Ogu Nigwo Muringo Ogu “Waasiimire”

1. Niki ekyareeteire Yesu ‘kushemererwa omu mwoyo gurikwera’? (Reeba ekishushani aha kutandika.)

NOOBAASA kuteera akashushani oku Yesu Kristo yaabaire ari obwo ‘ashemereirwe omu mwoyo gurikwera’? Naabaasa kuba yaabaire naasheka kandi n’amaisho ge garikworeka ngu ashemereirwe munonga. Niki ekyamureeteire kushemererwa atyo? Akaba ayohereize 70 aha beegi be kubuurira amakuru marungi g’Obukama bwa Ruhanga. Ahabw’okugira ngu hakaba hariho abazigu baingi b’amakuru marungi, akaba naayenda kureeba oku baabaire nibaija kuhikiiriza obujunaanizibwa bwabo. Abazigu aba bakaba nibatwariramu abahandiiki n’Abafarisaayo abaabaire bari abanyabwengye kandi beegire munonga. Bakareetera abantu baingi kureeba Yesu nk’ow’ahansi kandi omubaizi kwonka. N’abeegi be baabareeba ‘nk’abantu babisi abateegyesiibwe.’ (Byak. 4:13; Mak. 6:3) N’obu abeegi baraabe baabaire nibatwarwa batyo, bakagaruka bashemereirwe barikuruga kubuurira. Bakabuurira n’obu baraabe baabaire nibahakanisibwa abantu, na baadaimoni! Niki ekyabareeteire kugira okushemererwa n’obumanzi?​—Shoma Luka 10:1, 17-21.

2. (a) Abeegi ba Yesu bakaba bari nk’abaana bato mu muringo ki? (b) Niki ekyahwereire abakuratsi ba Yesu kumanya amazima?

² Yetegyereze eki Yesu yaagambiire Yehova ati: “Taata, Mukama w’eiguru n’ensi, ninkusiima ahabw’okuba okashereka ebigambo ebi abanyabwengye n’abarikwetegyereza, waabishuuruurira abaana bato. Eego, Taata, ahabw’okuba ekyo nikyo waasiimire.” (Mat. 11:25, 26) Yesu akaba atarikumanyisa ngu abeegi be buzima n’abaana. Kureka, akaba naamanya ngu bakaba bari nk’abaana bato waabagyeragyeranisa n’abandi abaabaire beegire munonga omu ihanga ryabo, abaabaire nibeemanya obwengye. Ekikuru munonga, Yesu akeegyesa abeegi be kuba nk’abaana bato, barikuguma bari abacureezi kandi bakaikiriza kwegyesibwa. (Mat. 18:1-4) Bakagasirwa bata ahabw’okuba abacureezi? Yehova arikukoresa omwoyo gurikwera akabahwera kwetegyereza amazima, kandi abaabaire nibeetwara nk’abanyabwengye barikubajuma, bakaguma bahumiibwe Sitaane n’omwemanyo gwabo.

3. Nituza kushwijuma ki omu kicweka eki?

³ Hatariho kubanganisa, Yesu akashemererwa munonga. Kikamushemeza kureeba Yehova naashuuruurira abantu abacureezi ab’emiringo yoona amazima agatoorobi kwetegyereza, atarikwihirira aha bwegyese bwabo nari etalanta zaabo. Yesu akashemererwa kureeba Ishe naasiima omuringo ogu ogw’okwegyesa. Mbwenu shi Yehova akahinduka, kandi naayoreka ata ngu naakisiima omuringo ogu ogw’okwegyesamu? Twatunga eky’okugarukamu, nitubaasa kushemererwa nk’oku Yesu yaashemereirwe.

OKUBAASISA AMAZIMA AGAGUMIRE KUMANYWA BOONA

4. Watchtower eyorobi, ebaire eta nk’ekiconco ky’omuhendo?

⁴ Omu myaka egi, ekibiina kya Yehova nikita omutima aha kwegyesa omu muringo gworobi kandi ogurikwetegyerezibwa gye. Yetegyereze eby’okureeberaho bishatu. Eky’okubanza, hariho Watchtower eyorobi.a Egi eri nk’ekiconco ky’omuhendo ahari abo abatarikworoberwa ndimi, nari abu kirikugumira kushoma. Emitwe y’amaka bashangire ngu abaana baabo hati nibeejumbira kimwe omu kwega Watchtower eyorobi, omuhanda mukuru gw’entebeekanisa yaitu y’okwegyesibwa eby’omwoyo. Baingi bahandiikiire Akakiiko Akareeberezi amabaruha g’okusiima. Munyaanyazi-itwe omwe akahandiika ngu akaba naatiina kugarukamu omu kwega Omunaara gw’Omurinzi. Kwonka hati takitiina! Bwanyima y’okutandika kukoresa Watchtower eyorobi, akahandiika ati: “Hati ningarukamu emirundi erengire ahari gumwe, kandi tinkitiina! Niinyebaza Yehova hamwe naimwe.”

