Nooreeba Oburingaaniza nk’Oku Yehova Arikubureeba?

1, 2. (a) Nabosi n’abatabani bakahikwaho obutariburingaaniza bwa muringo ki? (b) Ni mitwarize ki ebiri ei turikuza kushwijuma omu kicweka eki?

ABASHAIJA babiri babi baata omushango gw’amaani aha mushaija. Ebi barikumugambaho n’ebishuba. Kwonka baamwomesereza kandi baamucwera ogw’okufa. Teekateeka aha ku abantu abaabaire nibakunda oburingaaniza baayehuriire kureeba omushaija n’abatabani be abataine mushango nibabateera amabaare kubaita! Eki ti kitebyo kwonka. Kikaba aha muheereza wa Yehova omwesigwa orikwetwa Nabosi, owaabaire ariho obu Omugabe Ahabu yaabaire naategyeka Israeli.​—1 Abagabe 21:11-13; 2 Abagabe 9:26.

² Omu kicweka eki, nituza kugamba aha kyahikire ahari Nabosi. Nitwija n’okugamba aha nshobe y’amaani ei omureeberezi omwesigwa ow’omu kibiina kimwe eky’omu kyasha ky’okubanza yaakozire. Eby’okureeberaho ebi bibiri nibitworeka oku obucureezi n’okusaasira oyekundiire birikwetengyesa twaba nitwenda kugira oburingaaniza nka Yehova.

OBUTARI BURINGAANIZA OBURENGYESEREIZE

3, 4. Nabosi akaba ari mushaija wa muringo ki, kandi ahabw’enki yaayangire kuguza omusiri gwe gw’emizaabibu Omugabe Ahabu?

³ Nabosi akaba ari omwesigwa ahari Yehova obu Abaisraeli baabaire nibatooreza eky’okureeberaho kibi eky’Omugabe Ahabu n’omukazi we, Omugabekazi Yezebeeli. Bakaba nibaramya ruhanga w’ebishuba Baali kandi batarikuha Yehova ekitiinisa nari ebiragiro bye. Kwonka Nabosi akaba naatwara omukago gwe na Yehova nka mukuru munonga okukira amagara ge.

⁴ Shoma 1 Abagabe 21:1-3. Ahabu ku yaashabire kugura omusiri gwa Nabosi gw’emizaabibu nari ngu amuhe ogundi musiri gw’emizaabibu, Nabosi akanga. Ahabw’enki? Omu muringo murungi Nabosi akashoboororera Ahabu ati: “Nikikabure nyowe okukuha obuhunguzi bwa baatatenkuru.” Nabosi akanga kwikiriza eki Omugabe Ahabu yaabaire naayenda ahabw’okugira ngu kikaba nikitaana n’ekiragiro eki Yehova yaabaire ahaire Abaisraeli aha kuguriza kimwe eby’obuhunguzi bw’eka yaabo. (Abaleevi 25:23; Okubara 36:7) Buzima Nabosi akaba ari omwesigwa ahari Yehova.

5. Niki eki Yezebeeli yaakozire kubaasa kutunga omusiri gwa Nabosi gw’emizaabibu?

⁵ Nabosi ku yaayangire kuguza omusiri gwe gw’emizaabibu, Omugabe Ahabu n’omukazi we bakakora ebintu bibi munonga. Kubaasa kutunga omusiri gw’emizaabibu, Omugabekazi Yezebeeli akagambira abashaija babiri kubeiherera Nabosi aha kintu eki yaabaire atakozire. Ekyarugiremu, Nabosi n’abatabani bakaitwa. Niki eki Yehova yaakozire aha butariburinganiza bubi obwo?

OBURINGAANIZA BWA RUHANGA

6, 7. Yehova akooreka ata ngu naakunda oburingaaniza, kandi ahabw’enki kiine kuba kyahuumurize ab’eka ya Nabosi na banywani be?

⁶ Ahonaaho Yehova akoohereza Eliya kugambira Ahabu. Eliya akagambira Ahabu ngu akaba ari omwitsi kandi omushuma. Yehova akacwamu kukora ki? Ahabu, omukazi we, n’abatabani bakaba nibaija kwitwa, nk’oku baabaire baitsire Nabosi n’abatabani.​—1 Abagabe 21:17-25.

⁷ Ab’omuka ya Nabosi na banywani be bakagira obusaasi bwingi ahabw’ebintu bibi ebi Ahabu yaakozire. Kwonka Yehova akareeba obutari buringaaniza obwo ahonaaho yaagira eki yaakora. Ekyo kiine kuba kyabahuumuriize. Kwonka nabwo, obucureezi n’obwesigwa bwabo ahari Yehova bukagyezibwa ahabw’ekindi kintu ekyabaireho.

