA

9. Eky’okureeberaho kya Yesu eky’akatimba kiine makuru ki?

⁹ Shoma Matayo 13:47-50. Eky’okureeberaho kya Yesu eky’akatimba kiine makuru ki? Yesu akagyeragyeranisa okubuurira amakuru marungi g’Obukama omu bantu boona n’okutega akatimba omu nyanja. Nk’oku akatimba karikukwata “eby’enyanja by’emiringo yoona,” okubuurira kwaitu nikushemeza obukaikuru n’obukaikuru bw’abantu b’emiringo yoona. (Isa. 60:5) Abantu baingi abarikwija omu nteerane zaitu empango n’aha Kiijutsyo buri mwaka nibahamya ekyo. Bamwe aha bantu aba ni barungi kandi nibarundaanwa omu kibiina Ekikristaayo. Kwonka abandi ni babi ahakuba ti boona abarikurundaanwa ngu nibasiimwa Yehova.

10. Ahabw’enki Yesu yaakoreise eky’okureeberaho ky’akatimba?

¹⁰ Ahabw’enki Yesu yaakoreise eky’okureeberaho eki? Okutoorana eby’enyanja okw’akamanyiso tikurikumanyisa okucwa orubanja okw’ahamuheru okuraabeho omu bwire bw’okubonabona kwingi. Kureka, nikworeka ekiraabeho omu biro by’emperu eby’ensi egi embi. Yesu akooreka ngu ti boona abarikusiima amazima ngu nibaija kuhamira ahari Yehova. Baingi babaasize kuguma nibaija omu nteerane zaitu. Abandi babaasize kwikiriza ngu tubeegyese Baibuli, kwonka tibeteekateekire kwehayo. (1 Bag. 18:21) Kandi abandi beecwire aha kibiina Ekikristaayo. Eminyeeto abamwe boroirwe abazaire baabo Abakristaayo, kwonka tibakagiriire Yehova rukundo hamwe n’emitindo ye. Embeera yoona ei omuntu arikuba arimu, Yesu akooreka ngu buri omwe aine kwecweramu. Abo abarikucwamu gye, Yehova naabareeba ‘nk’eitungo’ ry’amahanga goona.​—Hag. 2:7.

11, 12. (a) Nitubaasa kugasirwa tuta omu ky’okureeberaho ky’akatimba? (b) Eki nikitwegyesa ki ahari Yehova na Yesu?

¹¹ Eky’okureeberaho ky’akatimba nikibaasa kutugasira kita? Okwetegyereza eky’okureeberaho eki nikituhwera kwetantara kuhwamu amaani omwegi wa Baibuli nari omwana waitu yaayanga amazima kugahindura age. Eki nikibaasa kubaho n’obu twakuteeraho munonga. Omuntu okwikiriza kwega Baibuli nari okukurira omu mazima, tikirikumanyisa ngu naija kugira omukago murungi na Yehova. Abo abatarikwenda kworobera obutegyeki bwa Yehova, obwire nibwija kuhika batooranwe omu baheereza be.

¹² Mbwenu shi eki nikimanyisa ngu abo abaarugire omu mazima tibarikubaasa kwikirizibwa kugaruka omu kibiina? Nari omuntu ku arikuremwa kwehayo ahari Yehova, nikimanyisa ngu naabarirwa omu babi ebiro byona? Ngaaha. Abantu nk’abo bakiine omugisha obu okubonabona kwingi kutakatandikire. Yehova naaba ari nk’orikubeeta ati: “Mungarukire, naanye niinyija kubagarukira.” (Mal. 3:7) Enshonga egi neeshoboororwaho omu ky’okureeberaho kya Yesu ekindi, eky’omwana owaarazire.​—Shoma Luka 15:11-32.

OMWANA OWAARAZIRE

13. Eky’okureeberaho kya Yesu eky’omwana owaarazire kiine makuru ki?

¹³ Eky’okureeberaho kya Yesu eky’omwana owaarazire kiine makuru ki? Omuzaire omunyambabazi omu ky’okureeberaho eki, naajwekyera Yehova Tataitwe ow’omu iguru oine rukundo. Omwana owaashabire omugabo gw’ebintu bye reero akabishiishagura, naajwekyera abo abarugire omu kibiina. Ku barikuruga omu kibiina, nibaba bari nk’abaaza “omu nsi endiijo eya hare,” niyo nsi ya Sitaane, eyetaaniise ahari Ruhanga. (Efe. 4:18; Kol. 1:21) Kwonka bwanyima, abandi nibeeteera omu kifuba, bagaruka omu kibiina kya Yehova. Abacureezi aba abarikweteisa, Tataitwe orikusaasira naagaruka abaakiira.​—Isa. 44:22; 1 Pet. 2:25.

