Okwerarikirira Akabi

“Ku ndikuhurira engombe ezirikumanyisa ngu hariho akabi, omutima gwangye nigutandika kuteera munonga nyiruka kweshereka ahu abantu barikweshereka bomu,” Alona nikwo arikugira. “Kwonka nayo okwo nimba nyerarikiriire. Ku ndikuba ndi aheeru ntaine h’okweshereka obwo ninyerarikirira munonga. Eizooba rimwe nkaba ndi omu muhanda ningyenda, naatandika kurira kandi nkaba ntarikubaasa kwitsya. Kikantwarira eshaaha nyingi kwikaikana. Bwanyima engombe ekagaruka yaatandika kugamba.”

Orutaro ni kimwe aha bintu bingi ebirikureetaho akabi. Nk’eky’okureeberaho, waamanya ngu omukundwa waawe aine endwara y’akabi noobaasa kuhurira nk’owateerwa bomu. Kandi abandi nibeerarikirira ahabw’okutiina ebiraabeho omu biro by’omumaisho. Nibeerarikirira bati: ‘Abaana baitu, nari abaana baabo, nibaija kutuura omu nsi erimu entaro, okuhenda ebiragiro, emyika mibi, embeera mbi y’obwire, n’endwara ezirikujaanjara ahonaaho?’ Nitubaasa kwemera tuta okwerarikirira nk’okwo?

Ahabw’okumanya ngu ebintu bibi nibibaho, “omwerinzi ku areeba akabi kaija, ayeshereka.” (Enfumu 27:12) Nk’oku turikuteeraho kwerinda omu by’omubiri, tushemereire n’okuteeraho kurinda ebiteekateeko byaitu n’enyehurira zaitu. Eby’okweshemeza ebirimu obushaarizi n’amakuru agarikworeka ebishushani ebirikutiinisa, nibyongyera kutureetera kwerarikirira n’abaana baitu. Okwetantara ebishushani ebirikworeka obushaarizi tikirikumanyisa ngu twayehuzya obushaarizi. Ruhanga tarahangire bwongo bwaitu kuteekateeka aha bintu ebibi. Omu mwanya gw’ekyo, twine kubutamu “byona eby’amazima, . . . eby’oburyo, . . . ebishemeire, . . . ebirikushemeza.” Twakora tutyo, “Ruhanga mukama w’obusingye” naija kutuha obusingye bw’omu biteekateeko n’omu mutima.—Abafilipi 4:8, 9.

OBUKURU BW’OKUSHABA

Okwikiriza okwabuzima nikutuhwera kwemera okwerarikirira. Baibuli neetwehanangiriza ‘kwezirikira okushaba.’ (1 Petero 4:7) Nitubaasa kushaba Ruhanga obuhwezi, obwengye, n’obumanzi kuhindura embeera yaitu, turikuhamya ngu ‘naatuhurira omuri byona ebi tushaba.’—1 Yohaana 5:15.

Baibuli neeshoboorora ngu Sitaane, niwe “omutegyeki w’ensi egi” kandi ngu ‘ensi yoona eri omu butegyeki bw’Omubi.’ (Yohaana 12:31; 1 Yohaana 5:19) N’ahabw’ekyo, Yesu akaba atarikukoresa ebigambo by’akamanyiso obu yaatwegyesa kushaba tuti: “Otujune Omubi.” (Matayo 6:13) “Engombe ku erikutandika kugamba, ninshaba Yehova kumpwera kurinda enyehurira zangye,” Alona nikwo arikugira. “Kandi, na ibanyi naanyeta reero ashaba naanye. Okushaba buzima nikuhwera.” Kiri nk’oku Baibuli erikugira ngu Yehova “ari haihi na boona abamutakira, boona abamutakira omu mazima.”—Zaaburi 145:18.

AMATSIKO GAITU AHA BIRO BY’OMUMAISHO

Yesu omu Kwegyesa kwe okw’aha Rushozi, akeegyesa abeegi be kushaba bati: “Obukama bwawe bwije.” (Matayo 6:10) Obukama bwa Ruhanga nibwija kwihaho okwerarikirira okubi kwona ebiro byona. Ruhanga naija kumaraho “engamba okuhika aha muheru gw’ensi” kurabira omuri Yesu “Mukama w’obusingye.” (Isaaya 9:6; Zaaburi 46:9) “[Ruhanga] aryaramura amahanga maingi . . . Eihanga tiriribangira rindi rurara, kandi tibarigaruka kwega by’engamba. . . . Tihaine oribakangisa.” (Miika 4:3, 4) Ab’omu maka abashemereirwe “baryayombeka amaju, bagatuuremu; baryabyara emizaabibu, barye ebijuma byayo.” (Isaaya 65:21) “Tihaine mutuuzi waayo origira ati: Ndwaire.”—Isaaya 33:24.

Obunaku obu, n’obu abantu baraabe nibateeraho kuzibira ‘ebihikiirizi’ nari kwetantara okuba omu mwanya mubi omu bwire bubi, obumwe tikirikubaasika. (Omubuurizi 9:11) Nk’oku kyabaire kiri ebyasha bingi enyima, entaro, obushaarizi, n’endwara nibigumizamu kwita abantu. Abo abarikuhikwaho ebyo baine matsiko ki?

Abantu nyamwingi abu omuhendo gwabo gurikumanywa Ruhanga wenka, nibaija kuzooka. Ruhanga naabaijuka kandi hati bari nk’abagwejegyeire, kuhitsya aha izooba obu boona baraarugye “omu bituuro.” (Yohaana 5:28, 29) Baibuli erikugamba aha kuzooka, neetuhamiza eti: “Amatsiko aga tugaine nk’ekitsibo ky’amagara, n’amatsiko agahamire kandi agatarikunyiganyigibwa.” (Abaheburaayo 6:19) Kandi Ruhanga ‘akabihamiza abantu boona, obu yaazoora Yesu omu bafu.’—Ebyakozirwe 17:31.

Kwonka hati, nangwa nabo abarikuteeraho kushemeza Ruhanga nibeerarikirira. Ahabw’okugira ngu Paul, Janet, na Alona nibateeraho kwirira haihi Ruhanga kurabira omu kushaba, kandi baine n’amatsiko aha biro by’omumaisho, nibateeraho kusingura okwerarikirira. Nitushaba ngu “Ruhanga Mukama w’amatsiko abaijuze okushemererwa kwona n’obusingye omu kwikiriza,” nk’oku yaahwereire Paul, Janet, na Alona.—Abarooma 15:13.