5. Ni birungi ki ebiri omu New World Translation of the Holy Scriptures ehindwirwemu?

⁵ Eky’okureeberaho ekya kabiri, hariho New World Translation of the Holy Scriptures ehindwirwemu, eyaashohiziibwe omu Rungyereza aha ruteerane rwa buri mwaka orw’akakiiko akareeberezi omuri Okitoba 5, 2013.b Ebyahandiikirwe ebingi hati biine ebigambo bikye, kwonka biine amakuru kandi nibyetegyerezibwa gye. Nk’eky’okureeberaho, Yobu 10:1 omu Rungyereza hakaba haine ebigambo 27 kwonka hati haine 19. Enfumu 8:6 hakaba haine ebigambo 20 hati haine 13. Emishororongo egi yombi neeyetegyerezibwa gye omu Baibuli egi ehindwirwemu. Buzima, ow’eishe-emwe omwe oshukirweho amajuta otwire naaheereza n’obwesigwa akagira ati: “Mperize kushoma ekitabo kya Yobu omu Baibuli ehindwirwemu, kandi nooshusha oti nibwo nkyetegyereize omurundi gw’okubanza!” Baingi bagambire ebigambo nibyo bimwe.

6. Noohurira ota ahabw’enyetegyereza nsya ey’ebiri omuri Matayo 24:45-47?

⁶ Eky’okureeberaho ekya kashatu, yetegyereze zimwe aha nyetegyereza nsya ezibaireho. Nk’eky’okureeberaho, enyetegyereza nsya erikukwata aha ‘mwambari omwesigwa kandi ow’obwengye,’ eyaashohoreire omu Munaara gw’Omurinzi ogwa Gyuraayi 1, 2013, ekatushemeza munonga. (Mat. 24:45-47) Kikashoboororwa ngu omwambari omwesigwa n’abari aha Kakiiko Akareeberezi, kandi ngu “ab’omu ka ya Yesu” n’abo boona abarikuriisibwa yaaba abashukirweho amajuta nari ‘ab’entaama ezindi.’ (Yoh. 10:16) Ka nitushemererwa kwega amazima aga reero tukageegyesa abasya! Ni miringo ki endiijo ei Yehova ayorekire ngu naasiima enyegyesa eyorobi, kandi erikwetegyerezibwa gye?

OKUSHOBOORORA EBIRI OMU BAIBULI OMU MURINGO GWOROBI

7, 8. Ni bintu ki ebimwe ebiri omu Baibuli ebiine eki birikujwekyera?

⁷ Ku oraabe omazire obwire orikuheereza Yehova, noobaasa kuba oreebire omu bitabo byaitu enyetegyereza nsya ez’ebimwe ebiri omu Baibuli. Mu muringo ki? Omu myaka y’enyima, ebitabo byaitu bikaba nibigira ngu bingi ebiri omu Baibuli nibiba nibijwekyera ekintu kikuru ekirikwija kubaho omu biro by’omumaisho. Mbwenu shi hariho obuhame oburikutureetera kushoboorora eby’omu Baibuli omu muringo ogu? Eego. Nk’eky’okureeberaho, Yesu akagamba aha “akamanyiso ka nabi Yona.”(Shoma Matayo 12:39, 40.) Akashoboorora ngu Yona okuza omunda y’eky’enyanja ekyabaire nikiija kuba ekituuro kye ku ogire ngu Yehova taramurinzire ahuriire, kikaba nikijwekyera obwire obu Yesu yaabaire naija kumara omu kituuro.

⁸ Baibuli erimu obunabi obundi obwabaire bwine eki burikujwekyera. Entumwa Paulo akashoboorora bumwe aharibwo. Nk’eky’okureeberaho, omukago gwa Abrahamu na Hagari na Saara gukaba nigujwekyera omukago gwa Yehova n’eihanga rya Israeli hamwe n’ekicweka eky’omu iguru eky’ekibiina kya Yehova. (Gal. 4:22-26) Nikyo kimwe, eihema na hekalu, Izooba ry’Okuhongyereraho Ebibi, omunyamurwa omukuru, n’ebindi ebyabaire biri omu Biragiro bya Musa bikaba biri ‘ekishushani ky’ebirungi ebyabaire nibyenda kwija.’ (Heb. 9:23-25; 10:1) Nikishemeza kandi nikihamya okwikiriza kwaitu kwega ebirikukwata aha bunabi obwo obwine eki burikujwekyera. Mbwenu shi nitubaasa kugira ngu buri omwe orikugambwaho omu Baibuli naaba aine ou arikujwekyera, nari ngu buri kintu ekirikugambwaho nikiba kiine eki kirikujwekyera?