14. Ahabw’enki Yesu yaakoreise eky’okureeberaho ky’omwana owaarazire?

¹⁴ Ahabw’enki Yesu yaakoreise eky’okureeberaho eki? Omu muringo murungi, Yesu akooreka ngu Yehova naayenda ngu abahabire bamugarukire. Omuzaire omu ky’okureeberaho eki tarahwaire matsiko ngu omutabani naija kugaruka. Ku yaareebire omutabani n’obu araabe “yaabaire akiri hare munonga,” akagyenda ahonaaho kuza kumutangirira. Eki nikihiga abo abarugire omu mazima kugarukira Yehova ahonaaho. Nibabaasa kuba bahweiremu amaani omu by’omwoyo, kandi okugaruka nikubaasa kubagumira. Kwonka okuteeraho kwabo kugaruka ti kwa busha ahakuba n’omu iguru nihabayo okushemererwa.​—Luk. 15:7.

15, 16. (a) Niki eki turikwegyera aha ky’okureeberaho kya Yesu eky’omwana owaarazire? Ha eby’okureeberaho. (b) Eki nikitwegyesa ki ahari Yehova na Yesu?

¹⁵ Eky’okureeberaho ky’omwana owaarazire nikibaasa kutugasira kita? Tushemereire kutooreza Yehova. Titurikwenda ‘kurengyesereza okuhikiirira’ tukanga kwakiira abasiisi abarikweteisa. Eki nikibaasa kubarugiramu “okufa” omu by’omwoyo. (Mub. 7:16) Eky’okureeberaho eki haine ekindi eki turikukyegyeraho. Omuntu orikuruga omu kibiina tushemereire kumureeba “nk’entaama ebuzire,” beitu atari nk’otarikubaasa kugaruka. (Zab. 119:176) Mbwenu shi twabugana omuntu oyetaaniise aha kibiina, nitwija kuteeraho kumuhwera kugaruka? Nitwija kumanyisa abareeberezi ahonaaho kugira ngu bamuhe obuhwezi oburikwetengyesa? Nitwija kukikora twagyendera aha bi twayega omu ky’okureeberaho kya Yesu eky’omwana owaarazire.

¹⁶ Yetegyereze oku bamwe abaabaire barugire omu kibiina barikworeka okusiima kwabo obunaku obu, ahabw’embabazi na rukundo ebi Yehova yaabagiriire n’oku ekibiina kibahwereire. Ow’eishe-emwe owaamazire emyaka 25 abingirwe naagira ati: “Kwiha obu naagaruka omu kibiina okushemererwa kwangye kugumire nikweyongyera nk’oku Yehova agumire naampa ebiro by’okugaruka busya. (Byak. 3:19) Boona nibakwatanisa naanye kandi nibankunda! Hati ndi omu ka nungi ey’eby’omwoyo.” Munyaanyazi-itwe muto owaahabire akaruga ahari Yehova kumara emyaka etaano akagamba aha kugaruka kwe ati: “Tindikubaasa kubashoboororera gye oku naayehuriire kureeba oku ab’eishe-emwe baanyorekire rukundo ei Yesu yaagambireho. Okuba omwe aha bari omu kibiina kya Yehova n’eky’omuhendo munonga!”

17, 18. (a) Eby’okureeberaho bishatu ebi twashwijuma twabyegaho ki? (b) Tushemereire kumariirira kukora ki?

¹⁷ Eby’okureeberaho ebi bishatu twabyegaho ki? Eky’okubanza, twine kumanya ngu titwine bushoboorozi aha kutunguuka okw’eby’omwoyo. Obushoboorozi obwo Yehova niwe abwine. Ekya kabiri, titushemereire kuteekateeka ngu boona abarikwija omu nteerane zaitu kandi bakeega Baibuli naitwe, ngu nibaija kuhamira aha mazima. Eky’aha muheru, n’obu abamwe barikubaasa kuruga omu mazima kandi bakaruga ahari Yehova, titushemereire kuhwa amatsiko ngu tibarikwija kugaruka. Kandi ku baraagarukye, ka tuteereho kubakiira omu muringo ogurikuhikaana n’emiteekateekyere ya Yehova.

¹⁸ Buri omwe ahariitwe ka agumizemu kusherura okumanya, okwetegyereza, n’obwengye. Waaba nooshoma aha by’okureeberaho bya Yesu, yebuuze eki birikumanyisa; ahabw’enki biri omu Baibuli; oku turikubaasa kugyendera aha bi twegiremu; n’eki turikubaasa kwega ahari Yehova na Yesu. Twakora tutyo, nitwija kwetegyereza amakuru g’ebigambo bya Yesu.