EBIBUUZO EBI BAIBULI ERIKUGARUKAMU
Ensi etarimu bworo neebaasa kubaho?
Ruhanga naija kureetaho ata ensi etarimu bworo?—Matayo 6:9, 10.
Abantu nyamwingi baitsirwe endwara n’okukuuhura ahabw’okurya kubi ekirikureetwa obworo oburengyesereize. N’obu ebicweka bimwe by’ensi biraabe biri ebigaiga, abantu obuhumbi n’obuhumbi bari omu bworo oburengyesereize. Baibuli neeshoboorora ngu obworo butwireho kumara obwire bwingi.—Shoma Yohaana 12:8.
Nikyetengyesa gavumenti emwe omu nsi yoona kubaasa kumaraho obworo. Gavumenti egyo eshemereire kuba eine amaani g’okuha abantu ebirikwetengyesa omu nsi yoona kandi ekamaraho entaro, ezirikureetera abantu kuba abooro. Ruhanga aragaaniise kureetaho gavumenti nk’egyo.—Shoma Danieli 2:44.
N’oha orikubaasa kumaraho obworo?
Ruhanga atooraine omwana we Yesu, kuba omutegyeki w’abantu boona. (Zaaburi 2:4-8) Yesu naija kujuna abooro, amareho okubonabona n’obushaarizi.—Shoma Zaaburi 72:8, 12-14.
Nk’oku kyagambirwe, Yesu “Mukama w’obusingye,” naija kureetaho obusingye n’oburinzi omu nsi yoona. Obwo abantu nibaija kutuura omu nsi omu maka agaabo, bakunde emirimo yaabo erikushemeza, kandi bagire n’eby’okurya bingi.—Shoma Isaaya 9:6, 7; 65:21-23.