Ahabw’enki Ruhanga Arikwenda ngu Tumushabe?

Ruhanga naaba naayenda kugira omukago naitwe.

Abanywani nibagaaniira hamwe kwongyera kuhamya omukago gwabo. Na Ruhanga naayenda ngu tugaaniire nawe kugira omukago murungi nawe. Naagira ati: ‘Muryantakira, mwije munshabe, naanye mbahurire.’ (Yeremia 29:12) Waaba noogamba na Ruhanga, noija ‘kumwirira haihi, nawe abone kukwirira haihi.’ (Yakobo 4:8) Baibuli neetuhamiza eti Yehova “ari haihi na boona abamutakira.” (Zaaburi 145:18) Ku turikweyongyera kushaba Ruhanga, n’omukago gwaitu nawe nigweyongyera kuba murungi.

Ruhanga naayenda kukuhwera.

Yesu akagira ati: “Ni muntu ki omuriimwe, ou omwana we yaakushaba omugaati, akamuha eibaare? Nari ku yaakumushaba eky’enyanja, akamuha enjoka? Imwe ku muraabe nimumanya kuha abaana baanyu ebirungi . . . Shoimwe ow’omu iguru tarikizaho kuha ebirungi abo abamushaba?” (Matayo 7:9-11) Buzima, Ruhanga naayenda ngu omushabe ahabw’okuba ‘naakutaho omutima’ kandi naayenda kukuhwera. (1 Petero 5:7) Kandi naayenda ngu omugambire n’oburemeezi bwawe. Baibuli neetugira eti: “Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime.”​—Abafilipi 4:6.

Abantu baine ekyetengo ky’eby’omwoyo.

Abahangu abarikumanya gye obuhangwa bw’abantu beetegyereize ngu abantu nyamwingi nibamanya ngu baine ekyetengo ky’okushaba. Nangwa n’abamwe abatarikwikiririza omuri Ruhanga nibabarirwa omu muhendo ogu.a Eki nikihamya ngu abantu bakahangwa baine ekyetengo ky’okwenda kugira omukago na Ruhanga. Yesu akagira ngu abarikufayo aha kyetengo kyabo eky’eby’omwoyo baine okushemererwa. (Matayo 5:3) Omuringo gumwe ogu turikubaasa kuhikiiriza ekyetengo eki n’okushaba Ruhanga butoosha.

Twashaba Ruhanga, nitugasirwa tuta?