9. Ebiri omu Baibuli ebirikukwata ahari Nabosi enyima tukaba nitubishoboorora tuta?

⁹ Enyima, ebitabo byaitu bikaba nibishoboorora ngu buri muntu, omukoro, nari buri kintu haine eki kirikujwekyera. Teekateeka ahari Nabosi, ou Omugabekazi Yezebeeli yaakoreire orukwe rw’okumwita kugira ngu iba Ahabu abaase kutwara omusiri gwe ogw’emizaabibu. (1 Bag. 21:1-16) Omuri 1932, ebirikukwata ahari Nabosi bikashoboororwaho nk’obunabi obwine eki burikujwekyera. Ahabu na Yezebeeli bakagambwaho nk’abarikujwekyera Sitaane n’entebeekanisa ye, reero ngu Nabosi naajwekyera Yesu, kandi ngu okufa kwa Nabosi kukaba nikworeka omuringo ogu Yesu yaabaire naija kufamu. Kwonka bwanyima, omu kitabo “Let Your Name Be Sanctified,” ekyateirwe omu 1961, Nabosi akagambwaho nk’orikujwekyera abashukirweho amajuta, kandi ngu Yezebeeli akaba naajwekyera ediini ezirikweyeta Enkuristaayo. Kandi ngu Yezebeeli okubonabonesa Nabosi kukaba nikujwekyera okubonabona kw’abashukirweho amajuta omu biro by’aha mperu. Kumara emyaka mingi, abaheereza ba Ruhanga bashangire enyetegyereza egi ey’ebiri omu Baibuli erikuhamya okwikiriza. Kwonka shi ahabw’enki ebintu bihindukire?

10. (a) Omwambari omwesigwa naakoresa ata obwengye yaaba naashoboorora ebiri omu Baibuli ebimwe? (b) Ebitabo byaitu hati nibigamba munonga ahari ki?

¹⁰ Kumara emyaka, Yehova atwire naahwera ‘omwambari omwesigwa kandi ow’obwengye’ kwongyera kuba ow’obwengye. Hati omwambari naayoreka ngu ebiri omu Baibuli nibiba nibijwekyera ekintu kikuru haaba hariho enshonga ezirikuhamya ekyo kuruga omu Byahandiikirwe. Kandi, kyetegyereziibwe ngu enshoboorora enkuru ezirikukwata aha bintu ebiine eki birikujwekyera nizigumira baingi kuzeetegyereza. Enyetegyereza ezimwe zigumire kwetegyereza, kwijuka n’okuzihikaanisa n’embeera yaitu. Kandi ekikuru munonga, omutima ku gurikuteebwa aha ki ebiri omu Baibuli birikujwekyera, enshonga nkuru ei turikubyegaho neebura. N’ahabw’ekyo, ebitabo byaitu hati nibigamba munonga aha mitwarize y’abarikugambwaho omu Baibuli nk’okwikiriza, okugumisiriza, okworobera Ruhanga, n’endiijo mitwarize mikuru ei turikubaasa kutooreza.c

11. (a) Hati nitwetegyereza tuta ebirikukwata ahari Nabosi, kandi twena nitubaasa kumwegyeraho ki? (b) Ahabw’enki ebitabo byaitu hati bitarikukira kugira ngu ebiri omu Baibuli nibijwekyera ebiraabeho omu biro by’omumaisho? (Reeba “Ebibuuzo Kuruga omu Bashomi” omu Watchtower eya Maaci 15, 2015.)

¹¹ Mbwenu shi nitwetegyereza tuta ebirikukwata ahari Nabosi? Hati nitubyetegyereza omu muringo gworobi kandi ogurikwetegyerezibwa gye. Omushaija murungi ogwo tikugira ngu akafa ahabw’okujwekyera Yesu nari abashukirweho amajuta, beitu n’ahabw’okugira ngu akarinda obwesigwa bwe. Akahamira aha Biragiro bya Yehova n’obu araabe yaabaire naahinganisibwa abeebembezi abaabaire nibakoresa kubi obushoboorozi bwabo. (Kub. 36:7; 1 Bag. 21:3) Nitumwegyeraho, ahakuba buri omwe ahariitwe naabaasa kuhiiganisibwa ahabw’enshonga nizo zimwe. (Shoma 2 Timoseo 3:12.) Abantu b’emiringo yoona nibabaasa kwetegyereza, baijukye, kandi beegyere aha ky’okureeberaho kye ekirikuhamya okwikiriza.

12. (a) Mbwenu shi ebiri omu Baibuli nitubyegaho bwegaho tibiine gandi makuru? (b) Ahabw’enki nitwetegyereza gye ebintu ebitoorobi kwetegyereza? (Reeba obugambo obw’ahansi.)