8. Ahabu akatwaza ata ku yaahuriire obutumwa bwa Yehova, kandi niki ekyarugiremu?

⁸ Ahabu ku yaahuriire eki Yehova yaabaire acwiremu kukora, “yaataagura ebijwaro bye, yaajwara ebiguniya, yaayesiibyakwo abyami omu biguniya, yaagyenda ayeinamiriire.” Ahabu akecureeza! Niki ekyarugiremu? Yehova akagambira Eliya ati: “Ahabw’okwecureeza omu maisho gangye, tindireeta kabi omu busingye bwe; kureka omu busingye bw’omutabani nimwo ndireetera akabi aha nju ye.” (1 Abagabe 21:27-29; 2 Abagabe 10:10, 11, 17) Yehova, ‘ogyeza emitima,’ orikubaasa kureeba eki turi buzima, akagirira Ahabu embabazi.​—Enfumu 17:3.

OBUCUREEZI NIBUTURINDA

9. Ahabw’enki okugira obucureezi kyabaire nikiza kuba eky’oburinzi ah’ab’omu ka ya Nabosi na banywani be?

⁹ Ab’eka ya Nabosi na banywani be ku baahuriire ngu eka ya Ahabu ekaba etarikuza kufubirwa kuhitsya obu arifa, ekyo nikibaasa kuba kyagyerize okwikiriza kwabo omuri Ruhanga. Kwonka obucureezi bukaba nibubaasa kubahwera kurinda okwikiriza kwabo. Ahabw’enki? Kuri baabaire bari abacureezi, bakaba nibaija kugumizamu nibaramya Yehova, barikumwesiga ngu tarikubaasa kugira obutari buringaaniza. (Shoma Eky’Ebiragiro 32:3, 4.) Omu biro by’omu maisho, ab’eka ya Nabosi nibaija kutunga omugisha gw’okureeba abantu baabo nibazooka. Nihaija kubaho oburingaaniza obuhikire ahari Nabosi n’abatabani. (Yobu 14:14, 15; Yohaana 5:28, 29) Omuntu omucureezi naamanya ngu “Ruhanga aryacwera orubanja ekintu kyona ekyakozirwe, n’ekintu kyona ekyasherekirwe, yaaba kirungi nari kibi.” (Omubuurizi 12:14) Yehova naareeba obuhame obu tutarikumanya. N’ahabw’ekyo obucureezi nibuturinda kuguma nitwikiririza omuri Yehova.

10, 11. (a) Ni mbeera ki ezirikubaasa kugyeza omutwarize gwaitu gw’oburingaaniza? (b) Ni mu miringo ki ei obucureezi buratubeere oburinzi?

¹⁰ Noija kutwaza ota, abareeberezi bacwamu ekintu eki otarikwetegyereza nari eki otarikwikirizana nakyo? Nk’eky’okureeberaho, noija kukora ki waayihwaho nari munywani waawe yaihwaho obujunaanizibwa omu kibiina? Kandi shi ou oshwereine nawe, muhara waawe, nari munywani waawe yaabingwa omu kibiina kandi okaba otaikiriziine n’eki abareeberezi baacwamu? Noija kukora ki waaba noomanya ngu abareeberezi baakora enshobe kugirira embabazi omuntu owaakora ekibi? Embeera ezi nizibaasa kugyeza okwikiriza kwaitu ahari Yehova n’oku atebeekaniise ekibiina kye obunaku obu. Obucureezi nibwija kukubeera oburinzi buta waagyezibwa emwe aha mbeera ezi? Ka tureebe emiringo ebiri.

¹¹ Ogw’okubanza, twaba turi abacureezi, nitwija kwikiriza ngu titwine buhame bwona. N’obu twakuteekateeka ngu nitumanya byona ebirikukwata aha mbeera egyo, Yehova wenka niwe arikumanya ekiri omu mutima gw’omuntu. (1 Samueli 16:7) Twaguma nitwijuka ekyo, nitwija kumanya ngu twine obweremwa kandi ngu twine kuhindura omu miteekateekyere yaitu. Ogwa kabiri, twaba tureebire nari tukatwarizibwaho omu muringo gutari gw’oburingaaniza, okuba abacureezi nikiija kutuhwera kworoba, tugumisirize kandi tutegyereze Yehova kutereeza embeera. Baibuli neegira eti: “Abatuura omu maisho ga Ruhanga nibamutiina nibo bariba gye.” Neegaruka egira eti: “Kwonka omubi we tariba gye, n’obu kwakuba okwongyera aha biro bye.” (Omubuurizi 8:12, 13) Twaguma turi abacureezi, nitwija kugasirwa kandi n’abandi nabo nibaija kugasirwa.​—Shoma 1 Petero 5:5.