¹² Mbwenu shi tugire ngu ebiri omu Baibuli nitubyegaho bwegaho kwonka tibiine gandi makuru? Ngaaha. Na hati ebitabo byaitu obumwe nibyoreka oku ekintu ekimwe ekirikugambwaho omu Baibuli kiine akakwate n’ekindi. Tibirikukira kworeka ngu bingi ebiri omu Baibuli nibijwekyera ebirikwija kubaho omu biro by’omumaisho. Nk’eky’okureeberaho, nitubaasa kugamba butunu ngu obwesigwa bwa Nabosi arikuhiiganisibwa n’okufa kwe nibitwijutsya obwesigwa bwa Kristo n’abashukirweho amajuta. Kwonka, ebirikukwata ahari Nabosi nibibaasa n’okutwijutsya obwesigwa ‘bw’ab’entaama ezindi.’ Nitubaasa kwetegyereza gye oku Yehova arikutwegyesa omu muringo gworobi.d

OMURINGO GWOROBI OGW’OKUSHOBOORORAMU ENFUMU ZA YESU

13. Niki ekirikworeka ngu hati nitushoboorora zimwe aha nfumu za Yesu omu muringo gworobi kandi ogurikwetegyerezibwa gye?

¹³ Yesu niwe Mwegyesa mukuru oraabaireho omu nsi. Omu kwegyesa kwe akaba naakunda kukoresa enfumu nari eby’okureeberaho. (Mat. 13:34) Eby’okureeberaho bye bikaba bihwera abantu kuteekateeka kandi bibahika aha mutima. Ebitabo byaitu nabyo bitwire nibishoboorora enfumu za Yesu omu muringo gworobi kandi ogurikwetegyerezibwa gye. Mbwenu shi tituraashemereirwe kwongyera kwetegyereza gye enfumu ya Yesu erikukwata aha kitumbisa, akajuma ka sinaapi, n’akatimba k’eby’enyanja, omu Munaara gw’Omurinzi ogwa Gyuraayi 15, 2008? Hati nitumanya gye ngu enfumu ezi nizikwata aha Bukama bwa Ruhanga n’oku busingwire omu kurundaana abakuratsi ba Kristo ab’amazima kuruga omu nsi egi embi.

14. (a) Tukaba nitushoboorora tuta enfumu y’Omusamaria omurungi? (b) Hati enfumu ya Yesu egyo nitugyetegyereza tuta?

¹⁴ Kandi shi ebitebyo bya Yesu n’enfumu ebirikugamba aha bintu bingi? Buzima, ezimwe ziri omu muringo gw’obumanyiso n’obunabi, kandi ezindi zirimu eby’okwega. Kwonka shi nitubaasa kumanya tuta ngu enfumu egi n’obunabi nari erimu eby’okwega kwonka? Kumara emyaka, eky’okugarukamu kitwire nikyeyongyera kwetegyerezibwa gye. Nk’eky’okureeberaho, yetegyereze oku tutwire nitushoboorora enfumu ya Yesu erikukwata aha Musamaria omurungi. (Luk. 10:30-37) Omuri 1924, Watch Tower ekagira ngu Omusamaria akaba naajwekyera Yesu, ngu oruguuto orurikuruga Yerusaalemu kuza Yeriko orwabaire nirushuuma rukaba nirujwekyera omuhanda gw’abantu kuruga aha bugomi bw’omuri Edeni, ngu abashuma omu muhanda bakaba nibajwekyera ebigombe by’abashuubuzi ab’omururu, kandi ngu omunyamurwa n’Omuleevi bakaba nibajwekyera ebibiina by’ediini ezirikweyeta Enkuristaayo. Hati, ebitabo byaitu nibikoresa eky’okureeberaho ekyo kwijutsya Abakristaayo boona ngu baine kwetantara kushoroora baaba nibahwera abaine eki bakyenire, na munonga omu by’omwoyo. Mbwenu shi tikirikutushemeza kureeba ngu Yehova naatuhwera kwetegyereza gye enyegyesa egi?

15. Nituza kushwijuma ki omu kicweka ekirikukurataho?

¹⁵ Omu kicweka ekirikukurataho, nituza kushwijuma emwe aha zindi nfumu za Yesu, erikukwata aha baishiki ikumi. (Mat. 25:1-13) Yesu akaba naayenda ngu abakuratsi be beetegyereze bata enfumu egyo erimu okugyeragyeranisa? Mbwenu shi abantu boona abarikugambwaho omu nfumu egyo n’ebintu, haine eki birikujwekyera? Nari akaba naayenda ngu abakuratsi be bagire eki baayegamu ekiraabahwere omu biro by’emperu? Nitwija kureeba.