OMU KIBIINA HABAMU OBURYARYA

12. Nituza kushwijuma mbeera ki hati, kandi ahabw’enki?

¹² Abakristaayo aba ira ab’omuri Antiokia eya Siria bakahikwaho embeera eyaabaire neegyeza obucureezi bwabo n’okuba beteekateekire kusaasira. Ka tureebe embeera egyo kandi tugikorese kushwijuma emiteekateekyere yaitu aha kusaasira. Nikibaasa kutuhwera kwetegyereza ahabw’enki Yehova naabaasa kukoresa abantu abatahikiriire atarikwehuzya mitindo ye.

13, 14. Entumwa Petero akatunga bujunaanizibwa ki, kandi akooreka ata ngu akaba ari emanzi?

¹³ Entumwa Petero akaba ari omureeberezi ou Abakristaayo aba ira baabaire nibamanya gye. Akaba ari munywani wa Yesu kandi akaba atungire obujunaanizibwa bukuru. (Matayo 16:19) Nk’eky’okureeberaho, omu gwa 36, Petero akaheebwa obujunaanizibwa bw’okubuurira Koruneelio na boona ab’omu ka ye. Ahabw’enki eki kyabaire kiri eky’omutaano? Ahakuba Koruneelio akaba atari Muyudaaya; akaba ari Omunyamahanga otashazirwe. Koruneelio n’ab’omu ka ye ku baatungire omwoyo gurikwera, Petero akeetegyereza ngu nibabaasa kubatizibwa bahinduke Abakristaayo. Akagira ati: ‘Abantu aba abaaheebwa omwoyo gurikwera nkaitwe, hariho orikubaasa kubaima amaizi ngu batabatizibwa?’​—Ebyakozirwe 10:47.

¹⁴ Omu gwa 49, entumwa n’abareeberezi omuri Yerusaalemu bakabugana kucwamu yaaba Abakristaayo Abayudaaya baabaire baine kusharwa. Omu ruteerane oru, Petero aine obumanzi akaijutsya ab’eishe-emwe ngu we akaba aherize kureeba abanyamahanga abatashazirwe barikutunga omwoyo gurikwera. Eki Petero yaabaire naamanya nikyo kyahwereire ab’akakiiko akareeberezi kucwamu. (Ebyakozirwe 15:6-11, 13, 14, 28, 29) Abakristaayo boona Abayudaaya n’Abanyamahanga baine kuba baashemereirwe ahabwa Petero kugira obumanzi akagamba amazima. Nikibaasa kuba kyabaire kyorobi Abakristaayo abo aba ira kwesiga omushaija ogu omwesigwa kandi okuzire omu by’omwoyo.​—Abaheburaayo 13:7.

15. Ni nshobe ki ei Petero yaakozire obu yaabaire ari omuri Antiokia eya Siria? (Reeba ekishushani aha kutandika.)

¹⁵ Bwanyima y’oruteerane omuri Yerusaalemu, Petero akataayaaya omuri Antiokia eya Siria. Ku yaabaire ariyo, akamara obwire ari n’ab’eishe-emwe Abanyamahanga. Nitubaasa kuteera akashushani oku baashemereirwe kwegyera aha bi Petero yaabaire naamanya n’ebi yaarabiremu. Kwonka, nikibaasa kuba kyabatangaarize kandi kikabakora kubi obu Petero yaarekyera aho kurya nabo. Petero akareetera abandi Abakristaayo Abayudaaya, otwariiremu na Barunaba, kukora nikyo kimwe. Ahabw’enki omureeberezi ogu okuzire omu by’omwoyo yaakozire enshobe y’amaani nk’egyo, eyaabaire neebaasa kubaganisamu ekibiina? Ekikuru munonga, niki eki turikubaasa kwegyera aha nshobe ei Petero yaakozire ekirikubaasa kutuhwera omureeberezi yaagamba ebigambo nari akakora ebintu bikatureetera kwehurira kubi?

16. Petero akahaburwa ata, kandi ekyo kikareetaho bibuuzo ki?

¹⁶ Shoma Abagalatia 2:11-14. Petero akatiina abantu. (Enfumu 29:25) Petero akaba naamanya oku Yehova arikureeba abantu abatari Bayudaaya. Kwonka nabwo akaba naatiina ngu Abayudaaya abashazirwe abaabaire nibaruga Yerusaalemu bakaba nibaija kumureeba kubi ahabw’okukwatanisa n’Abakristaayo abatari Bayudaaya. Entumwa Paulo akagambira Petero ngu akaba naakora oburyarya. Ahabw’enki? Ahakuba Paulo akaba yaahuriire Petero arikugamba gye aha bantu abatari Bayudaaya omu ruteerane omuri Yerusaalemu omu gwa 49. (Ebyakozirwe 15:12; Abagalatia 2:13) Mbwenu shi Abakristaayo abatari Bayudaaya abu Petero yaabaire agambireho gye bakaba nibaija kutwaza bata? Bakaba nibaija kwikiriza bateera entsibo? Petero akaba naija kwihwaho obujunaanizibwa bwe ahabw’enshobe ye?

MUSAASIRANE

17. Petero akagasirwa ata bwanyima ya Yehova kumusaasira?

¹⁷ Petero akaba ari omucureezi kandi akaikiriza obuhabuzi bwa Paulo. Ebyahandiikirwe tibirikworeka ngu Petero akaihwaho bumwe aha bujunaanizibwa bwe. Kandi na bwanyima akaija yaahwerwa omwoyo gwa Ruhanga kuhandiika ebaruha ibiri ezirikushangwa omu Baibuli. Omu baruha ye eya kabiri, naagamba ahari Paulo nka “mugyenzi waitu orikukundwa.” (2 Petero 3:15) Enshobe ei Petero yaakozire eine kuba yaakozire kubi Abakristaayo abatari Bayudaaya. Kwonka, Yesu, omutwe gw’ekibiina, akagumizamu naamukoresa. (Abaefeso 1:22) Ab’eishe-emwe n’abanyaanyazi omu kibiina bakaba baine omugisha gw’okutoreeza Yesu na Ishe barikusaasira Petero. Ekirungi, tihariho owaikiriize kuteerwa entsibo ahabw’enshobe y’omuntu otahikiriire.

18. Ni ryari obu twine kutooreza Yehova tukareeba oburingaaniza nk’oku arikubureeba?

¹⁸ Omu bibiina by’omu kyasha ky’okubanza hakaba hatarimu bareeberezi abahikiriire, kandi omu bibiina Ebikristaayo eby’obunaku obu tiharimu bareeberezi abahikiriire. Baibuli neegira eti: “Twena tushobya.” (Yakobo 3:2) Eki kyorobi kwetegyereza, kwonka shi nitwija kukora ki ow’eishe-emwe yaatutwariza kubi? Nitwija kugira oburingaaniza nka Yehova? Nk’eky’okureeberaho, noija kutwaza ota omureeberezi yaagamba ebirikworeka okushoroora omu bantu? Noija kuteerwa entsibo omureeberezi yaagambira eryo ebirikukusaasa nari ebirikukuteeza entsibo? Omu mwanya gw’okuteekateeka ngu ow’eishe-emwe ogwo tashemereire kuba omureeberezi, noija kutegyereza Yesu, omutwe gw’ekibiina? Omu mwanya gw’okuta omutima aha nshobe, noija kwijuka emyaka mingi ei ow’eishe-emwe amazire naaheereza omu bwesigwa? Ow’eishe-emwe okushobeize yaagumizamu naaheereza nk’omureeberezi nari akoongyerwa obujunaanizibwa obundi, noija kumushemerererwa? Waaba oyeteekateekire kusaasira, nooyoreka ngu nootooreza Yehova orikureeba oburingaaniza nk’oku arikubureeba.​—Shoma Matayo 6:14, 15.

19. Twine kumariirira kukora ki?

¹⁹ Ahabw’okugira ngu nitukunda oburingaaniza, twiniire ekihika obwire obu Yehova araihireho kimwe obutari buringaaniza oburikureetwaho Sitaane n’ensi ye mbi. (Isaaya 65:17) Obwire obwo obu butakahikire, twahikwaho obutari buringaaniza, omu bucureezi tugume twijukye ngu titurikubaasa kumanya ebirikutwarirwamu byona reero tusaasire abatushobeize twihire aha mutima. Twakora ekyo, nitwija kuba nitutooreza Yehova turikureeba oburingaaniza nk’oku arikubureeba.